“Upumoni, O Le Faavae Lea o Faaiuga Sao”
E itiiti se taua o le silafia o le upumoni sei vagana ua tatou faaaogaina i le faiga o filifiliga sa’o.
Talu ai ona o le upumoni e na o le pau lea o le faavae ‘anoa e mafai ona tatou faia ai ni faaiuga atamai, e mafai la faapefea e se tasi ona mauaina le mea moni lava? Ua faatupulaia le iloaina e tagata e faapea o le faia o faaiuga amiotonu ua matuai faateteleina lava le faigata ona o se lalolagi o loo tatou nonofo ai ua tumu i le mau punaoa o fesootaiga. O loo faailoa mai pea e le aunoa ia i tatou le anoanoai o fautuaga, timaiga, ma faalauiloaga. E faia e se tuufaatasiga fenumiai o ala o faasalalauga, Initoneti, ma isi auala. I soo se mataupu e mafai ona tatou mauaina le anoanoai o fesootaiga faatosina, o savali ua matuai fatuina ma le faaeteete lea e faailoa mai ai ma ni tali. Ae e masani lava o le lua o na tali e mafai ona matuai feteenai lava. E le o se mea e ofo ai le fenumiai o nisi tagata ma ua le iloa ai pe faapefea ona faia ni faaiuga sao.
O se vaega ua faateleina ai le faigata o mataupu, ona o isi o loo taumafai e faatosina i tatou e faapea o a tatou faaiuga e tatau ona taliaina faalauaitele ma ia sa’o i tulaga faaupufai. E manatu nisi o lena metotia o le a faaalia ai lona sese tele. Talu ai ona o faiga faalauaitele ma faiga faaupufai e matuai eseese lava i le lalolagi atoa ma e mafai ona matuai suia lava i le gasologa o taimi, e matuai iloga lava le faavalevalea o le faaaogaina o lena metotia e fai ai faaiuga.
E lua lava auala e sailia ai le mea moni—e taufai aoga uma, pe afai lea tatou te mulimuli ai i tulafono o loo faavaeina ai. O le auala muamua o le metotia lea faasaienisi. E mafai ona manaomia ai le iloiloina o faamatalaga e faamautu ai le teori po o le isi auala o le faatuina lea o se mataupu faavae aoga e ala i le faataitaia. O le auala faasaienisi o se auala taua tele i le sailia o le mea moni. Ae peitai, e lua ni tapulaa o lena metotia. Muamua, e le mafai ona tatou mautinoa ua tatou mauaina le mea moni aiai, e ui ua tatou matuai latalata atu lava i ai. Lona lua, e le afaina po o le a le naunautai o lo tatou faaaogaina o le metotia, ae mafai ona tatou maua ai se tali sese.
O le auala e sili atu ona taua o le sailia o le mea moni o le alu sao lea i le pogai o le mea moni ma fesili pe tali atu i le musumusuga.1 Ina ia faamanuiaina, e lua ni vaega e taua tele: muamua, faatuatua e le masalosalo i le Pogai o le mea moni atoa; lona lua, o se naunautaiga e tausia poloaiga a le Atua ina ia mafai ai ona tatalaina le fesootaiga faaleagaga ma Ia. O lea na faatoa saunoa mai Elder Hales ia i tatou e uiga i faaaliga faaletagata ma le auala e maua ai.
