I Tamaitai Talavou
Ia avea [oe] ma se tamaitai o Keriso. Ia faapelepele i lou tulaga taua i le silafaga a le Atua. Na te moomia oe. E moomia oe e lenei Ekalesia. E moomia oe e le lalolagi.
Na faavalea leaga lava au e le taimi i nai masina na sei mavae atu nei. Na ou ala i luga i se tasi taeao ma le tiotio ma sauni mo galuega o le aso, na amataina le taeao i sina ataata—ae faatoa ou iloaina faafuase’i, o le aso lena, na amata ai ona avea se tama teine a lo’u afafine ma teine talavou. Sa ou mafaufau i ai mo sina taimi ma ou faia loa le mea e faia e soo se tamalii matua. Sa ou alu loa i lo’u moega ma toe pulou lo’u ieafu.
E aunoa ma le faia o ni tala malie e masani ai i aafiaga faigata o le tausiga o talavou, ou te fia faapea atu i le tama a lo’u afafine ma le anoano o talavou o le Ekalesia ou te feiloai atu i ai i a’u malaga, e maeu lo matou mitamita ia te outou. O loo tutupu tulaga matautia ma uiga le mama e toetoe lava o soo se mea o loo siomia ai outou faapea ma faaosoosoga o ituaiga eseese o loo tuuina atu ia te outou i aso uma, ae ui i lea o le toatele lava o outou o loo tauivi ina ia faia le mea e sao.
O le afiafi nei ou te fia sii ai lo’u leo e faaviivii ia te outou, e faailoa atu lo’u alofa, o la’u faamalosiau ma la’u faamemelo mo outou. Talu ai ona o lenei afafine faapelepele a le ma tama lea ou te talanoa i ai o se tamaitai talavou, o le a faaautu atu ai o’u manatu i tamaitai talavou o le Ekalesia, ae ou te faamoemoe o le agaga o le mea ou te fai atu ai e mafai ona faatatau i tamaitai ma alii o tupulaga uma. Peitai, o le aso nei, e pei ona pese soo ai ia Maurice Chevalier, ou te fia “faafetai i le lagi mo teineiti.”
Muamua lava, ou te manao ia e mitamita o oe o se tamaitai. Ou te manao ia e lagonaina le moni o le uiga o lena upu, ia iloa moni lava po o ai oe. O oe moni lava “o se afafine faaleagaga a ni matua faalelagi ua i ai se natura paia ma le taunuuga faavavau.”1 O lena upumoni silisili e tatau ona mausali i lou agaga ma ia avea ma faavae i faaiuga uma e te faia a o e tupu ae e avea ma tamaitai matua. Semanu e le mafai lava ona i ai se faamaoniga sili o lou mamalu, o lou agavaa, o ou avanoa ma ou folafolaga. Ua silafia e lou Tama o i le Lagi lou igoa ma silafia ou tulaga. Na te faafofogaina au tatalo. Na te silafia ou faamoemoega ma au miti, e aofia ai ou popolega ma atugaluga. Ma ua Ia silafia le mea e mafai ona e oo i ai e ala i le faatuatua ia te Ia. Talu ai ona o lenei tofi paia, ua tutusa uma ai oe faatasi ma ou uso ma tuagane faaleagaga i Lana silafaga ma ua faamanaina e ala i le usiusitai ina ia avea ma suli moni i Lona malo faavavau, o se “suli lava o le Atua, o suli [faatasi] ma Keriso.”2 Saili ina ia malamalama i le taua o nei aoaoga faavae. O mea uma na aoao atu e Keriso sa Ia aoaoina atu i tamaitai e faapea foi i alii. O le mea moni lava, i le malamalama toefuataiina o le Talalelei a Iesu Keriso, o se tamaitai, e aofia ai se tamaitai talavou, ua aofia ai se tulaga silisiliese lea e tupito ia te ia i le fuafuaga paia a le Foafoa. O oe, e pei ona faaupuina e Elder James E. Talmage, “o se tasi ua tauaveina se tiutetauave paia lea e le tatau i se tasi ona faaleagaina.”3
Ia avea [oe] ma se tamaitai o Keriso. Ia faapelepele i lou tulaga taua i le silafaga a le Atua. Na te moomia oe. E moomia oe e lenei Ekalesia. E moomia oe e le lalolagi. O le faatuatua mausali o se tamaitai i le Atua ma le maelega e le faiifo i mea a le Agaga ua avea pea lea ma se taula pe a matamataita mai matagi ma galu o le olaga.4 Ou te tuuina atu ia te outou ia upu na saunoa atu ai le Perofeta o Iosefa i le silia ma le 150 tausaga talu ai: “Afai e te ola e tusa ai ma ou avanoa, o le a le mafai e agelu ona taofiofia lo latou avea ma au aumea.”5
