O Le Sailiga a le Tagata mo le Upumoni Paia
O le mulimuli i le faatulagaga a le Alii o le faalogo ma usiusitai i le upumoni paia o le a fesoasoani ia te oe e fausia se faavae faaleagaga faaletagata ma fuafua ai po o le a le mea o le a e oo i ai.
O loo faatasi ai i lenei aofia toatele ni malo faaaloalogia faapitoa se toatolu, o ni uo mamae i aso ua leva i le aoga. Sa latou faia se faigamalaga umi mai Peleseuma, lou atunuu moni, ina ia faatasi iinei mo le faamanatuina o le 50 tausaga o le matou vasega faauu ma auai i lenei konafesi. Ia i latou, ia te outou o e umia le perisitua, aemaise lava ia te outou alii talavou o loo sauniuni e avea ma faifeautalai, ou te tuuina atu i ai lenei savali. E faatatau i le sailiga e le tagata o le upumoni. Afai e maua, e ao ona faaaogaina i lenei lalolagi o loo faatupulaia ai le fenumiai i talitonuga faalelotu ma le faiifo o amioga mama. E tatau ona avea ma faavae faaleagaga faaletagata lea e taitai atu ai i tatou ia ola e tusa ai ma mataupu faavae o le amiotonu. E pei ona fetalai le Alii, “e faatumauina i le amiotonu” (3 Nifae 22:14).
O fea e maua ai le upumoni paia? O le “faalogo lea i le siufofoga o le Alii, … [faalogo] i leo o Ana auauna, … ia usiusitai i upu a perofeta ma aposetolo” (MFF 1:14). Faalogo ma usiusitai. O le faalogo e matuai faigofie lava. O le usiusitai ma faaaoga mea na faalogo i ai o le a avea lea ma luitau sili o le olaga.
Muamua, faalogo i le siufofoga o le Alii. O fesootaiga mai le Alii e uiga i le upumoni paia po o le malamalama faaleagaga o loo maua i tusitusiga paia. E faaigoaina o faaaliga—o lona uiga pe a faamatalaina, “o le faailoa mai” (Bible Dictionary, “Revelation,” 762). E tuuina mai ina ia “iloa ai le ala tatau e tapuai ai, ma le mea tou te tapuai i ai” (MFF 93:19). Na saunoa Elder Neal A. Maxwell, “E na o faaaliga e mafai ai ona tatou faia le galuega a le Atua e tusa ma Lona finagalo, i Lana ala, ma e tusa ma Lona taimi” (“Faaaliga,” Uluai Fonotaga Faaleaoaoga a Taitai i le Lalolagi Atoa, 2003, 5). “A aunoa ma faaaliga, o mea uma lava o le a taumatemate, pogisa, ma fenumiai” (Bible Dictionary, 762).
Lona lua, faalogo i le leo o Ana auauna. O faaaliga po o le upumoni paia e tuuina mai e le finagalo o le Alii i Ana auauna i auala ma taimi eseese ma o loo maua foi i tusitusiga paia. “E le faia lava se mea e le Alii o Ieova, ae faaalia lona finagalo i ana auauna o perofeta” (Amosa 3:7).
Lona tolu, ia usiusitai i upu a perofeta ma aposetolo. O le usiusitai o le gauai atu lea i ai. O le faalogo atu lea ia i latou o e ua valaauina e le Atua e avea ma molimau ola faapitoa o Iesu Keriso mo o tatou taimi. O lona uiga ia iloa i latou i lenei faiva, ia i ai se tali atu i la latou valaaulia ina ia maua se faamautinoaga faaleagaga faaletagata e faapea o a latou aoaoga e moni, ma o le a faia se tautinoga e mulimuli ia i latou.