Auala Faasaienisi2
O le a se mea ua tatou aoaoina mai le auala faasaienisi i le sailia o le mea moni? O le a faailoa mai i se faataitaiga. E tusa lava po o le a lo’u taumafai ae ou te le mafai lava, e oo lava i sina mea itiiiti, ona malamalama i le lautele, o le loloto, ma le ofoofogia o mea ua faatagaina e lo tatou Tama Faalelagi paia, o Elohima e faaalia mai i le metotia faasaienisi. Pe a na fai e mafai ona tatou agai atu i le vateatea, o le a tatou muai vaaia lo tatou lalolagi e faapei ona faia e tagata suesue i le vateatea. I talaatu, o le a tatou maua ai se vaaiga manino o le la ma ona paneta o loo siomia ai. E foliga mai i latou o se tamai lio o mea faitino o loo i totonu o se vaaiga tele o fetu feilafi. Afai tatou te faaauauina le faigamalaga i fafo atu semanu tatou te maua se vaaiga aoao o lo tatou Aniva i le vanimonimo faapea ma le tasi le 100 piliona o fetu o loo faataaliolio i se ala faataamilo, o lo latou faataamilosaga o loo pulea e le kalave o loo siomia ai le totonugalemu o se kalave o loo aofia ai le tele o fetu malolosi. A soso teisi i talaatu e mafai ona tatou vaai ai i luga i se vaega o kalave ua faaigoaina o le Virgo Cluster, lea ua manatu nisi e aofia ai ma lo tatou Aniva, lea ua fuafuaina pe tusa ma le 50 miliona tausaga le mamao. I talaatu o lena tatou te fetaiai ai ma atulaina o fetu e 10 piliona tausaga le mamao mai le lalolagi, lea na pueina ata e le faata vaai mamao a Hubble. O le maofa i le maoae o lena mamao o loo fautuaina mai e ala i le matauina o le alu a le malamalama i le 700 miliona maila i le itula. E ui lava foi i lenei vaaiga maoae ae le taitai ai lava ona tatou taulalata atu i se mutaaga po o se tapulaa o foafoaga a le Atua le Tama.
E pei ona maofa ai i lenei vaaiga ofoofogia o le a i ai i lagi, o loo i ai se isi mataupu e ao ona manatunatu i ai e talitutusa lava le mafaia ona faamautuina o le lē mafuatiaina o mana o lo tatou Tama o i le Lagi. Afai tatou te agai mai e vailiili le faatulagaga o mea faitino, e mafai ona tatou maua se vaaiga latalata o se molekiula piilua o le DNA. O se mea lena e ofo ai, o le fatuina faalua lea o le molekiula lea e puleaina le faatulagaga o o tatou tino faaletino. O nisi sailiiliga o le a tatou oo atu ai i le tulaga o le etoma, o loo aofia ai porotone, niutorone, ma eletorone sa tatou faalogo i ai.
Afai tatou te oo atu i le loloto o mea lilo o elemene o le foafoaga, o le a tatou oo atu i le mea e gata ai lo tatou malamalama o loo i ai nei. I le 70 tausaga ua tuanai e tele mea sa aoaoina e uiga i le faatulagaina o mea faitino. Sa atiina ae se Faatulagaga Masani o Patikale Ninii ma Fesootaiga. E faavae mai faataitaiga na faavaeina ai le i ai o patikale faavae sa faaigoaina o kuaki ma isi e igoa o lepitone. O lenei faatulagaga o loo faamatalaina ai le faiga o le fusia faatasi o etoma ma le tuuitiiitia o etoma i mea faitino, ae le o tuuina mai ai se faamalamalamaga lelei mo le malosi o le kalave. E le gata i lea, ua manatu nisi e i ai nisi meafaigaluega e sili atu ona malolosi nai lo mea o loo faaaogaina, e maua ai lo tatou malamalama o loo i ai nei i mea faitino e ono faaalia mai ai nisi patikale taua faaopoopo.2 O lea la, o loo tele ma anoanoai foafoaga a le Tama o i le lagi e ao ona malamalama i ai i le metotia faasaienisi.
E mafai ona tatou iloaina o le metotia faasaienisi ua aumaia ai se faalauteleina ofoofogia o lo tatou malamalama e pei ona musuia ai e le Alii tagata talenia o e le mafai ona malamalama po o ai na foafoaina nei mea e le malamalama foi i le faamoemoega. O le toatele o nei tagata e le mafai ona iloa ia nei musumusuga po o le faamalo foi i le Atua mo le faapogai o nei sao i tagata talenia. Na faamafanafanaina talu ai nei au a o faasoa mai e Peresitene Henry B. Eyring se aafiaga na maua e lona tama talenia a o feiloai ma isi saienitisi iloga. Sa ia fesiligia i latou pe sa faailoa mai i a latou sailiiliga le i ai o se tagata atamai ofoofogia ua faatulagaina. Sa latou faamautu uma mai o latou talitonuga e faapea o loo i ai se atamai faapena.
