O Upumoni Ua Toefuatai Mai
O le fuafuaga a le Tama mo le faaolataga ma le fiafia … o le a fesoasoani ia te outou e faatoilalo ai luitau uma o le olaga.
Ua tatou vaaia i lo tatou siosiomaga atoa le faatupula’ia o se manaoga mo se taitaiga faaleagaga i le lalolagi atoa, ona o se taunuuga o mafatiaga faateleina faanatura po o mea foi e faapogai e tagata. O lenei galala mo se taitaiga faaleagaga o se taunuuga o le avea ai o i tatou ma fanau a se Tama Faalelagi paia. E malamalama lelei lava, a oo ina tatou feagai ma faigata ona tatou liliu atu lea i lo tatou Foafoa mo se fesoasoani. Ua silafia e lo tatou Tama Faalelagi alofa, o tulaga leaga o le lalolagi, o lu’itau matuia faaletagata, ma mafatiaga, o le a ta’ita’i atu ai Lana fanau e saili Lana tausiga faaleagaga. O le lu’itau o le, pe faapefea ona saili faalelei.
Sa tatou ola moni lava i le afioaga o le Atua lo tatou Tama Paia ma Lona Alo Pele, o Iesu Keriso i se mua’i olaga. O iina ua tatou maua ai se malamalama i le fuafuaga a le Tama mo le faaolataga, ma le folafolaga o le fesoasoani pe a tatou fananau mai o ni tagata faitino i le fogaeleele. Sa faamanino mai ai le faamoemoega taua o le olaga. Sa ta’u mai ia i tatou:
“O le a tatou faia se lalolagi e nonofo ai i latou nei;
“Ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua;
“Ma o i latou o e e tausia lo latou uluai tofi [o lona uiga o le usiusitai i le mua’i olaga] e faaopoopoina ia i latou … ma o i latou foi o e e tausia lo latou tofi lona lua, [o lona uiga o le usiusita’i lea i lenei olaga faitino] o le a faaopoopoina i luga o o latou ulu le mamalu e faavavau faavavau lava.”1
O loo faaalia i na upu le faamoemoega aupito tupito o lo tatou i ai i le fogaeleele. O le faamoemoega, ia faata’ita’i ai oe lava ia pe e te usitai i poloaiga a le Alii, ma tupu ai lou malamalama, gafatia, ma uiga ta’uaogaina uma. Ina ia maua ai sauniga manaomia uma, ma tausia feagaiga uma e manaomia. Ia faatuina ma faafailele se aiga. O lenei aafiaga e aofia ai ma vaitau o tofotofoga ma le fiafia, faatasi ai ma le faamoemoe e toe foi atu ma le manumalo ina ua gafataulimaina lelei lu’itau ma avanoa o le olaga faitino, ia maua ai faamanuiaga mamalu na folafola mai mo e usiusita’i.
Ina ia fua mai la e le vaitau o suega faaleolaga nei lona manuia silisili, o lea sa aoaoina ai oe ma saunia mo tulaga o le a oulua fetaia’i i le olaga nei. Sa faamalamalama mai foi le mamanu a lo tatou Tama mo le taialaina o oe i le olaga faaletino. O le a ia filifili mai lana fanau agaga aupito totoa ma usiusitai, o perofeta ma isi auauna filifilia e umia Lana perisitua, e aoaoina mai Lana upumoni ma taialaina e faasafua atu lena upumoni i Ana fanau i le fogaeleele. O le a tuuina mai e le Atua i lana fanau taitoatasi se saolotoga e filifili ai, o le aia tatau lea e filifili ai Lana apoapoaiga po o le le amanaiaina foi. O le a faamalosiauina tagata uma, ae o le a le faia faamalosi ina ia usitai. Sa outou malamalama e mafai ona outou filifilia lo outou ala i le fogaeleele, ae e le mafai ona outou filifilia le taunuuga o a outou filifiliga. O le mea lena e fai e le tulafono o le faavavau.
Afai e tatau ona ola se tasi ina ia agavaa mo faamanuiaga aupito ‘oa ua folafola mai, ae pe i ai se mafuaaga na te le gafataulimaina e le mafai ai ona ia maua i le fogaeleele, o le a i ai se avanoa e tauia ai i le olaga pe a mavae le oti. O le a taofia lo outou manatua o le mua’i olaga, ina ia mautinoa ai o se su’ega aoga, peitai o le a i ai se taiala e tuuina mai e faasino atu ai ia te oe le auala e ola ai. O le fuafuaga a lo tatou Tama mo le faaolataga i lenei olaga, faatasi ai ma le avanoa e toe foi atu ai ia te Ia, o le a ta’ua o le talalelei a Iesu Keriso.
