Ola i le Faatuatua ae Le o le Fefe

Elder Quentin L. Cook

O Le Korama a Aposetolo e Toasefululua

A tatou filifili e mulimuli ia Keriso i le faatuatua nai lo le filifili o se isi ala ona o le fefefe, e faamanuiaina i tatou i se taunuuga e ogatusa ma la tatou filifiliga.

Ata

Uso e ma tuafafine pele, ou te auai faatasi ma outou i le faailoa atu o lo’u alofa ma le lagolagosua ia Peresitene Eyring ma lona aiga. Sa tuuina mai e Peresitene Hinckley lenei valaauga ia te au e auauna i le Korama a le Toasefululua i le afiafi o le Aso Tofi. E le mafai ona ou faaleoina atu le anoanoai o lagona ua maua talu mai lena taimi. Sa le maua se moe i le po ma sa anoanoai foi talosaga sa faia. E ui o lea, ua matua faagaeetia lo’u loto, i lo’u iloa o Peresitene Hinckley o le perofeta ma o le a tatalo foi ia tagata o le Ekalesia mo au ma lo’u aiga.

E le mafai ona ou faamatala atu lo’u lagona o le le gafatia. Ina ua tofia au o se Pulega Aoao ia Aperila i le 1996, sa faapena foi lo’u lagona i le valaauga. Sa faamautinoa mai ia te au e Elder Maxwell i lena taimi e faapea o le agavaa aupito taua lava mo i tatou uma o e galulue i le malo o le lagona mafanafana i le tuuina atu o le molimau i le paia o le Faaola. Sa oo mai ia te au se filemu i lena taimi ma sa tumau ai lava ia te au talu ai ona ou te alofa i le Faaola ma ua i ai o’u aafiaga faaleagaga na mafai ai ona ou molimau atu ia te Ia. Ou te olioli i le avanoa e molimau atu ai ia Iesu Keriso i le lalolagi uma (tagai MFF 107:23), e ui lava i o’u tulaga le agavaa.

I le Mataupu Faavae ma Feagaiga e 68, fuiaupu e 5 ma le 6, tatou te faitau ai:

“Faauta, o le folafolaga lenei a le Alii ia te outou, a’u auauna e.

“O lea, ina fiafia ia, ma aua le fefe, aua o a’u le Alii o loo faatasi ma outou, ou te tu foi faatasi ma outou; tou te molimau foi ia te au, o Iesu Keriso lava, o au o le Atalii o le Atua soifua, o au o le na i ai, o le o i ai, ma lē o le a oo mai.”

Ou te sailia le mafutaga ma le Agaga Paia a o ou tautala atu i lenei taeao o le Sapati.

O le lagona lofituina na oo mai ia te au ina ua ou mauaina lenei valaauga e faapea e tatau ona tatou ola i le faatuatua ae le o le fefe. I le 2 Timoteo, na ta’ua ai e le Aposetolo o Paulo le faatuatua o le tinamatua o Timoteo o Loi, ma lona tina o Eunike. Na tusia ai e Paulo:

“Aua ua le foaiina mai e le Atua ia te i latou le Agaga e mata’u ai; a o le Agaga e faamalosi ai, ma alofa ai, ma mafaufau tonu ai” (2 Timoteo 1:7).

I lo’u lava tulaga, ou te faailoa atu ma le faaaloalo lava ou augatama ua i ai nei i le isi itu o le veli, o e na latou foai atu mea uma sa poloaiina ai i latou ina ia fausia ai le malo o le Atua i le fogaeleele.

Ou te faafetai lava ona o lo’u olaga atoa na siomia ai au e i latou o e alolofa i le Faaola. Ua tumu lo’u loto i le faafetai i lo’u aiga. O lo’u toalua, o Mary, o ia o lo’u fiafiaga i lo’u olaga. O lona malosi faaleagaga, faataitaiga amiotonu, o ona uiga malie, ma lana lagolagosua matagofie, ua faamanuiaina ai au i lo’u olaga atoa. O le ma fanau e toatolu ma o latou taitoalua o se faapogai o le lotomalie patino tele, faatasi ai ma fanau a le ma fanau e toaiva, o se matua faamanuiaga lava mo i ma’ua. O lo latou faatuatua ma a latou tatalo ma lo latou lelei, o se faamafanafanaga tele lea mo Mary ma au.

