“Fafaga Au Mamoe”
E sili atu ona tali mai tagata i o tatou aafiga pe a latou lagonaina e moni lo tatou alolofa ia i latou, ae le na o so tatou valaauga e faataunuuina.
Na i ai se taimi na fesili faatolu atu ai lava le Faaola ia Peteru: “Simona e, le atalii o Iona, pe e te alofa mai ia te au? Ua fai mai o ia ia te ia, Ioe, le Alii e, ua e silafia ou te alofa ia te oe. Ua fetalai atu [Iesu] ia te ia, Ia e fafaga i au mamoe.”1
Talu ai ona o Lona matuai popole tele i le soifua manuia o fanau a lo tatou Tama Faalelagi, na tuuina atu ai e le Alii ia Peteru se lu’i faapitoa o le fafagaina o mamoe. Na ia toe faamautinoa atu foi lenei lava atugaluga e tasi i ona po nei e ala i se faaaliga na tuuina atu ia Iosefa Samita:
“O lenei, ou te fai atu ia te outou, o le mea foi ou te fai atu ai ia te outou ou te fai atu ai taitoatasi i le Toasefulu ma le Toalua: Ina tulai ia ma fusi a’e o outou sulugatiti, ma ave o outou satauro, ma mulimuli mai ia te a’u, ma fafaga au mamoe.”2
A o tatou suesueina ia tusitusiga paia, tatou te matauina ai na auauna atu le Faaola i tagata e tusa ai ma mea patino sa latou manaomia. O se faataitaiga lelei o lenei mea na tupu ina ua latalata atu o Ia i Kapanaumi, na alu atu ai Iairo, o se tasi e pule i le sunako, ua faapau i vae o Iesu, ma faatoga atu i le Alii ina ia afio atu i lona fale ma faamanuia i lona afafine, o le a oti. Na o atu Iesu ma Iairo e ui lava i le fetaomi atu o le motu o tagata lea na faigata ai ia te Ia ona faatalise atu.
Ona oo atu ai lea o se avefeau ma ta’u atu ia Iairo ua oti lona afafine. E ui i lona faavauvau sa i ai, ae sa mausali pea le faatuatua o Iairo i le Alii, o le na faamafanafanaina le loto o lena tama, i le fetalai atu:
“Aua e te fefe, tau ina e faatuatua, e ola ai o ia.
“Ua ulu atu ia i le fale, e le mafai ia te ia ona ulu atu se tasi, tau o Peteru, ma Iakopo, ma Ioane, o le tama foi ma le tina o le teine.
“Ua fetagisi i latou uma, ma tagitui ona o ia: a ua fetalai atu ia, Soia le fetagisi; e lei oti o ia, a ua moe… .
“… Ona tago atu lea o ia i lona lima, ua valaau, ua faapea atu, Funa e, ina tulai ia.
“Ua toe foi mai lona agaga ona tulai loa lea o ia: ua fetalai atu foi o ia, ia avatu ni ana mea e ai.”3
Sa faaalia e Iesu le onosai ma le alofa ia i latou uma o e o atu ia te Ia e saili se fofo mo o latou ma’i faaletino, faalelagona, po o le faaleagaga, ma ē ua lagona le lotovaivai ma le loto nutimomoia.
Ina ia mulimuli i le faataitaiga a le Faaola, e tatau ia i tatou taitoatasi ona vaavaai solo ma aapa atu i le mamoe o loo feagai ma tulaga lava na e tasi ma sii i luga i latou ma faamalosiau ia i latou ina ia faaauau le faigamalaga e agai atu i le ola faavavau.
O lenei tulaga moomia i aso nei ua faateleina pe atonu ua sili atu nai lo le taimi a o femaliuai ai le Faaola i lenei lalolagi. I le avea ai ma leoleo mamoe e ao ona tatou malamalama e tatau ona tatou faafaileleina a tatou mamoe taitoatasi ina ia aumaia i latou ia Keriso aua o le faamoemoega lea o mea uma tatou te faia i totonu o lenei Ekalesia.
Soo se gaoioiga, fonotaga po o se polokalama e tatau ona taulai atu i le faamoemoega lava lea e tasi. A o tatou nofouta ai i manaoga o tagata, o le a mafai ona tatou faamalolosia i latou ma fesoasoani ia i latou e faatoilaloina o latou luitau, ina ia latou tumau mausali ai i le ala lea e taitai atu ai i latou i le afioaga o lo tatou Tama Faalelagi ma fesoasoani ia i latou ia tumau seia oo i le iuga.
O le talalelei a Iesu Keriso e faatatau i tagata, ae le o polokalama. O nisi taimi, i le faananati ona faataunuuina o o tatou tiutetauave o le Ekalesia, ua tele taimi tatou te faaalu e taulai ai i polokalama, nai lo le taulai atu i tagata, ma oo atu ai ina tatou faaleano i mea moni latou te manaomia. Afai e tutupu mea faapena, ua tatou le maua le faamoemoega o o tatou valaauga, ua le amanaiaina ia tagata, ma taofia ai i latou mai le oo atu i o latou avanoa taua ina ia maua le ola faavavau.
