O Lima Mama ma se Loto e Mama
O lo tatou faamoemoega faaleagaga o le faatoilaloina o le agasala ma le manao e fai le agasala, e le gata i le pisia a o le puleaina e le agasala.
Ou te manatua ma le faamama’i a o ou laitiiti ia lo’u tina o faitau mai ia te au tala o le Tusi a Mamona. Sa i ai sona tomai na faaolaola mai ai le moni o tala faatusi paia i o’u mafaufauga talavou, ma ou te lei masalosalo lava na i ai se molimau a lo’u tina i le moni o na tala paia. E faapitoa lo’u manatua o lana faamatalaga o le asiasiga a le Faaola i le konetineta o Amerika, ina ua mavae Lona toetu ma Ana aoaoga i tagata i le nuu o Nuumau. O lana faaaoaoga tumau faigofie ma lana molimau, sa faamumu ai e lo’u tina i totonu ia te au uluai afi mumu o le faatuatua i le Faaola ma Lana Ekalesia i aso e gata ai. Ua ou iloa ai mo a’u lava ia o le Tusi a Mamona o se tasi lea molimau ia Iesu Keriso ma o loo i ai le atoaga o Lana talalelei faavavau (tagai MFF 27:5).
O le aso, ou te manao tatou te faamanatuina faatasi se tasi o mea ou te fiafia lava i ai na tupu i le Tusi a Mamona, o le afio ifo lea o le Faaola i le Lalolagi Fou, ma talanoaina Ana aoaoga i le motu o tagata e uiga i le mana faamama o le Agaga Paia. Ou te tatalo mo le taitaiga a le Agaga mo au faapea foi outou.
O Le Galuega a le Faaola i le Lalolagi Fou
I le taimi o le galuega a le Alii i aso e tolu i le lalolagi fou, sa Ia aoao atu ai Lana aoaoga faavae, tuu atu le pule i Ona soo e faataunuu ai sauniga o le Perisitua, faamalolo i e mama’i, tatalo mo tagata, ma faamanuia ma le alofa tamaiti. Ina ua lata ina mae’a le taimi o le Faaola e mafuta ai ma tagata, sa Ia faia se otootoga puupuu ma le manino o mataupu faavae o Lana talalelei.
Na Ia fetalai, “O le poloaiga lenei, ina salamo ia outou tuluiga uma o le lalolagi ma o mai ia te au, ma ia papatisoina i lo’u igoa, ina ia faapaiaina outou i le Agaga Paia tou te talia, ina ia outou tutu ma le le pona i o’u luma i le aso gataaga” (3 Nifae 27:20).
O mataupu faavae ua otooto mai e le Matai i lenei mau, e taua mo i tatou ona malamalama i ai ma faaaoga i o tatou olaga. Muamua o le salamo, “o se liliu atu o le loto ma le manao i le Atua, ma se lafoa’ia o le agasala” (Bible Dictionary, “Repentance,” 760). A o tatou sailia e tusa ai ma maua le meaalofa faaleagaga o le faatuatua i le Faaola, ona tatou liliu atu lea ma faalagolago i le taui, o le alofa mutimutivale, ma le alofa tunoa o le Mesia Paia (tagai 2 Nifae 2:8). O le salamo o le fua suamalie lea e maua mai i le faatuatua i le Faaola ma o loo i ai foi ma le liliu atu i le Atua ma le fulitua i le agasala.
Ona sosoo ai lea ma le faamatalaina e le Alii toetu o le taua o le o mai ia te Ia. Sa valaaulia tonu lava e le Faaola ia tagata sa potopoto i le malumalu, ina ia o atu “taitoatasi” (3 Nifae 11:15) e tagotago i mea na tutui ai fao i vae ma lima o le Matai, ma tuu atu o latou lima i Lona itu. O tagata taitoatasi na maua lenei avanoa “ua mautinoa lava, ma ua molimau o ia lava lena” (f. 15), o Iesu Keriso, o lē na afio mai.
