Tufugaaao o le Atua
O lo outou aafiaga mo le lelei e le mafuatiaina ma e le mafaamatalaina foi.
Ua faatagaina a’u e Peresitene Hinckley e fai ma sui o le Au Peresitene Sili, e faailoa atu lo matou agaga faafetai mo i latou uma sa fesoasoani i soo se auala lava, e faasaoina le ola ma meatotino ina ua mae’a mala sa tutupu ma o loo tutupu pea lava i lo tatou atunuu.
O’u tuafafine pele, ua faalotomaulaloina lava au i lenei tiutetauave tele ma le avanoa e lauga atu ai ia te outou o afafine o le Atua i le tele o atunuu. Ua faamalamalamaina ma faagaeetiaina lava i tatou i se ata vitio puupuu mai ia Peresitene Hinckley. Tatou te matuai faafetai lava ona o lo tatou faatasi ai ma Peresitene Hinckley ma Peresitene Monson i lenei afiafi. Ua faamalosiauina lava i tatou i la la’ua lagolago ma la la’ua taitaiga. Sa musuia i tatou e Sister Parkin, Sister Hughes, ma Sister Pingree. Ua ootia foi o tatou lagona i le Aufaipese. A ou vaavaai atu i o outou foliga e mafai ona ou lagonaina lo outou lelei. Ou te faamalo atu ia te outou taitoatasi mo a outou galuega amiotonu i aso taitasi. E ui o a outou galuega ua na o sina vaega toaitiiti o loo iloaina, ae o loo tusitusia i le tusi o le ola a le Tamai Mamoe,1 lea o le a susueina i se aso e molimauina ai la outou tautua maelega, naunautai, ma galuega i le avea ai ma ni “tufugaaao o le Atua e faataunuu a’i lenei galuega tele.”2
Na saunoa Elder Neal A. Maxwell, “E matua itiiti lava so tatou iloa … i mafuaaga na vaevaeina ai tiute i le va o tamaitai ma alii e faapea foi i le va o tina ma le perisitua. O nei vaevaega na fuafuaina faalelagi i se isi taimi ma se isi nofoaga. Ua tatou masani i le taulai atu i tamalii o le Atua, aua o loo ia i latou le perisitua ma le faasologa o le taitaiga. Peitai, e vaavaalua lena pule ma se aafiaga amiotonu e atagia mai ai tamaitai ofoofogia o le Atua o e sa soifua ai i tupulaga ma tisipenisione uma, e aofia ai ma i tatou. O le silisiliese e le fuaina i le aofaiga o inisi o koluma, i nusipepa po o totonu o tusitusiga paia. O lea la, o tala i tamaitai o le Atua, mo le taimi nei, o se tala o lo o natia i totonu o le talaaga tele o tagata o le Atua.”3
O nisi o outou tuafafine e mafai ona lagonaina le faatauvaa ona e foliga mai e le mafai ona outou faia mea uma tou te mananao e fai. O le avea ma tina ma le avea ma matua, o matafaioi sili ia ona faigata. O loo i ai foi o outou valaauga faaleEkalesia lea tou te gafataulimaina ma le faaeteete. E le gata i lea, o le toatele o outou, o loo faigaluega ma tausia o outou aiga. E momomo lo’u loto i tina ua oti a latou tane ma tuafafine ua avea ma matua nofotoatasi o e o loo tauaveina uma le tiutetauave o matua. I se tulaga lautele, o outou tuafafine tamalii o loo outou faia se galuega sili ona lelei o le faataunuuina o o outou tiute i le olaga, ma outou manuia ai, nai lo le mea tou te iloaina. Ou te fautua atu ina ia taulimaina taitasi luitau i le taimi. Ia fai le mea sili e te mafaia. Ia vaai atu i mea uma e ala i vaaiga o le faavavau. Afai o le a e faia lenei mea, o le a ese foi se vaaiga i lenei olaga.
