Lelei, Lelei Tele, Lelei Silisili

Elder Dallin H. Oaks

O Le Korama a Aposetolo e Toasefululua

E ao ona tatou tuuese nisi o mea lelei ina ia filifili ai mea e lelei tele pe sili atu le lelei aua latou te atiina ae ai le faatuatua i le Alii o Iesu Keriso ma faamalolosia ai o tatou aiga.

Ata

O le toatele o i tatou e moomia ona faia ni mea se tele nai lo mea e mafai ona tatou faia. I le avea ai ma tagata e faigaluega e maua ai tupe e tausi ai le aiga, o ni matua, o ni tagata galulue o le Ekalesia ma ni tagata o le Ekalesia, tatou te feagai ma le tele o filifiliga po o a ni mea o le a tatou faia i o tatou taimi ma isi punaoa.

I.

E tatau ona tatou amata i le iloaina lea o le mea moni, e le faapea a lelei se mea ona lava ai lea o se mafuaaga e faia ai. O le aofaiga o mea lelei e mafai ona tatou faia e sili mamao atu nai lo le taimi avanoa e faataunuuina ai. O nisi mea e lelei tele nai lo le lelei, ma o mea na e tatau ona matuai taulai atu i ai le faamuamua i o tatou olaga.

Na aoao atu e Iesu lenei mataupu faavae i le fale o Mareta. A o “tiga o ia i le fatuaiga” (Luka 10:40), o lona uso, o Maria, sa “nofo i lalo i tafatafa o vae o Iesu, ma faalogo i lana fetalaiga” (f. 39). Ina ua faitio Mareta faapea ua tuu atu na o ia e lona uso e faia toatasi le tapenaga, sa faamalo atu Iesu ia Mareta mo le mea sa ia faia (f. 41) ae sa aoaoina o ia e faapea “o le mea lava e tasi e ao ina ia maua: ua filifilia foi e Maria lea mea lelei, e le aveeseina ia te ia” (f. 42). Sa tauleleia e Mareta le “pupū i mea e tele” (f. 41), ae o le aoaoina o le talalelei mai le Matai Faiaoga sa sili ona “manaomia.“ O loo aofia ai i tusitusiga paia le tele o isi aoaoga e faapea o nisi mea e sili atu ona manuia nai lo isi (tagai Galuega 20:35; Alema 32:14–15).

O se aafiaga a o o’u laitiiti na faailoa mai ai ia te au le manatu faapea o nisi filifiliga e lelei ae o isi e lelei tele. E lua tausaga o o’u ola i se faatoaga. E seāseā ona matou o i le taulaga. O le matou faatauga o le Kerisimasi sa faia i luga o tusi faatau a le Sears, Roebuck. E tele ni itula sa ou faaaluina e matamata ai i ona itulau. Mo aiga maotua i na aso, o itulau o tusi faatau sa pei o se faleoloa faatau po o le Initoneti i o tatou taimi.

O nisi oloa faatau i totonu o le tusi sa tosina atu i ai lo’u mafaufau. E tolu lava ituaiga: lelei, lelei tele, ma le lelei silisili. Mo se faataitaiga, o nisi seevae o alii sa faaigoaina e lelei ($1.84), o nisi e lelei tele ($2.98), ae o nisi e lelei silisili ($3.45).¹

A o tatou manatunatu i filifiliga eseese, e tatau ona tatou manatua e le lava le na ona lelei o se mea. O isi filifiliga e lelei tele, ae o isi e silisili ona lelei. E ui lava o se filifiliga patino e taugata atu, ae o lona taua naua e avea ai ma filifiliga e silisili atu.

Manatunatu i le auala tatou te faaaogaina ai o tatou taimi i filifiliga tatou te faia e matamata ai i le televise, taaalo ai i taaloga vitio, asiasi ai i le Initoneti, po o le faitauina o tusi po o mekasini. E moni e lelei le matamata i faafiafiaga e lelei po o le mauaina o ni faamatalaga e fiafia i ai. Ae le o mea uma o lena ituaiga e aoga i le vaega o lo tatou olaga tatou te faaaluina ina ia maua ai. O nisi mea e lelei tele, ae o isi e silisili ona lelei. Ina ua fetalai mai le Alii ia i tatou ina ia suesue i le atamai, na Ia fetalai mai, “Ina saili atu ia outou i upu o le poto mai tusi sili ona lelei” (MFF 88:118; ua faatusilima mea e faamamafa).

II.

