Ina ia Mafai Ona Tatou Toe Nonofo Uma Faatasi i le Lagi
A oo ina avea i tatou ma tufugaaao o le Atua, e faaaogaina i tatou e Ia e fai Lana galuega.
Uso e, o le po nei ua tatou potopoto i le sauniga aoao a le Aualofa. A o tatou mafuta, e le mafai ona galo ia te a’u lena uluai fonotaga a le Aualofa. Ou te vaai faalemafaufau i le Perofeta o Iosefa o saunoa i tamaitai ma saunia i latou mo la latou pitolaau i le fausiaina o le malo o le Atua. Ua ou faalogoina tatalo a loto o tamaitai, “Ua uma ona ou osi feagaiga e fai Lau galuega, ae fesoasoani mai le Alii e, ina ia avea ma meafaigaluega i ou aao.” O la latou tatalo, o la tatou tatalo foi lea.
O le olaga nei o le taimi lea e avea ai i tatou taitoatasi ma lena meafaigaluega.
Ou te fiafia lava i le savali a Sister Lusi Maki Samita, o lē sa vaivai ma olomatua, ae sa tula’i ae e saunoa i ona uso i se uluai fonotaga a le Aualofa i Navu. Ou te manao ia outou manatua, o ia o se tamaitai sa avea ma sosia o le malosiaga—o se taitai maoae. O le ituaiga tamaitai tonu lava lea o loo ou vaaia i le Aualofa i le taimi nei. Ae sa ia saunoa i lena aso, “E ao ona tatou fefaapelepelea’i, fetausia’i, fefaamafanafanaa’i, ma maua aoaoga ina ia mafai ai ona tatou toe nonofo faatasi i le lagi.”1
O na upu o loo tautala i le avea o tamaitai ma “tufugaaao o le Atua.”2 O ai o i tatou e le moomoo ia faapelepele, tausia, ma faamafanafanaina ma aoao i mea a le Atua? E faapefea ona tupu? Tasi se agalelei, tasi se faaalia o le alofa, tasi se taga faatino lelei, tasi se lima naunauta’i i le taimi. Peitai o la’u savali e le mo i latou e mauaina na galuega o le alofa, ae mo i latou uma e tatau ona ola ai i na tulaga paia i aso uma. Ina ia avea atili e faapei o Iesu Keriso, ua aoao mai e le Perofeta o Iosefa, “e ao ona faateleina lo outou alolofa mo isi.”3
Tatou te moomoo uma ia maua le alofa moni o Keriso, lea e ta’ua o le alofa mama, peitai o o tatou uiga faaletagata—le “tagata o le lalolagi”—e fai ma faalavelave. Tatou te feitai, tatou te le fiafia foi, tatou te a’oa’iina i tatou lava ma isi—ma a oo ina tatou faia faapena, ona le mafai lea ona tatou maua le alofa tatou te moomia, pe afai tatou te fia avea ma tufugaaao o le Tama Faalelagi. O le naunau e faamagalo i tatou lava faapea foi ma isi, e avea ma se vaega taua tele e mafai ai ona tatou maua le alofa o le Alii i o tatou olaga ma faia Lana galuega.
Ina ua amata ona ou saunia lenei lauga, sa ou faia mea uma sa ou iloa e tatau ona ou faia: sa ou alu i le malumalu, sa ou anapogi, sa ou faitau i tusitusiga paia, sa ou tatalo. Ma sa ou tusia loa le lauga. Ae pe a e filifili e tusi e uiga i le alofa mama, e ao lava ona e mafaufau o oe e te agaalofa. O a’u la e leai. Ma o lea, ina ua matu o’u loimata ma mae’a ni tatalo, sa oo mai se malamalama i lo’u mafaufau, e tatau ona ou ole atu mo se faamagaloga a i latou, o ē latou te le o iloa, sa avea ma mafuaaga o o’u mafaufauga le alofa. Ma sa faigata. Peitai, sa avea o se faamalologa. Ma sa toe foi mai le agaga o le Alii.
O le alofa mama faifai pea, o se taumafaiga i le olaga atoa, peitai o faatinoga taitasi o le alofa e suia ai i tatou ma i latou foi e faatinoina. Se’i ou faamatalaina atu le tala i se tamaitai talavou sa ma feiloai talu ai nei. O Alicia, o se talavou, sa taumamao ese mai le Ekalesia, peitai sa musuia o ia mulimuli ane e toe foi mai. E masani ona asiasi atu i lona tamamatua i se nofoaga o tagata matutua i Aso Sa. I se tasi o na aso, sa tonu ai ia te ia e alu i le lotu a le Au Paia o Aso e Gata Ai iina. Sa tatala e ia le faitotoa, ma iloa ai o le sauniga a le Aualofa la e fai, ae ua leai se nofoa o avanoa. Ina ua liliu o le a toe alu, sa geno atu se tamaitai ia te ia ma soso ina ia maua se avanoa mo ia i lona nofoa. Sa fai mai Alicia: “Sa ou tau mafaufau pe o le a se manatu o le tamaitai ia te au. Sa tatui solo lo’u tino, ma ou namu tapaa. Ae sa foliga e le’i afaina ia te ia; sa na ona ia faaavanoaina lava o se nofoaga mo a’u i ona tafatafa.”
Na faamalosiauina Alicia i le alofa o lenei tamaitai, ma toe toaga ai i le lotu. Ua mae’a lana misiona ma ua ia faasoa atu nei foi lena ituaiga o alofa i isi tamaitai. Sa malamalama le uso matua lea na faasoa atu lona nofoa ia Alicia, e i ai se nofoaga mo tamaitai uma i le Aualofa. Uso e, tatou te potopoto mo se malosiaga, ae tatou te o mai ma o tatou vaivaiga ma lē atoatoa uma.