E ui e tapulaa lo tatou malamalama, ae o loo tatou malamalama i foafoaga a lo tatou Tama o loo faailoa mai ai o le tele lava o se vanimonimo. E ui o na mea sa tatou manatu i ai e mausali, mautu, e fai tino, pe a vaaia le faateleina i le vanimonimo po o sina mea faitino itiiti, ae o le tele lava o le vanimonimo lea o loo pulea lelei ma faaaoga e le Atua, lo tatou Tama mo Ona faamoemoega faaeaina.
Metotia o le Upumoni Faaalia
O le a le mea ua tatou aoaoina e uiga i le upumoni e ala i faaaliga?
I seneturi ua mavae sa faatagaina ai e le Atua le Tama nisi o ana perofeta e vaavaai i le maoae o le atoatoa o Ana foafoaga, e ala i le fesoasoaniga a le Agaga Paia. Sa Ia faamalamalamaina atu foi le mafuaaga na Ia foafoaina ai. “Aua faauta, o lau galuega ma lou mamalu lenei—ia faataunuu le faaofuina o le tagata i le tino ola pea ma le ola faavavau.”3 O Enoka sa avea ma se tasi o na perofeta. Sa ia matauina le tutulu o le Atua o le lagi ina ua Ia silasila mai i le liliuina e le mana ma le faatosinaga a Satani o le toatele i le lalolagi i le amioleaga.
Sa folafola mai e Enoka:
“Po ua faapefea ona e tutulu, aua e paia oe, e mai le vavau e oo i le faavavau?
E le gata i lea, ae ana mafai foi ona faitaulia e le tagata … le miliona ma miliona o isi foi lalolagi e pei o lenei, e matua le mafai lava ona tutusa ma le faitauga o au mea na fai; ma o loo tumau pea ou ie puipui; peitai … e amiotonu oe; ua e alofa ma agalelei e faavavau;
“… Ma e na o le filemu ma le amiotonu, ma le upumoni o loo i ai i lou nofoalii; e alu atu foi mai ou fofoga le alofa tunoa e le gata; ae ua faapefea ea la ona e tutulu?
“Ona fetalai mai lea o le Alii ia Enoka: Faauta i ou uso nei; o i latou o galuega a ou lava lima, ma na tuuina atu ia i latou lo latou poto … ma … na ou tuuina atu i le tagata lona saolotoga.
“Ma sa ou fai atu i ou uso … ma poloaiina foi i latou, ia latou fealofani, ma e ao ina latou filifilia au, lo latou Tama; ae faauta, ua aunoa i latou ma le alofa, ma ua latou inoino i o latou lava toto.”4
Na fetalai lelei atu le Atua le Tama ia Mose:
“Ma e le mafaitaulia lalolagi ua ou foafoaina; ma ua ou foafoaina foi ia lalolagi mo le fuafuaga o ia te au lava; ma na ou foafoaina ia lalolagi e ala atu i le Atalii, o lou Atalii lea e Toatasi na Fanaua …
“… E tele foi isi lalolagi … ma e le mafaitaulia i latou e le tagata; ae ua ou mafaitauliaina mea uma, aua o au lava mea, ma ua ou iloa uma i latou.”5
E itiiti se taua o le silafia o le upumoni sei vagana ua tatou faaaogaina i le faiga o filifiliga sa’o. Mafaufau mo sina taimi i se tagata, ua matuai ova le mamafa, ua oo atu i se faaaliga o oloa o loo faatau i se fale keke. O lona mafaufau o loo i ai manatu nei: Ua ta’u atu e le fomai ia te oe e aua e te toe aia soo se meaai o na ituaiga meaai. E le lelei mo oe. E na ona faamalie ai lava o le manao mo sina taimi. O le a le lelei ai lau faalogona i toega o le aso. Ua e filifili e le toe aia lava. Ona ia faalogoina lea o ia lava o faapea, “O le a aumai ni a’u pani tavio la se lua ma ni nai tonati sukalati na. E le afaina lava i se taimi e tasi. E na o le pau lava lenei ma ou te le toe faia lava.”