Ou te talitonu o outou uma tuafafine e mananao ina ia fiafia ma saili le filemu lea na folafola mai e le Faaola. Ou te manatu o le toatele o outou o loo taumafai malosi ina ia faataunuuina uma o outou tiutetauave. Ou te le manao e faatiga i soo se tasi. Ou te musu e ta’u atu se mataupu, ae ua ou lagona e tatau ona ta’u atu. O nisi taimi e umi ai ona tatou tauaveina ni lagona le fiafia o ni tiga ua mavae. Ua tele lo tatou malosi e alu i mea ua mavae atu ma e le mafai ona suia. Ua tatou tauivi ina ia tapuni le faitotoa ae lafoai ese le lagona tiga. Afai e mavae se taimi, ae ua mafai ona tatou faamagalo atu i soo se mea lava na mafua ai le tiga, o le a tatou pa’i atu “i se punavai ola o le faamafanafanaina” e ala i le Togiola, ona fai ai lea mo i tatou le suamalie o le filemu o le faamagalo atu.4 O nisi manua e matuai tiga lava ma loloto, lea e na o le fesoasoani mai i se mana e maualuga atu e oo mai ai le faamalologa ma le faamoemoe mo se faamasinoga tonu atoatoa ma le toe tauia i le isi olaga. Tuafafine, e mafai ona outou pa’i atu i lena mana maualuga atu ma mauaina le faamafanafanaga sili ma le filemu moni.
Ou te popole ia te outou tuafafine ona tou te leiloaina le lautele o lo outou aafiaga mo le lelei i o outou aiga, i totonu o le Ekalesia, ma totonu o alalafaga. O lo outou aafiaga mo le lelei e le mafuatiaina ma e le mafaamatalaina foi. Na saunoa Peresitene Polika Iaga: “O tuafafine i a tatou Faalapotopotoga o le Aualofa ua tele naua mea lelei ua latou faia. Pe mafai ona outou ta’u maia le aofaiga o mea lelei e gafatia e tina ma tamaitai o Isaraelu? Leai, e le mafai. Ma o mea lelei o le a latou faia o le a mulimuli atu ia i latou i le faavavau atoa.”5 Ou te talitonu faamaoni o outou o tufugaaao o le Atua i le tele o a outou matafaioi, aemaise lava i le avea ai ma tina.
I le galuega o le malo [o le Atua], e tutusa uma le taua o alii ma tamaitai. Ua faatuatuaina e le Atua ia tamaitai ina ia tausia ma faafaileleina Ana fanau. E leai se isi galuega e sili atu lona taua. O le avea ma tina o se matafaioi taua tele mo tamaitai. Ua tafe mai faamanuiaga paia ma aafiaga amiotonu i totonu o lo’u lava olaga ma olaga o lo’u aiga mai lo’u toalua pele, o lona tina, o tinamatutua, ma o’u afafine faapelepele, ma a latou fanau teine. O sootaga faapelepele a tamaitai taitoatasi i lo’u olaga e le mafaatusaliaina. E faapitoa le faamaonia o lenei mea i la’u soa e faavavau, o Ruth.
Matou te mananao ia te outou tuafafine nofofua ina ia iloa lo matou alolofa tele mo outou. E mafai ona avea outou o ni tufugaaao malolosi o le Atua e fesoasoani e faataunuu a’i lenei galuega tele. E taua outou ma e manaomia. O isi tamaitai, e ui ua faaipoipo, ae e lei mafai ona avea ma ni tina. Mo i latou o loo i ai i se tasi o ia tulaga, faamolemole ia mautinoa e alofa le Alii ia te outou ma e le o faagaloina outou. E mafai ona e faia se mea mo se isi tagata, lea e leai se tagata soifua e mafai ona faia. Atonu e mafai ona e faia se mea mo se tama a se isi tamaitai lea atonu e le mafai ona ia faia. Ou te talitonu o le a oo mai ni faamanuiaga e tauia ai i lenei olaga ma le olaga a sau i tuafafine o loo i ai i na tulaga. O nei faamanuiaga ma se filemu mafanafana o le a oo atu ia te oe pe afai e mafai ona e alofa i le Atua “ma lou loto atoa, ma lou agaga atoa, ma lou malosi atoa, ma lou manatu atoa; e te alofa atu foi i le lua te tuaoi e pei o oe lava ia te oe.”6 E mafai lava ona maualuga pea lou faamanuiaina i soo se mea e te faia i le avea ai ma tufugaaao o le Atua i le faataunuuina o lenei galuega tele.