Sa aoao foi e le Faaola tagata ina ia o mai ia te Ia e ala i feagaiga paia, ma sa Ia faamanatu atu ia te i latou o i latou “o fanau o le feagaiga” (3 Nifae 20:26). Sa Ia faamamafaina le taua faavavau o sauniga o le Papatisoga (tagai 3 Nifae 11:19–39) ma le mauaina o le Agaga Paia (tagai 3 Nifae 11:35–36; 12:6; 18:36–38). I se uiga talitutusa, ua apoapoaiina ai foi oe ma au ina ia liliu atu ma aoao mai ia Keriso ma o mai ia te Ia e ala i feagaiga ma sauniga o Lana talalelei toefuataiina. A tatou faia, o le a oo lava ma i’u ina tatou iloa o Ia (tagai Ioane 17:3), “i lona lava aso tatau, ma i Lona lava ala, e tusa ma lona finagalo” (MFF 88:68), e faapei ona faia i tagata i le nuu o Nuumau.
O le salamo ma o mai ia Keriso e ala i feagaiga ma sauniga o le faaolataga o uluai mea ia e manaomia ma o se sauniuniga foi mo le faapaiaina i le taliaina o le Agaga Paia, ma tutu atu ai ma le le pona i luma o le Atua i le aso gataaga. Ua ou manao nei e taulai atu i le mana faapaiaina o le Agaga Paia e mafai ona i ai i o tatou olaga.
O La Tatou Malaga Faaleagaga
O le faitotoa o le Papatisoga e tau atu i le ala sa’o ma le vaapiapi ma le taunuuga o le lafoai o le tagata o le lalolagi, ma le avea ai ma se tagata paia e ala i le Togiola a Keriso le Alii (tagai Mosaea 3:19). O le faamoemoega o la tatou malaga i le olaga nei, ua le na ona matamata ai i vaaiga o le lalolagi pe faaalu lo tatou vaega o le taimi i tulimata’iga manatu faapito; ae e tatau ona tatou “savavali i le ola toefuataiina” (Roma 6:4), ina ia faapaiaina ai e ala i le tuuina atu o o tatou loto i le Atua (tagai Helamana 3:35), ma “maua le finagalo o Keriso” (1 Korinito 2:16).
Ua poloaiina i tatou ma aoaoina ina ia tatou ola, ina ia suia lo tatou tulaga pau e ala i le mana faapaiaina o le Agaga Paia. Sa aoao mai e Peresitene Marion G. Romney o le papatisoga i le afi e le Agaga “e faaliliuina ai [i tatou] mai le faalelalolagi i le faaleagaga. E fufulu ai, faamalolo, ma faamama le agaga… . O le faatuatua i le Alii o Iesu Keriso, salamo, ma le papatisoga i le vai o mea manaomia uma ia e muamua, peitai, [o le papatisoga i le afi] e le Agaga Paia, o le faaiuga lena. Ina ia mauaina lenei [papatisoga i le afi], o le ta’umamaina lea o le tagata mai ana agasala, e ala i le toto togiola o Iesu Keriso” (Learning for the Eternities, comp. George J. Romney [1977], 133; tagai foi 3 Nifae 27:19–20).
O le mea lea, a toe fanauina i tatou ma taumafai ina ia iai pea lava pea Lona Agaga e faatasi ma i tatou, e faapaia ma faafouina o tatou agaga e le Agaga Paia e faapei ona faia e le afi (tagai 2 Nifae 31:13–14, 17). O le iuga lava, e tatau ona tatou tutu atu ma le le pona i luma o le Atua.
O le talalelei a Iesu Keriso e aofia ai le anoanoai o mea nai lo le aloese, faatoilalo, ma le faamamaina mai agasala ma uunaiga leaga i o tatou olaga; e aofia ai foi ma le faia o mea lelei, amio lelei, ma le avea ma tagata e sili atu. O le salamo i a tatou agasala ma le sailia o le faamagaloga e tatau ai i le faaleagaga, ma e tatau ona tatou faia pea e le aunoa. Peitai, o le faamagaloga o agasala e le na o le pau lea o le faamoemoega po o le tumutumuga o le talalelei. O le suia o o tatou loto e le Agaga Paia e pei o le ‘ua le toe i ai so matou manatu e fai amio leaga, a e fia fai pea lava le amio lelei” (Mosaea 5:2), e faapei ona faia e le nuu o Peniamina, o le tiutetauave o le feagaiga ua tatou taliaina. O lenei suiga tele ua le na o se taunuuga o le galue malosi po o le atiina ae o se amio pulea sili atu o le tagata lava ia. Ae o le taunuuga o se suiga taua i o tatou faanaunauga, o o tatou faamoemoega, ma o tatou natura ia ua mafai ona o le Togiola a Keriso le Alii. O lo tatou faamoemoega faaleagaga o le faatoilaloina o le agasala ma le manao e fai le agasala, e le gata i le pisia a o le puleaina e le agasala.
