Yaco me Tamata ka sa Tiko Vua na Yalo ni Kalou

Elder L. Tom Perry

Mai na Kuoramu ni iApositolo Le Tinikarua

Sa vauci tu e na veiyalayalati cecere na Turaga me vakalougatataka na noda bula me vaka na ivakarau ni noda yalodina. O koya duadua ga e rawa ni veisautaki keda me da tamata ka sa tiko vua na Yalo ni Kalou, ka yacana na Yalo Tabu.

Au gadreva me’u vagoleya na noqu vosa e na bogi ni kua vei kemuni na cauravou dokai o ni taura tu na Matabete Tabu i Eroni. Sa dua na veivakalougataki digitaki me da taura tu na matabete ni Kalou, ka na rawa ni vakalevutaka na noda kaukauwa, na veika eda rawata, kei na noda kila na veika vinaka mai na ka ca. Me’u na vakaraitaka mada na veivakalougatataki e rawati mai na isolisoli oqo, e na noqu talanoataki rau e rua na tamata ni Kalou, ka yacadrau ruarua o Josefa.

A sotava o tamaqu e dua na kena ivakaraitaki vinaka sara e na nona a se tiko e na itabayabaki ni bete. E sega ni dua na koronivuli torocake e na vanua e tiko kina, ka vinakata o koya me vuli. Sa vakadonuya na tamana me biuta na vanua ni teitei ka vakasaqaqara vuli e na veivanua tale eso, ia me sa na sasaga taudua sara ga. Ni yaco yani ki na Siti o Salt Lake, e rogoca sara ni soli tiko e dua na cakacaka e na vale nei Peresitedi Joseph F Smith. A saumi me dau qarauni rau tiko na bulumakau ni parofita. E na neitou lotu vakavuvale keitou dau vinakati tamai keitou me talanoataka na veika a sotava e na veiyabaki taumada ni nona bula e na nona a tiko voli e na vale ni parofita. Keitou dau rogoca na veitukutuku me vakaoqo:

E dau dusimaki tamaqu o Sister Smith e na vuku ni nona itavi, e na nona vakamacalataka ni o rau na bulumakau “e rau bulumakau vakaturaga, ka dodonu mo na qaravi rau vinaka. Vakasavasavataki rau sara vakavinaka ka vakavulici rau sara vakavinaka ka ni kevaka au na mani nanuma me’u kauti rau mai ki na rumu ni gade sa na rawa me vakakina ni rau sa savasava vinaka tu.” E kaya ko tamaqu ni kila na lobaka na sucu ni bulumakau ia e sega ni kila na vakasavasavataki rau.

Ni se bera ni dau loba na sucudrau e na veimataka kei na veiyakavi, sa dodonu me rau na vakasavasavataki sara vakavinaka ka vakamamacataki e na waikatakata, sovu kei na tawelu ka vakarautaki vakatabakidua ga me baleta na ka oqo. Erau dau vakani e na co vinaka duadua ka loba na sucudrau e na gauna vata sara ga, me vakarua e veisiga.

Me ikuri ni nona itavi ki na nodratou bulumakau “vakaturaga” na vuvale na Smith, sa dau kerei tale ga o tamaqu e na so na gauna me qarava eso na cakacaka ni vale. E dau talanoa kina vaqo vei keitou: “E na dua na mataka batabata sara au a savata kina na ikabakaba ka gole ki na nona vale na Peresitedi ni Lotu. A voleka sara vakalailai me vakavuna na nona leqa, ni’u a biuta tu me cevata na wai ni bera ni qai vakamamacataki. Au qai mai kauta yani na waikatakata me vakawaicalataka na waicevata ka qai vakayagataka na itawelu me vakamamacataki kina na vatu. Sa voleka sara me sa savasava vinaka na ikabakaba, ia era sa tasivi tiko e gaunisala na lewe ni noqu kalasi e na nodra ilakolako ki koronivuli ni se bera ni cava na noqu cakacaka. Sa dua dina na ka veivakayalomalumalumutaki.”