Faatuatua ma le Tagata
O le faagasologa o le iloaina o le upumoni e moomia ai i nisi taimi ni taumafaiga se tele e o faatasi ma le faatuatua mautu i lo Tatou Tama ma Lona Alo faamamaluina. Ua faamoemoe le Atua o le ituaiga taumafaiga lenei ma le faatuatua e manaomia ina ia mamanuina ai lou tagata, a o e faia faaiuga taua. O le tagata agavaa o le a faamalosia lou gafatia e tali atu ai ma le usiusitai i le taitaiga a le Agaga. O le tagata amiotonu o le mea lena o le a e oo i ai. E sili atu ona taua nai lo mea e te maua, o mea e te aoaoina, po o a sini ua e ausia. E mafai ai ona faatuatuaina oe. O aga amiotonu e maua ai le faavae o le malosiaga faaleagaga. E mafai ai e oe i taimi o faigata ma tofotofoga ona faia faaiuga sao ia e matuai faigata ma taua e ui lava e foliga mai e matuai faigata.
Ou te molimau atu faapea e le mafaia e Satani po o soo se isi mana ona faavaivaia pe faaumatia lou tagata ua tuputupu ae. E na o oe lava e te mafaia e ala lea i lou le usiusitai.
Ia malamalama ma faaaoga lenei mataupu faavae taua i lou olaga: O lou faatinoina o le faatuatua e fausia ai lou tagata. O le faamalosia o le tagata e faalauteleina ai lou gafatia ona faatinoina le faatuatua tele. O lea, e faateleina ai lou lagona mautinoa i le faia o faaiuga sao. Ma e faaauauina pea le faataamilosaga o le faamalosia. O le tele lava ona faamalosia o lou tagata, o le faateleina foi lena ona mafai ona e faaaogaina le mana o le faatuatua mo se tagata malosi sili atu.
O Lo Tatou Tama ma Lona Alo
Talu ai ona e tele naua mea e laitiiti so tatou malamalama i ai, ma e le taulalata foi i ai so tatou malamalamaaga atoatoa i ai, e maeu lo tatou faafetai e tatau ona i ai ona o lenei Atua, e le mafaitaulia ona tomai, o lo tatou Tama. O Ia o se Tama alofa, malamalama, agaalofa, ma onosai. Sa Ia foafoaina i tatou o ana fanau. Na te tausia i tatou o ni atalii ma ni afafine faapelepele. Na te faia i tatou ia lagona le alofagia, talisapaia, faatauaina, ma le pele ia te Ia. Ua Ia tuuina mai ia i tatou Lana fuafuaga o le alofa mutimutivale6, ma ua Ia tuuina mai ia i tatou le tomai, pe a tatou usiusitai, e faia faaiuga sa’o. Ua Ia tuuina mai e ala mai i Lona Alo paia, se ala mo i tatou ina ia ola ai, ia tuputupu ae ai, ia atiina ae ai, ma tuu tonu ai o tatou tagata i luga o le ala ina ia faavavau pea ona i lalo o Lana taitaiga ma le uunaiga.
E sili atu lo’u alofa i lo tatou Tama o i le Lagi nai lo upu e mafai ona ou faamatalaina ai. I le lotomaualalo uma, ou te tuuina atu ai lau molimau paia e faapea o lenei Matai o le Foafoaga, e le mafaatusalia ona mana, o lo tatou Tama paia agaalofa. Na tuuina atu ma le usiusitai atoatoa e Lona Alo Pele Lona lava soifua i Lona Tama ina ia motusia ai noanoaga o le oti ma ia avea ma o tatou Matai, o lo tatou Togiola, ma lo tatou Faaola. E ui ou te lei malamalama atoatoa i o La’ua tomai, a ua ou malamalama i sina mea e uiga i lo La’ua mana e matuai faailoa mai ai lo La’ua alolofa tele. Ou te tuuina atu lau molimau paia o loo soifua i Laua ma e alolofa ia i tatou. I le suafa o Iesu Keriso, amene.