Mai lava a o le’i Foafoaina lenei lalolagi, sa i ai le tetee i le fuafuaga a lo tatou tama, na matua’ia e se agaga leaga atamai lea ua tatou iloa o Lusifelo po o Satani. Sa ia fautuaina se suiga o tulaga e manaomia. Sa matua’i faatosina lava lona manatu, ma o lea na mulimuli atu ai le tasi vaetolu o fanau agaga a le Tama ia Satani ma tutuli ese ai. Sa latou le maua le avanoa maoa’e e ola ai ma le avanoa taua mo se tino faitino.
E silafia lelei e lo tatou Tama Paia ia tagata taitoatasi o Lana fanau, e toatele o le a tofotofoina mo se taimi, ma avea ai ma nisi o le lalolagi, ma teena le molimau ma aoaoga a Ana perofeta. O le a suia e le pogisa le malamalama o le upumoni i se tulaga e ta’ua o se liliuese. O le vaitaimi mai le folasaga mai o le upumoni seia oo ina leiloa ona o le agasala, o le a ta’ua o se tisipenisione. O le a filifilia lea perofeta ma lea perofeta i se faagasologa o tisipenisione, e tausisia ai le upumoni i le fogaeleele mo i latou o e faatuatua, tusa lava pe fesuia’i pe teena foi e le toatele.
Sa outou aoaoina o le Malamalama o Keriso o le a maua mai ai lena taiala. E maua mai ai le malamalama ma le ola o mea uma. E uuna’ia ai tagata taitoatasi uma i le lalolagi atoa ia latou iloa le eseesega o le mea moni mai le mea e le tonu, o le sa’o foi mai le sese. O le Malamalama o Keriso, e le o se tagata. O se mana lea ma se uunaiga mai le Atua lo tatou Tama e ala mai i Lona Alo, o Iesu Keriso, ma afai e mulimuli ai, e mafai ona taitai atu ai se tagata ia agavaa mo se isi taiala e sili atu ona manino ma musumusuga a le Agaga Paia. Sa ta’u atu foi ia te outou, o le solitulafono e faavaivaia ai le uunaiga [a lea malamalama] peitai, e mafai ona toefuatai mai e ala i le salamo. Sa outou fiafia ina ua outou iloa, o i latou e usiusitai, ma osia feagaiga e tatau ai ma tumau ai le faamaoni, o le a fai mo latou tofi le mamalu selesitila ma ola ai i le afioaga o le Atua le Tama ma le Alo i le faavavau atoa.
E faapefea ona tatou iloa nei upumoni? E mafai faapefea ona e faamaonia le moni o nei mea? Ua e vaai i le tele o le fenumia’i e faatatau i le natura o le Atua, o Ana aoaoga, ma le faamoemoega o le olaga. E faapefea la ona taiala e le Atua, lo tatou Tama Faalelagi, Ana fanau i le fogaeleele? E faapefea ona Ia faaali mai le upumoni ma Lona finagalo ina ia mafai ai e Ana fanau faamaoni, ma talitonu ona faia filifiliga sa’o ma maua faamanuiaga e finagalo ai le Tama Faalelagi mo i latou? O le a ou faamatalaina atu.
Mai lava i le faavaeina o lenei lalolagi, sa mulimulitu’i lava le Atua lo tatou Tama i Lana fuafuaga lea sa faatoa ou faamatalaina atu. Sa galue Atamu e faasoa atu le fuafuaga a lo tatou Tama i lana fanau ma a latou fanau. E toatele sa talitonu ma sa faamanuiaina. Peitai, o le toatele sa filifili e faaaoga la latou meaalofa faalelagi, o le filifiliga saoloto e teena ai Ana aoaoga ma Lana talalelei. Sa teena e le au le usiusitai le upumoni, ta’useseina aoaoga ma sauniga, ma aveeseina mai i latou lava mai le Atua. Na oo mai le taimi, sa suia ai le malamalama o le upumoni i le pogisa faaleagaga, ma sa aveeseina mai ai le perisitua ma le Ekalesia moni mai le lalolagi, ma le maua ai e tagata.
