Iloaina o le Mea Ua Tatou Iloa
O le molimau a isi tagata e mafai ona amatalia ma fafagaina ai le naunau mo le faatuatua ma le molimau, ae i le iuga lava, e tatau ona iloa e le tagata lava ia mo ia lava
I tausaga ua mavae na molia ai se alii i se solitulafono matuia lava. E toatolu ni molimau na aumai e loia o le itu tagi, o i latou taitoatasi na vaai i le alii o faatupuina le faalavelave. Ona folasia lea e le itu tetee ni molimau e toatolu, e leai se isi o i latou na vaai i le mea na tupu. Sa le mautonu le au faamasino faatauvaa. E faavae i le numera o molimau, na foliga mai le faamaoniga i le au faamasino e vaelua tutusa lelei lava ia molimau na faia e faasaga i lē ua molia. Na faia le faaiuga e le sala lea alii. O le mea moni, sa le talafeagai le faapea e fia miliona tagata sa lei vaai i le faalavelave. Sa manaomia lava le i ai o se molimau se toatasi.
I le atamai o le fuafuaga o le talalelei, i le iuga e na o le tasi lava le molimau e tatau ona i ai, ae o lena molimau e tatau lava o oe. O le molimau a isi tagata e mafai ona amatalia ma fafagaina ai le naunau mo le faatuatua ma le molimau, ae i le iuga lava, e tatau ona iloa e le tagata lava ia mo ia lava. E leai se tagata e mafai ona tumau ai pea i se malamalama e nonoina mai.
Ua le sili atu le moni o le talalelei toefuataiina i le asō nai lo le taimi na savali ese atu ai se taulealea e toatasi na i le Vao Paia i le 1820. E lei faalagolago lava le moni i le aofai o i latou na taliaina. Ina ua tuua e Iosefa le vao, sa na o le toatasi lava le tagata i luga o le fogaeleele na iloaina le upumoni e uiga i le Atua le Tama ma Lona Alo o Iesu Keriso. Ae peitai, e tatau lava, ona iloa e le tagata lava ia mo ia lava, ma tauave atu lena molimau mumu i le olaga a sau.
Ina ua tofia le alii e 23 tausaga o Heber J. Grant o se peresitene o le Siteki a Tooele, sa ia tauina atu i le Au Paia, na talitonu o ia e moni le talalelei. Na fesili Peresitene Iosefa F. Samita, o se fesoasoani i le Au Peresitene Sili, “Heber, na e saunoa e te talitonu i le talalelei ma lou loto atoa, ae e te lei molimau atu ua e iloa e moni. E te le silafia ea ma le mautinoa ua moni lenei talalelei?”
Na tali Heber: “Ou te le iloa.” Ona faliu lea o Iosefa F. Samita ia Ioane Teila, le Peresitene o le Ekalesia ma faapea atu: “Ou te auai i le toe faaleaogaina i le afiafi nei o le mea na tatou faia ana nei i le taeao. Ou te manatu e le tatau i soo se alii ona pulefaamalumalu i se siteki, pe afai e leai sona malamalama atoatoa ma le mausali e uiga i le paia o lenei galuega.”
Na tali Peresitene Teila: “Iosefa, Iosefa, Iosefa, Ua iloa lelei lava e [Heber] e pei foi o oe. Na pau le mea na te lei iloaina, ua ia iloa.”1
I ni nai vaiaso, na faapea ona ausia ai lena molimau, ma na maligi loimata ona o le agaga faafetai o le taulealea o Heber J. Grant mo le molimau atoatoa, mausali ma le maumaututu na oo atu i lona olaga.
O se mea mataina tele le iloa—ma le iloa ua e iloa ma e lei nonoina mai lena malamalama mai se isi.
O tausaga ua mavae, na ou pulefaamalumalu ai i se misiona na i ai lona ofisa autu i Sisifo Tutotonu. I se tasi aso, faatasi ai ma ni nai a matou faifeautalai, sa ma talanoa ai ma se sui iloga o se isi faatuatuaga Kerisiano. Na talanoa mai lenei alii agamalu e uiga i le talafaasolopito ma aoaoga faavae o lana lava ekalesia, ma iu ina toe taua ai upu masani nei: “O le alofa tunoa ua faaolaina ai outou. E tatau i alii ma tamaitai uma ona faaaoga le faatuatua ia Keriso ina ia avea ai ma se tagata faaolaina.”
Na [matou] i ai faatasi ma se faifeautalai fou. Sa matuai le masani o ia i isi tapuaiga. O lea na tatau ai ona ia fesili atu, “Ae, lau susuga, o le a le mea e tupu i le pepe meamea e maliu ae lei lava lona matua e malamalama ai ma faaaoga le faatuatua ia Keriso?” Na punou le alii atamai, ma tilotilo i le fola, ma fai mai: “E tatau ona i ai se tuusaunoaga. E tatau ona i ai se avanoa. E tatau ona i ai se auala; peitai e leai se mea.”
Na tilotilo mai le faifeautalai ia te au, faatasi ai ma loimata na ia fai mai ai: “Ta fiaola e, Peresitene, ua ia i tatou le upumoni, a ea!”