O nisi o a tatou filifiliga e sili ona taua e faatatau i gaoioiga faaleaiga. E toatele tagata e na o latou e faigaluega e popole ona ua laitiiti o latou taimi mo o latou aiga ona o a latou galuega. E leai se fua faigofie mo lena feteenaiga i mea e faamuamua. Ae peitai, ou te le iloa lava se tagata e toe tepa i tua i sona olaga faigaluega ma faapea ane, “E le’i lava lo’u taimi sa faaalu i la’u galuega.”

I le filifilia pe faapefea ona tatou faaaluina le taimi o se aiga, e tatau ona tatou faaeteete ina ia aua ne’i alu uma lo tatou taimi avanoa i mea e lelei, ae laitiiti ai se taimi mo mea e lelei tele pe sili ona lelei. Na ave e se uo lona aiga talavou i ni malaga tafafao i le taumafanafana, e aofia ai le asiasi atu i nisi o nofoaga tautaua. I le faaiuga o le taumafanafana sa ia fesili atu ai i lona atalii talavou po o fea o nei gaoioiga o le taumafanafana sa sili ona ia fiafia i ai. Sa aoaoina e le tamā mai le tali, e faapea foi i latou sa ia ta’uina atu i ai. “O le mea sa sili ona ou fiafia i ai i lenei taumafanafana,” sa tali atu ai le tamaitiiti, “o le po lea sa ta taotooto ai i luga o le mutia ma vaavaai i fetu ma talatalanoa.” O gaoioiga maoae faaleaiga e mafai ona lelei mo le fanau, ae le sili atu ona lelei nai lo le taimi e feiloai taitoatasi ai ma se matua alofa.

O le aofaiga o le taimi o fanau-ma-matua e alu i gaoioiga lelei o lesona patino, taaloga fai ‘au, ma isi gaoioiga a le aoga ma kalapu e moomia foi ona faafoe ma le faaeteete. A leai, o le a soona lofituina foi fanau i mea e fai ma o le a le lavavā ma le mautonu matua. E tatau ona gaoioi matua ina ia faasaoina le taimi mo tatalo faaleaiga, suesueina o tusitusiga paia e le aiga, afiafi faaleaiga, ma isi faatasiga taua ma taimi e feiloai taitoatasi ai lea e fusia faatasi ai se aiga ma fesoasoani ai i fanau e faataua mea na e faavavau le aoga. E tatau ona aoao atu e matua mea e faamuamua o le talalelei e ala i mea latou te faia faatasi ma a latou fanau.

Ua lapatai mai le au atamamai i mataupu tau i le aiga e tetee i le mea ua latou taua o le “soona fuafuaina o taimi o fanau mo gaoioiga.” I le augatupulaga mulimuli ua sili atu ona pisi fanau ma ua matuai tau leai ai lava se taimi e faaaluina faatasi e le aiga. Faatasi ai ma le tele o mafuaaga o lenei tulaga faiifo o lipoti e faapea o le taimi e alu i taaloga faatulagaina ua faaluaina, ae o le taimi saoloto o fanau ua tuuitiitia i le 12 itula i le vaiaso, ae o gaoioiga i fafo e le fuafuaina ua pau ifo i le 50 pasene.²

O le aofai o i latou o e na lipotia mai faapea “o lo latou aiga atoa e masani ona fai ‘aiga faatasi i le afiafi” ua pau ifo i le 33 pasene. E sili atu ona popole i le tulaga lenei aua o le taimi e faaalu faatasi e se aiga e “taumamafa faatasi ai i le fale [o se] faailo malosi lea o le solosolo manuia o tamaiti i le aoga, ma le tomai e fetuunai ai tulaga o le olaga.”³ O taimi o taumafataga faaleaiga o loo faaalia foi le avea ma se puipuiga malosi i fanau e tetee atu ai i le ulaula, inu pia, po o le faaaogaina sese o fualaau.⁴ O loo i ai se atamai musuia i le fautuaga lenei i matua: O le mea e sili ona mananao i ai fanau mo le taumafataga o le afiafi, o oe.

