Afai ua Saunia Outou, o le a Outou Le Matata’u ai Lava
E mafai ona tatou ola ina ia mafai ona tatou valaau atu i le Alii mo Lana puipuiga ma le taitaiga… . E le mafai ona tatou faamoemoe e oo mai Lana fesoasoani pe afai tatou te le naunau e tausi i Ana poloaiga.
O’u uso pele o le perisitua, pe o fea lava o e i ai i le salafa o lenei lalolagi—e maeu lava le maoa’e o lenei tino ua outou auai, o tamalii ma taulelea o ituaiga ma lanu eseese, o i latou uma o se vaega o le aiga o le Atua.
E maeu lava Lana meaalofa mo i tatou. Ua ia tuuina mai ia i tatou se vaega o Lana pule paia, le perisitua faavavau, o le mana Na te faataunuuina ai le faaofuina o le tagata i le tino ola pea ma le ola faavavau. E mulimuli lava i le tulaga lea, a tele mea e tuuina mai ia i tatou o le tele foi lena o mea e su’eina mai ia i tatou (tagai Luka 12:48; MFF 82:3).
Ou te iloa e le o i tatou o ni tagata ua atoatoa. Ua tatou iloa le ala e atoatoa, ae tatou te le faia i taimi uma e tusa ma lo tatou iloa. Peitai, ou te manatu o le toatele lava o loo taumafai. O loo tatou taumafai e avea ma ituaiga o tagata e finagalo ai lo tatou Tama. O se faamoemoega maualuga tele lena, ma ou te faamalo atu ia te outou uma o loo taumafai ina ia au i ai. Ia faamanuia atu le Alii ia te outou, a o outou saili e ola i ni olaga lelei tele, i ona itu uma.
I le taimi nei, ua tatou iloa uma, le matuai mafatia talu ai nei o Sautesasae o le Iunaite Setete, ona o matagi matamataita ma lologa. E toatele na leiloloa uma a latou mea sa i ai. Sa matua tele naua mea sa faaleagaina. O le mea moni, e faitau miliona i latou sa mafatia. Sa matua faatumulia loto o le toatele i le popole ma le atuatuvale. Sa tele ni soifua na maumau.
O nei mea uma, sa matua tele ai le sasaa mai o fesoasoani. Sa faamaluluina loto. Sa tatala mai fale. E fiafia tele le au faitio e talanoa i mea ua toilalo ai le Au Kerisiano. Soo se tagata lava e faitio i le au Kerisiano, e tatau ona vaai i mea ua faia e ekalesia i nei tulaga. O le tele o aulotu ua latou faataunuuina mea ofoofogia. Ma e le ta’ufaatauvaaina ai foi le auai faatasi o la tatou Ekalesia i le vaega lea. E anoanoa’i o tatou tamalii ua malaga atu i nuu mamao, ma latou avatu ai meafaigaluega ma faleie ma le faamoemoe susulu. Ua tuuina atu e tamalii o le perisitua le afe ma afe o o latou taimi i le galuega o le toe faaleleia. E ta’i tolu i le ta’i fa afe tagata e galulue i le taimi. O loo i ai foi nisi iina i le taimi nei. E le lava a matou upu e faafetai atu ai ia i latou. Faamolemole ia outou silafia lo matou agaga faafetai, o lo matou alolofa, ma a matou tatalo mo outou.
E toalua o tatou Fitugafulu Eria, o Uso John Anderson, e nofo i Florida, ma Uso Stanley Ellis, e nofo i Texas, sa taitaiina le tele o lenei taumafaiga. Peitai, o la’ua lava o le a muamua faapea mai, e ave le faamalo i le toatele o tamalii ma taulelea sa tuuina atu la latou fesoasoani. E toatele sa latou oofu i mitiafu sa tusia ai upu, “Lima Fesoasoani o Mamona.” Sa latou mauaina le alofa ma le faaaloalo a i latou sa fesoasoani atu i ai. O la latou fesoasoani sa le gata ina tuuina atu i tagata o le Ekalesia sa mafatia, ae o le toatele foi o i latou e le o iloa ni tapuaiga e auai.
