Talai La’u Talalelei—o le Meafaigaluega Soofaatasi i le va o Tagata o le Au Paia ma Faifeautalai

Elder Erich W. Kopischke

O Le Fitugafulu

E tatau i faifeautalai ma tagata o le ekalesia ona … tasi i a tatou taumafaiga e folafola atu le talalelei.

Ata

E lei mamao atu, sa matou valaaulia ai tamaitai faifeautalai e toalua matou te fai aiga i le aoauli. Ina ua maea le mea tausami, sa matou talosagaina i laua a o lei tuua, e tuu se mafaufauga faaleagaga mo i matou. Sa matua saunia lelei lava i laua, ma sa folasia mai se faiga o le faitauga tusitusiga paia ma le makaina. Sa la aumaia se kopi fou o le Tusi a Mamona, ma se seti o penivali. Sa matou taliaina le valaaulia a faifeautalai. Talu mai lena taimi, ua suia le faitauga i aso taitasi faaleaiga o le Tusi a Mamona. O mataupu taitasi, ua matou makaina ai i lanu eseese ia fuaitau e faatatau ia Iesu Keriso pe a matou tau i ai. O taimi uma lava, e faamanatu mai ai i lenei faiga o tatou faifeautalai.

Ina ua tuu mai e faifeautalai lenei gaoioiga, sa vave ona matou iloa, o se faiga lea e suesue ai tusitusiga paia o loo fautuaina mai i le Talai La’u Talalelei. Matou te matua faafetai lava, o se aiga, mo lenei meafaigaluega maoae ma le mamana faafaifeautalai.

Ua tolu nei tausaga o faaaoga e faifeautalai le Talai La’u Talalelei i le lalolagi atoa. Ua matua faaleleia ai lava le galuega faafaifeautalai. Ua faataunuuina le tofa loloto a Peresitene Hinckley: O faifeautalai ua “matuai atamamai i manatu autu o lesona.” Latou te “aoaoina atu ia manatu autu i ni a latou lava upu i lalo o le taitaiga a le Agaga Paia” (tagai “Galuega Faafaifeautalai,” Fonotaga Faaleaoaoga a Taitai i le Lalolagi Atoa, 11 Ian. 2003, i. 21).

A oo ina totofu ifo faifeautalai i le suesueina o le Talai La’u Talalelei, latou te aoaoina ma faaaoga aoaoga faavae taua ma mataupu faavae lea e atili ai ona latou gafataulimaina la latou galuega taua. E ui lava i lea, latou te manaomia uma lava la tatou fesoasoani ma le lagolagosua. E na o lo tatou tutu faatasi lava e mafai ai ona faataunuu le tiute tele na tuuina mai i aposetolo anamua ma ona po nei: “O atu ia outou i le lalolagi uma, ina tala’i atu ai le talalelei i tagata uma lava” (Mareko 16:15).

Ina ia mafai ona manuia nei taumafaiga, e tatau ona tasi i tatou ma faifeautalai, ma e tatau ona tatou femalamalamaa’i le tasi i le isi. Pe tou te malamalama i taimi uma i faifeautalai? Ou te le o fai atu i le gagana, ae pe faapefea ona latou faia le galuega faafaifeautalai. Ua tatou vaai ma matauina i latou o valaaulia tagata e faalogologo i la latou savali. Latou te aoao atu mataupu faavae o le talalelei ma valaaulia i latou e fiafia e suia o latou olaga ma papatisoina ma faamauina o ni tagata o le Ekalesia.

Afai tatou te mananao ia malamalama ma fesoasoani i o tatou faifeautalai, e tatau ona i ai lo tatou faatuatua e pei ona i ai le faatuatua o faifeautalai, e tatau ona tatou mafaufau e pei ona mafaufau o faifeautalai, ma e tatau ona tatou lagona e faapei ona lagonaina e faifeautalai. E mafai faapefea ona tatou ausia lena mea?