Ua aioi mai Peresitene Gordon B. Hinckley ina ia tatou “galulue i lo tatou tiutetauave i le avea ai ma matua e pei lava o loo faalagolago i ai mea uma o le olaga, aua o le mea moni o loo faalagolago i ai mea uma o le olaga.” Sa ia faaauau:

“E patino ona ou talosaga atu ia te outou alii, ina ia faatali teisi lava ma toe fai se iloiloga o outou lava i le avea ai ma tane ma tama ma ulu o aiga. Tatalo mo se taiala, mo le fesoasoaniga, mo le taitaiga, ona mulimuli lea i musumusuga a le Agaga ina ia taialaina oe i le tiutetauave sili ona ogaoga o tiutetauave uma, aua o taunuuga o lau taitaiga i lou aiga o le a faavavau ma tumau.”⁵

Ua talosagaina e le Au Peresitene Sili ia matua ina “ia tuuto a latou taumafaiga silisili i le aoaoina ma le tausiga o a latou fanau i mataupu faavae o le talalelei… . O le aiga o le faavae lea o se olaga amiotonu, ma e leai se isi meafaigaluega e mafai ona suia lona tulaga … i … lenei tiutetauave ua tuuina mai e le Atua.” Ua faailoa mai e le Au Peresitene Sili “peitai, tusa pe o le a le taua ma le talafeagai o isi mea e manaomia po o gaoioiga, e le tatau ona faatagaina e suitulaga i tiute paia ua faatonuina mai e le Atua, ia e na o matua ma aiga e mafai ona faia lelei ai.”⁶

III.

E tatau i taitai o le Ekalesia ona malamalama o sauniga ma gaoioiga a le Ekalesia e mafai ona matuai faigata lava ma avea ma avega mamafa pe afai e taumafai se uarota po o se siteki e fai uma mea e lelei ma mafai i le anoanoai o a tatou polokalama a le Ekalesia. E moomia ai foi iina le faatulaga o mea e faamuamua.

Ua faamamafa mai e sui o le Korama a le Toasefululua le taua o le faaaoga o le faamasinoga musuia i polokalama ma gaoioiga a le Ekalesia. Na aoao mai e Elder L. Tom Perry lenei mataupu faavae i la tatou uluai fonotaga faaleaoaoga mo taitai i le lalolagi i le 2003: I le fautuaina foi o ia lava taitai i le 2004, na saunoa ai Elder Richard G. Scott: “Ia fetuunai a outou gaoioiga ina ia ogatasi ma tulaga ma puanoa i le lotoifale… . Ia mautinoa o loo ausia manaoga taua, ae aua le soona faia i le fatuina o le tele o mea lelei e faia ae le ausia ai mea e taua… . Ia manatua, aua ne’i faateleina le galuega e ao ona faia—ia faafaigofie.”⁷

I le konafesi aoao i le tausaga na tea nei, na lapatai mai ai Elder M. Russell Ballard e tusa ma le soloitua o sootaga faaleaiga lea e mafai ona oo i ai pe a tatou faaaluina le tele o le taimi i gaoioiga e le lelei ae laitiiti se aoga faaleagaga. Sa ia lapatai mai e uiga i le faafaigataina o la tatou auaunaga i le Ekalesia “i mea faaopoopo e le manaomia lea e tele le taimi e alu ai, taugata tele tupe e fai ai, ma tele le malosi e alu ai… . O le faatonuga ina ia faalauteleina o tatou valaauga e le o se poloaiga ina ia faaopoopoina ma faafaigata. Ina ia faataitai ni manatu fou e le faapea o lona uiga o le faalautele; e masani lava o lona uiga o le faafaigofie… . O le mea e sili atu ona taua i o tatou tiutetauave o le Ekalesia,” na ia saunoa ai, “e le o fuainumera o loo lipotiina atu po o fonotaga o loo faia ae pe o auauna atu ea taitoatasi i tagata taitasi—e pei ona faia e le Faaola—e siitia ma uunaia seia oo ina suia.”⁸

E moomia e au peresitene o siteki ma au epikopo ona faaaogaina lo latou pule e aveese ai ia mau mea le aoga na e moomia mai nisi taimi i tagata o a latou siteki po o uarota. O polokalama a le Ekalesia e tatau ona taulai atu i le mea e sili ona lelei (sili ona aoga) i le ausiaina o o latou faamoemoega ua tofiaina e aunoa ma le faalavelave fua i taimi e moomia e aiga mo o latou “tiute ua faatonuina ai e le Atua.”

