O Le Ositaulaga o se Olioliga ma se Faamanuiaga
Ou te tatalo ina ia avea uma i tatou ma Au Paia ua naunau e ositaulaga ma avea ma tagata ua agavaa mo faamanuiaga faapitoa a le Alii.
Uso e ma tuafafine, malo le soifua. Na aoao mai le Perofeta o Iosefa Samita “o se talitonuga faalelotu e le moomia ai le ositaulagaina o mea uma, o le a le maua ai lava le mana e moomia ina ia tupu ai le faatuatua e tau atu i le ola ma le faaolataga” (Lectures on Faith [1985], 69). Afai tatou te aoteleina le talafaasolopito o tusitusiga paia, e mafai ona tatou faapea atu o le talafaasolopito o osigataulaga.
E mafai ona tatou mauaina ia faataitaiga matagofie i tusitusiga paia o i latou o e na ositaulagaina o latou soifua ina ia faatumauina ai pea lo latou faatuatua ma molimau. O se tasi faataitaiga e mai le tala ia Alema ma Amoleka ina ua la vaai atu ma le tiga i tagata o Amonaea o lafoina i le afi ma maliliu ai, ae sa tumau pea lo latou faatuatua (tagai Alema 14:7–13).
Tatou te mafaufau foi ia Iesu Keriso, o le na afio ifo mai le afioaga o Lona Tama i lenei lalolagi ina ia faia le taulaga e laveai ai le lalolagi e ala i ni tiga matuitui e leai se tasi ua mafai ona onosaia.
I lenei tisipenisione faaiu o le talalelei, e toatele paionia na uma o latou ola ma sa latou osia ni taulaga maoae ina ia faatumauina ai lo latou faatuatua.
O le taimi nei e le o toe faapena ona poloaiina i tatou ina ia faia ni osigataulaga tetele faapea e pei o le tuuina atu o o tatou ola, ae o loo tatou vaaia le tele o faataitaiga o le Au Paia o e o loo osia ia ni taulaga tiga ina ia faatumauina ai pea le ola o o latou faatuatua ma molimau. Atonu e sili atu ona faigata le faia o ni tamai osigataulaga i o tatou olaga i aso taitasi. Mo se faataitaiga, e mafai ona manatu o le tausiga o le Sapati ia paia o se tamai osigataulaga, o le faitauina o tusitusiga paia i aso taitasi, po o le totogiina o a tatou sefuluai. Ae o nei osigataulaga e le faigofie ona faia sei vagana ua i ai o tatou mafaufau ma le naunautaiga e faia ai ia osigataulaga lea e moomia ina ia mafai ai ona tausia na poloaiga.
A o tatou faia nei osigataulaga laiti, o loo tauia i tatou i le tele o faamanuiaga mai le Alii. Fai mai le Tupu o Peniamina, “Ua ia te outou e taui atu ai ia te ia, ua faapea i nei ona aso, e oo i le faavavau, faavavau lava” (Mosaea 2:24). Ma, e pei foi ona ia faia i lona lava nuu, sa uunaia ai e le Tupu o Peniamina i tatou o le a tatou mauaina faamanuiaga silisili a o faaauau pea ona tatou usiusitai i le afioga a le Atua.
Ou te manatu o le uluai faamanuiaga lava e maua mai le ositaulaga o le olioli lea e mafai ona tatou lagonaina pe a tatou totogiina le tau. Atonu o le manatu lava ia e faapea o le ositaulaga e mafai ona avea ma se faamanuiaga o le a avea ma se faamanuiaga. Afai e ia i tatou lena ituaiga manatu ma lagonaina le olioli, atonu ua uma ona tatou mauaina se faamanuiaga.
Talu ai nei lava, na ou maua ai lena ituaiga o faamanuiaga i le Au Paia i Korea o e sa auai i le faamanatuina o le 50 tausaga o le faapaiaina o le Ekalesia i Korea ma le 200 tausaga o Iosefa Samita. Ou te fia ta’u atu sina tala e uiga i osigataulaga ma le olioli ma faamanuiaga na latou mauaina.
Ina ia faamanatuina le talalelei, lea na tuuina atu le faamoemoe ma le lototele i tagata i Korea o e na tiga tele ona o le Taua i Korea, sa amata ai sauniuniga a tagata mo lenei aso fiafia i le silia ma le tausaga talu ai. O le toatele o tagata o le ekalesia i Korea—o le Peraimeri, alii talavou, tamaitai talavou, autalavou nofofua, tuafafine o le Aualofa, ma isi—sa potopoto faatasi e fai faataitaiga mo le aso fiafia. Sa latou saunia le tele o siva faaleatunuu, e aofia ai siva fugalaau, siva faataliolio, siva ili, ma siva a le au faifaatoaga. Sa latou taina talipalau; faaali ai foi le Taekwondo [pei se karate], tala faatino, siva faapapalagi, musika; faaali ai foi ma ata faatino mo tamaiti; ma faia faaaliga a aufaipese.
