Pule o le Perisitua i le Aiga ma le Ekalesia
E tele mea e tutusa ai ma ni nai eseesega i le auala e galueaiina ai le pule o le perisitua i totonu o le aiga ma le Ekalesia.
O La’u mataupu o le pule o le perisitua i le aiga ma totonu o le Ekalesia.
I.
Na maliu lo’u tama a ua fitu o’u tausaga. O a’u o le ulumatua o le fanau toatolu laiti lea sa tauivi lo matou tina ua oti lana tane, e tausi. Ina ua faauuina a’u e avea ma tiakono, sa fai mai o ia, e ese lona fiafia ona ua i ai se tasi e umia le perisitua i lo matou aiga. Ae sa faaauau pea ona taitai e le Tina lo matou aiga, e aofia ai le tofia o le tagata o i matou e tatalo pe a matou tootutuli faatasi i taeao taitasi. Sa ou le mautonu. Sa aoaoina a’u, o le perisitua e pulefaamalumalu i le aiga. Atonu sa i ai se mea ou te le i malamalama ai, i le auala e faagaoioia ai lena mataupu faavae.
E tusa o le taimi foi lena, sa i ai so matou tuaoi e pule saua ma o nisi foi taimi e saua ai i lona toalua. E avaavau le tamaloa e pei o se leona, ae matafefe pei se tamai mamoe le fafine. A savavali i le lotu, e savali atu lava i tua le fafine. Na avea lena ma mea e ita ai lo’u tina. O ia o se tamaitai malosi ma na te le taliaina lea ituaiga o pule saua, ma sa ita o ia i le vaai atu o sauaina faapena se isi tamaitai. Ou te mafaufau lava i ona uiga faaalia i soo se taimi e vaai ai i tamaloloa o faaaoga sese la latou pule e faamalie ai lo latou faamaualuga, pe faaaoga foi e pulea ai pe fai faamalosi ni faatonuga i a latou ava, i soo se tulaga amioletonu (tagai MFF 121:37).
Ua ou vaai foi i ni tamaitai faamaoni e le malamalama i le auala e faagaoioia ai le pule o le perisitua. Ona ua latou iloa le sootaga faapaaga ma o latou taitoalua i le aiga, o lea ua taumafai ai nisi fafine e faalautele atu lena sootaga i valaauga faaleperisitua o o latou taitoalua, e pei o le epikopo, po o le peresitene o le misiona. I le faatusatusa atu i ai, ua i ai nisi tamaitai nofofua ua sauaina e tamaloloa (mo se faataitaiga faapea ua tete’a) e fenumia’i sese ai le perisitua ma le sauaina e tane, ma masalomia ai le pule o le perisitua a soo se tasi. O se tagata sa leaga sona aafiaga i se mea e alu i le eletise, e le tatau ona taofia ai lona faaaogaina o le malosiaga faaeletise.
O nei tulaga taitasi ua ou faamatalaina atu, e mafua mai i le le malamalama i le pule o le perisitua ma le mataupu faavae sili, e ui ina faamalumalu lenei pule i le aiga ma le Ekalesia, ae e eseese lava auala e faagaoioia ai le perisitua i mea taitasi. Ua malamalama ma o loo faaaogaina lenei mataupu faavae e taitai maoae o le Ekalesia ma aiga ua ou iloa, ae e seasea lava ona faamalamalamaina. E oo lava i tusitusiga paia, o loo tusia ai le faaaogaina eseese o le pule o le perisitua, e tau lē o ta’ua patino mai ai foi pe o fea mataupu faavae e na o le aiga e faaaoga ai lea pule o le perisitua, pe na o totonu o le Ekalesia, pe o mea uma foi e lua.
II.
I lo tatou talitonuga ma faiga faalelotu, o le aiga ma le Ekalesia e i ai se sootaga moni malosi. E faalagolago le aiga i le Ekalesia mo aoaoga faavae, o sauniga, ma ki o le perisitua. E saunia e le Ekalesia ia aoaoga, o le pule, ma sauniga e tatau ai ina ia faaauau ai sootaga faaleaiga i le faavavau.