E tele naua le aafiaga o tamaitai i mea lelei o loo tutupu i le lalolagi lea semanu e le maua. I nisi tulaga, e faatonutonu ai e ava ma tina ia le tafe mai o faamanuiaga i totonu o o latou fale. A o e lagolagoina ia valaauga faaleperisitua o lou toalua ma uunaia lau fanau tama i a latou gaoioiga faaleperisitua, o le a matuai faamanuiaina lava lou aiga. E tatau foi ona e uunaia lau fanau ina ia fesoasoani i isi e le o tagolima. O lo matou aiga ua matuai faamanuiaina lava i lo ma’ua olaga faaipoipo ona o le aafia ai o lo’u toalua i le Aualofa. Sa avea o ia o se peresitene o le Aualofa i le uarota ona sosoo ai lea ma le siteki mo le tele o tausaga. A o ia faataunuuina ona tiute ma auai atu i ana fonotaga, sa faamanuiaina lo matou aiga i le agaga moni o le auauna atu sa ia aumaia i lo matou fale.
O outou o sui o le sosaiete sili ona maoae mo tamaitai i le lalolagi, pei ona outou faafofoga i ai i lenei po. Ma e pei o lea na faatoa faailoa mai e Peresitene Hinckley ia i tatou i le vitio, na folafola mai e le Perofeta o Iosefa Samita: “O lenei Sosaiete e maua mai ona faatonuga mai le faatulagaga na faavaeina e le Atua—e auala mai lea i lalo o le taitaiga a i latou ua tofia e taitai ai—ma ua ou tatalaina nei le ala mo outou i le suafa o le Atua ma o lenei sosaiete e ao ona olioli, ma o le a tafe atu le poto ma le atamai mai lenei taimi—o le amataga lenei o aso sili ona lelei i lenei Sosaiete.”7 E tele avanoa na oo mai i tamaitai talu ona tatalaina e le Perofeta o Iosefa Samita lena auala mo i latou nai lo le amataga o le i ai o tagata i le lalolagi.8
Mai lava i le amataga, sa avea ai tamaitai i totonu o le Ekalesia ma tufugaaao o le Atua. Ina ua fausia le malumalu i Katelani, sa tuuina atu e tamaitai le lagolago mo le aufaigaluega, e pei ona ta’ua mai e Peresitene Heber C. Kimball:
“Sa gafa o tatou fafine ma le lalagaina o ie ma su’i ina ia mafai ona faaoofu ai tamaloloa ma taulelea sa galulue i le malumalu, ma sa na o le Alii sa silafia ia vaaiga o le mativa, o mafatiaga ma faanoanoaga ina ia faataunuuina ai lenei mea. Sa galue lo’u toalua i le taumafanafana atoa i le tuuina atu o lana fesoasoani ina ia faataunuuina ai lenei mea. E selau pauna o ana vulu, lea sa ia miloina, faatasi ai ma se fesoasoani a se teineitiiti, ina ia maua ai ni ofu mo i latou sa galulue i le fauga o le Malumalu, ma e ui lava sa ia maua le avanoa e tuu ai le afa o vulu mo ia, e fai ma taui o lana galuega, ae na te lei taofia lava se mea e oo lava i ni vulu e fai ai ni ona totini; ae sa ia tuuina uma atu mo i latou o e sa galulue i le maota o le Alii. Sa ia miloina ma lalaga ma faia ni ie, ona oti lea ma sui ai ni ofu, ona tuuina atu lea i na alii o e sa galulue i le Malumalu; e toetoe lava o tuafafine uma i Katelani sa galulue i le lalagaina, suiina, miloina, ma isi galuega mo le faamoemoe o le faatelevaveina o le galuega a le Alii.”9
O Polly Angell, o le toalua o le tusiata a le Ekalesia, na faapea mai na saunoa atu le Perofeta ia i latou: “Tuafafine e, o outou lava e tapa atu i ai. O tuafafine lava e muamua ma taulamua i galuega lelei uma. O Maria lava [na] muamua [taunuu i le tuugamau e vaai i le Alii toetu]; ma o tuafafine foi nei ua muamua galulue i totonu o le malumalu.”10
O outou tuafafine o loo i ai ni uiga faalelagi o le magafagafa ma le alofa mo mea matagofie ma musuia. Ua outou faaaogaina nei meaalofa e faanofogofie atili ai o matou olaga. E masani lava afai e saunia e outou tuafafine ma tuuina atu se lesona, tou te tuu se ie laulau ma ni fugalaau mananaia i luga o le laulau—o se faailoga matagofie o lo outou natura o le magafagafa ma le faautautaga loloto. I se faatusatusaga, afai e tuuina atu e alii se lesona, e oo lava i ni vao osovale latou te le teuina ai se laulau! Peitai, o nisi foi taimi tou te faafaigataina ai mea mo outou lava. Tou te manatu afai e le o atoatoa lelei lau taulaga, o le a le taliaina lea. Ae, ou te ta’u atu ia te outou, afai ua e faia le mea sili e te mafaia, lea e masani lava ona outou faia, o le a taliaina ma le fiafia e le Alii lau taulaga faatauvaa, e tusa lava po o le a.
