Ia Saunia … Ia Outou Malolosi e Amata Atu Nei Lava

Epikopo Keith B. McMullin

Fesoasoani Lua i le Au Epikopo Pulefaamalumalu

E le mafai lava ona manumalo mala ma faigata i le mea e tausisia ai le amiotonu.

Pe i ai ea se taimi na e i ai i se talanoaga ae faafuase’i ona manaomia lou le toe pisa ina ua faauiga sese ma ta’ufaatauvaaina sou manatu? Na tupu se mea faapena ia te a’u pe tusa ma le 25 tausaga talu ai, ma sa tumau pea lo’u le fiafia i lena talanoaga e le’i mae’a e oo mai i lenei aso.

A o avea a’u ma se peresitene o le misiona, sa valaaulia a’u ma nisi mai le Ekalesia, e fono ma le pulenuu o se tasi o aai o la matou misiona. Sa faaaloalo lava o ia ma talia i matou i lona ofisa. O la matou talanoaga sa faatatau i atugaluga o lena taimi. Mulimuli ane, sa ia fesili pe aisea e faia ai e le Ekalesia ia galuega faafaifeautalai i lona nuu.

E le o se mea faapea ou te le’i faamoemoeina lea tulaga. Sa oo mai se uunaiga ia te a’u i ni nai vaiaso a o lumanai ai, o le a ia fai mai lenei fesili ae pe o le a la sa’u tali. Sa ou tali atu, “O le talalelei a Iesu Keriso, e maua ai tali ma vaifofo o faafitauli uma a le lalolagi, e aofia ai foi ma faafitauli o loo feagai ma tagata lelei o lou nuu. Ma o le mafuaaga lena o lo matou i ai iinei.”

Sa ia te a’u le faamoemoega atoatoa o le a manao le pulenuu e fia iloa atili. Peitai, sa suia ona uiga. Sa suia ona foliga i le le talitonu, ma le manatu faatauvaa. Sa avaavau o ia e uiga i la’u tali mamā i luitau o le lalolagi, ma sa faafuase’i ai ona faamuta la matou talanoaga. E le’i faatagaina se isi faamatalaga.

O le taeao nei, ua ou manao ai ina ia faamae’a lena talanoaga. Ou te faamoemoe o faafofoga mai lea pulenuu lelei, aua o mea o loo mulimuli mai e taua i se lalolagi ua mafatia.

Ua tatou malamalama lelei i mafatiaga matautia o tausaga talu ai nei. Ua matua tasoo mai ma ogaoga. E matua’i fe’ai malosiaga faanatura i o latou foliga, o le faaoolima faaletagata ua matua’i leai se alofa i le faamaligi toto, o mana’oga soona fai o le tino ua oo atu ai i faiga faatufanua, o solitulafono, ma ua lalata mai ai se tulaga matuia tele o le olopalaina o le aiga. O galulolo i Asia i saute ma afa i le Iunaite Setete, ma la latou sasa mata’utia, o mala aupito lata mai na sa tatou feagai. Sa aapa atu loto ma lima mai le lalolagi atoa ia i latou sa matua aafia ai. Mo sina taimi puupuu, sa gauai atu ai i latou sa feeseesea’i, i le alofa ma le agalelei.

Tatou te nonofo aitalafu ia i latou e fesoua’iina i mala faigata, aua latou te faamanatu mai ia i tatou le faalagolago o le tagata i le Atua. Sa i ai se tina ua oti lana tane i se tolauapiga a le au sulufai, sa matua mafatia ona o le fasiotia faamo’amo’a o lana fanau tama ma sa ia tagitautala ai i upu nei, “E le tatau ona ou lafoa’ia lo’u faatuatua.” Sa auina atu e i latou na sao mai ai se augani, ina ua lofituina i le mateletele o [le afa fulifao] o Katrina, “Tatalo mai mo i matou.”¹

O mafuaaga o ia mala o autu na o felafolafoa’iga e le uma. E tofu le au faasalalau, o le au faiupu fai, o saienitisi, ma le toatele o isi, ma o latou manatu i mafuaaga.

Na fetalai mai le Alii o Iesu Keriso, e faatatau i le Toefuataiina mai o Lana talalelei:

“O le mea lea, o a’u le Alii, ina ua iloa le malaia o le a oo mai i luga o tagata o le lalolagi, na ou valaauina la’u auauna o Iosefa Samita, le itiiti, ma ua ou tautala atu ia te ia mai le lagi ma ua tuuina atu ia te ia poloaiga …

“Ina sailia nei poloaiga, aua ua moni ia ma faamaoni lava, ma o valoaga uma ma folafolaga o i ai o le a faataunuuina.”²

Tatou liliu atu i mafuaaga po o faamoemoega e oo mai ai na malaia. O le mea e lelei ai, e le manaomia ni felafolafoa’iga iinei, aua ua ia te i tatou le atoaga o le talalelei a Keriso, lea e mafai ona tatou faalagolago i ai. Saili atu i upu a perofeta i le Tusi a Mamona ma le Tusi Paia; faitau i aoaoga a Iesu Keriso i le mataupu e 24 o le Mataio;³ suesue i faaaliga a le Alii i aso e gata ai o loo i le Mataupu Faavae ma Feagaiga.⁴ O iina tatou te iloa ai faamoemoega o le Atua i na mea.