Ua i ai a tatou polokalama ma gaoioiga i le aiga faapea foi le Ekalesia. E matua fesoota’i lelei, ma o le tautua i le tasi o le tautua foi lea i le isi. A vaaia e le fanau o latou matua o faatino ma le faamaoni o latou valaauga faale-Ekalesia, e faamalolosia ai o latou sootaga faaleaiga. A malolosi aiga, ua malosi foi le Ekalesia. E o tutusa lelei lava ia mea e lua. E taua ma e tatau ona i ai ia mea e lua. E ao ona taulimaina ia mea taitasi faatasi ma le manatu popole mo le isi. O polokalama ma gaoioiga faale-Lotu, e le tatau ona tele naua se taimi e alu ai, ne’i le mafai ai e aiga ona maua tagata uma mo taimi faaleaiga. E le tatau foi ona faatulagaina gaoioiga faaleaiga ia feteena’i ma le sauniga faamanatuga po o isi fonotaga taua Faale-Ekalesia.
Tatou te manaomia uma gaoioiga faale-Ekalesia ma faaleaiga. Afai e mautu ma atoatoa aiga uma, e laitiiti lava ni nai gaioioiga e faia e le Ekalesia. Peitai, i se lalolagi e toatele o tatou talavou e ola a’e i aiga e misi le matua e toatasi, e le auai i le ekalesia, pe le toaga foi i taitaiga faale-talalelei, e i ai lava se tulaga manaomia faapitoa mo gaoioiga Faale-Ekaleisa e faatumu ai mea o loo misi i le olaga faaleaiga. Sa iloa lelei lava e lo matou tina ua tuua na o ia, o gaoioiga faalelotu o le a maua ai e lana fanau tama ni aafiaga sa le mafai ona ia faia, aua sa leai se tane e avea ma o matou faataitaiga i le aiga. Ou te manatuaina lona uuna’ia o a’u, e matau ma ou taumafai ia pei o alii lelei o la matou uarota. Sa ia tuleia malosi a’u ou te auai i le Sikauti ma isi gaoioiga faalelotu e maua ai lenei avanoa.
I se ekalesia e toatele ona tagata e nofofua, e le o i ai ni a latou soa e pei ona finagalo ai le Alii mo ona atalii ma afafine uma, e ao i le Ekalesia ma ona aiga ona i ai se popolega faapitoa mo mea e manaomia e le au matutua nofofua.
III.
O le pule o le perisitua e faagaoioia i le aiga ma le Ekalesia. O le perisitua o le mana o le Atua e faaaoga e faamanuia ai Ana fanau uma, o tane ma fafine. O nisi o a tatou anaga pupuu e pei “o tamaitai ma le perisitua,” e aumai ai se manatu sese. O alii, e le “o le perisitua.” O sauniga a le Au Perisitua o se sauniga a i latou o loo umia ma faaaogaina le perisitua. O faamanuiaga o le perisitua, e pei o le papatisoga, mauaina o le Agaga Paia, faaeega paia i le malumalu ma faaipoipoga e faavavau, o loo i ai mo alii faapea foi tamaitai. O le pule o le perisitua e galueaiina i le aiga ma le Ekalesia, e tusa ai ma mataupu faavae ua faatuina e le Alii.
Ina ua maliu lo’u tama, sa pulefaamalumalu lo’u tina i lo matou aiga. Sa leai sona tofi o le perisitua, peitai ona o ia o le matua o loo totoe o la la’ua ulugalii, o lea sa avea ai o ia ma taitai faafoe i lona aiga. O le taimi foi lava lea, sa ia matua faaaloalo atoatoa i le pule o le perisitua a lo matou epikopo ma isi taitai o le Ekalesia. Sa pulefaamalumalu o ia i lona aiga, ae sa pulefaamalumalu i latou i le Ekalesia.
IV.
E tele mea e tutusa ai ma ni nai eseesega i le auala e galueaiina ai le pule o le perisitua i totonu o le aiga ma le Ekalesia. A tatou le iloa eseesega ma faamamalu i ai, ona tatou fetaia’i ai lea ma faigata.