Talu ai ona o le leotetele o talipalau a alii talavou, sa faitio ai ia tuaoi, ma sa latou taumafai e taofi ia faataitaiga. Sa matuai faigata lava ona faia ni faataitaiga i se taimi umi, ae sa latou fiafia lava i ai. Ou te le’i iloaina lava se tasi na faitio e uiga i a latou taumafaiga ma osigataulaga pe a latou alafa’i mai i le 4:00 i le vaveao e pu’e le pasi e malaga atu ai i faataitaiga tuufaatasi. Sa latou lagonaina le fiafia tele ma le faafetai mo faamanuiaga a le Alii ma le avanoa e faaali atu ai lo latou talisapaia.
E toatele foi faifeautalai ua maea a latou misiona mai atunuu mamao na toe foi uma atu lava i Korea faatasi ma o latou taitoalua ma fanau mo lenei aso fiafia. Sa latou ositaulaga ina ua latou o mai i Korea i a latou misiona i ni vaitaimi ua leva lava. Ae o le taimi lenei, ua latou faia se isi osigataulaga o taimi ma tupe ina ia aumaia o latou aiga ma auai i aso fiafia sa latou tulimatai atu i ai.
Ina ia faamalosiau i le Au Paia i Korea faapea ma isi tagata, na auina atu ai e le Alii Lana perofeta, o Peresitene Gordon B. Hinckley i Korea. Na faia foi e Peresitene Hinckley lava ia se osigataulaga tele mo lenei asiasiga i le fuafuaina lea o se malaga taamilo i le lalolagi e 13 aso ma oo mai ai i Korea ina ia feiloai ma le Au Paia o e ua tele tausaga o ia alofa i ai ma momoli atu ai e ia lava alofaaga faapitoa o le Alii. E leai se tasi na lagonaina o se osigataulaga lenei mea. Ae, na matou maua uma loimata o le olioli ma le faafetai. O le faamanuiaga lenei o loo tatou talanoa i ai, a ea?
Uso e ma tuafafine, aua le fefefe i osigataulaga. Faamolemole ia talia ma le fiafia faamanuiaga e maua mai le ositaulaga lava ia.
O nisi taimi e i ai se va i le taimi e faia ai osigataulaga ma le faamanuiaga. E mafai ona oo mai le osigataulaga e tusa ai ma o tatou taimi, ae o le faamanuiaga e le mafai ona oo mai e tusa ai ma o tatou taimi, ae fuafua i le kalena a le Alii. Talu ai ona o lenei tulaga, ua faamafanafanaina ai i tatou i le fetalai mai o le Alii, “O lea, aua ne’i loto vaivai i le faia o mea lelei, aua o loo oulua faataatia le faavae o le galuega tele” (MFF 64:33).
E mautinoa lava le oo mai o faamanuiaga. Faamolemole ia manatua o le ositaulaga lava ia e mafai ona avea ma se ituaiga faamanuiaga. Ia tatou ositaulagaina ia nai mea laiti.
Afai tatou te faitau i le Tusi a Mamona a o mili o tatou mata tulemomoe, ia tatou manatua o loo tatou mulimuli i le fautuaga a lo tatou perofeta ma maua le olioli lea e sau mai lena malamalama. E tele a tatou pili e totogi, ae afai e totogi a tatou sefuluai, ia tatou lagonaina le olioli ona o le avanoa ua tatou maua e foai atu ai se mea i le Alii.
Ona sasaa mai ai lea o faamanuiaga silisili i o tatou luga. E pei lava ona tatou tete’i ma fiafia, pe a tatou mauaina se meaalofa e lei faamoemoeina.
E pei ona saunoa mai Peresitene Spencer W. Kimball, “A tatou foai atu, tatou te iloaina ai o le ‘ositaulaga e aumaia ai faamanuiaga o le lagi!’ [Viia Le Na Fetaiai ma Ieova,” Viiga, nu. 15.] Ae i le faaiuga, tatou te iloa ai foi e le o se osigataulaga.” (“Becoming the Pure in Heart,” Ensign, Mat. 1985, 5). Ou te tatalo ina ia avea uma i tatou ma Au Paia ua naunau e ositaulaga ma avea ma tagata ua agavaa mo faamanuiaga faapitoa a le Alii. O le a leoleoina i tatou e le Alii ina ia aua nei faigata tele ona onosaia so o se osigataulaga. I le suafa o Iesu Keriso, amene.