I le aotelega, o loo i ai se faatulagaga a le Alii i le faasoaina atu o le upumoni paia faatasi ma perofeta ina ia taialaina ma faamanuiaina ai i tatou i luitau ma mea leaga o le olaga: faalogo ma usitai. O lo tatou faavae faaleagaga faaletagata e moomia ona atiina ae i luga o lenei faatulagaga pe afai tatou te fia aeae i faamanuiaga a le Alii. O lea e le lava le na o le sailia o tusitusiga paia ina ia iloa ai le mafaufau o le Alii. E tatau ona mulimuli i ai e ala i le faatuatua, ma talia le faia o le finagalo o le Alii e ala i le usiusitai i Ana poloaiga, a o lei mafai ona tatou aeae i faamanuiaga a le Alii. O se faamautinoaga faaleagaga a le tagata lava ia o lenei faagasologa e ala i le ole atu ma le talitonu lea o le a tatou mauaina, o le a avea, ma tatalo i le olaga atoa.
O le mea moni lava, o fesootaiga po o le faalogo e uiga i upumoni paia e mafai ona tauaofaiina i upu e tolu: faaaliga, poloaiga, faamanuiaga. Ae peitai, o le a avea ma luitau o le olaga atoa le faalogo muamua ona usitai ai lea i le siufofoga o le Alii ma Ana auauna. Aisea? “Aua o le tagata o le lalolagi, o le ita lea i le Atua … e faapea foi e oo i le faavavau faavavau lava, seiloga e gauai o ia i galuega alofa a le Agaga Paia” (Mosaea 3:19). O sauniuniga faaleagaga o se tulaga manaomia lea ina ia maua ai se faalogona faaleagaga o le tagata lava ia. O le atoaga o le fuaiupu e faitauina faapea e tatau ona avea i tatou “ma tagata amiotonu ona o le togiola o Keriso le Alii“ ma ia avea foi ”ia pei o le tamaitiiti, ua fia usiusitai, ma agamalu, ma faamaulalo, ma onosai, ma ua tumu i le alofa ma le fia gauai i” le finagalo o le Alii, o lona uiga o Ana poloaiga. Ona fetalai mai lea o le Alii, “Pe a tatou maua foi soo se faamanuiaga … , e maua ai i le usiusitai i le tulafono lea e autu ai” (MFF 130:21).
Ia tatou malamalama nei i lenei faatulagaga i se faataitaiga talu ai nei o le faalogo ona usiusitai lea i upu a perofeta ma aposetolo o o tatou aso. Na tuuina mai talu ai nei e le Au Peresitene Sili se valaaulia i tagata uma o le Ekalesia ina ia faitauina le Tusi a Mamona: O Se Tasi Molimau ia Iesu Keriso a o lei oo i le faaiuga o le tausaga. Na faaiuina le luitau i se folafolaga: “O le a faamanuiaina [outou] i se fuataga faaopoopoina o le Agaga o le Alii, o se naunautaiga sili e usiusitai i Ana poloaiga, ma se molimau malosi i le soifua moni ai o le Alo o le Atua” (Tusi a le Au Peresitene Sili, 25 Iulai, 2005).
Aisea o le a tatou moomia ai ona tuputupu ae i se molimau malosi i le soifua moni ai o le Alo o le Atua e pei ona maua ai i le Tusi a Mamona? O le taimi nei ua tele naua le fenumiai i le lalolagi Kerisiano e uiga i le mataupu a Keriso—e le gata i Lona natura paia ae faapea foi i Lana Togiola ma le Toetu, o Lana talalelei, aemaise lava i poloaiga o loo faatatau i ai. O le taunuuga o se talitonuga lea i se Keriso ua faia e tagata lava ia, o se Keriso lauiloa, ma se Keriso, na faasatauroina gugu. O talitonuga sese faalelotu e tau atu ai i ni amioga sese faalelotu.
O se faavae faaleagaga o le tagata lava ia e mafai ma e ao ona faalagolago atu i se faamautinoaga faaleagaga o le tagata lava ia e ala i le Agaga Paia i le soifua moni ai o Iesu Keriso, o perofeta, ma tusitusiga paia o loo aofia ai faaaliga a le Alii. E le gata i lea, o le soifua moni ai o Keriso e ogatasi lea ma le Toefuataiga mai o Lana talalelei ma ona savali e faapea “o Iesu Keriso o le Faaola o le lalolagi, o Iosefa Samita o lana tali faaaliga ma le perofeta i nei aso e gata ai, ma O Le Ekalesia a Iesu Keriso o le Au Paia o Aso e Gata Ai o le malo lea o le Atua ua toe faatuina i le lalolagi“ (Faatomuaga o le Tusi a Mamona).