O nei mea uma o loo taumafai e tau atu ai ia te oe ia lagona o lou Tama oi le Lagi ia te oe ma le mea ua Ia fuafuaina e te oo i ai. Ma afai e i ai se taimi ua le malamalama ai soo se tasi o outou i faamoemoega o le Atua mo outou po o le fuafua foi e ola i se tulaga ua le paia tele nai lo le mea e te mafaia, ona matou faailoa atu lea o le alofa silisili mo outou ma aioi atu ia te outou ina ia avea o outou tausaga o le talavou ma manumalo, ae le o se faatoilaloina. E le o i ai lava se isi manatu o tama ma tina, perofeta ma aposetolo, sei vagana lava o le faamanuiaina o lou olaga ma puipuia oe mai soo se lototiga e mafai ona matou puipuia mai ai oe.
Mo oe ina ia e mauaina atoatoa faamanuiaga ma le puipuiga a le Tama Faalelagi matou te talosaga atu ai ia te oe ina ia tumau faamaoni i faatulagaga o le Talalelei a Iesu Keriso ae le o le mulimuli i tifiga ma taaiga lea e avea ai oe ma pologa. O le a le taofia lava e le Ekalesia lau lava aia e faatatau i mea tonu e tatau ona e ofuina ma foliga tonu e tatau ona foliga ai. Ae o le a faailoa atu pea lava e le Ekalesia ia faatulagaga ma o le a aoao atu pea lava ia mataupu faavae. E pei ona sa aoao mai e Sister Tanner i le taeao analeila, o se tasi o na mataupu faavae o le tauagafau lea. I le Talalelei a Iesu Keriso o le tauagafau i foliga vaaia o teuga lava ia. O o tatou faatulagaga e le fetuunaia faalauaitele.
O le tamaitusi o le Mo le Malosi o le Autalavou o loo matuai manino mai ai lana valaau i tamaitai talavou ina ia aloese mai ofu e fufusi tele, pupuu tele, ma isi ofu e iloagofie ai ou itutino, e aofia ai ofu e le ufiufia ai le puimanava.6 Matua, faamolemole ia iloilo faatasi ma lau fanau lenei tamaitusi. E lona lua atu i lo latou moomia o lou alofa, o mea ia e te faatapulaaina. Tamaitai talavou, filifili ou ofu i le auala e te filifilia ai au uo—i ia tulaga uma ia filifili le vaega e faaleleia ai oe, ma e maua ai le lagona mautinoa e tu atu i luma o le Atua.7 O uo lelei latou te le faalataina lava oe, faalumaina oe, pe faaaogaina sese oe. E le tatau foi ona faapena ou ofu.
Ou te fia avatu se talosaga faapitoa e tusa ai ma le auala e ono laei ai tamaitai talavou mo sauniga a le Ekalesia ma tapuaiga i le Sapati. E masani ona tatou ta’ua “ofu sili” po o “ofu o le Aso Sa” ma atonu ua tatau foi ona tatou toe ta’ua. I soo se tulaga, mai lava i aso anamua e oo mai i ona po nei e valaaulia ai pea lava i tatou ina ia tuuina atu o tatou tagata sili i totonu ma fafo pe a tatou ulu atu i le maota o le Alii—ma o se falesa o le AAG ua faapaiaina o se “maota lea o le Alii.” O o tatou ofu ma seevae e le moomia le taugata, ma o le mea moni lava e le tatau ona taugata, ae le tatau foi ona atagia mai ai tatou te o i se matafaga. Afai tatou te o mai e tapuai atu i le Atua ma le Tama o i tatou uma, ma fetagofi atu i le faamanatuga o le faatusa lea o le Togiola a Iesu Keriso, e tatau ona tatou laei i laei talafeaga ma le faaaloalo, ia mamalu ma talafeagai ai i le mea tatou te mafaia. E tatau ona iloagofie i tatou i o tatou foliga vaaia e faapea foi i a tatou amio o i tatou moni lava o soo o Keriso, ma i le agaga o le tapuaiga e tatau ona tatou agamalu ma lotomaulalo, ma ia tatou naunau moni lava ina ia mafuta pea le Agaga o le Faaola ma i tatou.