A ou toe mafaufau i lo’u talavou i Logan, Iutā, (le Vanu o Cache Valley e fiafia tele i ai Elder Perry), ua ou iloa ai lo’u laki tele i le tausia o au i se aiga lelei—i le i ai o se tina amiotonu o le sa tumu i le faatuatua ma se tama alofa, o se uso e matua atu ia te au, o le sa avea ma se faataitaiga tulaga ese mo au e faapea foi i le avea ai ma se uo ma se fesoasoani, ma se tuafafine laitiiti o le sa alofa ma lagolagosua mai. E ese foi lo’u laki ona o le i ai o ni ou taitai talenia ma le tuuto i le Ekalesia, o faiaoga i potuaoga, o faiaoga mo taaloga, ma uo o e sa avea o ni faataitaiga matagofie mo au.

A o ou talavou sa ou maua le avanoa e auauna atu ai i le Misiona i Peretania, o se mea na tele se tosinaga ma suia ai lo’u olaga. O le aafiaga a se peresitene malosi o le misiona o se tasi lea o vavega o le talalelei toefuataiina. I ni nai vaiaso talu ai, sa ou mauaina ai se faamanuia o lo’u aso fanau i le laumua o le Ekalesia, na aumai i se tamaitai sa ou fesoasoani i le aoaoina i Gloucester, Egelani, i le tele o tausaga ua mavae. Sa ou le toe maua se fesootaiga ma ia. Sa ia ta’u mai ia te au, o i la’ua ma lona toalua o ni tagata toaaga o le ekalesia ma ua 6 le la fanau ma fanau a le la fanau e 20, na fananau uma lava i totonu o le feagaiga. Atonu o le faamanuia aupito sili lea ua ou mauaina o o’u aso fanau.

Na ma tuua ma Mary ia Iutā, ina ia ou alu i le aoga faaloia i Palo Alto, Kalefonia. Sa matou nonofo i Kalefonia mo le 33 tausaga ma atiina ae ai lo matou aiga iina. E tele avanoa sa ma mauaina e auauna atu ai. Sa ma fiafia lava i le eseese o tagata o le au paia ma a latou tautinoga i le talalelei a Iesu Keriso. O le a faavavau pea lava lo’u lotofaafetai mo le Au Paia [maoae] o Aso e Gata Ai i Kalefonia, o e sa avea ma ni uunaiga lelei i lo’u olaga.

O nei tausaga e 11 1/2 o le auauna atu o se Fitugafulu, o ni tausaga faamanuiaina moni lava. A o ou tuua lena korama, ou te manao ia silafia e o’u Uso lo’u alofa ma lo’u agaga talisapaia o lo latou tuuto atu ma le faamaoni i le malo o le Atua i le fogaeleele—mo lo latou faatuatua ma galuega lelei. Ou te manao ia latou silafia lo’u olioli i lo matou galulue faatasi ai.

Ou te alofa ma lo’u loto atoa i le Usoga ua tatou lagolagoina o ni perofeta, tagatavaai, ma talifaaaliga. Sa ou taumafai e auauna atu ma le mamalu ma tuumamaina o latou tiutetauave i soo se mea sa ou mafaia. Ou te faafetai i le Au Peresitene Sili ma le Korama a le Toasefululua mo o latou soifua lelei ma faataitaiga, o lo latou onosai, o a latou aoaoga, o lo latou agalelei, o lo latou tuuto atu i lo tatou Tama Faalelagi ma Lona Alo o Iesu Keriso, ma Lana talalelei toefuataiina. Ou te faafetai ona sa valaauina e le Atua Iosefa Samita e avea ma se perofeta na toefuataiina mai ai le atoaga o le talalelei i le lalolagi.