Ni’u talanoataka tiko na italanoa eso oqo, au sega ni vinakata mo ni nanuma ni o tamaqu na isa ni drua tagane kei Cinderella. Eratou a kauta na vuvale na Smith na gonetagane dravudravua oqo e na vanua ni teitei mai Idaho ki na nodratou vale me la’ki vakacavara na nona vuli torocake ka dewa yani ki na University of Utah. Eratou a okati koya ki na nodratou itavi qaravi vakavuvale, eratou kana vata e na nodratou teveli ni kana, ka ratou masu vata. A qai wasea o tamaqu vata kei keitou na nona ivakadinadina ni sa italai dina ni Kalou na Parofita o Joseph F. Smith: e na noqu tekiduru vata kei na Parofita, e na masu vakavuvale, ka vakarogoca na nona masu e na yalodina ka kerea kina na Turaga me vakalougatataka na nona vuvale kei na nodratou qele ni manumanu lalai kei na qele ni manumanu lelevu, e na noqu qai kila ni sai ira na bulumakau veivakamaduataki oqo era vu ni noqu vakalougatataki, sa qai vakavuna na noqu raica na irairai dina ni veika e yaco… . E levu na tamata cecere au sa sotava oti era sega ni dau vakaraitaka na itovo ka veiganiti kei ira e na nodra bula e veisiga. E sega ni vakakina vei parofita Joseph F Smith. Na itovo kilai levu ka dau vakaraitaka e na nona bula ni veisiga e vukea na kena tubu cake tiko na nona bula cecere. Kivei au o koya e parofita e na gauna sara mada ga e savata tiko kina na ligana se sereka tiko na wa ni nona ivava.” Na lesoni e vulici kina sa i koya me da taleitaka ka lomana e dua na parofita ni Kalou.

Na nona ivakamacala o tamaqu me baleti parofita Joseph F. Smith e kauta lesu mai vei au na nona malanivosa na Fero me baleti Josefa mai Ijipita: “E rawa beka ni da raica e dua me vakaoqo, e dua ka sa tiko vua na Yalo ni Kalou?” (iVakatekivu 41:38).

Na italanoa nei tamaqu e tukuna vei keda na veika me baleti Peresitedi Smith, na nona vuvale, kei ira na nona bulumakau, e vakatakila talega na veisau ni gauna mai na itekivu ni ka 20 ni senitiuri. Au sega ni vakabauta ni a bau raitayaloyalotaka o tamaqu na komipiuta ni gauna oqo ka ra dabe toka e na veiteveli lalai ka vakarautaki na totolo ni nodra cakacaka e na gigahertz kei na levu ni ka e rawa ni ra maroroya e na gigabytes. Au sega talega ni vakabauta ni a bau raitayaloyalotaka na veika ca e rawa ni vakayacora o Setani mai na veimisini talei vata ga oqo. Mai na nona ivakarau vakasisila e tu vua, sa vakadewa tale tikoga o Setani eso na parokaramu veivagagai e na veimisini oqo. Na veika oqori era na vakacaca vakalevu sara ki yaloda kevaka e sega ni tu vei keda na isasabai kaukauwa me taqomaki keda. Oqori e vakavuna me’u vakasamataka na itatarovi levu duadua ni vairusi—oya na isolisoli ni Yalo Tabu.

Me baleta na isolisoli ni Yalo Tabu, e kaya kina o Peresitedi Joseph F. Smith: ‘na isolisoli ni Yalo Tabu,’ e dua na veivakalougatataki digitaki ka dregati vei ira era papitaisotaki ni ra sa veivutuni ka vakabauti Jisu Karisito ka “dua na ivakadinadina tudei”E rawa me na dau marautaki na yalo ni Kalou me ivurevure vakawawa ni veivakauqeti ka dau basika mai kina ki na kawatamata na rarama kei na kaukauwa me baleta eso na inaki kei na soqo digitaki.Ia na isolisoli ni Yalo Tabu, ka ra a ciqoma na iapositolo e na siga ni penitiko, ka dau soli e na veivakadeitaki, sa dua na ivakadinadina tudei ka edaumeni cecere cake”. [James R Clark, comp., Messages of the First Presidency of the Church of Jesus Christ of Latter Day Saints, 6 na iVola [1965–75], 5:4].

