E! Ia Manatua, Ia Manatua Lava
“E! ia manatua, ia manatua lava,” e masani ona augani mai ai perofeta o le Tusi a Mamona.1 O la’u mau, o le uunaia lea o outou e saili auala e faailoa ai ma manatua le agalelei o le Atua.
Sa ou faafetai mo le aufaipese i le latou faasalalauga i lenei taeao, lea sa faatatau i le Faaola, ma e faafetai ai ona o upu o se tasi o pese sa latou usuina, “O Le Keriso Lenei,” sa tusia e Peresitene James E. Faust. A o o’u nofo i lalo i tafatafa o Uso Newell, sa ou sōsō atu ma fesili ia te ia, “O a mai lau fanau?” Sa ia tali mai, “A o alala ai Peresitene Faust i le nofoa lena, o le mea lava lena e masani ona fesili mai ai.” E le o se mea ou te ofo ai, aua o Peresitene Faust sa avea pea ma faataitaiga lelei o se soo lea sa faamatalaina i le Musika ma le Afioga Tulei i le asō. Sa ou lagonaina pea lena mea a o o’u tuputupu ae, sa ou manao ou te fia pei o Peresitene Faust. Atonu lava e i ai se taimi.
A o laiti lava le ma fanau, sa amata ona ou tusitusia ni nai mea e uiga i mea sa tutupu i aso taitasi. Sei ou faamatalaina atu le auala na amata ai lena mea. Sa ou tuai mai i le fale mai se tofiga faale-Ekalesia. Sa pogisa. Sa faateia au e le tama o lo’u toalua, o le sa nofo latalata mai ia i matou, a o ou savali agai atu i le faitotoa i luma o lo’u fale. Sa amo mai lana amoga o paipa, ma savali teleai mai ma ona ofu faigaluega. Na ou iloa sa ia fauina se pamu e pamu mai ai le vai mai se vaitafe na i lalo atu o lo matou fanua.
Sa soisoi mai o ia, ma talatalanoa lemu mai, ona toe alamu ane ai lea i o’u tafatafa i le pogisa e faaauau lana galuega. Sa ou savali teisi agai atu i le fale, ma mafaufau i lana mea sa fai mo matou, ma i le taimi na ou taunuu ai i le faitotoa, sa ou faalogoina i lo’u mafaufau—ae le o lo’u leo—ia upu nei: “Ou te le o tuuina atu nei aafiaga mo oe lava. Tusi i lalo.”
Sa ou alu i totonu. Ou te lei alu ou te moe, e ui lava ina sa ou le lava. Sa ou aumaia ni pepa ma amata loa ona tusi. Ma a o ou faia, sa ou malamalama i le savali sa ou faalogoina i lo’u mafaufau. Sa tatau ona ou tusia mo lau fanau e faitau ai, i se taimi i le lumanai, le auala na ou vaaia ai le aao o le Atua sa faamanuiaina ai lo matou aiga. Sa le tau faia e tamamatua le mea sa ia faia mo i matou. Semanu e mafai ona ia fai i se tasi na te faia, po o le le faia lava. Peitai, o la sa auauna mai o ia ia i matou, o lona aiga, i le ala e masani ona faia ai e soo o le feagaiga a Iesu Keriso. Sa ou iloa e moni lena mea. Ma sa ou tusia i lalo, ina ia manatua e lau fanau i se aso pe afai latou te faitau i ai.
Sa ou tusia ni nai laina i aso taitasi mo le tele o tausaga. Ou te lei misia lava se aso tusa lava po o le a lou le lava, po o le a foi le vave ou te usua’i ai i le taeao e sosoo ai. Ae ou te lei tusia se mea, ou te mafaufau lava i le fesili lenei: “Pe na ou vaaia le aao o le Atua o aapa mai e pa’i mai ia i maua po o le ma fanau po o le matou aiga i le aso?” A o faaauau pea ona ou faia lenei mea, sa amata ona tupu se mea. Pe a ou mafaufau i mea na tutupu i le aso, ou te vaaia faamaoniga o mea sa faia e le Atua mo se tasi o i matou ae ou te lei iloaina i taimi pisi o le aso. A o tupu lena mea, ma e tele lava taimi e tupu ai, sa ou iloaina ai o le taumafai e manatua, na mafai ai e le Atua ona faasino mai ia te au le mea sa Ia faia.