Sa latou mulimuli i le mamanu a Sa Nifae e pei ona tusia i le tusi a Alema: “Ua latou le faaliliu ese e ua le lavalava, po o e fia aai, po o e fia inu, po o e mama’i, po o e ua le fagaina. Ua le mafuli foi o latou loto i le oloa, ua latou matamau ai i tagata uma lava, o e matutua atoa ma e iti, o e noanoatia ma e saoloto, o tane atoa ma fafine, o e ua lotu atoa ma e ua le lotu, ua le faailogaina tagata ia te i latou ai e matitiva” (Alema 1:30).
Sa tuuina atu e fafine ma teineiti i le tele o vaega o le Ekalesia, se taumafaiga faigata tele, e avatu ai le ta’i fia sefulu afe o pusa mo le soifua maloloina ma mea faamama. Sa auina atu e le Ekalesia ia masini, o meaai, o vai, ma faamafanafanaga.
E anoanoa’i tupe ua tatou foai atu i le Koluse Mumu ma isi ofisa fesoasoani. E faitau fia miliona na tuuina atu mai taulaga anapogi faapea foi tupe mo fesoasoaniga. Ia te outou uma taitoatasi, ou te faapea atu e avea ai ma sui o i latou na outou fesoasoani atu i ai, ma avea ai foi a’u e fai ma sui o le Ekalesia, faafetai tele.
Ia, ou te le fai atu, ma ou te toe fai atu ma lo’u iloa lelei ou te le faapea atu, o le mea sa tupu o se faasalaga mai le Alii. E toatele foi tagata lelei, e aofia ai ma ni o tatou tagata faatuatua o le Au Paia o Aso e Gata Ai, o loo mafatia ai foi. O lo’u ta’uina atu o lena mea, ou te le musu ai e ta’u atu ua masani lelei lenei lalolagi tuai i mala ma faalavelave matautia. O i tatou ua faitau ma talitonu i tusitusiga paia, ua iloa lelei lapataiga a perofeta e faatatau i mala ua taunuu, faapea foi mala e le’i taunuu.
Sa i ai se Lolo tele ma sa ufitia ai le fogaeleele, ma e pei ona fai mai Peteru, e na o le “toavalu na faasaoina” (1 Peteru 3:20).
Afai e i ai lava se tasi e masalosalo i mea mata’utia e mafai ona mafatia ai le tagata, ia outou faitau i le mataupu e 24 o le Mataio. O loo fetalai mai le Alii: “E faalogo outou i taua ma tala o taua… .
“Aua e sii le taua e le tasi nuu i le tasi nuu, ma le tasi malo i le tasi malo; ona oo mai ai lea o oge, ma faama’i, ma mafuie i lea mea ma lea mea.
“O na mea uma o le amataga ia o puapuaga… .
“Oi talofa foi i fafine toto, ma e failele i ia ona po! …
“Aua o ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei, e le toe faapea foi amuli.
“A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia” (Mataio 24:6–8, 19, 21–22).
I le Tusi a Mamona ua tatou faitau ai i le faatafunaga le mafaatusalia i itu Lalolagi i Sisifo i le taimi o le maliu o le Faaola i Ierusalema. Ou te toe faitauina:
“Ua oo foi i lona tolusefulu ma le fa o tausaga o le masina muamua, o le aso foi e fa, ona to mai ai lea o le afa tele, ua faatoa iloa i le nuu uma se afa faapea.
“Ua to mai foi le matagi tetele ma le matautia, ma le faititili foi ua matua matautia, ua iu ina luluina le lalolagi uma, e peiseai a vaeluaina.
“Sa i ai foi le uila matua maamaai tele, ua faatoa iloa se mea faapea i le nuu uma.
“Ua mu le aai o Saraemila.
“Ua goto i le moana loloto le aai o Moronae, ma ua malelemo e na i ai.
“Ua aveina ae foi le eleele i luga o le aai o Moronaea, ma ua avea ma mauga tele le mea ua i ai le aai… .