O isi perofeta e pei o Enoka, Noa, Aperaamo, ma Mose sa toe faafouina le upumoni mo o latou tisipenisione, peitai sa i ai taimi sa teena ai e le toatele a latou taumafaiga. I le vaeluaga o taimi, sa soifua mai ai Iesu Keriso, le Alo Pele o le Atua i le lalolagi. Sa Ia toefuataiina mai upumoni ma auauna atu i le alofa ma le agalelei. Sa Ia toe faatuina Lana Ekalesia faatasi ai ma aposetolo ma perofeta i le lalolagi. Sa Ia faataunuuina le poloaiga paia a Lona Tama Paia e ala i se mafatiaga ogaoga, ia avea ai ma o tatou Faaola ma Togiola. Sa Ia faatagaina o Ia lava e faasatauro ma fasiotia. Sa toetu mai o Ia ma faatoilaloina ai le oti faaletino. O Lana taulaga togiola e le i’u, o se meaalofa faalelagi e mafai ai ona maua le faamagaloga o agasala a le tagata ua salamo, ma agavaa ai mo le ola faavavau. Peitai, na oo lava i le Alo o le Atua o teena e tagata uma sei vagana ai ni nai tagata toaitiiti. Sa sauaina Ana aposetolo ma tagata o le Ekalesia, ma e toatele foi sa fasiotia. Sa goto ifo le fogaeleele i se vaitau umi ma le mata’utia, i le pogisa ogaoga faaleagaga.
O loo tusia i tusitusiga paia, i le talafaasolopito atoa lava, i taimi e sili ona taua, sa faalogoina ai le siufofoga o le Atua le Tama. E i ai foi taimi sa faaali atu ai Iesu Keriso lava ia i ni tagata patino. Ae, e na o le tasi lava le taimi paia, se taimi tulaga ese lea ua tatou malamalama i ai, sa faaali mai ai le Atua le Tama lava Ia. Sa faia lea tulaga faatasi ma Lona Alo pele Paia, o Iesu Keriso, i se aofia e na o le toatasi. O lea toatasi, o le taulealea o Iosefa Samita, le Itiiti, o se agaga e tulaga ese lava, sa saunia a o le’i faavaeina le lalolagi. O le a avea o ia ma perofeta aupito maoae e auina mai i le lalolagi. O le a toe foi mai le pule o le perisitua, o le Toefuataiga atoatoa o le Ekalesia sa faatuina e le Faaola, faatasi ai ma tusitusiga paia faaopoopo e moomia mo o tatou taimi, e maua mai lea i faaaliga faifai pea mai le Faaola.
Na afio mai lo tatou Tama alofa mai Ana foafoaga e tele naua i lenei lalolagi, e faamanino le upumoni, ina ia aveesea ai ao mafiafia o le pogisa faaleagaga, ia faatuina Lona faasinomaga moni, ia toefuatai mai le upumoni, ma saunia le ala tonu e tasi e maua ai le taitaiga mautu, faaleagaga. O lenei toefuataiga taua tele, na amata i si fasi fuaitau faatauvaa a le Tama: “O Lo’u Atalii Pele Lenei. Faalogo ia te ia!”2 O iina na sosoo mai ai ma se Toefuataiga o le upumoni, le perisitua, sauniga paia, ma le Ekalesia moni faatasi ai ma le fuafuaga a le Tama mo le faaolataga ma le fiafia. Afai tou te ola ai i lena fuafuaga, o le a fesoasoani ia te outou e faatoilalo ai faigata uma o le olaga. O le a fesoasoani e faaagavaaina ai outou, e ala i le usiusitai, e maua ai le taitaiga faaleagaga paia tou te manaomia. O lena lagolago o le a tuuina atu ai ia te oe le malosi e tatau ona e ola ai, tusa lava pe o le a le toilalo o faiga a le lalolagi.
O le a se mea e matua taua tele ua alagatatau ai lenei asiasiga e le masani ai a le Atua le Tama? O le amataga o le “tisipenisione o le atoaga o taimi” lea na mua’i ta’ua mai e perofeta o le feagaiga tuai ma le feagaiga fou. Ua oo mai le taimi e faapotopotoina ai e le Tama “mea uma ia Keriso,”3 tuuina mai ki uma o le malo ma toefuatai uma mai ki o le malamalama o tisipenisione ua mavae,4 a o Ia faatuina le tisipenisione faai’u o le talalelei i lenei fogaeleele.