Sa ka bibi sara me ra vukei iko na nomu vuvale e na kena vulici na kosipeli ni noda Turaga ka iVakabula. Sa na qai dodonu vei keda kece me da vakararavi ki na isolisoli ni Yalo Tabu me na dusimaki keda e na noda kila na vinaka mai na ca. Oqo na vanua e na yaga kina na ivakaraitaki nei Josefa mai Ijipita me veivuke e na noda dusimaki yadua. O koya e dua ka dau vakararavi vakatabakidua ki na Yalo ni Turaga, ka ni a raica ka kila na kena irairai matalia kei na nona kaukauwa e dua ka sa vakamatabokotaki tu e na qaravi kalou lasu ka yacana o Fero.

Me da tovolea mada e na bogi ni kua me da raica na veitukutuku cecere eda rawa ni rawata e na noda vulica na veika e baleti ira na veiiliuliu lelevu mai na ivolanikalou. E dusimaki keda o Joseph Fielding Smith e na nona Answers to Gospel Questions:

Sa tu na ivakadinadina ni ra a kacivi ka tabaki e na gauna makawa na gonetagane. E na veigauna ni se bera ni luvuci ko vuravura, ni se dau balavu sara kina na gauna ni bula ni tamata, era a kacivi kina eso me ra vakaitavi ni ra se gone sara e na nodra yabaki ni bula. O Inoke a se qai yabaki ruasagavulu kalima e na gauna e tabaki koya kina o Atama; … ka a ciqoma o Noa na Matabete ni se qai yabaki tini ga (V&V 107:48, 52.) E sega ni volai tu e dua na itukutuku me baleta na nona yabaki ni bula o Josefa, na luvei Isireli, e na nona ciqoma na matabete; ia e kena irairai ga ni a se tamata gone sara kina. A volitaki yani mai vei iratou na tuakana ni se qai yabaki tinikavitu, ka kena irairai ni a sa taura oti tu na matabete e na gauna oya, ka ni a dau vakayagataka voli e na vanua o Ijipita. (iVakatekivu 37:2; 40:8–19; 41:14–36).(tuvana Joseph Fielding Smith Jr., Answers to Gospel Questions, 5 na ivola. [1957–1966], 2:9). Ni da cega na iVakatekivu e na Veiyalayalati Makawa, eda raica kina na italanoa kei Josefa. O Josefa e lako mai na dua na vuvale ka ratou lewe tinikadua na veitacini tagane—eratou lewe 10 eratou qase cake vua. E vaka me dau totaki koya vakalevu cake mai vei ira na kena vo o tamana. A cakava vei Josefa e dua na kote veivolavolai, a laiva me tiko voli ga e vale, ka dau vakaroti koya e na so na gauna me lako yani ka raici iratou na tuakana e na vanua eratou vakana sipi tiko kina. E dau tadra talega o Josefa eso na tadra ka biuti koya e na dua na itutu ka liu cake kina mai vei iratou na tuakana.

E na dua na siga ni baci lako yani o Josefa me raici iratou na tuakana e na nodratou vakana sipi tiko, eratou sa mani nanuma kina ni sa na sega ni rawa me ratou vosoti Josefa tiko ka ratou sa mani nanuma me ratou sa na vakawabokotaki koya. A yaco e dua na gauna vinaka me ratou volitaki koya kina vei ira e dua na ilawalawa Isimelaiti ka ra lako tiko vaka ki Ijipita.

E vakasauri na nona sa raici koya o Josefa ni sa la’ki tu e na dua na vanua matalia ka vulagi na kena itovo, e matalia na nodra lotu, ka qai kena e ca duadua beka, oya ni sa volitaki tu vakabobula. A vakaitovotaki koya sara vakavinaka o Josefa, ka mani voli koya kina o Potifa, e dua na turaganivalu ka nodra kavetani na yadra.” (iVakatekivu 37:36).