O aso nei, ua tele mea lelei ua faia e faiaoga asiasi. I le sefululua tausaga talu ai sa valaauina ai Susi e avea ma faiaoga asiasi ia Dora. O Dora o se tina ua maliu lana tane ma e leai sana fanau, e faigata ona uiga ma e toetoe lava a le fia masani i se tagata. Ina ua faatoa amata ona asiasi atu Susi ia Dora, sa faafeiloai o ia i le faitotoa ae lei valaauliaina i totonu. I le tele o masina mulimuli ane, na aveatu ai e Susi se meaai ia Dora ae sa fai atu Dora e le mafai ona ia taliaina. Ina ua fesili atu Susi pe aisea e le mafai ai, ae sa tali o ia, “Ne’i tei ua e manao i se mea e taui atu ai.” Sa faamautinoa atu e Susi ia te ia, “Na pau le mea ou te manao i ai ia avea oe o se uo.” Ina ua mavae lena, sa faafaigofie ia asiasiga. Sa faasolosolo malie lava ona maua e Susi ia ni auala e faia ai ni mea mo Dora ma faalogo atu foi i ai pe a moomia. Na te faamatala atu foi ia te ia e uiga i tagata lelei i le uarota, o lesona, o konafesi, ma ua avea lea ma auala ua ia lagonaina ai o ia foi o se itutino o le uarota. Ina ua amata ona tau faaletonu le soifua maloloina o Dora, sa faapea ona asiasi atu i ai Susi i aso uma, ma sa matuai mafana le la faigauo. Ina ua maliu ia Dora, sa mafai e Susi ona faia se saafiafiga i le tamaitai sa faaigoa e isi o “lē fia faamasani”, o se “tamaitai maoae” ma “se uo faapelepele.”11 Sa ia iloaina [Dora] e pei ona iloa e nisi, ona o lana auaunaga o se faiaoga asiasi.
O le Aualofa o se usoga faatamaitai ma o se nofoaga e aoaoina ai tamaitai ina ia fausia lo latou faatuatua ma ia faataunuuina galuega lelei. E pei ona saunoa soo mai ai Peresitene Hinckley, tatou te moomia uma lava ni uo. O faauoga e faatumulia ai i tatou i le mafanafana ma le alofa. E le faapito i talavou po o e matutua, o le mauoa po o le mativa, o le le taualoa po o le lauiloa. Po o a lava o tatou tulaga, tatou te manaomia uma lava se tagata e faalogo ma malamalama ia i tatou, e faamalo mai ia i tatou pe a tatou moomia le faamalosiau, ma totoina i o tatou loto le manao ina ia faia ia lelei ma ia sili atu. O le Aualofa na fuafuaina ina ia avea ma se li’o faapena o faauoga, e tumu i tamaitai e loto malamalama e faatupuina le alofa ma mea e faataunuuina, auā, o le laualuga o na mea uma, o se usoga lava.
O lenei sauniga aoao a le Aualofa o loo faasalalauina atu i le tele o atunuu i le salafa o le kelope. O se mea manaia le mafaufau atu i tuafafine o loo faapotopoto i nofoaga eseese e fefaasoaai ai savali lava e tasi ia o loo tatou faalogo i ai ma faatasia ai o ni uo. O se tasi tuafafine mai Aitiope na auai i se sauniga faapea i Fredericksburg, Virginia, ma sa ia matauina, “Na matou nonofo i lalo o ni uo, tina ma fanau teine, ae tutu ae i luga o ni uso.”12
O se tuafafine faifeautalai o loo auauna i Tailani sa ia tusia e uiga i lo latou nonofo faatasi ai ma tamaitai i Bangkok mo le faasalalauga i le tausaga ua te’a. Fai mai o ia, “sa ou lagonaina se malosi faapea mai lenei vaega toaitiiti o tamaitai Tailani, o loo latou faia le mea silisili ina ia mulimuli i fautuaga mai tamaitai i Sate Leki latou te lei feiloai lava muamua.”13 Pe le o se mea ea e maofa ai le lagonaina o le sootaga o le usoga faatamaitai lea e faalauteleina atu i luga o vasa ma vaitafe i le tele o atunuu a o tatou auai faatasi i lenei sauniga! E moni lava na tatalaina le auala e le Perofeta o Iosefa Samita ina ua latou feiloai ma se vaega toaitiiti o tamaitai i Navu e faatulaga le Aualofa i le 1842!