Ina ua silafia o le a faigata i le toatele ona talitonu na tupu lava lena Toefuataiga mamalu, o lea na saunia ai e le Faaola se molimau mautu e faavae ai lona moni, ma ua ta’ua o le Tusi a Mamona. O le auala e faamaonia ai le moni o le Toefuataiga, o loo faamalamalama atu i ona itulau. Sa Ia aumaia ai foi nisi tusitusiga paia malamalama e mana’omia i o tatou taimi, o le Mataupu Faavae ma Feagaiga ma le Penina Tau Tele e ala mai ia Iosefa Samita. E leitioa ona tulimata’i atu le tele o le galuega a Iosefa Samita i le Faaola, o Lana Togiola ma aoaoga faavae.
E ui ina ua folafola atu i le lalolagi atoa lenei savali taua tele, ae ua matua mataalia foi Satani e faaoso tagata ina ia aua ne’i amanaiaina, pe saili atu foi i ai i nofoaga sese. E matua toatele fanau a le Tama e le gata ua galo lo latou Tama i le Lagi, ae ua seasea lava ona latou mafaufau ia te Ia, pe manatunatu loloto foi pe o le a le faamoemoega ua latou i ai i le olaga faitino. Ua matua’i lilofia lava i latou i mea e le taua, ua taitai ese mai ai i latou mai mea e taua. Aua ne’i outou sese i lena mea.
I le avea ai o a’u o se auauna a Iesu Keriso, ou te molimau atu ai e moni mea sa ou faamatala atu. E le lava le i ai o sina silafia e le manino i le upumoni, po o le moni e i ai le Tama ma Lona Alo o lo tatou Faaola. E tatau ona tofu iloa e i tatou uma, pe o ai moni lava i La’ua. E ao ona e lagonaina le tele o lo La’ua alolofa mo oe. E ao ona e talitonuina lena mea, a o e ola tumau ai i le upumoni i le mea sili e te mafaia. O le a fesoasoani i La’ua ina ia e iloaina le faamoemoega o lou olaga faaletino, ma faamalosia oe ina ia e agavaa mo faamanuiaga ua folafola mai. O le usitai i poloaiga a le Atua, e manaomia ai se malamalama ia i La’ua. E manaomia ai le faatuatua ia i La’ua. O lena malamalama e sili ona maua e ala i le suesue o le tagata lava ia i aoaoga faavae. O se tasi lena o mafuaaga na valaaulia ai e Peresitene Hinckley ma ona fesoasoani, ia Iulai o le tausaga nei, ia tagata uma o le ekalesia e faitau le Tusi a Mamona ia oo atu i le faaiuga o le tausaga ua mae’a. Sa latou folafola mai: “O i latou e faitauina le Tusi a Mamona o le a faamanuiaina i se fuataga faaopoopo o le Agaga o le Alii, o se faaiuga sili atu e usitai i Ana poloaiga ma se molimau malosi atu o loo soifua le Alo o le Atua.”5 Ua ou tofotofoina ma faamaonia lena folafolaga i lo’u lava olaga, ma ua ou faamaonia lona moni. Afai sa e usitai ma le faaeteete i lena fautuaga, ua e iloa le uiga o la’u tala. Afai e te le’i amataina lava, o lea lava e i ai le taimi e faamauoa ai lou olaga e ala i le faitauina o le Tusi a Mamona. Faamolemole tago e fai.
I le avea ai ma se Aposetolo a le Alii o Iesu Keriso, ou te molimau atu ma le paia, o le Atua lo tatou Tama ma Iesu Keriso na faataunuuina le Toefuataiga sa ou faamatalaina atu, e auala mai ia Iosefa Samita; ua toe i ai le malamalama o le upumoni ma le Ekalesia a Iesu Keriso i luga o le fogaeleele, ma ua toe faaalia mai le natura moni o le Atua le Tama ma Lona Alo, ma ua faamanino mai fo’i le auala sa’o e maua ai le taiala faaleagaga. Ou te molimau atu, ua avanoa le fuafuaga o le faaolataga a le Atua mo tagata uma e sailia ma le faamaoni. Ia talia. Ola ai mo lou filemu ma le fiafia. I le suafa o Iesu Keriso, amene.