Eda Rai vei Karisito
Me vaka ga na kalokalo ni pola mai lagi.., veitalia se cava e na tu mai liu, e tu ga na Dauveivueti ni vuravura, na Luve ni Kalou, kilai vinaka ka dei me vaka e dua na ikelekele ni noda bula tawa mate rawa.
Kemuni na taciqu kei na ganequ, au via vakaraitaka talega na noqu vakavinavinaka titobu e na vuku ni itavi totoka eratou sa qarava rawa mai o Sister Smoot, Sister Jensen, Sister Dew, kei na nodratou matabose, ni ratou sa qarava sara ga vakavinaka e na vakabauta ni isoqosoqo totoka qo ni marama. E isoqosoqo totoka dina sara ka ni 4,900,000 na lewena. E sega tale ni dua e tauvata kaya. Au nanuma ni e na vuravura taucoko, e na vukea sara vakavinaka na nodra bula na marama e na veivanua kece sara. Vinaka kemudou na ganequ e na itavi dou sa qarava. Au kidavaki iko Sister Parkinkei rau nomu daunivakasala, kei na matabose o na digitaka.
E da sa mai vakacavara qo e dua na koniferedi totoka. E da sa mai marautaka e dua na kanavata uasivi e na tepeli ni Turaga. E da sa mai vakavulici e na Nona sala kei na Nona iValavala.
O i keda kece sa dodonu me da vinaka cake mai na kila ka levu oqo. Ke sega, na noda soqoni e sa tawa yaga sara.
Niu sa vosa oti, na matasere e na laga na,
“Abide with me, ‘tis eventide.
The day is past and gone;
The shadows of the evening fall;
The night is coming on.
Within my heart a welcome guest,
Within my home abide.
O Savior, stay this night with me;
Behold, ‘tis eventide”
(“Abide with Me; ‘Tis Eventide,” Sere no. 165).
E sa soqona vinaka sara ga na vakila ni yaloda ni da sa lesu ki na noda dui vale.
Me sala vata ka me tikotikoga kei keda na Yalo ni Turaga. E da sega ni kila na veika sa tu mai liu. E da sega ni kila na veika e na kauta mai na siga ni mataka. E da bula e na dua na vuravura tawa macala. E so era na rawa ka vakalevu sara. E so tale, na nuinui kara. E so era mamarau, e so era reki, bula vinaka, kei na bula dauloloma. E so tale, na tauvimate beka, kei na so na lolosi. E da sega ni kila. Ia e dua ga na ka e da kila. Me vaka ga na kalokalo ni pola e na lomalagi, veitalia na cava e tu mai liu, e tu ga na Dauveivueti ni vuravura, na Luve ni Kalou, kilai vinaka ka dei me vaka e dua na ikelekele ni noda bula tawa mate rawa. O koya e vatu dei ni noda bula, noda kaukauwa, noda ivakavakacegu, sai koya na inaki dei ni noda vakabauta.
E da rai Vua ni cila na siga se buto, ka sa na tiko e kea me vakadeitaka ka matadredre vei keda.
O Koya e uto ni noda sokalou. O Koya e Luvena na Kalou bula, na iMatai ni luvena na Tamada, na Luvena Duabau e na yago, ka a biuta na idabedabe vakatui mai cake me mai sucu vakayago e na tikina malumalumu ni ka sa yaco. E na galili ni Nona bula e kaya, “Sa vaqara na fokise, a sa vakairoro na manumanu vuka; ia na Luve ni tamata sa sega vua na vanua me kotora kina na uluna” (Maci. 8:20). E “lako voli ka dau caka vinaka” (Caka. 10:38).
E a turaga ni cakacaka mana. E dodoliga yani vei ira na leqa. E vakabulai ira na tauvimate ka vakaturi ira na mate. Ia mai na loloma kece e kauta mai ko Koya ki vuravura, e a beci ka cati mai na tamata; sa tamata e dau rarawa na lomana, ka sa dau kila na rarawa: … sa beci ka da a sega ni dokai koya (Raica na Aisea 53:3).
E da railesuva na Nona bula sega ni vakatauvatani rawa ka kaya vata kei na Parofita o Aisea: “E dina sa colata ko koya na noda rarawa, ka sa colata na rarawa ni lomada… .
“Sa vakamavoataki ko Koya e na vuku ni noda talaidredre, ka sa qaqi e na vuku ni noda caka cala: sa tau vua na cudruvi sa vu ni noda veivinakati tale; ia e na we ni kena kuita e da sa vakabulai kina” (“Ais. 53:4–5).