O se tasi auala taua, ioe, o le faatasi ma faifeautalai ma vaavaai i le faiga o mea latou te fai. Ae o se tasi o auala o lo tatou faamasani lea i le Talai La’u Talalelei ma aoao atili e uiga i le galuega faafaifeautalai. Talu lava ona saunoa mai Peresitene MaKei, “O tagata uma lava o se faifeautalai” (i le Conference Report, Apr. 1959, 122), ua taumafai lava tagata o le ekalesia ina ia saga toaaga e faasoa atu le talalelei. O le Talai La’u Talalelei, ua tatou maua ai se taiala ofoofogia e fesoasoani atili ai ia i tatou e faatino lenei valaaulia. O lo tatou suesueina e i tatou lava o le Talai La’u Talalelei, o le a le gata ina fesoasoani ai ia te i tatou e atiina ae se malamalamaaga sili atu ma se agaga talisapaia mo o tatou faifeautalai, ae o le a fesoasoani foi ia i tatou i o tatou lava olaga i aso taitasi.

E tofu tagata o lo matou aiga ma se kopi o le Talai La’u Talalelei. O le suesueina o lenei taiala o se lagolagosua tele lea i le atiina ae o se molimau malosi. E fesoasoani e malamalama ai i mataupu faavae taua o le talalelei, ma naunau ai e auauna atu. Faataga mai au mo sina minute e otooto atu ni nai faaulutala o le Talai La’u Talalelei ([2004], iii), ma o le a outou malamalama ai:

E faitauina faapea:

“E Faapefea Ona Ou Iloa ma Malamalama i le Agaga?”

“E Faapefea Ona Matuai Lelei La’u Suesue ma Saunia e Aoao Atu?”

“O A Mea Ou Te Suesue I Ai ma Aoao Atu?”

“O Le a le Matafaioi a le Tusi a Mamona?”

“E Faapefea Ona Ou Atiina Ae Uiga FaaKeriso?”

Pe le o mea na tatou te mananao uma lava ia tatou iloa? O tagata uma e mananao ia avea ma se faifeautalai i le au paia ma manao ia iloa pe faapefea ona lagolago i faifeautalai, o le Talai La’u Talalelei e tumu i auala mamana ma malamalamaaga. Tatou te aoao ai le auala e mafai ai ona tatou fesoasoani i faifeautalai e saili tagata ina ia aoaoina ma le auala e mafai ai e i tatou o tagata o le ekalesia ona galulue soosootauau ma faifeautalai ina ia fesoasoani ia i latou o loo sailiili i le Ekalesia. Tatou te aoao ia malamalama i le mafuaaga e fesoasoani ai valaaulia malolosi e galulue e faatele ai le faatuatua ia Iesu Keriso, ma le auala e mafai ai ona tatou tutu faatasi ma a tatou uo e le lolotu o loo agaigai atu i lenei gasologa matagofie e suia ai le olaga, o le liuaina.

Faatasi ai ma le suesueina o tusitusiga paia, e suesue e faifeautalai le Talai La’u Talalelei i aso uma. Latou te aoaoina mataupu faavae ma tomai ma latou faaaogaina. E faapitoa lava lo latou aoaoina o le auala e faaaoga ai le taitaiga a le Agaga i a latou galuega. Afai tatou te mananao ia aoaoina, e faapei ona faia e faifeautalai, e tatau foi ona tatou suesue ma le faaeteete i le Talai La’u Talalelei ma matau faifeautalai i la latou galuega i aso taitasi.

I le faatomuaga o le Talai La’u Talalelei, tatou te faitau ai: “O le Tala’i La’u Talalelei e mo faifeautalai faamisiona o le Ekalesia. Ae peitai, o mataupu faavae ma aoaoga faavae o loo aoaoina ai iina, e talafeagai foi mo faifeautalai o le uarota ma taitai a o latou saili e fausia le malo o le Alii. O le suesueina soo o lenei tusi lesona o le a mafai ai e i latou ona faataunuuina o latou tiutetauave i le avea ai ma uso faifeautalai o le au paia, ma o le a saga atiina ae ai foi le galulue faatasi ma faifeautalai faamisiona” (Talai La’u Talalelei, itulau xi).