Ua faamamafa mai e perofeta i augatupulaga uma tulaga manaomia atulua o le (1) aloese ma le faatoilaloina o le leaga ma le (2) faia o le lelei ma ia lelei atili. Manatu i fesili o’oo’o na fai e le Fai Salamo:
“O ai ea se alu a’e i le mauga o Ieova? po o le, o ai se tumau i lona afioaga paia?
“O le ua i ai lima mama, ma le loto mama; o le ua le naunau lona loto i le mea faatauvaa, ma ua le tauto faa’ole’ole” (Salamo 24:3–4).
Uso e ma tuafafine, e mafai ona i ai o tatou lima mama ae lē mama se loto. Faamolemole ia matau, e manaomia uma lima mama ma se loto mama e o a’e ai i le mauga o le Alii ma tutu atu i Lona afioaga paia.
Se’i ou fautuaina atu, o lima e faamama e ala i le faiga o le tuu ese o le tagata o le lalolagi ma le faatoilaloina o le agasala ma uunaiga leaga i o tatou olaga e ala i le Togiola a le Faaola. E faamamaina loto pe a tatou mauaina Lona mana faamalosi e faia le lelei ma avea ma ni ē sili atu. O o tatou faanaunauga agavaa uma ma galuega lelei, tusa lava po o le a le tatau, e le mafai ona fua mai ai ni lima mama ma se loto mama. O le Togiola a Iesu Keriso e maua mai ai le mana faamama ma le mana faaola lea e fesoasoani tatou te faatoilalo ai le agasala ma se mana faapaia ma faamalosi lea e fesoasoani tatou te lelei atili ai nai lo le mea tatou te mafaia, e ala lea i le faalagolago i lo tatou lava malosi. O le Togiola e le i’u e mo le tagata agasala faapea foi le tagata paia ia i tatou taitoatasi.
I le Tusi a Mamona, tatou te maua ai aoaoga maoae a le Tupu o Peniamina e faatatau i le misiona ma le Togiola a Iesu Keriso. O le aoaoga faavae faigofie sa ia aoao atu, na afua ai ona faapauu le potopotoga i le eleele, aua ua oo ia i latou le matau i le Atua. “Na latou iloa foi i latou lava i o latou tuinanau, ua le tusa i latou ma le efuefu o le eleele. Ua alalaga i latou uma ma le leo e tasi, ua faapea atu: Aue! Ia alofa mai ma faaaoga le toto o Keriso, ina ia matou maua le faamagaloina o a matou agasala, ina ia faamamaina o matou loto; aua ua latou faatuatua ia Iesu Keriso, le Alo o le Atua, o Le na faia le lagi ma le lalolagi, atoa ma mea uma, o Le foi e afio mai i le fanauga a tagata” (Mosaea 4:2; ua faaopoopo le faatusilima).
I le fuaiupu foi lenei, tatou te maua ai le faamanuiaga valalua o le faamagaloina o agasala, ua ta’u mai ai lima mama, ma le liua o o tatou natura, ua ta’u mai ai loto mama.
Ina ua faaiu e le Tupu o Peniamina ana aoaoga, sa ia toe faamamafa atu le taua o nei vaega faavae o le atina’ega faaleagaga.
“O lenei foi, ona o nei mea ua ou ta’uina atu ia te outou—o lona uiga, ona o le faatumauina o le faamagaloina o a outou agasala i lea aso ma lea aso, ina ia outou savavali ma le le agasala i luma o le Atua, ou te manao ai ina ia outou foai ni o outou oa i e matitiva” (Mosaea 4:26; ua faaopoopo le faatusilima).
E tatau ona avea ma o tatou faanaunauga faamaoni le i ai o lima mama ma se loto mama—o se faamagaloina o agasala i lea aso ma lea aso, ma ia savavali ma le le agasala i luma o le Atua. E le lava le na o ni lima mama pe a tatou tutu i Ona luma o lē ua mama atoatoa, ma lē “o se tamai mamoe e le pona lava ma e leai foi sona leaga” (1 Peteru 1:19), sa faamaligiina Lona lava toto taua mo i tatou.
