Aua Tou te Tineia le Agaga o Lē Faaolaolaina le Tagata i Totonu

Elder Keith K. Hilbig

O Le Fitugafulu

A tatou valaaulia le Agaga Paia e faatumu o tatou mafaufau i le malamalama ma le poto, Na te “faaolaolaina” i tatou, o lona uiga, e faamalamalama ma faafiafia le agaga o le alii po o le tamaitai.

Ata

I le 1 Tesalonia mataupu e 5, na apoapoai atu ai Paulo i le ekalesia ina ia amio i amioga a tagata o le a avea ma au paia. Sa faaauau i lona lisiina o uiga ma amioga talafeagai. I le fuaiupu e 19 na fautua atu ai Paulo i upu faigofie nei: “Aua tou te tineia le Agaga.”

O le mea e faagaeetia ai, pe a ma le 500 tausaga i luma atu o tusitusiga a Paulo, na taumafai ai se perofeta o le Tusi a Mamona e igoa ia Iakopo e aoao atu le talalelei a Iesu Keriso i se nuu vaogata. Sa fesili manino atu o ia i te i latou e faapea: “Pe tou te teena ea upu a le au perofeta; pe tou te … faafitia ea le afioga malie a Keriso, … ma le mea foaifuaina o le Agaga Paia lea, ma tinei le Agaga Paia?”¹

I o tatou aso, i le tele o seneturi ua mavae atu ai Paulo ma Iakopo, e tatau foi ona tatou faaeteete ia le faatuai, [le] amanaia, pe tineia le Agaga i o tatou olaga.

O faatosinaga faatauanau a le lalolagi e taumafai e liliuese o tatou mafaufau mai le ala sa’o ma le vaapiapi. O loo galue le tiapolo e faapogisa lo tatou mataalia i musumusuga a le Agaga, pe o i tatou o ni tupulaga laiti, ni talavou matutua, po o ni alii ma ni tamaitai matutua. O le matafaioi a le Agaga, le Agaga Paia, e taua i vaitaimi uma o lo tatou olaga i le tino.

Mai lava i le amataga, na folafola mai ai e le Tama i Ona atalii ma afafine agaga taitoatasi e faapea, o le Togiola ma le Toetu o Lona Alo Pele e Toatasi, e mafai ai e i tatou uma ona toe foi atu i le afioaga o le Atua ma maua faamanuiaga o le ola faavavau i le tikeri aupito maualuga o le malo selesitila.

Ua tatou iloaina uma lava, o le malaga i le faaeaga o le a umi, fita, ma o nisi taimi e tuuatoatasi ai, ae ua tatou iloaina foi, o le a le mafai ona tatou malaga na o i tatou. Ua saunia e le Tama Faalelagi mo i latou uma o e faataunuuina ia muai mataupu faavae o le faatuatua, salamo, ma le papatisoga ia se soa ma se taiala, o le Agaga Paia lea.

O le ala i le ola faavavau e le o se ala laugatasi. Ae, o se ala e a’ega, e alu pea i luma ma luga. O le mea lea, e manaomia ai se malamalama faaleagaga faateleina pea ma le malosi tatou te oo atu ai i lo tatou taunuuga. Ona o le faaauau pea o le tetee faataumaoi o Satani, o lea e matua talafeagai ai le taitaiga mataala faifaipea a le Agaga Paia. E le tatau ona tatou faatuai, pe le amanaia, pe tineia foi musumusuga a le Agaga Paia. Ae a oo loa i le faaaogaina o musumusuga ma faamanuiaga e faapea ona tafe mai i le Agaga Paia, e masani ona “faamalieina i tatou i mea laiti nai lo faamanuiaga e mafai ona tatou maua.”²

I le Penina Tau Tele, na tusia ai e Mose e faapea, ina ua uma ona papatisoina Atamu ma maua le Agaga Paia na, “faaolaolaina [o ia] i le agaga.”³

A tatou valaaulia le Agaga Paia e faatumu o tatou mafaufau i le malamalama ma le poto, Na te “faaolaolaina” i tatou, o lona uiga, e faamalamalama ma faafiafia le agaga o le alii po o le tamaitai.⁴ O le taunuuga, tatou te matauina se eseesega tele i o tatou agaga. Tatou te lagona le faamalosia, faatumulia i le filemu ma le olioli. Tatou te maua le malosi faaleagaga ma le naunautai, o na uiga uma e faaleleia atili ai o tatou gafatia moni. E mafai ona tatou ausia ni mea e sili atu nai lo mea e mafai ona tatou faia na o i tatou lava. Tatou te moomoo ia avea ma tagata e sili atu ona paia.

Tou te fia silafia le tau e tatau ona totogiina mo faamanuiaga ua ofoina mai, pe a uma ona tatou mauaina le Agaga Paia? O le tau e lei muai iloiloina po o se aofaiga faatulagaina foi; ae, e iloiloina lava e i tatou taitoatasi.

Afai e te faatulagaina lau tau, o lau taumafaiga patino lea, i se tau e matuai maualalo lava, o le a le mafai ona e maua fesoasoani uma ua ofoina mai e le Agaga. E te ono tineia ai foi le Agaga! Ae peitai, afai e te faatulagaina au lava taumafaiga i se tulaga maualuga, o le a tele se seleselega e mafai ona e maua mai le Agaga. O le tau ua ou taua, ioe, e le o tupe; ae o le tautino malosi atu ma le aofia ai i taumafaiga ma amioga patino faaleagaga.