O le mea mulimuli, e tatau ona ou tuuina atu ni nai upu itiiti ia te outou tuafafine talavou. O loo i ai so outou nofoaga taua i lenei usoga maoae faatamaitai. O le toatele o outou ua faamanuiaina i se molimau o le talalelei ua toefuataiina a Iesu Keriso. Faatasi ai ma lena molimau, ma lo outou malosi, aafiaga, ma le atamai faaletalavou, ua mafai ai ona outou mauaina faamanuiaga e maua mai i le faataunuuina o le tiutetauave ina ia avea ma “tufugaaao o le Atua i le faataunuuina o lenei galuega tele.”
Sa faasoa mai talu ai nei e se tuafafine talavou ona lagona e uiga i le Aualofa. Fai mai o ia sa ola ae i se uarota sa naunau atu lava ia tuafafine ia te ia, e ui lava sa i ai o ia i Tamaitai Talavou, o lea, ina ua oo i le taimi e alu atu ai o ia i le Aualofa, sa matuai fiafia lava o ia e faapena foi ia i latou. Sa ia matauina le “tele o uiga eseese, o lagona lelei, ma ituaiga tagata ma tausaga i lena Aualofa,” ma sa faapea mai, O le taimi nei … o loo i ai ni a’u uo e eseese uma tausaga—mai lava i le autalavou seia oo i tina o tina o tina matutua ma soo se vaitausaga.”14
O loo i ai se lumanai maoae mo outou tuafafine talavou o loo i o outou luma. Atonu e le fetaui ma le mea na e fuafuaina, ae e mafai ona manaia ma faamalieina ai ma e mafai ona ausia ai le lelei silisili. O le mauaina e outou tamaitai talavou o se mafutaga ma tuafafine matutua ua lava le silafia, ma amiotonu, o se avanoa lava lea ma se faamanuiaga.
Na matuai manaia lava le faaupuina e le faletua pele o Peresitene Hinckley, o Marjorie Pay Hinckley, lea tulaga ina ua ia saunoa: “O loo tatou i ai faatasi uma i lenei vaega. E maeu lo tatou taufai manaomia o isi o i tatou. O i matou o e ua matutua e manaomia outou o e o loo talavou. Ma e faamoemoe, o outou o loo talavou o loo manaomia nisi o i matou ua matutua. I se tulaga moni lava faaletagata soifua, e manaomia lava e tamaitai ia tamaitai. Tatou te moomia ni faauooga loloto, faamalieloto, ma le faamaoni o le tasi i le isi. O nei faauooga o se pogai talafeagai lea o le tausiga. E moomia ona tatou faafouina lo tatou faatuatua i aso uma. E moomia ona tatou uulima faatasi ma fesoasoani e fausia le malo ina ia alualu i luma le talalelei ma faatumulia ai le lalolagi atoa.”15
Tuafafine pele, o paaga faigaluega i le malo, o o latou suafa o loo tusia i le tusi o le ola a le Tamai Mamoe,16 ia faaauau pea ona outou agai i luma. Ia agai i luma i le faatuatua ma le lotomaulalo. Aua nei faatagaina Satani po o soo se tasi o ona mana leaga faatosina e pulea outou. Aua nei tuuina se avanoa i le tiapolo17 pe faatagaina o ia e tuuitiitia lo outou malamalama tupito lea na aumaia mai le Atua e iloa ai le Agaga o le Alii. Ia taialaina pea outou e le Agaga ina ia outou maua faalogona paia i o outou manatu ma gaoioiga uma, a o outou aapa atu i isi i le alofa ma le alofa mutimutivale, ou te tatalo atu ai i le suafa o Iesu Keriso, amene.