“A sa tiko kei Josefa ko Jiova, [a yaco me veivuke na yalo ka dau kauta voli vata kei koya e na nona yaco] … .me tamata yaco; a sa tiko e na vale ni nona turaga na kai Ijipita.

“A sa raica na nona turaga ni sa tiko vata kaya ko Jiova, ka vakayacora ko Jiova na ka kecega sa cakava ko koya.

“A sa lomani Josefa, a sa qaravi koya ko Josefa, a sa lesi koya kina me lewa e nona vale, ka solia ki na ligana na ka kecega sa tu vua.

“Ia mai na siga sa lesi koya kina me lewa e nona vale, kei na nona ka kecega, sa vakalougatataka na nona vale na kai Ijipita o Jiova e na vukui Josefa; ia sa vakalougatataka ko Jiova na nona ka kecega e vale, kei na were.

“A sa laiva na nona ka kecega me lewa ko Josefa; ka sega ni kila e dua na ka sa tu vua, na kakana ga sa kania ko koya. A sa yagovinaka ka matavinaka ko Josefa (iVakatekivu 39:2–6).

E na dua na siga ni cakacaka voli e lomanivale o Josefa, a qai raica ni sa koto sara e na dua na vanua leqa. A vakaraitaka votu sara toka ga mai o Potifa na nona vinakata me rau veimoceri kei Josefa. A kila o Josefa ni vanua cala e sa tiko kina. E kaya kina:

“Sa sega e dua e vale oqo me levu cake vei au, a sa sega e dua na ka sa bureitaka vei au, ko iko duadua ga, ni ko sa watina: au na qai cakava rawa vakaevei na ka ca vakaidina oqo, kai valavala ca vua na Kalou? … .

“A sa taura ga na nona isulu ka kaya, me daru moce vata: a sa laiva na nona isulu ki ligana o Josefa, ka dro, ka curu yani ki tuba” (iVakatekivu 39: 9, 12)

Eda vulica e dua na lesoni levu mai vei Josefa. Ni vakatovolei e vakasauri ga na nona tawasei koya tani mai na ivakatakilakila lailai sara mada ga ni ca. E dau yacovi keda kece e na noda bula meda dau sotava eso na gauna dredre.

Ni da sotava na veika e ca ka veivakalolovirataki—se ivakatagi sega ni vinaka, parokaramu ni retio yaloyalo, se na initaneti ka dau biuti keda e na veivanua cala, e na veivakaukauwataki kevaka eda dau nanuma tu na italanoa kei Josefa: “… ka dro yani, ka curu yani ki tuba.” (iVakatekivu 39:12).

A gole tani mai na veitemaki.

Na nona digia mada ga na veidigidigi dodonu e sega ni vagalalataki Josefa mai na veika dredre a sotava tiko e na nona bula. Ni lesu yani o Potifa ki na nona vale, a vakatukutuku vua na watina ni a vakalialiai koya o Josefa. Sa dua na ka na nona cudru o Potifa ka: … tauri koya ka biuti koya ki valeniveivesu, na vanua era dau vesu kina na nona kaivesu na tui: ka sa mai tu yani kina e valeniveivesu.

“Ia sa tiko vata kei Josefa ko Jiova ka vakayacora vua na loloma, ka vagoleya na yalo ni vakatawa ni valeniveivesu me lomani koya.

“Ia ko koya na ivakatawa ni valeniveivesu sa lesi Josefa me lewa na tamata kecega sa vesu tiko e na valeniveivesu; ia sa vakatau vua na ka kecega era cakava kina (iVakatekivu 39:20–22).