E sili atu i le na o le lotofaafetai na tupu ae i lou loto. Sa tupu ae le molimau. Sa amata ona ou mautinoa atili e faafofogaina e lo tatou Tama Faalelagi tatalo ma tali mai i ai. Sa tele atu lou lotofaafetai ona o le faamaluluina ma le faaleleia e oo mai ona o le Togiola a le Faaola o Iesu Keriso. Ma sa atili ai ona ou mautinoa e mafai e le Agaga Paia ona faamanatu maia mea uma ia i tatou—e oo lava i mea tatou te lei matauina pe gauai atu i ai pe a tutupu.
Ua mou atu tausaga. Ua matutua uma lau fanau tama. Ma o lenei o nisi taimi e faaofo ai e se tasi o i latou ia au, “Tama, sa ou faitauina lau kopi o le tusi o talaaga e uiga i le …” ona ia faamatala mai lea e uiga i le faitauina o le mea sa tupu i se taimi ua leva ua fesoasoani ia te ia na te iloa ai se mea sa faia e le Atua i lona aso.
O la’u mau, o le uunaia lea o outou e saili auala e faailoa ai ma manatua le agalelei o le Atua. O le a fausia ai a tatou molimau. Atonu e le o tusia sau tusi o talaaga. Atonu e te le o faasoaina atu sau faamaumauga o tausi ia i latou e te alofa i ai ma tautuaina. Peitai, o le a faamanuiaina oe ma i latou pe a e manatuaina mea sa faia e le Alii. Atonu e te manatuaina lena pese tatou te usuina i nisi taimi: “Faitau ou manuia ua maua mai; faitau taitasi, E te ofo tele i mea ua Ia fai.”2
O le a le faigofie ona manatua. O le ola e pei ona tatou i ai e aunoa ma se manatua o le muai olaga, e le mafai ona tatou manatua pe na faapefea lo tatou nonofo ai ma lo tatou Tama Faalelagi ma Lona Alo Pele, o Iesu Keriso, i muai lalolagi; e le mafai foi e o tatou mata faaletino po o se mafuaaga tatau ona vaai i le aao o le Atua i o tatou olaga. O le vaaia o mea faapena, e manaomia ai le i ai o le Agaga Paia. Ma e le faigofie ona agavaa mo le mafutaga ma le Agaga Paia i se lalolagi amioleaga.
O le mafuaaga lea ua avea ai le faagalo o le Atua ma faafitauli faifai pea i Lana fanau talu le amataga o le lalolagi. Manatu i taimi o Mose, ina ua foai mai e le Atua le manai ma taitai ma puipui Lana fanau i auala faavavega sa vaaia. Ae, sa lapataia pea e perofeta ia tagata o e sa matua faamanuiaina, e pei lava ona sa lapataia ai e perofeta ma o le a lapataia pea lava: “Tau ina faaeteete oe ia te oe, ma ia e matua faaeteete lava ia te oe, ne’i galo ia te oe nei mea na iloa ai e ou mata, nei tea ese ai lou loto i aso uma o lou olaga.”3
Ma o le luitau ina ia manatua o le mea sili lava lea ona faigata ia i latou ua matua faamanuiaina. O i latou o e faatuatua i le Atua e puipuia ma manuia. O le taunuuga lena o le auauna atu i le Atua ma tausi Ana poloaiga. Ae o na faamanuiaga e oo mai ai le tofotofoga ina ia faagalo le pogai. E faigofie ona amata ni lagona faapea e lei aumaia ia faamanuiaga e se Atua alofa lea tatou te faalagolago i ai, ae o lo tatou lava malosi. Ua atulasi ona tau mai e perofeta lenei lagona faanoanoa:
“Ua faapea ona tatou iloa le pepelo ma le feliuliuai o loto o le fanauga a tagata; ioe, tatou te iloa ua faamanuiaina ma faauluolaina e le Atua, i lona agalelei tele e le mafuatia, o i latou uma o e faalagolago ia te ia.
“Ioe, e mafai ona tatou iloa o le aso ua faamanuiaina ai e ia lona nuu, ioe, i le fua tele mai o latou fanua, ma a latou lafu, ma fagaga, i le auro foi ma le ario, ma mea taua uiga eseese, ma gaosiga uiga eseese; ina o faasaoina o latou ola ma laveaiina i latou ai lima o e ita mai ia te i latou; ina o faamaluluina loto o e ita ia te i latou ina ia latou le sii mai le taua ia te i latou, ioe, o lenei foi, ina o faia mea uma ina ia manuia ma fiafia ai lona nuu, e moni, o le aso lava lea latou te faamaaa ai o latou loto, ma faagalogalo foi ia te i latou le Alii lo latou Atua, ma soli i lalo o latou vae Le Paia—ioe, o lenei foi ona o lo latou filemu ma lo latou manuia matua tele.”