O le taimi e iloa ai o loo ia te oe se molimau—e manaia ma matagofie—pe a e iloaina ua e iloa. O lena molimau, pe a fafagaina, o le a taatia i ou luga e pei o se ofu talaloa. A oo ina tatou iloa le malamalama, ona siomiaina ai lea o i tatou. O sulu o le malamalama e mumu i totonu o o tatou loto ma mafaufau.
Sa ma talanoa i se tasi taimi ma se alii talavou lelei lava e le auai i le tatou ekalesia, e ui ina sa auai o ia i le tele o a tatou sauniga lotu mo le silia ma se tausaga. Sa ou fesili pe aisea ua le auai ai i le Ekalesia. Na tali o ia: “Ona ou te le iloa pe moni. Ou te manatu atonu lava e moni, ae e le mafai ona ou tu ma molimau atu, e pei ona e faia, ‘Ou te mautinoa e moni.’”
Sa ou fesili i ai, “Ua e faitauina le Tusi a Mamona?” Sa tali mai ua faitau i le tusi.
Na ou fesili pe na tatalo e uiga i le tusi. Na tali: “Na ou ta’ua i a’u tatalo.”
Na ou fai atu i la’u uo, afai lava e na o lona faitauina ma tatalo faasamasamanoa, o le a na le mauaina lava e faavavau. Ae afai na te faatulagaina se taimi mo le anapogi ma le augani, o le a mu le upumoni i totonu o lona loto, ma o le a ia iloaina ai na ia iloa lava. E lei i ai lava sana tala na toe fai mai ia te au, ae na fai atu i lona faletua i le taeao na sosoo ai, o le a anapogi o ia. O le Aso Toonai na sosoo ai na papatisoina ai o ia.
Afai e te fia iloa ua e iloaina ua e iloa, e tatau lava ona totogi se tau. Ma o oe lava e toatasi e tatau ona totogia lena tau. E i ai tagata sui mo sauniga, ae leai ni tagata sui mo le mauaina o se molimau.
Na faamatala Alema e uiga i lona liua i nei upu matagofie: “Na ou anapogi ma tatalo i aso e tele ina ia ou iloa nei mea mo a’u lava. O lenei foi, ua ou iloa mo a’u lava ua moni aua ua faaalitinoina ia te au e le Alii le Atua” (Alema 5:46).
Pe a iloaina se molimau, e i ai se uunaiga malosi i le tagata na te mauaina e folafola atu lena molimau i isi. Ina ua uma ona papatisoina ia Polika Iaga, na ia saunoa: “Sa i ai le Agaga o le Alii i o’u luga, ma na ou lagonaina na pei a mu ou ivi i totonu seiloga ou te tautala atu i tagata… . O le aoaoga muamua lava na ou folafolaina atu na silia ma le itula na faia ai. Na ou tatalaina lo’u gutu ae na faatumuina e le Alii.”2 E pei ona lē mumu se afi vagana ua iloa le aloiafi, e le mafai foi ona mausali se molimau seiloga e faailoa atu.
Na saunoa mulimuli ane Polika Iaga e uiga ia Orson Pratt: “Afai [e] tipitipiina ia Uso Orson i ni fasi inisi, o le a alalaga uma mai na fasi inisi taitasi, ‘E moni le Ekalesia Mamona.’”3 Na viia e Tama Liae ia lona atalii faamaoni o Nifae, i upu nei: “A e peitai, faauta, e le o ia, a o le Agaga o le Atua sa ia te ia, ua tatalaina ai lona gutu i le tautala ua le mafai ona ia tapuni ai” (2 Nifae 1:27).
O le avanoa ma le tiutetauave mo le faailoaina atu o molimau, e afua atu lava i totonu o le faalapotopotoga o le aiga. E tatau i a tatou fanau ona mafai ona manatua le malamalama i o tatou mata, le tagitagi o a tatou molimau i o latou taliga ma le lagona i o latou loto a o tatou tuuina atu a tatou molimau i a tatou au maimoa e sili ona faapelepele, o Iesu o le Alo moni o le Atua, ma o Iosefa o Lana perofeta. E tatau ona iloa e a tatou fanau ua tatou iloa, ona e masani ona tatou tauina atu ia i latou.
Na totogi e taitai o le Ekalesia anamua se tau maoae e faatuina ai lenei tisipenisione. Atonu o le a tatou feiloai atu ia i latou i le olaga a sau ma faalogo i a latou molimau. A valaauina i tatou e molimau atu, o le a la tatou tala e fai atu? O le a i ai fanau iti faaleagaga, ma sauai faaleagaga i le olaga a sau. O le faavavau o se taimi umi lea e ola ai e aunoa ma le malamalama, ae maise lava pe afai o o tatou taitoalua ma a tatou fanau, e nonofo foi i le pogisa ona e leai se malamalama i totonu o i tatou faapea ma isi, o le mea lea, e le mafai ai ona tutu a latou lamepa.
E tatau ona tatou tatalo i taeao ma afiafi uma ma aioi atu i le Alii, ina ia aua lava nei aveesea lo tatou faatuatua, la tatou molimau po o la tatou amio lelei. E na o le tasi lava le molimau e tatau ona i ai, ae e tatau o la oe lava molimau.
E i ai la’u molimau. E uunai mai pea e faailoa atu. Ou te molimau atu o loo i ai le mana o le Atua soifua i totonu o lenei Ekalesia. Ua ou iloa le mea ua ou iloa, ma e moni la’u molimau. I le suafa o Iesu Keriso, amene.