E na gauna a vakayacori kina na ivalu mai lomalagi, o Lusefa, na Luve ni Mataka, e lako kaya mai kei na dua na ituvatuva ka sega ni vinakati. Na Tamada kece sara, e na Nona lomani keda na luvena, a solia e dua na ituvatuva vinaka cake ka da na rawa ni galala kina me da digia na ilakolako ni noda bula. Na Luvena e Duabau, na Tuakada Lomani, e uto ni ituvatuva o ya. Na tamata e na soli vua na galala, ia na galala ka na sala vata mai kei na ka me na tarogi kina. Na tamata e na lako e na sala ni vuravura kei na ivalavala ca kei na tarabe. Ia na Luve ni Kalou e na taurivaki Koya vakataki koya na yago, ka na vakacabori Koya me i soro ni tamata kece ga. E na rarawa galugalu e na yaco kina ko Koya me Dauniveivueti, ka i Vakabula kei vuravura.
Ni da mai kila na iloloma soli wale sega ni vakatautauvatani rawa, na iloloma soli wale ni veivueti, eda sa cuva ga Vua e na yalo e vakarokoroko.
E na Lotu sa tu o ira na dusi keda, e lewe levu sara. E ra kaya ni da sega ni vakabauta na Karisito makawa ni lotu Vakarisito. E tiko na dina ni ka era kaya. Na noda vakabauta, na noda kila e sega ni yavutaki mai na itovo ni gauna makawa, na vakabauta ka lako mai na kila ka ni gauna oqo ka taurivaki mai na veitalanoa tawacava ni tamata ka ra saga me ra yacova e dua na ibalebale ni Karisito vakaturi tale. Na noda vakabauta, na noda kila e lako mai na ivakadinadina ni dua na parofita ni gauna oqo ka a raica ni tu e matana na Kalou levu ni vuravura kei na Luvena Duabau, na Turaga o Jisu Karisito ka sa tucake tale. E Rau a vosa vua. A vosa vei Rau. E vakadinadinataka raraba, vakamatata, ka sega ni maduataka na raivotu bibi o ya. E raivotu ni Kalou Cecere kei na Dauveivueti ni vuravura, lagilagi ka dredre me vakasamataki rawa, ia e dei ka matata vinaka e na kila e kauta mai. Mai na kila ka o ya, teivaki titobu e na qele ni raivotu ni gauna oqo ka da sa “tukuni Karisito ka rekitaki Karisito, ka vunautaki Karisito, ka parofisaitaki Karisito; ia eda sa vola na ka sa vakatakilai vei keda, me ra kila kina na noda kawa na sala me bokoci kina na nodra i valavala ca” (2 Ni. 25:26).
Koya ya, vei kemuni na taciqu kei na ganequ, ni keimami vakamoce yani ki na dua tale na gauna, keimami vakaruataka na neimami ivakadinadina dei ka dau vosota. Keimami kitaka yadudua e na kila e dei ka dina sara. Me vaka au sa dau tukuna vakalevu, kau na tukuna tale, au kila ni Kalou na Tamada Tawamudu e bula. O Koya e Kalou levu ni vuravura. O Koya e Tama ni yaloda ka da na rawa ni veivosaki kaya e na masu.
Au kila ni o Jisu Karisito na Luvena Duabau, na Dauniveivueti ni vuravura, o koya ka solia na Nona bula me rawa kina vei keda na bula tawamudu ka tiko vua na lewa ka dabe vakatui kei Tamana. Au kila ni Rau lewe rua, duidui sara mai vei koya kadua, ia erau tautauvata e na nodrau ibulibuli kei na ivalavala kei na inaki. Au kila ni itavi ni Kalou levu me ra tucake tale mai na mate na tamata kecega ka rawata na bula tawamudu (raica na Mosese 1:39). Au kila ni o Josefa Simici e parofita, na parofita dina ni gauna oqo ka a tasereki mai vua na dina ka sa tu oqo. Au kila ni Lotu oqo e cakacaka ni Kalou, dabe vakatulewa kina ka liutaka o Jisu Karisito o koya ka vakatoka yacataka tiko na lotu na yacana tabu.
Au vakadinadinataka na veika kece oqo niu tasereka yani e na noqu loloma kei na veivakalougatataki, e na yaca i Jisu Karisito, emeni. Me tiko ga kei kemuni na Kalou ka yacova ni da sota tale.