Ma sa ta’ua foi e le perofeta:
“Ioe, ua faataalise ona faafefeteina i le faamaualuga, ua faavave ona mitamita ma fai amioletonu uiga eseese, a ua telegese i latou e manatua le Alii lo latou Atua, ma uai atu o latou taliga i ana faatonuga, e moni, ua telegese lava ona savavali i ala o le poto!”4
E faanoanoa, o le manuia e le na o le pau lea o le mafuaaga e faagalo ai le Atua e tagata. E mafai foi ona faigata ona manatua o Ia pe a tulai mai faafitauli i o tatou olaga. A tatou tauivi, e pei ona faia e le toatele, ma le mamafa o le mativa pe faasagatau mai foi o tatou fili ia i tatou pe ua le malolo se ma’i, e mafai e le fili o o tatou agaga ona auina atu lana feau faatiapolo faapea e leai se Atua, po o le faapea afai o i ai se Atua, e le popole mai lava o Ia ia i tatou. Ona faigata lea i le Agaga Paia ona faamanatu mai o tatou faamanuiaga uma na aumai i le Alii mai lava i lo tatou pepe meamea faapea foi i le lotolotoi o o tatou taimi faigata.
E i ai se vaifofo faigofie mo le gasegase o le faagalo o le Atua, o Ana faamanuiaga, ma Ana savali ia i tatou. Sa folafola mai e Iesu Keriso i Ona soo ina o le a oo i le taimi e faasatauro ai, toetu, ona aveeseina ai lea mai ia i latou ina ia afio ae i le mamalu o Lona Tama. Sa popole i latou e fia iloa pe o le a mafai faapefea ona latou tumau pe afai e le toe i ai o Ia faatasi ma i latou.
O le folafolaga lenei. Sa faataunuuina ai mo i latou i le taimi lena. E mafai foi ona faataunuuina mo i tatou uma i le taimi nei:
“O mea ia ua ou fai atu ia te outou, manu o tatou nonofo.
“A o le Fesoasoani, o le Agaga Paia lea, e auina mai e le Tama i lou igoa, o ia lava na te aoao ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou.”5
O le ki i le manatuaina e maua mai ai ma faatumauina ai le molimau, o le mauaina lea o le Agaga Paia e fai ma se soa. O le Agaga Paia lea e fesoasoani tatou te iloa ai mea ua fai e le Atua mo i tatou. O le Agaga Paia o le e mafai ona fesoasoani ia i latou o e tatou te auauna atu i ai, ia iloa mea ua fai e le Atua mo i latou.
Ua tuuina mai e le Tama Faalelagi se mamanu faigofie mo i tatou e maua ai le Agaga Paia e le na o le faatasi, ae faaauau ai pea lava i taimi fememeai o o tatou olaga i aso taitasi. O lea mamanu o loo fai faafia i le tatalo o le faamanatuga: Ua tatou folafola atu o le a tatou manatua pea le Faaola. Ua tatou folafola atu o le a tatou tauaveina i o tatou luga Lona suafa. Ua tatou folafola atu e tausi i Ana poloaiga. Ae ua folafola mai foi ia i tatou afai tatou te faia lena mea, o le a i ai pea Lona Agaga e faatasi ma i tatou.6 E galulue faatasi folafolaga i se ala matagofie e faamalolosia ai a tatou molimau ma e oo mai le taimi, e ala i le Togiola, e suia ai o tatou natura pe a tatou tausia la tatou vaega o le folafolaga.
O le Agaga Paia o le o loo molimau mai o Iesu Keriso o le Alo Pele o se Tama Faalelagi o le e alofa ia i tatou, ma e finagalo ina ia tatou maua le ola faavavau faatasi ma Ia o ni aiga. E oo lava foi pe afai e faatoa amata ona i ai lena molimau, tatou te lagonaina se naunau e auauna atu ia te Ia ma tausi Ana poloaiga. A tatou tumau i le faiga o lena mea, tatou te maua meaalofa a le Agaga Paia e aumai ai lena mana ia i tatou i la tatou auaunaga. O le a atili manino ai la tatou vaai i le aao o le Atua, e matua manino lava e oo mai le taimi e le gata ina tatou manatua o Ia, ae ua tatou alolofa foi ia te Ia ma, o le mana foi o le Togiola, tatou te avea atili ai e faapei o Ia.
