Rau Veiqaravi ena Vanua Era Vakaitikotiko Kina na Yalododonu o Elder Oaks kei Elder Holland

Me tekivu ena vula o Okosita, erau sa na veiqaravi kina ena taudaku kei Amerika me dua na yabaki o Elder Dallin H. Oaks kei Elder Jeffrey R. Holland mai na Kuoramu ni Apositolo Le Tinikarua. Ena Peresitedi ni Wasewase e Phillipines o Elder Oaks ka veiqaravi vaka-Peresitedi ni Wasewase e Chile o Elder Holland.

Sa imatai ni gauna oqo ena loma ni vicasagavulu na yabaki me na vakaitikotiko kina ka vakatulewa ena taudaku kei Amerika e dua na lewe ni Kuoramu ni Apositolo Le Tinikarua. Erau a veiliutaki ena veitabana ni daukaulotu e Iurope kei na Ra kei Iurope o Elder Ezra Taft Benson (1899–1994) kei Elder Mark E. Petersen (1900–84) ena nodrau itutu vaka iApositolo. A veiqaravi talega vaka Peresitedi ni Tabana ni Daukaulotu mai Peritania o Elder David O. McKay (1873–1970) ena nona itutu vaka-iApositolo ena itekivu ni 1920.

Na nodrau lesi oqo o Elder Oaks kei Elder Holland me rau Peresitedi ni Wasewase e kena inaki me wali kina na dredre e sotavi tiko ena veiwasewase ka ra se qai vakatorocaketaki tiko: oya na tubu vakatotolo. “Na tubu sa i koya na neimami leqa levu duadua,”e kaya o Peresitedi Hinckley ena dua na veivakatarogi vata kei na Deseret News. “Ka sa dua na leqa taleitaki.”

Ena nodrau ilesilesi vou, erau na vakaitavi kina o Elder Oaks kei Elder Holland me rau vukea na nodra tuberi na iliuliu ni Lotu vovou ka vakakina na nodra vukei na lewenilotu vou me ra vakamatautaki ira ki na Lotu ka lako ki na valetabu. Na ilesilesi vou oqo ena rawa talega kina vei ira na lewe ni Kuoramu ni Apositolo Le Tinikarua me ra kila na sala me rawa ni ra walia kina na mataqali leqa vakaoqo.

E vakilai tiko e Chile kei Philippines ena veiyabaki eda se qai sivia na tubu totolo ni Lotu. Ena Philippines, sa tubu na iwiliwili ni lewe ni Lotu me volekata yani na veimama ni milioni, ka yaco na tubu levu duadua ena loma ni tini na yabaki sa oti. Na lewenilotu e Philippines ena 1984 a 76,000, ena 1990 sa 237,000, ni kua sa yacova tiko yani vakacaca na 496,000. E sivia ni 1,200 na ivavakoso ena loma ni 80 na iteki ka 13 na tabana ni daukaulotu, e sa tu ena matanitu oqo. A vakatabui ena 1984 na Valetabu na Manila Philipines.

Sa sivia koto na 520,000 na Yalododonu Edaidai mai Chile. Ena gauna e vakatabui kina na Valetabu na Santiago Chile ena 1983, sa yacova toka kina na iwiliwili ni lewenilotu ena matanitu oqo na 140,000. Ena 1988 sa yaco kina o Chile me i ka va ni matanitu e vuravura me yacova na 50 na iteki. Ena maliwa ni 1983 kei na 1993, a vakaruataki kina na iwiliwili ni lewenilotu kei na iteki e Chile, ka yaco kina o Chile me matanitu ka totolo duadua na tubu ni kena iwiliwili ni lewenilotu ena Ceva kei Amerika. Na toso tikoga ni kena tubu, na kena tauyavutaki e 26 na iteki vovou ena maliwa ni 1994 kei na 1996, sa yaco kina me vakaduri na iWasewase e Chile ena 1996.