O lo’u aafiaga o se Pulega Aoao ua faatumulia ai lo’u loto i le faafetai mo le faatuatua ma le agalelei o le Au Paia o Aso e Gata Ai i le lalolagi atoa. Sa ma galulue mo tausaga e lua i Filipaina. Ia Aperila i le 1961, na auina atu ai e Peresitene Hinckley, a o avea lena ma Fesoasoani i le Toasefululua, ia uluai faifeautalai i Manila. O le taimi nei, ua toeitiiti atoa le 600,000 tagata o le ekalesia iina. E le faigofie o latou olaga, ma e le tele ni mea o lenei olaga latou te maua, ae ua latou alolofa i le Faaola. Ua matua tele le aafiaga ua faia e le talalelei e faaleleia ai o latou olaga. O se matuai faamanuiaga lava le auauna atu ia i latou.

Sa ma galulue foi mo le tolu tausaga i Atumotu o le Pasefika. E maoae lava ona ua toeitiiti 25 pasene o tagata Polenisia uma i le lalolagi o tagata o le Ekalesia. O se talatuu lava lo latou faatuatua ma lo latou faaleagaga. Sa ma malaga ma Sister Cook i Vava’u i Atumotu o Toga i se tasi taimi. Faatoa uma lava ona ou lauga e uiga i le mulimuli i le perofeta i se sauniga aoao o se konafesi faalesiteki. I le taimi o le toonai ina ua maea le konafesi, sa ou nofo i tafatafa o se peteriaka iloga ma le matua. Sa ia ta’ua lona faafetai tele ina ua faalogo i mea sa aoao mai e le Perofeta. Sa ia faamatala maia le tala lenei. O Vava’u, o si motu laitiiti lava, e masani ona lava ma totoe ia timuga, ae o nisi taimi e i ai ni lamala matautia. E i ai fagaloa uumi, e toetoe lava pei o ni ava vaiti, e tavi’o atu i motu i lalo ifo o mauga tifato. A oo ina leai se vai i le nuu ona o lamala, na o le tasi lava le ala e mafai ona latou maua ai se vai fou ma ola ai. Ua tele senituri, sa latou maua ai o le vai manino e tafe mai vaipapa i totonu o mauga ma oo mai ai ma lepa ai i ni nai vaega i le sami.

Ona o lea o tamaloloa Toga i o latou paopao faatasi ai ma se toeaina e i ai le tofā e tu i le isi pito o le vaa na te autiloa le vaega tonu lava o lepa ai. E tutu taulelea malolosi i le vaa ma sauniuni ai ma koneteina e maulu ai i le sami loloto. A latou tau loa i le vaega tonu, ona sisii ae lea e le toeaina ona lima uma i le lagi. O le faailoga lena. Ona totofu loa lea o taulelea malolosi i le sami ma faatutumu ai koneteina i le vai magalo fou. Sa faatusa e lenei peteriaka toeaina lenei aga faaola i le vai ola o le talalelei a Iesu Keriso, ae o le toeaina e i ai le tofā ua faatusa i le perofeta a le Atua i le fogaeleele. Sa ia ta’ua e mama, ma felesi le vai, ma o se vai faaola i lo latou lamala. Ae e le faigofie ona maua. E le iloa e mata e lei aoaoina. Sa manao lenei peteriaka ia ona iloa mea uma sa aoao mai e le perofeta.

Ua tatou ola i se taimi matautia. Ua matua manaomia lava e le lalolagi se vaipuna manino, o le talalelei lea a Iesu Keriso. E tatau ona tatou faalogologo ma le toto’a i le perofeta a o tatou faia filifiliga. I a’u lava faamaumauga e le aloaia, ua ta’u mai ai ua faatele atu ona faamamafaina pea lava pea e Peresitene Hinckley le faatuatua i le Alii. E sosoo ai ma lona faamamafaina o le faamalolosia o aiga ma le mataituina o le tapuaiga faalelotu i le aiga. Ua faafia foi ona ia ta’u mai ia te i tatou afai tatou te tausia pe ola i se mataupu faavae, o le a tatou maua se molimau o le moni o lena mataupu faavae, lea o le a faateleina ai lo tatou faatuatua.

