Vitio: Tufugaaao o le Atua
O se vitio na faaalia i le taimi o le sauniga aoao a le Aualofa o loo faaalia ai Peresitene Gordon B. Hinckley o faamatalaina le talafaasolopito o le Aualofa. I le taimi o le vitio, o loo faaalia ai se fonotaga a le Perofeta o Iosefa Samita, Ema Samita, Lusi Maki Samita, ma uso na amataina le Aualofa, na fai i totonu o se faleoloa piliki lanumumu.
Peresitene Hinckley: O le tuputupu a’e o le Aualofa mai sui e 18, ina ua faatulagaina i le aso 17 o Mati, 1842, i tuaoi i sisifo o le aai o Navu, i le silia ma le lima miliona ua i ai i le 160 tausaga mulimuli ane, ma ona sui i nuu tetele ma nuu laiti i le lalolagi atoa, o se tala umi tulaga ese ma le ofoofogia.
O elemene na ola mai ai le Aualofa, na mua’i ona i ai a o le’i faatulagaina. O na elemene e aofia ai le uiga faanatura o tamaitai e aapa atu e fesoasoani e uuna’ia mea lelei, e fesoasoani ia i latou e faanoanoa, ma faaleleia o latou lava mafaufau ma taleni. Ma o lena na faatulagaina ai e Iosefa Samita i latou i se sosaiete.
Iosefa Samita: O lenei “Sosaiete o Tuafafine e ono musuia ai le usoga e faia galuega lelei e taulima ai manaoga o e matitiva—ma saili atu i avanoa e fai ai galuega alofa, ma auauna atu i mea latou te manaomia—e fesoasoani; e faasa’osa’o mataupu autu ma faamalolosia amioga lelei a tagata.”1
Peresitene Hinckley: Mai i lena amataga faatauvaa ua tula’i mai ai se faalapotopotoga ou te manatu ua aupito sili ma aoga i le lalolagi atoa.
I lena uluai fonotaga, ina ua filifilia Ema H. Samita e avea ma peresitene, sa ia fai mai “e tatau i uso taitasi ona naunau e fai mea lelei.”2 O le agaga lena i lena taimi, ma o le agaga foi lena i le taimi nei. E ao ina faaauau pea e avea ma mataupu faavae e taialaina ai i augatupulaga uma i le lumanai— “e tatau i uso taitasi ona naunau e fai mea lelei.”
Ema Samita: “O le a tatou faia se mea e tulaga ese… . Tatou te nofo sauni mo mea e le masani ai ma valaau faanatinati.”3
Iosefa Samita: “E tatau ona maua e lenei Sosaiete faatonuga e ala mai i le faatulagaga ua faatuina e le Atua— [e ala mai] ia i latou ua tofia e taitai.”4
“O le natura lava o tamaitai le i ai o lagona o le alofa—ma ua tuu nei outou i se tulaga e mafai ai ona outou galulue e tusa ai ma na tigaalofa ua toto e le Atua i o outou loto. Afai tou te ola ai i nei mataupu faavae sili ma le mamalu!—afai tou te tausisia o outou avanoa, e le mafai ona taofia agelu mai le fesoasoani atu ia te outou… . E le o le taua, e le o le fevataua’i, e le o le femisaa’i, e le o le fevaevaea’i, ae o le agamalu, alofa, mama, o mea nei e tatau ona faasusulu atu ai i tatou… .
“Ona liligi mai ai lea o faamanuiaga o le lagi… .
“A outou o i le fale, ia aua lava nei soona tautala le mafaufau, ae ia avea le agalelei, alofa ma le agamalu, e uuna’ia ai au galuega i le lumanai… .
“A o faateleina lo outou lotomama ma le amioatua, a o faateleina lo outou lelei, ia faateleina—lo outou alolofa atu i isi—e ao ina outou lava papale ma onosa’i i faaletonu ma sese o tagata. E taua tele agaga o tagata! …
“… Ma ua ou tatalaina nei le faitotoa mo outou i le suafa o le Atua ma o le a olioli lenei Aualofa ma o le a tafe atu le poto ma le malamalama i lalo e amata atu i le taimi nei—o le amataga lenei o aso sili mo lenei Aualofa.”5
Peresitene Hinckley: O lena saunoaga faaperofeta na avea ma se faamaumauga aloa’ia i le seneturi ma le afa o le Sosaiete a le Aualofa O Le Ekalesia a Iesu Keriso o le Au Paia o Aso e Gata Ai.
