Vakatuburi ni Kaukauwa e Loma

Mary Ellen W. Smoot

Qai Vakacegu Walega Oqo mai na Peresitedi Raraba ni iSoqosoqo ni Veivukei

E rawa vakacava vei iko kei au me daru saumaki ki na dina, vakasinaiti e na vakabauta, dauvakararavi vakatabakidua vua na Kalou me daru vorata na veivakatovolei ka vakaukauwataki talega mai vei ira?

E na vukudra na noqu daunivakasala kei na matabose raraba ni Soqosoqo ni Veivukei, keimami kidavaki kemuni yani na lewe ni Lotu e vuravura raraba, ka vakabibi ga vei ira na marama,mai na nodra vakabauta kei na yalodina e na veiqaravi era solia kina na nodra bula kei na taledi me vakalougataki e na nodra bula na tamata yadua kei na matavuvale wavokita na vuravura.

E na veivakalougatataki e a solia vei au o Peresitedi Gordon B. Hinckley, e na noqu a vakatikori, e a tukuna na veiqaravi e rawa me vakayacora na iSoqosoqo ni Veivukei. E kaya, “Oqo e dua na isoqosoqo vakaitamera, e rairai ni kena e levu ka qase duadua e na kena mataqali e vuravura taucoko. Na nona itavi sa ikoya me caka vinaka ka me vukei ira era rarawa ka gadreva tu na veivuke, me veiuqeti e na cakacakataki ni vuli, na vinaka ni veiqaravi vakaitikotiko, kei na kila ka e so e na nodra bula na marama e vuravura taucoko.”

Era tu me noda idusidusi na vakatutusa ni iSoqosoqo ni Veivukei; vuli yadua, vakaitikotiko kei na vuvale, kei na parokaramu ni dauveisiko. Na veiyaya ni cakacaka oqo era sa vakadikevi vakavinaka ka ra sa vakayagataki me vukei ira na marama me ra vakarabailevutaka na nodra kaukauwa e loma mai na veiqaravi kei na duavata.

Me ivakaraitaki ni mataqali kaukauwa e loma au vosa tiko kina, au gadreva me’u wasea na italanoa kei Sussana Stone Lloyd e na nona yabaki 26, ka a biuti Igiladi e na yabaki 1856 me lako duadua ki Utah. O koya duadua ga e na nona matavuvale e lewenilotu, o Susanna e a lewe ni Willie Handcart Company. Me vakataki ira tale e so na ivuvu, e a vosata na veivakacudrui ni viakana, tauvimate, kei na oca.

E na nona yaco yani ki Salt Lake Valley o Sussana, e a kerea e dua na iloilo me ukutaki koya kina. Mai na nona sasaga vagumatua, e nanuma lesu, “Au na sega ni guilecava rawa na kequ irairai. E so vei ira na noqu itokani makawa era sega ni kilai au.”¹ E na nona a volitaka nona iloilo vua e dua na kai Idia me kena isau e dua na tiki ni lewe ni bulumakau, e lailai na gauna me tirovi koya kina. Qo sa sega ni kila tale na kena irairai. E sa dua tani tale na tamata, e loma kei na taudaku. E na nona lakova voli na veiulunivanua veivatu na veidelana ka la’i cava yani e na dredre vakatamera sa yaco mai na kila titobu. E a vakatovolei na nona vakabauta, kei na nona saumaki e sa vakadeitaki. E a sa vakasavasavataki e na veigaunisala me tautauvata kei na iloilo uasivi duadua ka sega mada ga ni rawa meda ilovi keda kina. E a masulaka tiko o Susanna me vakaukauwataki ka qai rawata … e na boto ni yalona.

Oqo na mataqali kaukauwa e loma au gadreva me’u na vosa kina. E daru rawa vakacava o iko kei au me daru saumaki ki na dina, vakasinaiti e na vakabauta, dauvakararavi vakatabakidua vua na Kalou me daru vorata na veivakatovolei ka vakaukauwataki talega mai vei ira?

E sega ni vakayagataki vakalevu na bula me da raica rawa kina ni bula taucoko e na sega ni vaka na nomu inaki taumada. Na veitemaki kei na veivakararawataki e lako mai vei keda yadua. O bau kila li e so ka ra sega ni vinakata me veisautaka e so na ka me baleti ira se na nodra ituvaki? Ia, au vakabauta ni o kila e levu era toso ki liu vata kei na vakabauta. O na vinakata mo veimaliwai vata kei ira na tamata oqori, era uqeti iko, ka mo na vakaukauwataki mai na nodra ivakaraitaki.