“… Ua liua le fogaeleele atoa ona o le matagi, ma asiosio, ma le faititili, ma le uila, ma le luluina matua tele o le lalolagi uma;
“Ua faaumatia ala tanu, ma ua faaleagaina ala laulelei, ma ua faagaoaina mea laugatasi e tele.
“E tele aai tetele ma le taua ua magoto, e tele foi aai ua susunuina, e tele aai ua luluina, ua pauu ai fale i le eleele, ma ua fasiotia ai e na mau ai, ma ua tuu faatafunaina nuu” (3 Nifae 8:5–10, 12–14).
Se mala ina a mata’utia.
O le malaia po o le Oti Uliuli [Black Death] i le Seneturi lona sefulu ma le fa sa faitau miliona ma miliona soifua na faaumatia ai. O isi faama’i na aafia ai le tele o tagata, e pei o le tanesusu, sa oo mai ai mafatiaga e le’i iloa, faapea foi ma le oti i le tele o seneturi.
I le tausaga T.A. 79 sa faatafunaina ai le aai tele o Pompei ina ua pa le Mauga mu o Vesuvius.
Sa matuai tele se faatama’iaga o Chicago i se afi mata’utia. Sa tuua faataufusi ni vaega o Hawaii e galulolo. O le mafui’e i San Francisco i le 1906 sa faaleagaina ai le aai ma e tusa ma le 3,000 ni soifua na faaumatia ai. O le afa lea na taia ai Galveston, i Texas, i le 1900 na maliliu ai le 8,000. Ma e le’i leva tele atu, e pei ona outou silafia, sa i ai se galulolo mata’utia i Asia i Sautesasa’e, lea na faitau afe ma afe soifua na leiloloa ai, ma o loo manaomia ai pea lava galuega fesoasoani.
E maeu le tulaga faaperofeta o upu o faaaliga i le Vaega e 88 o le Mataupu Faavae ma Feagaiga e faatatau i mala o le a oo mai pe a mavae molimau a le au toeaina. Na fetalai mai le Alii:
“Aua a uma la outou molimau ona oo mai ai lea o le molimau a mafui’e, o le faatupuina lea o le tagiaue ia te ia, o le a pauu fo’i tagata i le eleele ma le mafai ona tutu.
“O le a oo mai foi le molimau a le leo o faititili, ma le leo o uila, ma le leo o ta’uta’u, ma le leo o peau o le sami ua siitia ma tāēa i tala atu o o latou tuaoi.
“O le a faanunununu fo’i mea uma; ma e moni lava, o le a meia loto o tagata; aua o le a oo le fefe i tagata uma. (MFF 88:89–91).
E uiga ese ia faamatalaga o le galulolo ma afa talu ai nei, i le utuvagaga o le gagana o le faaaliga lenei o loo faapea mai: “O le leo o peau o le sami ua siitia [i latou lava] ma tāēa i tala atu o o latou tuaoi.”
O faiga faatautala a tagata i soifua o [isi] tagata sa faaalia i taimi ua fano, o loo faaauau pea i fevaevaea’iga i le taimi nei ma aumaia ai le mafatia e le magagana i ai. I le itulagi o Darfur i Sudan, e fiasefulu afe sa fasiotia ai ma e matua silia ma le miliona ua leai ni mea e nonofo ai.
O mea na tatou vaai i ai i aso ua mavae, sa valo’ia, ma e le’i uma. E pei lava foi ona i ai mala i aso ua mavae, tatou te iloa foi o le a i ai nisi e oo mai i le lumanai. O le a nei la tatou mea a fai?
Fai mai se tasi, e le’i timu i le taimi na fau ai e Noa le vaa. Peitai, na ia fausia, ma oo mai ai le timu.
Na fetalai mai le Alii, “Afai ua saunia outou, o le a outou le matata’u ai lava” (MFF 38:30).
O le uluai sauniuniga lava o loo ta’u mai i le Mataupu Faavae ma Feagaiga, lea o loo faapea mai: “O lea, ia outou tumau ai i mea paia ma aua le liliu ese se’ia oo mai le aso o le Alii” (MFF 87:8).