O Ki. O se eseesega taua se tasi o lona faagaoioia i totonu o le Ekalesia ma totonu o le aiga, o le pule uma o le perisitua i le Ekalesia e galueaiina i lalo o le taitaiga a le o loo umia ki talafeagai o le perisitua. I se faatusatusaga, o le pule e faamalumalu i le aiga—pe o se tama pe na o se tina nofofua foi—e faagaoioia mea tau i le aiga e aunoa ma le moomia o se pule mai i se isi o umia ia ki o le perisitua. O lenei pule faaleaiga e aofia ai le taitaiina o gaoioiga a le aiga, o fonotaga faaleaiga e pei o afiafi faaleaiga, tatalo faaleaiga, aoao atu o le talalelei, ma le fautuaina ma a’oa’i tagata o le aiga. E aofia ai foi tamā faauuina e tuuina atu faamanuiaga faaleperisitua.
Peitai, e tatau ona faatagaina e ki o le perisitua le faauuina po o se vaetofiaina o tagata o le aiga. E afua lenei mea ona o le faalapotopotoga na tuu i ai e le Alii le tiute mo le faataunuuina ma le faamaumauina o sauniga o le perisitua o le Ekalesia, ae le o le aiga.
O Tuaoi. O faalapotopotoga faale-Ekalesia e pei o uarota, korama po o ausilali, e i ai o latou tuaoi faale-faafanua lea e faatuaoi ai tiutetauave ma le pule o valaauga e aofia ai. I se faatusatusaga, o sootaga ma tiutetauave faaleaiga, e le faalagolago i le mea e nonofo ai tagata eseese o aiga.
O Le Umi. O tofiga faale-Ekalesia e le tumau, ae o sootaga faaleaiga e tumau.
Tofia ma Faamalolo. O se isi foi faatusatusaga e faatatau i le tofia ma le faamutaina o tofiga. I totonu o le Ekalesia, o se taitai perisitua na te umia ki talafeagai, ua i ai le pule e valaau ai pe faamalolo ia tagata i lalo o lana taitaiga. E mafai lava foi ona ia aveesea i latou mai le auai i le ekalesia ma “tineia” o latou igoa (tagai Mosaea 26:34–38; Alema 5:56–62). I se faatusatusaga, e matua taua tele sootaga faaleaiga, ma e le o i ai i le ulu o le aiga le pule e fai ai ni suiga i tagata auai o le aiga. Na pau le mea e mafai ai lena tulaga, o se tagata ua faatagaina e fetuunai ia sootaga faaleaiga i lalo o tulafono a le malo po o tulafono a le Atua. O lona uiga, e mafai e se epikopo ona faamalolo se peresitene o le Aualofa, ae le mafai ona ia tuueseeseina la la’ua sootaga ma lona toalua e aunoa ma le tatalaina i lalo o le tulafono a le malo. O lona uiga foi la, e le mafai ona faamutaina lana faamauga mo le faavavau, e aunoa ma le faiga e faaleaoga ai i lalo o tulafono a le Atua. E faapena foi, i se talavou e galue i se au peresitene o se vasega po o se korama, e mafai ona faamalolo e le pule o le perisitua i le uarota, ae e le mafai e matua ona faamutaina la latou sootaga ma se tamaitiiti e faatiga ana filifiliga ia te i latou. E sili atu ona tumau sootaga faaleaiga nai lo sootaga faale-Ekalesia.
Faapaaga. O se eseesega aupito sili ona taua i le faaaogaina o le pule o le perisitua i le aiga ma totonu o le Ekalesia, e afua mai i se tulaga moni, o le pulega o le aiga e pulefaamalumalu ai tamā ma e laugatasia uma ai tama i o latou aiga, ae o le pulega o le Ekalesia e i ai se faasologa o pule mai luga seia oo mai i lalo. O le konasepi o le faapaaga, e ese lona faagaoioia i totonu o le aiga ma totonu o le Ekalesia.
