Mai i Mea Iti
I le avea ai o ni soo o le Alii o Iesu Keriso, ua i ai sa tatou matafaioi e tausia ma auauna atu i o tatou uso ma tuafafine.
Mabuhay mai tagata lelei ma le ofoofogia o Filipaina. O se tasi o fesili aupito leva ma sili ona loloto na tautalagia i le talafaasolopito o le lalolagi lenei, sa fesiligia e Kaino i se auala e sili ona pulunaunau e tali atu ai i le fesili a le Atua ina ua faatoa uma lava ona ia fasiotia lona uso o Apelu. “O au ea le leoleo o lo’u uso?”1 O lenei fesili e tatau ona mafaufau loloto i ai i latou o loo saili e fai le finagalo o le Alii. O se tasi o tali o loo maua i le aoaoga a Alema:
“O lenei foi, … ua outou fia o mai i le lafu mamoe a le Atua, ma ia taua o lona nuu, ma ua loto ina fesui i a outou avega e ave ina ia māmā ai;
“Ioe, ma ua loto ina faanoanoa faatasi ma e faanoanoa; ioe, ma faamafanafana i e ua tatau i ai le faamafanafanaga.”2
I le avea ai o ni soo o le Alii o Iesu Keriso, ua i ai sa tatou matafaioi e tausia ma auauna atu i o tatou uso ma tuafafine. O le faamatalaina o le faataoto i le Samaria Agalelei, e le gata ina faafememea’i ai e Iesu Keriso ia Ona fili, ae na aoao mai ai foi se lesona maoae ia i latou uma o e saili e mulimuli ia te Ia. E tatau ona tatou faateleina le li’o o a tatou faatosinaga. O a tatou auaunaga i isi e le tatau ona faalagolago i le ituaiga tagata, lanu, tulaga, po o le faiā. Aua foi, o le poloaiga: “ia fesoasoani i e vaivai, ia sii ae lima o loo tautau i lalo, ma faamalosia tulivae vaivai”3 e le’i aumaia faatasi ma ni tulaga e agavaa ai.
E talitonu le toatele e faapea, ina ia avea auaunaga ma ni mea ‘anoa, e tatau ona aofia ai le i ai o ni fuafuaga auiliili ma faatuina se komiti. E ui ina fesoasoani le tele lava o nei galuega faatino aoga, o le tele lava o auaunaga o loo manaomia i le lalolagi i aso nei e faatatau lea i a tatou fegalegaleaiga o aso taitasi o le tasi i le isi. E masani ona tatou maua nei avanoa i totonu lava o lotoifale o o tatou aiga, tuaoi, ma le uarota.
O le fautuaga lenei na tuuina atu e Screwtape taufaasese i si ona tei tama o Wormwood i le tusi a C. S. Lewis’ “The Screwtape Letters,” o loo faamatalaina ai se faama’i masani o loo mafatia ai le toatele o i tatou i aso nei: “Pule oe i lau mea e fai, o le a i ai sina agalelei, faapea foi ma sina matau’a, i le loto o lau ma’i. O le mea taua lava ia taitai atu lona matau’a i ona tuaoi vavalalata latou te feiloai i aso uma, ae ia lafo atu i fafo lona agalelei i tuaoi mamao, i tagata na te le iloaina. O le mea lea e avea ai le matau’a ma mea moni a’ia’i ae o le agalelei o le a tele lava ina faafoliga.”4
O upu mai se viiga lauiloa ua fautuaina mai ai le fofo tonu lava:
Ua ou faamāmā i se ua mafatia
Ma faamafanafana i ai?
O e ua mamai, ua ou tausia ea?
Ma faainu ma fafaga i ai?
Ia ala ma fai se lelei
nai lo le manao i manuia.
O se fiafiaga, se faamanuiaga,
se alofa, tiute, aoga.5
O mea nei na ou maua le avanoa e molimauina, ua aoaoina ai au i auala e mafai ona fesoasoani ai galuega faatauvaa o le auauna atu ia i tatou ma i latou e mafai ona tatou faatosinaina. Ua tuuina mai e lo tatou Tama Faalelagi ni tagata agalelei i taimi o faiga filifiliga taua, e fesoasoani ia i tatou ina ia le tuua na o i tatou e autago i le pogisa. O nei alii ma tamaitai e fesoasoani mai e ala i faataitaiga, onosai ma le alofa. E faapena le tulaga na ou oo i ai.