O lenei faamautinoaga faaleagaga e ala i le mana o le Agaga Paia e tuuina mai i aiaiga a le Alii i soo se tasi o loo naunau e ola i le faatuatua, i le talitonu lea e mafai ona oo mai se tali e ala i lena mana. E amata i le faalogo atu i le siufofoga o le Alii, o Ana auauna, o Ana perofeta ma aposetolo, ma e faaauau pea e ala i le usiusitai i a latou upu. O le malamalama faaleagaga i le Toefuataiga o se mataupu o le faatuatua.
Ou te fia faasoa atu so’u aafiaga faaleagaga i le avea ai ma se tagata liliu mai e avea ma se faataitaiga o lenei faagasologa faaleagaga. Ina ua oo atu faifeautalai i lo matou aiga, sa ia te au le manao e faalogo atu i le savali o le Toefuataiga o le talalelei. O le mea na uunaia au o lo’u fia iloa lea. O le auai atu i le lotu, na ou faalogo ai i se malamalama faaleagaga fou e sili atu. Sa tulaga ese lava ma sa ou fiafia i ai, ae sa ou misia le vaega taua: o le usiusitai lea i ai. Sa tatau ona ou fausia se faavae faaleagaga faaletagata i luga o le soifua moni ai o Keriso ma le faamautinoaga lea o Iosefa Samita o le Perofeta o le Toefuataiga. O lena faamautinoaga na faatoa oo mai ina ua ou faalogo ma tofotofoina lo’u faatuatua tau amata i le Tusi a Mamona, le faamaoniga tino mai o faaaliga i ona po nei.
Ae peitai, o le mauaina o lena malamalama sa le lava lea; na ao ona sosoo mai ai ma se tautinoga ina ia liua lo’u faatuatua i le mautinoa lea o le Tusi a Mamona e moni e faapea foi ia Iosefa Samita i le avea ai ma se perofeta. E lei fesiligia lava lo’u faatuatua ia Keriso. Sa ou faatuatua i le Alii ma Ana folafolaga. O le filemu i le mafaufau, filemu i totonu, o le tali lea—sa leai nisi fesili. O le faavae faaleagaga sa mautu, na sosoo mai ai ma se tautinoga i lo’u loto ina ia taliaina le feagaiga o le papatisoga. Ona oo mai ai lea o le meaalofa o le Agaga Paia ina ia taialaina ai au ma fesoasoani ia te au i le faia o faaiuga amiotonu ina ia tumau seia oo i le iuga. Na ou iloa mai ai iina le mea e fai i lo’u lumanai i lenei olaga faaletino.
E tatau ona e sailia le moni o faaaliga faalelagi. Faalogo i le siufofoga o le Alii. E moni; e patino; e faamaoni. O mafuaaga faalemafaufau e le suia ma e le mafai ona suitulaga i faaaliga. I le siitia mai o le saunoaga a Peresitene James E. Faust, “Aua nei e tuu atu i ou lava masalosaloga e vavaeeseina mai oe mai le pogai faalelagi o le malamalama” (“Le Alii e, Ua Ou Talitonu; Ia e Fesoasoani i Lo’u Le Faatuatua,” Liahona, Nov. 2003, 22).
Tofotofo ma lagonaina le mana o le afioga a le Atua i lou mafaufau a o tuuina mai e auauna a le Alii (tagai Alema 31:5).
Tofotofo ma ole atu i le faatuatua, ona usiusitai atu lea i upu a perofeta ma aposetolo, ma o le a e “maua ai le pale o le olaga faavavau” (MFF 20:14).
O lenei, ia manatua, i le faaiuga, o le mulimuli i le faatulagaga a le Alii o le faalogo ma usiusitai i le upumoni paia o le a fesoasoani ia te oe e fausia se faavae faaleagaga faaletagata ma fuafua ai po o le a le mea o le a e oo i ai i lenei olaga ma le olaga a sau.
I le suafa o Iesu Keriso, amene.