Ou te iloa e toatele outou o loo popole i le tausiga o a outou fanau i nei taimi faigata ma le faateleina o lo latou faatuatua. Ina ua amataina lo ma aiga ma lo’u toalua i le Eria o le Faga i San Francisco, sa faapena foi lo ma’ua popolega. I se taimi taua lava sa fautuaina ai tagata o lo matou siteki e Elder Harold B. Lee, o le sa avea ma uso o le Toasefululua i lena taimi, e mafai ona matou tausia o matou aiga i le amiotonu pe afai matou te:

Mulimuli i le perofeta.
Fausia le agaga moni o le talalelei i o matou loto ma aiga.
Avea ma se malamalama ia i latou tatou te nonofo.
Taulai atu i sauniga ma mataupu faavae o loo aoaoina i le malumalu. (tagai MFF 115:5; Harold B. Lee, “Your Light to BE a Standard unto the Nations,” Ensign, Aug. 1973, 3–4.)

A o matou mulimuli i lenei fautuaga, sa faateleina lo matou faatuatua ma sa faaitiitia lo matou fefefe. Ou te talitonu e mafai ona tatou tausia ni fanau amiotonu i soo se mea i le lalolagi, pe afai e aoaoina i latou i mataupu faavae faalelotu i o tatou aiga.

O se tasi o vaega e mafai ai e o tatou tagata ona ola ai i le faatuatua ae le o le fefe, o la tatou taumafaiga faafaifeautalai. A o lei valaauina au i lo’u tofiga i le Au Peresitene o le Au Fitugafulu i le aso 1 o Aokuso o le tausaga nei, sa ou galue ai i le Matagaluega a Faifeautalai mo le ono tausaga, o tausaga mulimuli e tolu sa avea ai au ma Faatonu Sili i lalo o le taitaiga a Elder M. Russell Ballard, o le sa avea ma Taitaifono o le Fono Sili a Faifeautalai.

Sa faailoa mai ia i matou e nisi peresitene o misiona, e toatele tagata lelei o le au paia o loo nana lo latou avea ma nisi o le ekalesia, mai o latou tuaoi ma e latou te faigaluega. Latou te le faailoa atu i tagata pe o ai i latou ma o latou talitonuga. Ua tatou matua manaomia lava le faaaofia ai o tagata o le au paia i le faasoaina atu o le savali o le Toefuataiga. I le Roma 10, fuaiupu e 14, o loo faailoa mai ai lenei mea:

“Pe faapefea ona latou valaau atu i le (o loo faatatau i le Faaola) ua latou le faatuatua i ai? pe faapefea foi ona latou faatuatua i le ua latou le faalogo atu i ai? pe faapefea foi ona latou faalogo atu pe a leai se tala’i atu?”

O le fuaiupu e 15 o loo i ai le savali matagofie o loo faasino i ai Isaia:

“E matagofie naua o latou vae o e au mai le talalelei i le manuia, o e aumai le tala i mea lelei.” (tagai foi Isaia 52:7).

O lona uiga e tatau i tagata o le au paia ona galulue ma tautatala atu pe afai latou te mananao e ausia lenei faamanuiaga.

O le Talai La’u Talalelei, o se taiala i le galuega faafaifeautalai, sa muai folasia mai ia Oketopa, 2004. Na amatalia e Peresitene Hinckley lenei taumafaiga ina ua valaau atu i faifeautalai e aoao le aoaoga faavae ma aoao atu mataupu faavae e ala i le Agaga. Sa auai uma uso o le Au Peresitene Sili ma le Korama a le Toasefululua i se tulaga maualuga patino. Sa ma manatu ma Elder Ballard ua toina mai pupuni o le lagi, ma sa liligi ifo ai musumusuga a le Alii ma maua mai ai lenei punaoa maoae. Ua silia ma le 1.5 miliona kopi o le Talai La’u Talalelei ua maua e tagata o le Ekalesia. O se faavae ofoofogia, ma o faifeautalai o ni faiaoga mamana ma le faaleagaga. E ui i lea, afai tatou te mananao e faataunuu le mea na molimanao mai ai Peresitene Hinckley, e ao i tagata o le ekalesia, ona ola i le faatuatua ae le o le fefefe, ma faasoa atu le talalelei i a latou uo ma paaga.