Ou te manatua se filifiliga e faapitoa lona taua—o le filifiliga o le alu i se misiona. Sa ou mafaufau i lena filifiliga mo se taimi umi lava. A o ou tauivi e filifili po o le fea le itu ou te agai i ai, na oo mai lo’u aiga, uo ma taitai perisitua, ma taitai au. Sa latou faamalosiau ma tuu mai ia te au se lu’i, ma faia ni talosaga se tele mo au. Sa tusi mai e le aunoa lo’u tuafafine sa faamisiona ia te au, ma sa le’i fiu ai.
E oo mai i le aso, o loo lagolagoina pea a’u e alii ma tamaitai lelei. Ou te manatu o loo faapena uma lava i tatou. I se isi itu, tatou te faalagolago uma lava o le tasi i le isi ina ia mafai ona tatou toe foi atu i lo tatou aiga faalelagi.
O le faasoaina atu o le savali o le talalelei o se tasi lea o auala tauia e mafai ona tatou tuuina atu ai le auaunaga ia i latou e le auai i la tatou ekalesia. Ou te manatua se mea na ou oo i ai a o ou laitiiti ma se tasi o le a ou faaigoaina o Uncle Fereti.
I le ono o ou tausaga, sa ou matuai fefe lava i a Uncle Fereti. O ia o lo matou tuaoi ma e onā lava i taimi uma. O se tasi o ana gaoioiga sa fiafia e fai o le tauai mai lea o maa i lo matou fale.
Talu ai ona o lo’u tina o se kuka lelei tele, sa masani ai ona o mai i lo matou fale ia tagata matutua nofofua o le matou paranesi toagaogao. I se tasi aso, ina ua uma le onā o Uncle Fereti, sa faamasani i ai nei tagata [o le paranesi] ma valaaulia o ia i totonu o lo matou fale. O lenei faiga na matuai ou fefe ai lava. Ua le toe i ai nei o ia i fafo ae o totonu o le matou fale. Na tupu lenei mea i nai nisi taimi, ma mulimuli ane na mafai ona latou tauanauina Uncle Fereti e faalogo i faifeautalai. Sa ia taliaina le talalelei ma papatisoina ai. Sa auauna atu o ia o se faifeautalai faamisiona, ma sa foi mai ma le mamalu, faaauau ana aoga, ma faaipoipo i le malumalu. Ua avea nei o ia o se tane, tama, ma se taitai perisitua amiotonu. O le vaai atu ia Uncle Fereti i le taimi nei, e faigata lava ona talitonu ai se tasi o le tagata lea na aumaia ni aafiaga taufaamatau i le olaga o se tamaitiiti e ono tausaga le matua. Ou te faamoemoe ia mafai ona tatou mataala i taimi uma i avanoa e fetufaai atu ai le talalelei.
O lo’u tina o se faataitaiga maoae o le fesoasoani atu i isi e ala i le tuuina atu o mea latou te manaomia. E tele lesona taua sa ia aoaoina ai i matou. O le lesona e tasi na sili ona tumau i lo’u olaga o lona naunau lea e fesoasoani atu i soo se tasi na asiasi mai i lo matou fale na manaomia se fesoasoani. Sa ou le fiafia i le vaaia o le toatele o i latou e o ese atu ma a matou meaai, o matou lavalava, e oo foi i a matou tupe. Ona sa ou laitiiti ma sa matou matitiva tele, o lea, sa ou le fiafia ai i le mea na ou vaaia. E faapefea ona ia foai [ia mea] i isi ae sa le lava foi mea na maua e lo matou aiga? Pe na sese ea le faamuamua o o matou manaoga? Pe matou te le’i agavaa ea mo se olaga e sili atu ona lelei?
Sa ou tauivi ma nei fesili i le tele o tausaga. O se taimi umi mulimuli ane o le olaga, na iu ina ou iloaina ai le mea na aoao mai e lo’u Tina. E ui lava ina sa tauivi o ia ma taunuuga o se faama’i pipili, sa le mafai ona tuua ai lona foai atu ia i latou o e lima vaivai.
“O lea, aua nei loto vaivai i le faia o mea lelei, aua o loo oulua faataatia le faavae o le galuega tele, o mea iti foi e tutupu mai ai mea tetele.”6 O le auauna atu i isi e le faapea na o ni mea maoae e oo mai ai. E masani lava, o gaoioiga faatauvaa i aso taitasi e tuuina atu le mafanafana, faagaeetia, faamalosiau, lagolago, ma aumaia se foliga ataata i isi.
E faamoemoe ia tatou maua i taimi uma avanoa e auauna atu ai, o la’u tatalo lea i le suafa o Iesu Keriso, amene.