O Lusi Maki Samita, le tina o le Perofeta, ina ua saunoa atu i tuafafine i Navu e faapea,
Lusi Maki Samita: “E ao ina tatou fefaapelepelea’i e le tasi le isi, fetausia’i, fefaamafanafanaa’i, ma ia maua aoaoga ia mafai ai ona tatou toe mafuta faatasi i le lagi.”6
Peresitene Hinckley: Ua faaalia e le talafaasolopito o le faalapotopotoga, e le’i taufaatalitali tamaitai o le Ekalesia se’i mafuta faatasi i le lagi ona faatoa tofo ai lea i le suamalie o fua o ituaiga gaoioiga sa ia faamatalaina.
Ua telē lo latou silafia o le lagi i le olaga nei, aua ua latou fefaapelepelea’i le tasi i le isi i le olaga nei, fefaamafanafanaa’i, ma fea’oa’oa’i e le tasi le isi. O ai na te mafai ona faavasegaina aafiaga ofoofogia i olaga o le faitau miliona o tamaitai, o ē ua faateleina lo latou silafia, ua lautele la latou vaaiga mamao, ua siitia o latou olaga, ma o lo latou malamalama i mea a le Atua ua faamauoaina i lesona e le mafaitaulia, e aoaoina lelei i fonotaga a le Aualofa?
O ai e mafai ona ia fuatia le olioli e oo mai i olaga o nei tamaitai a o latou miomiō faatasi, ma fegalegalea’i faatasi i se siosiomaga o le uarota po o le paranesi, ma faamauoa ai olaga o le tasi ma le isi e ala i faauoga ua suamalie ma faatauaina? O ai, e mafai ona silafia, ma malamalama i galuega e le masino o le alofa ua faatino, o meaai ua tuu i luga o laulau, o le faatuatua na faafailele i itula o le atuatuvale ona o ma’i, o manu’a sa fusifusia, o tiga ua faaleleia e lima alolofa ma upu filemu ma le mautinoa, o le mafanafana na tuuina atu i taimi o le maliu ma le tuulafoaiina?
A o saunoa e uiga i le Aualofa, na ta’ua ai e Peresitene Iosefa F. Samita i se tasi taimi e faapea: “O lenei faalapotopotoga na fauina i le lagi, e pulea faalelagi, na amataina faalelagi, faauuina faalelagi e le Atua e galulue mo le faaolataga o agaga o tamaitai faapea foi ma alii. O le mea lea, e leai se isi faalapotopotoga e mafai ona faatusatusa i ai, … e mafai ona faia le galuega o loo faia e le Aualofa.
“… Ia faamuamua le [Aualofa], ia taulamua, ia aupito maualuga, ia aupito sili ma loloto nai lo se isi lava faalapotopotoga o i ai i le lalolagi. Ua tofia outou i le siufofoga o le Perofeta a le Atua e fai, ia pito i luga, ia aupito maoa’e ma aupito sili, ma aupito mama ma aupito faamaoni i le mea tonu.”7
Ia faamanuia e le Atua le Aualofa O Le Ekalesia a Iesu Keriso o le Au Paia o Aso e Gata Ai. Ia faaauau pea ona tupu le agaga o le alofa, lea na uuna’ia ai ona tagata i le silia ma le seneturi ma le afa, ma ia lagonaina i le lalolagi atoa. Ia pa’i atu a latou galuega alofa mo le lelei o soifua o tagata e le mafaitaulia i soo mea e faaalia ai. Ia avea foi le malamalama ma le silafia, poto ma le atamai, ma upumoni o le faavavau, ma mea e faaleleia atili ai olaga o augatupulaga o tamaitai o le a oo mai, i atunuu uma o le lalolagi, ona o lenei faalapotopotoga faapitoa na faatuina faalelagi. Talosia ia amana’ia e tagata taitoatasi uma, la latou matafaioi tele ma faamanuiaga e avea ai ma “tufugaaao o le Atua e faataunuu ai lenei galuega tele” (Alema 26:3).