I o tatou valaauga taitoatasi, e manaomia ona i ai lo tatou faatuatua ae aua le fefefe.

O lo ma afafine, o Kathryn, o loo avea ma peresitene o le Peraimeri i lana uarota i le Aai o Sate Leki. Sa ma auai atu ma lo’u toalua i lana uarota i le Aso Sa talu ai, e faalogologo i le polokalama a le peraimeri i le sauniga faamanatuga, “O Le a Ou Mulimuli ia te Ia i le Faatuatua.” Sa matua faagaeetia lava au e faalogo atu i tamaiti o tauloto mai mau ma tala faatasi ai ma pese e faaautu i le faatuatua ia Keriso.

Ina ua maea le sauniga, sa ou fesili atu ia te ia e uiga i lona valaauga. Sa fai mai o ia, o le taimi muamua, sa avea o se avega mamafa ia te ia. O le tele o taimi sa faaalu i le tau foiaina o faafitauli. Ona tonu ai lea i le au peresitene e faamamafa le alofa, faatuatua, ma le tatalo. Na faafuasei ona oo mai uunaiga faaleagaga e uiga i se tamaitiiti po o se aiga faapitoa. Sa suia lagona feteenai i le alofa. Sa ia fai mai, a o latou galulue i luga o musumusuga mai le Agaga, sa tulai mai i le Peraimeri se migao ma le filemu, ma ua faatino ai foi le aoaoina moni o le talalelei.

O lo tatou faatuatua ia Iesu Keriso lea o loo lagolagoina ai i tatou i taimi faigata o le olaga. O le mataupu faavae muamua o le talalelei. A aunoa ma lena, o le a itiiti se mea tatou te ausia po o le leai foi, ma alu ai lava o tatou taimi taua ae leai se taunuuga. O Keriso lava na ofoina mai le valaaulia ina ia mulimuli atu ia te Ia, ia lafo atu ia te Ia a tatou avega, ma ia tauaveina Lana amo, “aua e avegofie [Lana] amo, o [Lana] avega foi e mama ia”(Mataio 11:30).

E leai lava se isi igoa i lalo o le lagi e mafai ona faaolaina ai le tagata (tagai Galuega 4:12). E tatau ona tatou tauaveina i o tatou luga Lona suafa, ma maua ai Ona foliga i o tatou mata ina ia oo i le taimi e afio mai ai o Ia, ua tatou avea atili e faapei o Ia (tagai 1 Ioane 3:2; Alema 5:14). A tatou filifili e mulimuli ia Keriso i le faatuatua nai lo le filifili o se isi ala ona o le fefefe, e faamanuiaina i tatou i se taunuuga e ogatusa ma la tatou filifiliga (tagai MFF 6:34–36).

Talosia ia tatou iloa ma faafetai atu ona o le meaalofa e le mafaatusalia o le olaga, lea ua tatou tofu olioli ai, ma mo le manava o loo Ia aumai mo i tatou i aso taitasi. Talosia ia tatou filifili ia i ai ni talitonuga maumaututu i taimi taua o le olaga ma faatino le faatuatua ia Iesu Keriso. Ou te tatalo ina ia tatou ola i le faatuatua ae le o le fefe. Ou te tuuina atu la’u molimau i le Atua, o lo tatou Tama Faalelagi, ma Lona Alo, o Iesu Keriso, o le na togiola mo a tatou agasala, i le suafa o Iesu Keriso, amene.