Ae o se lapataiga lenei mo aiga. A faapea o lea ua tuuitiitia e taitai o le Ekalesia le taimi e moomia i fonotaga ma gaoioiga a le Ekalesia ina ia faateleina ai le taimi avanoa mo aiga e faatasia ai. O le a le ausia lenei faamoemoega sei vagana ua matuai galulue ma le maelega tagata o le aiga—aemaise lava o matua—ina ia faateleina le faatasia o le aiga ma taimi e feiloai taitoatasi ai. O taaloga fai ‘au ma meataalo faatekinolosi e pei o taaloga vitio ma le Initoneti o loo manumalo i le faoina o le taimi o a tatou fanau iti ma le autalavou. O le asiasi i le Initoneti e le sili atu lona lelei nai lo le auauna atu i le Alii po o le faamalosia o le aiga. O nisi alii ma tamaitai talavou ua latou faamisia ia gaoioiga a le autalavou o le Ekalesia po o le tipi o taimi faaleaiga ina ia auai atu ai i taaloga soka po o le auai atu i nisi o faafiafiaga. Ua i ai nisi o le autalavou ua latou sailia ia fiafiaga e tau atu ai i le oti—oti faaleagaga.

O nisi faaaogaga o taimi taitoatasi ma taimi faaleaiga e lelei tele, ae o isi ua sili atu le lelei. E ao ona tatou tuuese nisi o mea lelei ina ia filifili ai mea e lelei tele pe sili atu le lelei aua latou te atiina ae ai le faatuatua i le Alii o Iesu Keriso ma faamalolosia ai o tatou aiga.

IV.

O nisi nei o faataitaiga o le lelei, lelei tele, ma le lelei silisili.

E lelei le auai i le Ekalesia moni a lo tatou Tama o i le Lagi ma tausia uma Ana poloaiga ma ia faataunuu uma o tatou tiute. Ae afai o lenei vaega e agavaa ai mo se “lelei silisili,” e tatau ona faia ma le alofa e aunoa ma le faasausili. E tatau ona tatou, e pei ona tatou lagiina i se viiga maoae, “faapaleina lo [tatou] lelei i le usoga,”⁹ e faaalia le alofa ma le manatu mo i latou uma e aafia i o tatou olaga.

I a tatou faiaoga o aiga ma faiaoga asiasi e fia selau afe, ou te fautua atu faapea e lelei le asiasi atu i o tatou aiga ua tofiaina; e lelei tele le maua o sina feiloaiga puupuu lea tatou te aoao atu ai aoaoga faavae ma mataupu faavae; ae sili atu ona lelei i mea uma lava le faia o se suiga i olaga o i latou o e tatou te asia. O lena luitau e tasi e faatatau foi i le tele o sauniga tatou te faia—e lelei ona faia se fonotaga, e lelei tele pe a aoao atu ai se mataupu faavae, ae sili atu ona lelei le faaleleia o olaga e mafua mai i le fonotaga.

A o tatou taulalata atu i le 2008, ma se kosi fou e aoaoina i a tatou korama a le Perisitua Mekisateko ma le Aualofa, ou te toe faamanatu atu la matou lapataiga i le auala tatou te faaaoga ai ia tusi lesona o Aoaoga a Peresitene o le Ekalesia. E tele tausaga o galuega musuia na gaosia mai ai la tatou voluma o le 2008 o aoaoga a Iosefa Samita, le perofeta faavae o lenei tisipenisione. O se tusi taua tele lenei i tusi a le Ekalesia. I tausaga ua tuanai, e tuuina atu ai e nisi o faiaoga se mataupu o tusi lesona o Aoaoga mo na o sina taimi puupuu ona suitulaga ai lea i se lesona e filifilia e i latou lava. Atonu o se lesona lelei, ae o lenei faiga e le taliaina. O se faiaoga o le talalelei, ua valaauina e aoao atu ia mataupu atofaina mai tusi musuia ua saunia. O le mea e sili atu ona lelei e mafai ona faia e se faiaoga i Aoaoga: Iosefa Samita o le filifili lea ma sii mai upu a le Perofeta i mataupu faavae e fetaui lelei i manaoga o tagata o le vasega, ona taitai lea o se talatalanoaga a le vasega i auala e faaaoga ai na mataupu faavae i tulaga o o latou olaga.

Ou te molimau atu e uiga i lo tatou Tama Faalelagi, o i tatou o Lana fanau ma o Lana fuafuaga ua fuafuaina ina ia agavaa ai i tatou mo le “ola faavavau … o le meaalofa sili lea i lo meaalofa uma a le Atua” (MFF 14:7; tagai foi MFF 76:51–59). Ou te molimau atu e uiga ia Iesu Keriso, o Lana Togiola ua mafaia ai. Ma ou te molimau atu o loo taitaiina i tatou e perofeta, lo tatou Peresitene o Gordon B. Hinckley ma ona fesoasoani, i le suafa o Iesu Keriso, amene.