Atonu e te fesili, “Ae faapefea ona amata lea faagasologa i se tasi na te le iloa se mea e uiga i le Atua ma faapea mai na te le manatuaina lava ni aafiaga faaleagaga?” E tofu uma lava tagata ma aafiaga faaleagaga atonu latou te lei iloaina lava. O tagata uma lava, pe a ulufale mai i le lalolagi, e tuuina atu i ai le Agaga o Keriso. O loo faamatala mai i le tusi a Moronae le ala e galue ai lena agaga:
“Aua faauta, ua foaiina mai le Agaga o Keriso i tagata uma lava, ina ia iloa ai e i latou le lelei ma le leaga; o lea ua ou faailoa atu ai ia te outou le ala e faamasino ai; aua o mea uma ua valaau atu ia faia le lelei, ma ua faaoleole atu ia faatuatua ia Keriso, ua aauina atu ai i le mana ma le mea foaifuaina mai a Keriso; o lea tou te iloa ai ma le malamalama atoatoa e mai le Atua ia.
“A o mea uma e faaoleole i tagata ia faia le amioleaga, aua foi le faatuatua ia Keriso, a ia faafitia o ia, ma le le auauna i le Atua, ona iloa ai lea e outou ma le malamalama atoatoa e mai le tiapolo lava ia, aua o le ala lea e galue ai le tiapolo, aua na te le faaoleole i se tagata ia faia mea lelei, e leai lava; e le faia foi e ana agelu, pe faia e i latou o e gauai atu ia te ia… .
“O le mea lea ou te aioi atu ai ia te outou, o’u uso e, ia outou sailiili ma le filiga i le malamalama o Keriso, ina ia outou iloa le lelei mai le leaga; afai tou te fetagofi atu i mea lelei uma lava, a e le ta’uleagaina ai, e moni, e fai outou ma fanau a Keriso.”7
O lea, e oo lava foi a o lei mauaina e tagata le aia tatau i meaalofa a le Agaga Paia pe a faamauina i latou e avea ma tagata o le Ekalesia, e oo lava foi a o lei faamautuina e le Agaga Paia le upumoni ia te i latou a o lei faia le Papatisoga, ua i ai o latou aafiaga faaleagaga. Ua uma lava ona valaaulia i latou e le Agaga o Keriso, mai lo latou laiti, e faia mea lelei ma lapataia foi i latou mai mea leaga. Ua ia i latou le manatua o na aafiaga tusa lava foi pe latou te lei iloaina lo latou faapogai. O le a toe foi mai lena manatua ia i latou pe a aoaoina i latou e faifeautalai po o tatou i le afioga a le Atua ma latou faalogoina. O le a latou manatuaina le lagona o le olioli po o le faanoanoa pe a aoaoina i latou i upumoni o le talalelei. Ma o lena manatuaina o le Agaga o Keriso o le a faamaluluina ai o latou loto e faataga le Agaga Paia e molimau atu ia te i latou. O le a taitaiina ai i latou e tausia poloaiga ma mananao e tauave le suafa o le Faaola i o latou luga. Ma a o latou faia, i le vai o le papatisoga, ma a o latou faalogo o ta’u e se auauna ua faatagaina a le Atua ia upu i le faamauga “Talia le Agaga Paia,” ona faateleina ai lea o le mana e manatua ai pea lava pea le Atua.
Ou te tautino atu ia te outou o lagona mafanafana sa outou maua, a o outou faalogologo i le laugaina o upumoni i lenei konafesi e mai le Agaga Paia. O le Faaola, o le na folafola mai o le a auina mai le Agaga Paia, o le Alo pele, mamalu o lo tatou Tama Faalelagi.
O le po nei, ma le po a taeao, atonu o le a e tatalo ma mafaufau, ma fesili: “Pe na auina mai e le Atua se savali na patino mo au?” Pe sa ou vaaia Lona aao i lo’u olaga po o olaga o la’u fanau? O le a ou faia lena mea. Ona ou sailia ai lea o se ala e teu ai lena manatua mo le aso o le ou manatua ai, ma manatua ai e i latou ou te alofa i ai, le tele o le alofa o le Atua ia i matou ma le tele matou te manaomia ai o Ia. Ou te tautino atu e alofa o Ia ia te i tatou ma faamanuia ia i tatou, e sili atu nai lo le mea ua tatou iloa. Ou te iloa e moni lena mea, ma e aumaia ai le olioli ia te au i le manatuaina o Ia. I le suafa o Iesu Keriso, amene.