O mala o se ituaiga lea o puapuaga, ma o puapuaga o se vaega e tatau ai o le fuafuaga a le Tama Faalelagi mo le fiafia o Lana fanau.

Afai e i ai tonu o tatou loto i le Atua, o puapuaga e aoaoina ai i tatou, e fesoasoani tatou te faatoilalo ai o tatou natura faalelalolagi, ma faafailele ai le aloiafi paia ua i totonu o i tatou. Pe a na leai puapuaga, semanu tatou te le iloa ona filifili i le “vaega sili atu.”⁵E fesoasoani puapuaga tatou te iloa ai pe o le a le mea e tatau ona tatou salamo ai, e faagaua’i atu ai o tatou lava loto, e talia ai le amiotonu ma olioli i le “filemu o le loto fuatiaifo.”⁶

O le tele o lo tatou taofimau i le amiotonu, o le tele foi lena o lo tatou fiafia i le tausiga alofa a lo tatou Faaola. O Ia o le Mata’isau ma le Alii o le atulaulau. Na te faafilemu i matagi ma galu.⁷ O Ana aoaoga ma le Togiola e faamaloloina ai le agaga salamo. O Ia o le Mesia po o le Faaola, ma o Ia, lea e mafai ai e i tatou taitoatasi ona faafoe lona lalolagi patino, tusa foi pe lofituina i tatou i faigata. Faafofoga mai i nei upumoni:

“E afio mai le Mesia i le atoatoa o aso ina ia togiola e ia le fanauga a tagata ai le pau. Ina ua togiolaina i latou ai le pau, ua saoloto ai i latou e faavavau, o loo iloa le lelei ai le leaga, e filifili mo i latou lava, ae le galueaiina, sei iloga o le faasalaina i le tulafono i le aso tele ma le gataaga, e tusa ma poloaiga ua aumaia e le Atua.

“O lea ua saoloto ai tagata i la le tino, ma ua foaiina mai ia te i latou mea uma e tatau i tagata. Ua saoloto foi i latou e filifili le saolotoga ma le ola faavavau talu le Puluvaga sili o tagata uma, pe filifili le faatoilaloina ma le oti, e tusa ma le faatoilaloina ma le mana o le tiapolo, aua na te saili ina ia malaia tagata uma e pei o ia lava.”⁸

E lelei pe a tatou manatua, o le tiapolo o le faaoosala.

E moni, o le olaga lenei, e na o tulaga e faatagaina ai e o tatou olaga faaletino, tatou te saoloto ai. Atonu e le mafai ona tatou tatalia ia taua i nuu mamao, pe taofia foi e si o tatou lima vaivai le matamataita o matagi malolosi, pe taufetuli punoua’i foi pe a noanoatia o tatou tino i ma’i. Ae e moni lava, o na mea e le pulea atoatoa ai lo tatou lalolagi faaletagata. O i tatou lava!

Sa tautino mai e le Perofeta o Iosefa Samita: “O le fiafia o le faamoemoega lea o le mamanu o lo tatou olaga nei; ma o le iuga foi lena, pe afai tatou te tulimata’i atu i le ala e tau atu i ai; ma o lena ala o le amioatua, faamaoni, faatuatua, pa’ia, ma le tausia o poloaiga uma a le Atua.”⁹

Ma o lea, lau afioga mamalu a le alii Pulenuu, o le talalelei a Iesu Keriso e maua ai tali i faafitauli uma a le lalolagi, i se tulaga patino, aua o loo aumai ai vaifofo mo gasegase o tagata soifua uma.

O taimi uma lava e osofa’i mai ai se malaia, e i ai foi ma se matafaioi paia i o tatou luga taitoatasi ina ia lelei atili. E ao ina tatou fesili ifo ia i tatou lava, “O le a le vaega o lo’u olaga e moomia ona suia ina ia aua ai ne’i ou lagonaina le mamafatu o le a’oa’iga?”

O tusitusiga paia o loo faamanino mai ai e le Alii Lona faamoemoega mo i tatou pe a oo mai na ituaiga o faamasinoga. Ua Ia fetalai mai: “Ina fusi ia o outou sulugatiti ma saunia. Faauta, e o outou le malo, e le manumalo lava foi le fili.”¹⁰

Ua poloaiina le Ekalesia ma ona tagata ina ia faalagolago le tagata ia te ia lava, ma ia tu sa’oloto.¹¹ O le saunia e amata i le faatuatua, lea e mafai ai ona faafoe suiga leaga pe a o’o mai. Tatou te vaai atu i le olaga lenei, o se malaga sauniuni. O le faatuatua i le Alii ma Lana talalelei, e faatoilalo ai le atuatuvale ma fanau mai ai le faaleagaga.