O loo aumaia i le folafolaga i le aiga le faamalamalamaga matagofie lenei, i le sootaga a le tane ma le ava. E ui ina eseese o la’ua tiutetauave, “[i] nei matafaioi paia, e ao i tama ma tina ona fesoasoani le tasi i le isi o se paaga tutusa” (O Le Aiga: O Se Folafolaga i le Lalolagi.” Liahona, Oke. 2004, 49; faamamafa faaopoopo).
Sa saunoa Peresitene Spencer W. Kimball: “A tatou tautatala e uiga i le faaipoipoga o se paaga, ia tatou talanoa i le faaipoipoga o se paaga atoatoa. Tatou te le mananao i tamaitai o le Au Paia o Aso e Gata Ai, e avea ma ni paaga e le gagana po o ni paaga e faatapulaa i lena tofiga faavavau! Faamolemole ia avea ma se paaga e fai saofaga ma atoatoa” (The Teachings of Spencer W. Kimball, ed. Edward L. Kimball [1982], 315).
Sa tautino mai foi e Peresitene Kimball, “Ua matou faalogo i tamaloloa o faapea atu i o latou taitoalua, ‘O lea ou te umia le perisitua ma e tatau ona e faia le mea lea ou te fai atu ai.’” Sa vave ona ia aumai le tali e teena ai lena faaaogaina sese o le pule o le perisitua i se faaipoipoga, ma tautino mai ai o lena ituaiga o tagata “e le tatau ona faamamaluina i lona perisitua” (The Teachings of Spencer W. Kimball, 316).
E i ai aganuu po o tu ma aga i nisi vaega o le lalolagi e faataga ai ona faapologa e tamaloloa ia fafine, peitai e le tatau ona aumaia na faiga saua i totonu o aiga o le Ekalesia a Iesu Keriso. Ia manatua le faiga o aoaoga a Iesu, “Ua outou faalogo, na fai mai i e anamua … A ou te fai atu a’u ia te outou …” (Mataio 5:27–28). Mo se faataitaiga, sa teena e le Faaola le aganuu malosi a Lona nuu i Lona taulimaina lelei lea o tamaitai. E tatau ona avea le aganuu faatalalelei sa Ia aoao mai, ma o tatou taiala.
Afai e manaomia e tagata ia faamanuiaga a le Alii i a latou taitaiga faaleaiga, e ao ina latou faaaogaina la latou pule o le perisitua e tusa ai ma mataupu faavae a le Alii e faaaoga ai:
“E le tatau ona faatumauina se mana po o se uunaiga e le pule o le perisitua, tau lava i le tauanau atu, i le faapalepale, le agalelei, ma le agamalu, ma le alofa faamaoni; ”I le agalelei, ma le malamalama mama” (MFF 121:41–42).
A faaaogaina le pule o le perisitua i lena auala i totonu o le aiga i le pulega faapeteriaka, ona tatou maua lea o le “paaga atoatoa” lea sa aoao mai e Peresitene Kimball. E pei ona tautino mai i le folafolaga i aiga:
“E maua le fiafia i le olaga faaleaiga pe a faavae i aoaoga a le Alii o Iesu Keriso. O faaipoipoga ma aiga manuia, e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, [ma le] agalelei” (Liahona, Oke. 2004, 49).
E faataunuuina valaauga faale-Ekalesia e tusa ai ma mataupu faavae e pulea ai i tatou a o galulue i lalo o le pule o le perisitua i totonu o le Ekalesia. O nei mataupu faavae e aofia ai le tauanau atu ma le faapalepale o loo aoao mai i le vaega e 121, ma e faapitoa lona talafeagai i le faatulagaga e faasolo mai i luga le pule, i totonu o le Ekalesia.