Sa aoao mai e Elder Richard G. Scott e faapea, e ao i tagata uma o le ekalesia ona suesue ma le faaeteete i le Talai La’u Talalelei. Na ia saunoa, “Ua tele mea aoga ua faataunuuina … talu ona faaaoga le Talai La’u Talalelei, ae o le a tula’i mai mea silisili pe a tatou taufai maua uma le tomai e faaaoga ai lenei meafaigaluega faafaifeautalai tulaga ese” (“O Le Mana o le Talai La’u Talalelei,” Liahona, Me 2005, i. 31).

Atonu e foliga mai e laitiiti lo tatou taimi e fai ai lenei suesuega, o le mea lea se’i ou tuuina atu ni nai fautuaga atonu o le a fesoasoani atu.

E ao i talavou o loo sauniuni mo se misiona ona suesue ma le faaeteete i le Talai La’u Talalelei faatasi ai ma tusitusiga paia.
Valaaulia faifeautalai i lou fale. Talosaga i ai e aoao atu ia te oe ma lou aiga se mataupu faavae po o se aoaoga faavae mai le Talai La’u Talalelei.
Mai lea taimi i lea taimi, faaaoga le Talai La’u Talalelei mo afiafi faaleaiga. Faaaoga lau fanau talavou e aoao lou aiga e faapei ona fai e faifeautalai. I lo matou aiga, sa i ai ni a matou lesona e maofa ai na faia e le ma fanau. Sa ma matua maofa lava i le lelei ona latou aoao mai o ni mataupu faavae faigofie. O nisi taimi matou te valaaulia ai ni uo i na lesona.
E mafai e faiaoga o le talalelei ona faaaoga mataupu faavae faigofie ae aoga o le aoaoina atu o le talalelei, o loo otooto mai i le Talai La’u Talalelei e avea ma se lagolagosua i mataupu e aoaoina a vasega ua uma ona tusia.
E toetoe lava o gagana uma o loo tautatala ai o tatou tagata ua uma ona faaliliu ma lomia ai le Talai La’u Talalelei. O atunuu o loo fou ai le Ekalesia, e mafai ona faaaoga le Talai La’u Talalelei faatasi ma tusitusiga paia, e avea ma punaoa ma faavae o aoaoga uma faaletalalelei.
Sa fautuaina e Elder Scott taitai o le Ekalesia i le lotoifale “ina ia faaaoga nei mea i … fonotaga a au peresitene, komiti faapitoa o le Perisitua, ma aufono a uarota” (Liahona, Me, 2005, 31).
Faaaoga le Talai La’u Talalelei e fai ma punaoa mo aoaoga, lauga, mafaufauga faaleagaga, lesona, faeasaite, ma suesuega a le tagata lava ia.

Ou te molimau atu o lenei taiala faafaifeautalai na musuia e le Atua. E tatau ona tatou suesue auiliili i ai, ina ia mafai ona tatou malamalama atili i a tatou faifeautalai ma la latou galuega. E tatau i faifeautalai ma tagata o le ekalesia ona tasi la latou gagana. E tatau ona tasi i tatou i a tatou taumafaiga e folafola atu le talalelei. O le a sili atu ai ona mafai ai ona avea i tatou ma meafaigaluega i aao o le Alii, aua na Ia fetalai, “O le a faapea foi ona ou faapotopotoina e ua ou filifilia mai i itu e fa o le lalolagi, e tusa ma le toatele o e talitonu ia te au, ma faalogo i lo’u leo” (MFF 33:6).

I le avea ai ma tagata o Lana Ekalesia, ua faamoemoe ia avea i tatou ma se vaega e faia lenei faapotopotoina mai mamalu. Ou te molimau atu ai i nei upumoni i le suafa o Iesu Keriso, amene.