Ina ua lata ina ou aulia lo’u aso fanau lona 12, na valaaulia a’u e lo’u epikopo mo se faatalanoaga ma sa ia aoaoina a’u i le auala e saunia ai mo le mauaina o le Perisitua Arona ma faauuina o se tiakono. Ina ua lamalama faaiu le faatalanoaga, na ia toina ae ni fomu mai lana kesi ma sa ia tuu mai se lu’i ia te au e faatumu. O ni pepa mo se valaauga faamisiona. Sa ou te’i. Sa na o le 11 o’u tausaga. Ae sa i ai i lena epikopo se tofamamao o le lumanai ma faamanuiaga e oo mai ia te au pe afai ou te saunia faalelei e auauna atu i se misiona pe a oo mai lo’u taimi.
Na ia faaali mai lona popole tele mo au. Na ia ta’u mai ia te au ia laasaga e tatau ona ou uia ina ia saunia ai i mea tau tupe faapea ma le faaleagaga e auauna atu ai i le Alii. Ina ua mavae lena aso, sa ia faatalanoaina au, ma sa faapena foi i le isi epikopo na tofia e suitulaga, e le itiiti ifo ma le faalua i le tausaga, seia oo ina ua ou 19 ma sa uuna’ia au ina ia tumau lo’u faamaoni i a’u sauniuniga.
Sa la teuina pea a’u fomu faafaifeautalai i a la’ua faila, ma e la te faamanatu mai i soo se taimi e fai ai sa matou faatalanoaga. Faatasi ai ma le fesoasoani a o’u matua faapea ma le faamalosiauga a ni epikopo alolofa ma le onosai, sa ou auauna atu ai i se misiona. Na fesoasoani le misiona ia te au i le mauaina o se vaaiga i faamanuiaga o loo teuina e le Atua mo i latou uma o e tumau seia oo i le iuga.
E le afaina po o se tamaitiiti, talavou, po o se tagata matua—e moomia e tagata uma le lagona o le alofagiaina. Ua fautuaina i tatou i le tele o tausaga ina ia taulai atu i le galulue faatasi ma tagata liliu mai ma tagata le toaaga. O le a tumau pea tagata i le Ekalesia pe a latou lagonaina o loo i ai se tasi e manatu popole mo i latou.
I se tasi o aoaoga faaiu na tuuina atu e le Faaola i Ana Aposetolo, na Ia fetalai atu ai:
“O le poloaiga fou ou te tuu atu ia te outou, ia outou fealofani; faapei ona ou alofa atu ia te outou, ia fealofani foi outou.
“O le mea lea e iloa ai e tagata uma lava o o’u soo outou, pe afai ua outou fealofani.”4
E sili atu ona tali mai tagata i o tatou aafiga pe a latou lagonaina e moni lo tatou alolofa ia i latou, ae le na o so tatou valaauga e faataunuuina. A o tatou faailoa atu le alofa moni mo tagata, o le a mafai ona latou lagonaina le aafiaga o le Agaga ma mafai ona uunaia i latou e mulimuli i a tatou aoaoga. E le faigofie pea ona alolofa i tagata ona o i latou. Na faamalamalama mai e le perofeta o Mamona le mea e tatau ona tatou faia pe a tulai mai ni luitau:
“O le mea lea, o’u uso pele e, ia outou tatalo atu ai i le Tama ma le malosi uma o le loto, ina ia faatumuina outou i lenei alofa ua foaiina mai ia te i latou uma o e ua fai ma soo faamaoni o lona Alo o Iesu Keriso, ina ia avea outou ma atalii o le Atua, ina ia foliga i tatou ia te ia pe a faaalia mai o ia, aua tatou te iloa atu ia te ia e pei lava ona i ai nei o ia, ina ia ia te i tatou lenei faamoemoe, ina ia faamamaina i tatou, e pei ona mama o ia.”5
Sa auauna atu Keriso lava Ia i tagata, siitia avega mamafa, tuuina atu le faamoemoe i e lotovaivai ma saili i e ua leiloloa. Sa Ia faaali atu i tagata le tele o Lona alofa ma Lona silafia ia i latou ma lo latou taua tele. Na Ia faailoa atu lo latou natura paia ma le taua faavavau. E oo lava i le valaauina o tagata ina ia salamo, na Ia fetuuina le agasala e aunoa ma le fetuuina o le tagata agasala.
I lana uluai tusi i Korinito, na faamamafa atu ai e le Aposetolo o Paulo le moomia ona faailoa atu o le alofa moni i mamoe taitasi o le lafu a le Alii:
“Afai foi ou te tufatufaina au mea uma e fagaina ai e matitiva; afai foi ou te tuuina atu lo’u tino ina ia susunuina, ae leai so’u alofa, e leai lava sona aoga ia te au.
“E onosai le alofa, e agamalu; e le losilosi le alofa; e le mitamita vale le alofa, e le faafefeteina.
“E le amio mataga, e le sailia e ia ana lava mea, e le faaitaitagofie, e le tuuina atu i isi le leaga;
“E le fiafia i le amio leaga, ae fiafia i le faamaoni;
“E ufiufi i mea uma, e talitonu i mea uma, e faamoemoe i mea uma, e onosai i mea uma… .
“A o lenei, o tumau le faatuatua, faamoemoe, ma le alofa, o na mea e tolu; a o le sili o na mea o le alofa lea.”6
A o tatou mulimuli ai i le faataitaiga ma aoaoga a le Faaola, o le a mafai ona tatou lagolagoina tagata i le faataunuuina o la latou misiona i lenei lalolagi, ma toe foi atu e nonofo faatasi ma lo tatou Tama Faalelagi.
Ou te molimau atu ai ia te outou i nei mea i le suafa o Iesu Keriso, amene.