Tatou te iloa le maualuga o la tatou saofaga patino o loo i ai nei e ala i le suesueina o a tatou filifiliga ma mea e faamuamua i le taimi nei i fesili e pei o nei:

Pe o ou faaaluina ea se taimi tele i taaloga nai lo le alu i le lotu po o [le faia o] valaauga?
Afai e i ai so’u aso avanoa, pe ou te filifili ea ou te alu i le malumalu pe asiasi i faaleoloa tetele?
Pe ou te faaaluina ea lou taimi i taaloga komepiuta po o le evaeva i le Initoneti nai lo le ofoina atu o auaunaga anoa i isi i lo’u aiga ma le alalafaga?
Pe ou te faitauina ea le nusipepa i aso uma, ae faigata ona faitauina tusitusiga paia i aso taitasi?

E i ai isi fesili e te ono fatuina e faaalia ai le talafeagai o au filifiliga o i ai nei ma mea e ave i ai lau faamuamua.

Po o le a lava le maualuga o le alualu i luma faaleagaga atonu o loo tatou i ai nei, e i ai lava i taimi uma se tulaga e maualuga atu e mafai ona tatou ausia. O le taimi o se meatotino aupito sili lea ona taua. E te manao e faaalu le tele o lou taimi i mea o le faavavau ina ia mafai ai ona maua le mafutaga faifaipea a le Agaga Paia ma ia faamanuiaina atoatoa tele ai mai Ona aafiaga?

Afai o lau tali o le ioe, o le tau amata i lenei sailia o le faaleagaga e loloto atu, o se naunautai malosi ia maua musumusuga e tele atu ma ia avea ma se [tagata] e sili atu ona paia. A faatumulia loa o tatou loto i nei manao, o le a tatou faateleina ma le fiafia le tau tatou te totogia mo le fesoasoani a le lagi.

O le isi a tatou saofaga i lenei taumafaiga o le, ia faatofuina i tatou lava i taimi uma i afioga a Keriso ma perofeta. A faalautele a tatou taumafaiga i suesuega, e faapena foi ona faateleina aafiaga a le Agaga i o tatou olaga. Ia tatou suesue i tusitusiga paia ma uu se peni, ma tusi faamatalaga o manatu fou ma tusia ai uunaiga faaleagaga. A uma lea, ia tatou taumafai ia faatatau mea ua aoaoina i o tatou lava olaga. O le a faaolaolaina e le Agaga i tatou lava; o le a oo mai se malamalama fou o lea mataupu ma lea mataupu.

Ina ia mautinoa tatou te le tineia le Agaga, ae ia valaaulia Lona faatasi mai, e i ai se isi auala e laasia. Ia tatou tatalo e le aunoa ma le loto atoa. O le folafolaga alofa ma atoatoa a le Faaola o loo tusia i le Mataupu Faavae ma Feagaiga:

“Ia faalatalata mai ia te au ona ou faalatalata atu ai lea ia te outou.”
“Ia saili ia te a’u ma le filifiliga ona outou maua ai lea o a’u.”
“Ia ole mai ona outou maua ai lea.”
“Ia tuitui mai, ona toina ai lea ia te outou.”
“Soo se mea e tatau ia te outou, tou te ole ai i le Tama i lo’u igoa o le a foaiina atu ia te outou.”⁵

Ia manatua lena faasologa, uso e ma tuafafine. Tatou te latalata atu i le Faaola pe a tatou tausia Ana poloaiga i le tonu atoatoa. Tatou te augani atu ma le faatauanau i le Tama oi le Lagi i le suafa o Keriso. Ma, e ala mai i musumusuga a le Agaga Paia, tatou te maua ai taitaiga faalelagi ma le mafaufau matala.

Pe a tatou anapopogi, faafou a tatou feagaiga i le taimi o le faamanatuga, ma o atu i le malumalu, tatou te maua atili ai le Agaga. I nei tulaga, e mafai ai e le Agaga Paia ona faailoa mai Ona aafiaga i auala maoae.

O le malumalu o se siosiomaga ofoofogia e saili ai faaaliga patino. Pe a tatou auai atu e le aunoa ma faalogologo ma le totoa, ma mafaufau loloto i folafolaga matagofie ma mea ua faamoemoe i ai e faatatau i le faavavau, tatou te tuua le [malumalu] ma se malamalama faateleina e uiga i le fuafuaga a lo tatou Tama Faalelagi mo i tatou. O le Agaga Paia na te faalauteleina la tatou vaaiga ma faatagaina lena vaaiga e faavavau ia uunaia ai filifiliga tatou te faia i o tatou olaga i aso taitasi.

Afai tatou te faia lenei taumafaiga ma lē tineia le Agaga, e faaolaolaina o tatou tagata i totonu. A tatou tutumau, e faatalitali mai le ola faavavau ia i tatou. O le mea lea, e le tatau ai ona tatou tineia le Agaga e ala i le le usiusitai po o le faatamala. Ae, ia tatou “ola i le Agaga”⁶ e faaleleia ai le matafaioi paia ma taua a le Agaga Paia i o tatou olaga taitoatasi. Ou te molimau atu, a tatou saili moni i le Agaga, o le a sili atu ona tatou manuia mai galuega filemu, ae taua a le Agaga Paia. I le suafa o Iesu Keriso, amene.