Sa ta’u mai e Alicia ia te au se mea e le mafai ona galo ia te a’u. Fai mai o ia: “E na o le tasi lava le mea ou te faia mo a’u pe a ou alu i le lotu: Ou te ‘ai i le faamanatuga mo au. O le taimi uma e totoe, ou te sailia isi e manaomia a’u ona ou taumafai lea e fesoasoani ma faafailele i latou.”
Uso e, a oo ina avea i tatou ma tufugaaao o le Atua, e faaaogaina i tatou e Ia e fai Lana galuega. E faapei foi o Alicia, e ao ona tatou liliu atu ia i latou o si’omia i tatou ma matau auala e mafai ai ona tatou faafailele ma fesoasoani atu i ai. E ao ina tatou mafaufau ia i latou o i le faitotoa, o loo autilo mai, ma aumaia i latou ia i tatou—ina ia mafai ona tatou nonofo uma faatasi i le lagi. Atonu e le o i tatou uma o le a manatu e i ai se avanoa mo se isi tagata i o tatou nofoa, ae e maua lava nofoa i taimi uma pe afai e i ai se alofa i o tatou loto.
I le 1856, o Iulia ma Emily Hill o se auso sa auai i le Ekalesia a o talavou i Egelani, ma sa fetuu i la’ua e lo latou aiga, ma sa i’u ina maua ni o la’ua pasese e malaga mai ai i Amerika ma sa toeitiiti lava taunuu i le Siona, ua leva ona la moemiti i ai. Sa latou sopoia laufanua faatasi ma le vaega o taavaletosolima a Uili i laufanua valevalenoa o Amerika, ma sa pa’ulia ai i latou ma le toatele o isi tagata i le alasopo ona o se afa kiona faafuase’i i le amataga o Oketopa. Sa faia le miti faamomoiloto lea e uiga ia i latou e Sister Deborah Christensen, o se tama a le tama a le tama a Julia Hill. Fai mai a ia:
“Sa mafai ona ou vaai atu ia Julia ma Emily o pa’ulia i le kiona i luga o le tumutumu matagiā o Rocky Ridge, ma le isi vaega o le taavaletosolima a Uili. Sa leai ni o latou ofu mafanafana. Sa nofo Julia i le kiona ma tetemū ai. Sa le mafai ona toe savali. Sa matua maalili foi Emily, ae na ia iloa afai e le fesoasoani e faatu i luga Julia, o le a oti Julia. A o fusi mai e Emily si ona uso matua e tau faatu i luga, sa tagi Julia—ae sa leai ni loimata, ae na ona masusu. Sa la savavali faatasi atu i la latou taavaletoso. E toasefulutolu na maliliu i lena po matautia. Ae na ola Julia ma Emily.”4
Uso e, semanu e le ola nei tamaitai pe a na leai le tasi mo le isi. E le gata i lea, ae sa la fesoasoani atu foi i isi ia ola pea i lenei vaega mata’utia o le faigamalaga e aofia ai se tina talavou ma lana fanau. O Emily Hill Woodmansee lea sa tusia mulimuli ane ia upu o le pese “Galulue e Pei o Ni Uso i Siona.” O upu o le fuaiupu, “Ma faamalosi i e ua vaivai”5 e aumaia ai se uiga fou pe a e vaai faalemafaufau i lona aafiaga i laufanua valevalenoa ua mafiafia ai le kiona.
E pei foi o le au Hill, e toatele i tatou o le a le lavātia o tatou tofotofoga i le olaga nei e aunoa ma le fesoasoani mai i isi. Ma e moni lava: o le fesoasoani atu i isi e ola ai o tatou lava agaga.
Na iloa e Lusi Maki Samita le alofa mama o Keriso, o le alofa e leai se tuaoi. Sa ia i latou ia upumoni o le talalelei e taialaina ai o latou olaga: sa i ai so latou perofeta soifua; sa i ai so latou Tama i le Lagi sa faafofoga ma tali atu ia latou tatalo. E faapena foi i tatou. I le papatisoga, sa tatou tauaveina ai le suafa o Iesu Keriso i o tatou luga. Tatou te tauaveina lena suafa i aso taitasi, ma e uuna’ia i tatou e le Agaga ina ia ola e tusa ai ma aoaoga a le Faaola. A tatou faia, e avea i tatou ma tufugaaao o le Atua. Ona siitia foi lea o i tatou e le Agaga, i se tulaga e maualuga atu o le lelei.
O le faaaliga aupito sili o le alofa o le Togiola lea a Iesu Keriso, na tuuina mai ia i tatou o se meaalofa. O lo tatou sailia ma le maelega o lenei meaalofa e manaomia ai e le gata ina tatou naunau ina ia maua, ae ia faasoa atu foi. A o tatou fefaasoaama isi i lenei alofa, ua tatou tula’i mai o se “tufugaaao o le Atua, e faataunuu a’i lenei galuega tele.”6 O le a tatou saunia ai foi e nonofo faatasi ma o tatou uso—i le lagi.
Ou te molimau atu i le Faaola, o loo soifua o Ia ma e alofa o Ia i a i tatou. Ua Ia silafia le mea e mafai ona tatou oo i ai—e ui lava i ni o tatou le atoatoa i le taimi nei. I le suafa o Iesu Keriso, amene.