Ia sa tiko vata ga kei Josefa ko Jiova, ka soli tale kina vua e dua na gauna vinaka e na nona tiko voli e valeniveivesu. Erau a bala talega ki valeniveivesu e rua na dauveiqaravi nei Fero. Erau a dui tadra ka qai vakaibalebaletaka o Josefa na nodrau tadra. E dua vei rau e sa na vakayalia na nona bula e valeniveivesu; na kena ikarua sa na lesu tale ni oti e tolu na siga ki na nona itutu vakailiuliu ni daucaka mena gunu na Fero. A yaco ruarua na tadra. O koya na iliuliu ni daucaka mena gunu na Fero a lesu ka la’ki taura tale na nona itutu cecere vakacakacaka vua na Fero ka guilecavi Josefa vakadua me yacova ni sa oti e rua na yabaki.

A qai tadra na Fero. A sega ni dua e vakadewataka rawa na nona tadra. A qai nanumi Josefa mai na daucaka gunu. A tukuna vua na Fero me baleta na taledi ka tu vei Josefa e na nona dau vakadewataka na tadra. A mani talatala yani na Fero me kacivi mai o Josefa, ka mani la’ki kau tani sara mai kina vakatotolo mai na valeniveivesu: a torotoro ka veisautaka na nona isulu, ka lako yani vei Fero (iVakatekivu 41:14).

A mani vakaibalebaletaka na nona tadra na Fero o Josefa. A dua na ka na nona qoroqoro na Fero ka mani buli Josefa kina me dua na nona dauveiqaravi. A tiko tale vata kei Josefa na Turaga. E sega ni dede na nona sa kaba cake o Josefa ki na dua na itutu me sa tarava toka yani kina na Fero e na vanua taucoko o Ijipita. E tiko e dua na ka ka duatani taudua kina o Josefa mai vei ira kece na dauveiqaravi. A tukuna o Fero na vuna e duatani duadua kina o Josefa mai vei ira kece na dauveiqaravi e na nona kaya: “Eda na kunea li e dua vakaoqo, a tamata sa tiko vua na Yalo ni Kalou?” (iVakatekivu 41: 38).

Eda na raica ni veigauna kece e raici koya kina o Josefa e na tiko vata kei koya na Turaga. E rawarawa sara me da raica na yalo digitaki e tiko vua me baleta na ivakarau ni bula e bulataka ka dau rogoca na domo ni Turaga me dusimaki koya.

E na rawarawa talega na kena laurai vei keda na mataqali yalo vata oya kevaka eda liutaki ka dusimaki tiko mai na Nona Yalo Tabu. Vakarorogo ki na domo lailai e na gauna o vakatulewa kina. E na yaco me domo kaukauwa ni veivakasalataki me tukuna vei iko mo bokoca laivi na ivakatagi ka sega ni veiganiti, mo dro tani mai na parokaramu ni retio yaloyalo ka dau veivakalailaitaki, se mo lako tani mai na mataveilawa ka na vakavurea na vakanananu ca ki na nomu vakasama. E na tukuna vei iko na Yalo Tabu ni o sa tu e na vanua e sega ni dodonu mo tu kina.

Au yalataka vei kemuni, kevaka o ni na vakarogoca na domo ni veivakasalataki ni Yalo Tabu, ka muria na Nona veidusimaki, o na vakalougatataki mai vei ira na agilosi dauveiqaravi, e na vakuria na vuku, kilaka, kaukauwa, kei na lagilagi ki na nomu bula. Nanuma tiko ni sa yalataka tu na Turaga e na veiyalayalati tabu ni na vakalougatataka na noda bula me vakatau mai na noda yalodina.O Koya duadua ga e rawa ni veisautaki keda me da tamata sa tiko vua na Yalo ni Kalou.

Sa dua na veivakalougatataki levu me da taura tu na matabete tabu ni Turaga ka me tu vei keda na kaukauwa kei na igu oqori. Me vakalougatataki keda ka vakauqeti keda na Turaga e na noda vulica na kedra italanoa na vei-Parofita cecere ka ra sa lako oti e delai vuravura. Me da dreta mai na nodra bula na veika ka na kauti keda yani vakavoleka ki vua ka a Buli keda ka me vukei keda me da marautaka na vua ni kosipeli ni noda Turaga ka iVakabula. Me da vakauqeti me da muria na nona sala oqori na noqu masu e na yaca i Jisu Karisito, emeni.