Eso na iVakavuvuli Taumada Mai na iTukutuku Makawa kei Josefa Simici

Elder Carlos H. Amado

Mai na Vitusagavulu

Na saumaki mai e ivalavala ni tamata yadua ka ivalavala vakayalo. Sa dodonu ki na tamata yadua me ra vakadikeva na ivakavuvuli oqo me dui baleti ira.

E volai e na itukutuku makawa kei Josefa Simici me wasei kina na italanoa ni kena Vakalesui mai na Lotu e na gauna oqo. Na inaki ni talanoa me vakaraitaka na kena vakanuinuitaki na yalayala ni Turaga, ka ni dua na ivurevure ni marau kei na yalodei vei ira kece era vakabauta

Au sa wilika oti vakavica ka duidui na ituvaki ni gauna au wilika kina. E vakauqeti au e na noqu gauna ni gone; e idusidusi ka ivurevure ni kaukauwa e na noqu gauna ni itabagone; au dau wasea e na yaloqaqa kei na vakanuinui e na noqu gauna ni kaulotu; e na gauna sara mada ga oqo e se dau vakurabuitaki au ga ka kauta mai na yalo ni vakavinavinaka titobu. Mai na imatai ni gauna a vola kina o Josefa Simici, a dau tu me veivakalougatataki ka isolisoli ni vakabauta, me iloloma, vei ira era vakabauta e na yalodina; e veisureti raraba tu kivei ira era vakasaqara na dina, ka ra na daubolei tu ga kina na tawavakabauta.

Kivei ira era se bera tu ni lewena na Lotu,au vakatura mo ni wilika na ivakadinadina nei Josefa Simici e na galala ni vakasama kei na gagadre dina. O na vakila na nona dina. O na raica talega ka kila na kena vakalesui mai e na sala veivakurabuitaki na Lotu!

E dina ni levu tu na ivakavuvuli vakayalo e na italanoa talei oqo, au na yalana ga na noqu vosa e na noqu wasea e lima na ivakavuvuli, ka ra na vukei iko mo kila na Kalou, me vaka ga era a vakayacora vua na Parofita oya.

IVAKAVUVULI 1: MO GADREVA DINA SARA MO KILA NA DINA

E taukena tu o Josefa Simici na gagadre vakaitamera me kila na Kalou, ka vakayacora na Lomana. E rawa talega mo vakatorocaketaka na gagadre vata oya, ka na rawa Vua na Kalou saraga vakataki Koya me liutaki iko ki na dina. Ena gauna o sa kila kina na dina oqori vakayacora na veika kece sara o rawa ni rawata mo bulataka.

IVAKAVUVULI 2: VULICA NA BIBI NI KENA WILIKI NA IVOLANIKALOU

E kilai ira o Josefa Simici baleta ni dau vulici ira. E kaya kina:

“Ia au a wilika tiko na ivola i Jemesa e na dua na siga, koya na wase e dua tikina e lima; e kaya vakaoqo: Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu vei ira kecega na tamata; a sa sega ni dauveivakadirideini; ia e na solia ga vua.” (Josefa Simici—Ai Tukutuku 1:11)

Ena gauna lekaleka ni nona cakacaka vakalotu, a ciqoma talega kina o Josefa Simici e vuqa sara tale na ivakatakila bibi ka ra vu mai na kena wiliki na ivolanikalou. O na gadreva mo vulici ira me rawa kina ni yaco mo kila na Kalou, o Koya na ivurevure ni ka dina kecega.

IVAKAVUVULI 3 : VULICA NA YAGA NI MASU

E kaya na gonetagane o Josefa:

“A sa qai votu mai vei au ni rua ga na ka au rawa ni kitaka: me’u tu ga e na veilecayaki kei na butobuto, se me’u muria na ivakasala i Jemesa ka vakatakekere Vua na Kalou.”

“… Oqo na imatai ni gauna e na noqu bula taucoko me’u qai tovolea kina me’u masu votu.

“ … Au sa qai tekiduru sobu ka vakacabora na noqu masu vua na Kalou”

“ … Au sa kila ni sa dina sara ka yaga na ivakasala i Jemesa; io kevaka e dua na tamata sa lailai vua na vuku me kerea vua na Kalou; io e na solia vakalevu vua ka sega ni veivakadirideini”.

Me vaka ni sa tama uasivi sara na TamadaVakalomalagi, e kila vakavinaka tu na nomu gagadre vakayalo ka vakayago talega, ka gadreva me vakalougatataki iko, oqori na vuna sa vakaroti iko kina mo vakasaqarai Koya ka kerei Koya.

A yaco me kila o Josefa na dina baleta ni a masu. E na noda gauna, e milioni na lewe ni Lotu oqo, era vakadinadinataka na dina ni Veivakalesui mai, baleta ni ra muria na ivakasala koya ka vakatakekere vua na Turaga e na vakabauta. E nomu talega na dodonu vata oya mo ciqoma e dua na isau ni nomu masu baleta ni ivakadinadina e dua na isolisoli ka solia na Kalou vei ira walega era kerea e na yalodra dina. Tovolea mada, e na qai vakataucokotaki na yalayala.

IVAKAVUVULI 4: KILA NA VEIVAKALOUGATATAKI NI VAKANANANU VAKATITOBU

E dau vakanananu vakatitobu vakawasoma o Josefa Simici; e dau vakasamataka, kalasitaka, veidutaitaka, e dau tovolea me kunea na isau ni veika e wilika e na ivolanikalou. E kaya kina:

“Ni sa yaco tiko na veiqati levu oqo, sa druma sara na lomaqu …

“… Au sa kaya e lomaqu: … a cava me’u cakava? Na matalotu cava vei iratou oqo e dina; Eratou lasu taucoko li? Ke dua vei iratou e dodonu tiko, ia ko cei? Au na kila beka vakacava?