O Lea Upu ma Lea Upu
E i ai nisi e faalogo pe faitau foi i lenei savali e ono mafaufau faapea o le alualu i luma faaleagaga o loo ou faamatalaina atu, e le mafai ona maua i o latou olaga. Atonu tatou te talitonu e faatatau nei upumoni i isi ae le o tatou.
O le a tatou le mauaina se tulaga o le atoatoa i lenei olaga, ae e mafai ona tatou fetuleni atu i luma ma le faatuatua ia Keriso i le ala sa’o ma le vaapiapi ma agai atu ma le mautinoa i le taunuuga e faavavau. O le mamanu a le Alii mo le atina’ega faaleagaga o “lea upu ma lea upu, o le fuaiupu ma le fuaiupu, o sina mea itiiti iinei ma sina mea itiiti iina” (2 Nifae 28:30). O faaopoopoga faaleagaga laiti, ma le mautinoa o le tulaga faaleleia, o laasaga na e finagalo le Alii tatou te faia. O le saunia e savavali e aunoa ma le agasala i luma o le Atua, o se tasi o faamoemoega taua o le olaga nei ma mea e tulimata’i i le olaga atoa; e le mapuna mai i taimi e oso faafuasei ai le malosi faaleagaga.
Ou te molimau atu o le a faamalolosia ma fesoasoani mai le Faaola ia agai i luma, ma ia laalaa i luma ma le mautinoa. O le faaaoaoga i le Tusi a Mamona o le “matua toatele lava o e ua faamamaina” (Alema 13:12) i le Ekalesia anamua o e sa atoatoa ma lē pona i luma o le Atua, o se sosia lea o le faamalosiauga ma le faamafanafanaga ia te au. Ou te manatu o na tagata o le Ekalesia anamua, o ni alii ma ni tamaitai masani e pei lava foi o oe ma au. Sa lei mafai e nei tagata ona vaai i le agasala, aua ua latou inoino i ai, ma “ua faamamaina [i latou] ma ua ulu atu i latou i le malologa o le Alii lo latou Atua” (f. 12). Ma o nei mataupu faavae ma lenei faagasologa o le alualu i luma faaleagaga, e faatatau foi lea ia i tatou uma taitoatasi i taimi uma.
O Le Valaaulia Faaiu a Moronae
O le manaomia o le tuu ese o le tagata o le lalolagi ae avea o se tagata paia, ia aloese ma faatoilalo le leaga ae fai le lelei ma ia lelei atili, ia i ai lima mama ma se loto e mama, o se autu faifai pea i le Tusi a Mamona. O le mea moni o le valaaulia faaiu a Moronae i le faaiuga o le tusi o se otootoga lena o lenei autu.
“Ioe, o mai ia ia Keriso, ina ia faaatoatoaina outou e ia, ma ia teena e outou le amioletonu uma, ma alolofa atu i le Atua ma o outou loto atoa, ma o outou manatu, ma lo outou malosi uma, ona lava ai lea o lona alofa tunoa mo outou, ina ia atoatoa ai outou ia Keriso… .
“Ma le tasi, afai ua atoatoa outou ia Keriso i le alofa o le Atua, a e le faafitia lona mana, ona faapaiaina ai lea o outou ia Keriso i le alofa tunoa o le Atua, ona o le faamaligiina o le toto o Keriso, o lo le feagaiga lea a le Tama, e iu i le faamagaloina o a outou agasala, ina ia liua outou ina ia paia ma le le pona” (Moronae 10:32–33; ua faaopoopo le faatusilima).
Talosia ia e salamo ma ou salamo ma le faamaoni o le loto ma o mai moni ia Keriso. Ou te tatalo ia tatou saili e ala atu i le Togiola a le Faaola, ina ia i ai lima mama ma se loto mama, ina ia mafai ai ona tatou paia, ma le le pona. Ou te molimau atu o Iesu Keriso o le Alo o le Tama Faavavau ma lo tatou Faaola. O Ia le e aunoa ma se pona na togiolaina i tatou mai le agasala, ma faamalolosia i tatou e fai mea lelei ma ia lelei atili. Ou te molimau atu ai i le suafa paia o Iesu Keriso, amene.