E tupu le faaleagaga pe a tatou “tatalo, ma … savavali tonu i luma o le Alii.”¹² O le “loto fuatiaifo o le manumalo ia te oe lava ma le fesootaiga ma le Silisiliese.”¹³

O le faatuatua, faaleagaga, ma le usiusitai e maua mai ai tagata ua saunia ma faalagolago ia i latou lava. A tatou usitai i le feagaiga o le sefuluai, e puipuia mai i tatou mai mana’oga ma le mana o le faaoosala. A tatou usitai i le anapogi ma foai atu ma le lima foai mo le tausiga o isi, e faafofogaina mai a tatou tatalo ma faateleina le faatuatuaina o le aiga. E tali tutusa lava ma faamanuiaga tatou te maua pe a tatou usitai i fautuaga a perofeta ma ola ai i mea ua tatou maua, aloese i aitalafu e le tatau ona faia, ma teu faaagaga ia lava mea e manaomia e tausi ai i tatou lava ma o tatou aiga mo se taimi e le itiiti ifo i le tausaga. Atonu e le faigofie i taimi uma lenei tulaga, ae ia tatou faia le “mea silisili”¹⁴ ona le gaogao lea o o tatou faleteuoa—o le a “lava ma totoe mea e i ai.”¹⁵

Na toe fetalai mai foi le Alii: “Ia outou malolosi ai e amata mai nei lava; aua le matata’u, aua e o outou le malo.”¹⁶

O le malosi ma le gafatia e maua mai i le ola amiotonu. E le o se amiotonu le tagata e pa’ia i le Aso Sa, ae faifaiaga i aso uma o le vaiaso. O mana’oga soona fai o le tino e faatauma’oi ma mafua ai ona “ta’ufaatauvaaina [e alii] … mea paia.”¹⁷ Sa aoao mai e Peresitene Polika Iaga, “O le agasala e ‘apo e fanau uma a Atamu ma Eva o le faapea, e le’i lelei ona latou faia e tusa ma lo latou iloa.”¹⁸

O le talalelei a Iesu Keriso o le auala lea i le amiotonu. E le mafai lava ona manumalo mala ma faigata i le mea e tausisia ai le amiotonu. O le mea lea, i na tatou gaua’i atu ia i le apoapoaiga a le Aposetolo o Paulo:

“Ua leva le po, ua lata mai le ao; o lea ia tatou faate’a ese ai galuega o le pogisa, a ia tatou oofu i ofu tau o le malamalama.

“Ia tatou savavali ma le matagofie, e tusa i le ao; aua le poula ma le onā, aua le faitaaga ma le mataitu, aua le femisa’i ma le matau’a.

“A ia outou oofu i le Alii o Iesu Keriso; aua foi le sauniuni mo le tino, e oo ai ona tu’inanau.”¹⁹

O lo tatou tiute o ni Au Paia o Aso e Gata Ai o le saunia lea o i tatou lava, o lenei lalolagi ma ona tagatanuu mo le Afio Mai Faalua o le Alii o Iesu Keriso. O le saunia ma le malosi e pei ona aoao mai e le talalelei, e mautinoa ai le fiafia i le olaga nei ma le olaga a sau, ma mafai ai lenei “misiona tele faameleniuma.”

Ua apoapoa’i mai la tatou pele o Peresitene Hinckley: “O lenei, o’u uso e ma tuafafine, ua oo mai le taimi ua tatau ai ona tatou tutu maualuga teisi atu, ia tepa a’e o tatou mata ma faalautele atu o tatou mafaufau i se silafia ma se malamalamaaga sili atu i le misiona tele faameleniuma O Le Ekalesia a Iesu Keriso o le Au Paia o Aso e Gata Ai. O se vaitau lenei ua tatau ai ona tatou malolosi. O se taimi e fetuleni atu ai i luma e aunoa ma se faatuatuai, ma le iloa lelei o le uiga, le lautele, ma le taua o la tatou misiona. O se taimi e fai ai le mea sa’o tusa lava pe o a ona taunuuga e ono mulimuli mai ai. O se taimi ia maua mai ai o loo tausia poloaiga. O se vaitau e aapa atu ai ma le agalelei, ma le alofa ia i latou o faanoanoa, ma i latou o loo savavali i le pouliuli ma le tiga. O se taimi e amana’ia ai ma agalelei, alofa ma faaaloalo ai le tasi i le isi ia tatou fegalegalea’iga uma. I se isi faaupuga, ia avea atili ai e faapei o Keriso.”²⁰

O lenei apoapoaiga a le perofeta a le Alii, e faafoe ai lo tatou ala i nei taimi mata’utia. Mo i latou uma o loo pagatia, matou te manatua outou. Ia alofa le Tama Faalelagi, i Lona alofa mutimutivale, ia tuumamaina a outou avega ma faatumu o outou olaga i le filemu lea “e silisili i mea uma e manatu i ai.”²¹ E le o tuulafoaiina outou. O loo i ai faatasi ma outou o matou alofaaga ma le faatuatua ma talosaga. Ia fetuleni atu i luma i le amiotonu ona lelei lea o mea uma.

I le suafa o Iesu Keriso, amene.