O mataupu faavae sa ou ta’ua mo le faaaogaina o le pule o le perisitua, e sili atu ona malamalama ai ma faigofie ona talia e se tamaitai ua faaipoipo nai lo se tamaitai nofofua, aemaise lava se tamaitai nofofua e le’i faaipoipo lava. Na te le o iloa i le taimi nei le pule o le perisitua i le sootaga faapaaga i le faaipoipoga. O ona aafiaga i le pule o le perisitua o loo i ai lea i sootaga o le faatulagaga a le Ekalesia, ma e i ai nisi tamaitai nofofua e manatu e leai so latou sao i na sootaga. O le mea lea, e taua ai tele ona i ai se aufono lelei a le uarota, lea e nonofo faatasi ai e le aunoa taitai o alii ma tamaitai, e fefautuaa’i i lalo o le pulefaamalumalu a le epikopo.
V.
O le a faaiu atu i ni nai manatu masani faapea foi so’u aafiaga patino.
O le talitonuga faalelotu O Le Ekalesia a Iesu Keriso o le Au Paia o Aso e Gata Ai, e totonugalemu i le aiga. O lo tatou sootaga ma le Atua ma le faamoemoega o le olaga nei, e faamatala i tulaga o le aiga. O i tatou o fanau agaga a ni matua faalelagi. O le fuafuaga o le talalelei, e faataunuu e ala i aiga faalelalolagi, ma o lo tatou faanaunauga maualuga lava o le faaauauina lea o na sootaga faaleaiga seia oo atu i le faavavau. O le misiona tupito a le Ekalesia a lo tatou Faaola, o le fesoasoani lea ina ia tatou mauaina le faaeaga i le malo selesitila, ma e na o le sootaga faaleaiga lava e mafai ai ona ausia lena mea.
E le o se mea e ofo ai le lauiloa o la tatou Ekalesia o se ekalesia e taula’i i le aiga. E leitioa tatou atuatuvale i le matautia o tulaga faaletulafono ma faaleaganuu ua i ai nei faaipoipoga ma le fanauina o fanau. I se taimi ua foliga mai ua le malamalama le lalolagi i le faamoemoega o le faaipoipoga ma le taua o le fanauina o fanau, e matua taua lava i le Au Paia o Aso e Gata Ai ona leai se fenumia’i e uiga i nei mataupu.
Sa leai se fenumia’i o le tina faamaoni ua oti lana tane lea na tausia i matou, e uiga i le natura faavavau o le aiga. Sa ia faamamaluina e le aunoa le tulaga o lo matou tama ua oti. Sa ia faia e pei lava o loo ola pea i lo matou aiga. Sa ia talanoa i le faavavau o la la’ua faaipoipoga i le malumalu. Sa masani ona ia faamanatu mai ia te i matou mea e mana’o lo matou tama e fai, ina ia matou maua le folafolaga a le Faaola faapea e mafai ona faavavau lo matou aiga. Ua ou toe manatua se mea na tupu na faaalia ai le aafiaga o ana aoaoga.
Toeitiiti aulia le Kerisimasi i se tasi tausaga, ae talosaga mai lo matou epikopo ia te au, a o ou tiakono, e fesoasoani atu ia te ia i le tilivaina o ato Kerisimasi i tina ua oti a latou tane i le uarota. Sa ou aveina se ato ma tuu i faitotoa taitasi ma avatu i ai ana faamanuiaga. Ina ua ia momoliina a’u i le fale, sa toe tasi le ato na totoe. Sa ia tuu mai ia te au ma fai mai e mo lo’u tina. A o alu ese atu lana taavale, sa ou tutu a o toulu ifo le kiona ma ou faapea, pe aisea na aumai ai se ato mo lo’u tina. E le’i faapea lava lo’u tina ua oti lana tane, ma ou te le’i manatu foi lava ua nofofua o ia. I se tamaitiiti e 12 tausaga, e le o se tina o nofofua o ia. Sa i ai lana tane, ma sa i ai so matou tama. Sa na o sina taimi o loo alu ese ai.
Ua ou naunau atu i lena aso, o le a toe tuufaatasia ai e ua tuueseesea, ma mafai ai ona toe atoa i matou uma e pei ona folafola mai e le Alii. Ou te molimau atu o Iesu Keriso, le Alo Pele o le Tama e Faavavau, o Lana pule o le perisitua ma Lana Togiola ma Lona Toetu, e mafai ai mea uma, i le suafa o Iesu Keriso, amene.