Tatou te usuina le pepese:
A lulu o mafui’e,
Ia matou le fefe ai;
A o’o mai o au faafanoga,
Malu matou i Siona.
(“Ieova e, ia Tautai Pea i Matou”, Viiga, nu. 47).
E mafai ona tatou ola ina ia mafai ona tatou valaau atu i le Alii mo Lana puipuiga ma le taitaiga. O se ulua’i mea lea e faamuamua. E le mafai ona tatou faamoemoe e oo mai Lana fesoasoani pe afai tatou te le mananao e tausi i Ana poloaiga. O i tatou i lenei Ekalesia, ua lava molimau o faasalaga o le le usita’i i faataitaiga a malo o sa Iareto ma sa Nifae. Na tofu liua [nei malo] mai le mamalu, i le faatafunaga faamo’amo’a ona o le amioleaga.
Ioe, ua tatou iloa, e toto ifo le ua i e ua amiotonu, atoa ma e ua amioletonu (tagai Mataio 5:45). Peitai, e ui lava ina oti e amiotonu, ae le o leiloloa, ae o loo faasaoina e ala i le Togiola a le Faaola. Na tusi atu Paulo i tagata Roma: “Aua afai tatou te ola, tatou te ola mo le Alii, pe afai e oti, e oti mo le Alii” (Roma 14:8).
E mafai ona tatou gauai atu i lapataiga. Sa ta’uina mai ia te i tatou, e tele lapataiga sa tuuina atu e faatatau i vaivaiga o New Orleans. Ua ta’uina mai foi e le au suesue o mafui’e, o le Vanu o Sate Leki o se sone o mafui’e. O le mafuaaga taua foi lea, ua tatou faia ai se faafouga tele o le Tapeneko i le Lotoa o le Malumalu. O lenei fale o le talafaasolopito ma le ofoofogia, e tatau lava ona fausia ina ia lavatia ona tatali le galulu o le eleele.
Ua tatou fausia fale ma faleoloa e faaputu ma teu ai fatu ma mea e faaaoga i le olaga ne’i tula’i mai se mala. O le fale teuoloa sili lava o le potu teuoloa a le aiga lava ia. I upu o le faaaliga na fetalai mai ai le Alii: “Ia outou faatulagaina; ia saunia mea tatau uma” (MFF 109:8).
Ua atoa le tolu kuata seneturi o fautuaina o tatou tagata, ma uuna’ia e faia na sauniuniga aua e mautinoa ai lava e mafai ona ola, pe a oo mai se mala.
E mafai ona teuina ni nai vai, o meaai masani, o vailaau, ma lavalava e faamafanafanaina ai i tatou. E tatau lava ona faataatia ese sina tupe aua aso louloua.
O lea, o mea ua ou tautala atu ai, ia aua nei avea ma mea e taufetuli ai foi tagata i le faleoloa ma la’u uma mea o i ai. O mea sa ou fai atu ai, ua leva foi ona ta’uina atu.
Ia aua lava nei galo ia te i tatou le miti a Farao i povi pepeti ma povi paeee, o ‘au saito puputa ma ‘au saito mamae; o le uiga lea sa faamatalaina e Iosefa e faailoa mai ai tausaga o le mau ma tausaga o le oge (tagai Kenese 41:1–36).
Ou te faatuatua, o’u uso pele, o le a faamanuia i tatou e le Alii, ma leoleo i tatou, ma fesoasoani mai pe afai tatou te savavali ma le usiusitai i Lona malamalama, o Lana talalelei, ma Ana poloaiga. O Ia o lo tatou Tama ma lo tatou Atua, ma o i tatou o Ana fanau, ma atonu ua tatau ai i soo se itu ona tatou maua le aia tatau e maua ai Lona alofa ma Lana amana’ia. Ia faapea ona tatou faia, o la’u tatalo lea ma le lotomaulalo, i le suafa o Iesu Keriso, amene.