“E sega mada ni dua na tiki ni vola tabu e lauti au vakalevu me vaka na kena oqo. Raica sa laubasikata sara na yaloqu ka’u liaci au kina. Au vakasamataka lesu vakavica na kena laulau” (Josefa Simici—Ai Tukutuku t. 8, 10, 12).

Me vakasamataki vakatitobu na dina tawamudu sa i koya meda tarogi keda, vakavica: “Ena rawa vakacava me’u kila?” “Era kila vakacava o ira eso?”

Ena rawa vakacava mo kila na veika oqo? Yalovinaka vakasamataka vakatitobu.

IVAKAVUVULI 5 :VAKILA NA MARAU NI LAKO KI LOTU

Ena nona gagadre me kila na dina, a lakova kina o Josefa Simici e vica na matalotu e na nodratou itikotiko. Me baleta na nona sota vata kei na Kalou, na Tamada kei na Luvena, o Jisu Karisito, e vakamacalataka sara kina vakamatata na ivakaro a soli vua me baleta na veimatalotu tale eso:

“Au sa tarogi rau sara na tamata ka rau tu e mataqu se matalotu cava e dodonu; (ni gauna oqo e se bera vakadua ni bau yaco kina noqu vakasama ni ra cala kece) io me’u curu kina.”

“… Me’u kakua ni curu ki na dua vei ira; io me’u tiko ga ka waraka na ka e na vakaroti vei au.”

Eda na gadreva kece sara me yaco me da na kila na matanitu ni Kalou e vuravura, ka ciqoma e dua na ivakadinadina ni kena dina. Eda lako ki lotu me da vakila na Yalo Tabu, vulica na Nona ivunau, vakavouya na noda veiyalayalati, ka ciqoma na cakacaka vakalotu ni veivakabulai kei na bula vakalou me da lesu kina ki na kena iserau na Kalou vata kei ira na noda vuvale. O ni sa sureti yani kina mo ni lako mai ki lotu ka mai raica sara ga vakataki kemuni na veika oqo.

Na saumaki sa dua na ivalavala vakatamata yadua ka vakayalo talega.sa dodonu ki na tamata yadua me vakadikeva vakataki koya na ivakavuvuli oqo. E sega ni rauta meda cakava tu ga me rawa, ka salavata kei na lomalomarua, rere se sega ni veinuitaki. Sa yalataka vei keda na Kalou, e na vuku ni Nona loloma cecere, ni na sauma na noda kerekere me vaka na noda yalodina. O ira ga era vakasaqaqara e na yalodina era na rawata na kena isau, na iloloma ni Kalou, mai vua na Yalo Tabu.

Na Yalo Tabu e dau kilai talega me Dauveivakacegui ka iVakadinadina. Eda rawata mai Vua na noda kila ka kei na noda ivakadinadina ni sa Luve ni Kalou na Karisito

Ni o sa papitaiso oti, kevaka o na yalodina tiko ga ka kilikili kaya tiko na nomu veiyalayalati, e na tiko ga kei iko na veituberi ni Yalo Tabu, mai na vakasolokakana, veivakauqeti, veika e vakilai, na tatadra kei na ivakasala.

E tukuni vei keda mai na itukutuku makawa kei na ivolanikalou me baleti ira na tamata era a rogoca, vosataka se e na so tale na sala e tu vei ira na ivakadinadina dei vinaka me baleta na Kalou, kei na Nona ituvatuva ni noda vakabulai. Ia e vuqa vei ira era sega ni mani dina ki na veika era a yalataki ira kina.

Eda vulica mai na veika oqo ni sega ni ka eda vulica mai na nave ni yagoda, e rawa kina vei keda me da kila na inaki ni Kalou ka muri Koya, ia mai na veika ga e vakavurea mai na Yalo Tabu.

Ni dua e sa vulica na ivakavuvuli taumada oqo ka qai sega ni cakava, sa na yali kina vua na rarama kei na veituberi ka dau vukei koya me kila na Kalou kei ira na Nona parofita. Na kena ivakaraitaki e taudaku eda na raica oya ni ra sa na tawasei ira tani, era sa na luluqa mai vakalotu, se era na veisaqasaqa sara kei na Lotu. Na kena ivakaraitaki e loma oya ni sa na mudu na nodra vakatovotovotaka e dua se sivia na lima na veika oqo.

Sa na sega vei ira na gagadre dina me ra kila taucoko na dina
Era sa na sega ni dau wilika na ivolanikalou
Era sa na sega ni dau masu
Era sa na sega tale ni dau vakanananu vakatitobu ki na veika ni tawamudu
Era sa na sega ni dau lakova na Lotu

Sa dua na ka talei ni dua na gauna ni veilecayaki vakaitamera ni bula vakalotu, ni se bera mada ga ni yabaki 15, e na maliwa ni veisaqasaqa kei na veivakacacani sara mada ga,a vakaraitaka tiko kina o Josefa Simici e na yalovosota kei na yalodina na nona talairawarawa ka vakaraitaka talega kina vei keda na sala rawarawa sara ka mana me da voleka kina vua na Kalou.

Na kena ivalavala oqo e gadrevi kina me da vuli mai na ivunau ki na ivunau, vakalailai eke ka vakalailai e kea, me yacova ni da sa rawata na vakabauta ka kila vakamatata na keda inaki vakalou. (2 Nifai 28:30).

Sa noda itavi me da vaqaqacotaka e veisiga, na veivakauqeti eda dau vakila mai na Yalo Tabu, e na noda vakayagataka na lima na ivakavuvuli oqo.

Sa noqu masu me da dau vakayacora e veigauna na veika oqo, e na yacai Jisu Karisito, emeni.