O le vaega lava lea e tasi ou te fia ta’ua ai se mataupu e sili atu ona maaleale. Ou te talosaga atu ia te outou tamaitai talavou ina ia faamolemole ia faateleina lo outou taliaina o outou lava, e aofia ai lou fuaitino ma ou foliga, ae aua le soona naunau fua ia e foliga e pei o se isi tagata. E eseese uma lava i tatou. O isi e uumi ae o isi ua pupuu. O isi e puputa ae o isi ua paeee. Ma e toetoe lava o tagata uma i nisi taimi, po o nisi foi e mananao ina ia avea ma se mea e le o latou na! Ae pei ona talanoa atu se tasi fautua i ni teineiti talavou, “E le mafai ona e ola ma e popole i le sioa atu o isi tagata ia te oe. Afai e te popole ona o manatu o tagata, ua e tuueseina lou mana… . O le ki lava i le lagonaina o le [to’a] o le faalogo pea lea i lou tagata i totonu—[o oe moni lena.]”8 Ma i le malo o le Atua o oe moni lava “e sili atu le taua nai lo penina.”9 O tamaitai talavou uma o se tamaitai o le taunuuga ae o tamaitai matutua uma o se malosiaga mamana mo le lelei. Ua ou ta’ua tamaitai matutua aua o outou tuafafine, o faataitaiga sili ma punaoa mo nei tamaitai talavou. Ma afai o loo e popole i le taufaaofiina o ni ofu ua laiti tele, o le a e le ofo pe afai o lau tama teine po o se Maea Meite i lau vasega o loo faia foi lava le mea e tasi ma ua ma’i ai lava o ia i le taumafai ina ia paee. E tatau ona tatou malolosi ma maloloina uma—o se aoaoga faavae lelei lena mai le Upu o le Poto. O lona uiga o le taumafa tatau ma faamalositino ma fesoasoani i o tatou tino ina ia gaoioi i le mea e gata mai ai lo latou malosi. Atonu e mafai ona lelei uma i tatou i le vaega lena. Ae o lea ou te talanoa i le vaega lea o le soifua maloloina sili ona manaomia; e leai se lapoa taatele e manaomia.
I le tautala atu ma le faamaoni, ua fai si le migao o le lalolagi ia te outou e tusa ai ma le mataupu e faatatau i le lapopoa o outou tino. Ua matua si’omia outou i tifaga, televise, tifiga i mekasini ma faasalalauga o loo i ai savali e pei o foliga vaaia o le mea sili lea ona taua! O le manatu e faapea, “Afai ua matuai aulelei ou foliga, o le a matuai manaia lou olaga ma o le a e fiafia ma lauiloa.” O lena ituaiga uunaiga e matuai faateteleina i tausaga o le talavou, e aunoa ma le faailoaina mai o le matautia o lena ituaiga uunaiga pe a e matua. I le tele lava o tulaga, ua tele naua mea ua faia i le tino o le tagata ina ia ausia ai lea ituaiga tulaga faafoliga (po o le faa’ole’ole). E pei ona lipotia mai ai talu ai nei se tamaitai talavou o ata tifaga i Hollywood sa faapea mai, “Ua tatou popole i le aulelei ma le matavai o le tumau pea o le talavou ma … ua ou matua faanoanoa ai i le auala ua faamanu’aina ai e tamaitai [i latou lava] i le sailiga o lea tulaga. Ua ou vaai i tamaitai [e aofia ai ma tamaitai talavou] … ua faia taotoga o foliga e tatoso ai i luga ma afe i lalo ni vaega o le tino. E pei o se malifa maseesee. [E le mafai ona e toe alu ese mai ai.] O se matua faavalevalea lava … lea mea o loo faia e le lalolagi i tamaitai.”10
O lenei soona vaai ifo i le tagata lava ia ma taulai atu i mea faaletino ua faateleina atu nai lo le faavalevalea lautele; e faatafunaina ai faaleagaga ma e mafua ai le tele o le le fiafia o loo feagai ma tamaitai i ona po nei, e aofia ai tamaitai talavou. Ma afai ua popole tele le au matutua i foliga vaaia—o le tuuina i totonu o le tino ma le tipi ese ma toe su’i ma toe suia mea uma e mafai ona toe sui—o na uunaiga ma popolega o le a mautinoa lava le sosolo atu i fanau. I se tasi tulaga ua avea lea faafitauli ma mea o loo ta’ua i le Tusi a Mamona o “masalosaloga le aoga.”11 Ma o le lalolagi faalepopole ua matuai le taofiofia lava tuinanau ma masalosaloga. O le a manaomia moni ai lava e se tasi se pusa tele o vali ma teuga e faatautava ai ma le aulelei o loo atagia i faasalalauga eseese o loo siomia ai i tatou. Ae i le faaiuga o le aso o le a i ai lava i latou “e i ai le uiga o le tauemu ma le tusitusilima” e pei ona vaaia e Liae,12 aua po o le a lava le taumafai malosi o se tasi i le lalolagi o tifiga ma teuga, o le a le lava lena.
Na tusia e se tamaitai e le auai i la tatou Ekalesia e faapea i ona tausaga o le galulue faatasi ai ma tamaitai lalelei sa ia vaaia nisi o mea e tutusa ai i latou uma, ma e leai ma se tasi o i latou na popole i le lapopoa po o foliga. Fai mai o ia, o tamaitai sili ona lalelei ua ia iloaina, e susulu mai ai le ola maloloina, o se uiga tausaafia, o se fiafia e aoaoina, o le mautu o lona tagata, ma le amio sao. Afai e mafai ona tatou faaopoopo atu i lena lisi le agaga malu ma le lelei o le Alii o loo tauaveina e se tamaitai faapea, ona faamatalaina ai lea o le matagofie o tamaitai o soo se tupulaga po o taimi, o elemene uma o le matagofie o tamaitai loo faamamafaina mai, ma e maua e ala i faamanuiaga o le talalelei a Iesu Keriso.
Ou te fia faaiuina. Ua tele mea ua taua talu ai nei e uiga i faafiafiaga o faasalalauga e uiga i le naunau o loo i ai nei mo “polokalama i le televise o loo faaalia ai le olaga moni.” Ou te le o mautinoa po o a na mea ae mai le taele o lo’u loto ou te faasoa atu ai le moni o lenei talalelei i le tupulaga aulelei o tamaitai talavou o loo tutupu ae i totonu o lenei Ekalesia.
O la’u tautinoga paia ia te outou e faapea, e moni lava na faaali atu le Tama ma le Alo i le Perofeta o Iosefa Samita, o ia lava o se alii talavou na valaauina e le Atua mai lo outou vaitausaga. Ou te molimau atu o nei tagata paia na fetalai atu ia te ia, ma na ia faalogoina o la’ua siufofoga e faavavau ma vaaia o la tino faamamaluina.13 O lena mea na tupu e moni lava i lona lava faatulagaga e pei o le mea na oo i ai le Aposetolo o Toma ina ua fetalai atu le Alii ia te ia, “Au mai ia lou tamatamailima iinei, vaai mai foi i o’u lima; au mai ia foi lou lima, ma tuu i lo’u itu: … aua foi e te masalo vale, ae [ia] e talitonu.”14
I le tama teine a lo’u afafine ma soo se talavou i lenei Ekalesia ou te tuuina atu la’u lava molimau, o le Atua moni lava o lo tatou Tama ma o Iesu Keriso e moni o Ia o le Alo Pele e Toatasi i la le tino, o le Faaola ma le Togiola o le lalolagi. Ou te molimau atu o le Ekalesia moni lenei ma le malo o le Atua i le lalolagi, ma sa taitaia nei tagata e perofeta moni i aso ua mavae ma o se perofeta moni, o Peresitene Gordon B. Hinckley, o loo taitaiina nei. Ia outou iloa le alofa e le mavae o taitai o le Ekalesia mo outou ma ia outou tuu atu i mea moni e faavavau o le Talalelei a Iesu Keriso e siitia outou i luga a’e o popolega faaletino ma atuatuvalega faaletalavou, ou te ole atu ai i le suafa o Iesu Keriso, amene.