E na lima na yabaki sa oti au a sota kei ira na tacida mai Aferika ki Spain era ivuvu e na nodra dui dodonu vakataki ira. Au dau qoroya na nodra kaukauwa e loma, ka sa dau ivakaraitaki vei au na titobu ni nodra ivakadinadina. Sai ira oqo na tacida era bulataka na dina ka vakadeitaka na vakatutusa ni iSoqosoqo ni Veivukei

Na vakatutusa e kauta lesu mai vei keda se o cei sara mada o keda se cava na vuna eda cakava kina na veika eda cakava tiko. Na levu cake ga ni noda bulataka na kena ivakavuvuli, na levu cake ni kaukauwa e loma eda na taukena—Na noda itovo e na vakaraitaka na noda vakabauta: Na lolo, masumasu kei na vulici ni ivolanikalou e na vakaraitaka noda veimaliwai vata kei na iVakabula. Au gadreva me’u vakabibitaka e rua tale na gaunisala e rawa kina na kena tubu cake na kaukauwa e loma:—

Veiqaravi

E na noda sa saumaki vakaidina, na noda rai e sa na toso mai vei iko kivei ira e so tale. E rawa ni da kunea na kaukauwa e loma mai na veiqaravi. E sega ni dua na ka e marautaka vakalevu cake na meca me vaka na noda vakayawaki keda mai na kocokoco ni vakanananu kei na gagadre. Ia eda kila vakavinaka cake. Na veiqaravi e na vukei keda me da muria na gaunisala dodonu.

E na koniferedi ni marama, e na soqoni ni vuli yadua, vakaitikotiko kei na vuvale, e ka bibi duadua, e na noda dui vuvale, e vakauqeti au na nomuni cakacaka ni veiqaravi.

E na vica na macawa sa oti au a rogoca kina e dua na talevoni mai vei Peresitedi ni iWasewase e Europe Central Area. E kaya mai ni o ira na lewenilotu kei ira na daukaulotu e Albania kei Moldova era sa batabata sara ga, ka taroga mai kevaka e tu e so na itutuvi vei ira na iSoqosoqo ni Veivukei me vakau yani vei ira. Raitayaloyalotaka mada na levu ni noqu marau e na noqu veisiko yani ki na Veiqaravi Vakaveiwekani ka’u la’ki kila kina ni rawa ni keitou solia wale e 1,000 na itutuvi. E na loma ga ni vica na siga era sa vakatawani ka vakau. Na peresitedi ni tabana ni kaulotu e vola mai: “E tarai ira vakalevu na lewenilotu eke ni o ira na lewenilotu tale e so era bau nanumi ira tu mai.” Vinaka vakalevu na nomuni veiqaravi vei ira na tani.

Kemuni na taciqu, ni raica matua mada na vakatutu ni ulutaga ni soqoni ni vuli yadua, vakaitikotiko kei na vuvale ka vaqarai na gaunisala me ra tarai cake kina na kaukauwa vakayalo, tubucake ni kenadau vakaikoya, vakaukauwataki ni vuvale kei na matavuvale, ka vakarautaka na veiqaravi vakosipeli. Ni da cakava oqo e na yaco me da vakalailaitaka noda vakaogai keda e na noda leqa ka vakararavi vakalevu cake vua na Kalou.

Duavata

E dua tale na gaunisala e rawa ni da vakatubura cake kina na kaukauwa e loma sa ikoya noda tadolava na duavata e na noda matavuvale, e na noda iteki, na noda tabana levu, kei na noda mataveiliutaki. Na Turaga Vakaikoya e vakatavulica, “Kevaka dou sa sega ni duavata, dou sa sega ni noqu.”²

Duavata ni inaki, vakasama, kei na vakanananu era itovo ni bula vakalou. E na gauna e rawa kina me da biuta vakatikitiki na noda duidui ka taleitaka vakaikeda na noda dui kaukauwa, na veika uasivi era na yaco mai. E a vakasalataka na Parofita o Josefa Simici, “Kakua ni yalana na nomuni rai me baleta nodra bula dodonu na nomuni itokani… . E dodonu mo ni vakalevutaka na yalomuni e na nomuni veimaliwai.”³ Na mataqali yalosolisoli vakaoqori e veisureti ki na duavata uasivi.

Au sa sikova oti na iteki kei na tabanalevu ka ra dau duavata. Era cakacaka vata na lewe ni mataveiliutaki, ka cakacakataka vata na nodra sasaga; era veitokonitaka vata nodra iliuliu ni matabete ka tovolea vata me ra kauta mai na nodra matavuvale vei Karisito. E na kena sa toso ki liu na matanitu ni Kalou, e dodonu me da sa duavata e na noda sasaga ni maroroya na veiyalo.

E na veiliutaki raraba ni iSoqosoqo ni Veivukei keitou sa vakamuduo e na kena vakabibitaki ni dauveisiko.⁴ Na itukutuku vou e sureti ira na tacida me ra wilika mai na ivolanikalou vata kei na ivakavuvuli ni Mataveiliutaki Taumada kei ira e so na Vakaitutu Raraba me baleta na ivakavuvuli ni kosipeli. Era sa qai vakauqeti na tacida me ra wasea na rai e loma kei na veika era sotava me baleta na kena bulataki vakacava na ivakavuvuli ka sa vakalougatataka na nodra bula.

Kemuni na taciqu, kevaka mo ni vakamuria na ituvatuva oqo, o na vakila nomu duavata vakalevu cake vata kei na nomu itokani vata kei ira talega o vakavulici ira tiko. O na vakaukauwataki vakayalo.

Veitalia na noda ituvaki, o cei vei keda e rawa ni vakaotia noda bula e na mata ni iloilo nona lomani koya vakaikoya kei na veivakayalomalumalutaki? Io, me vaka e vakasalataka o Paula na iApositolo, eda gadreva taucoko me da “dikevi [keda]”⁵ e na veigauna. E gadrevi vei keda kece me da veivutuni, me da raica rawa noda malumalumu, me taucoko vakalevu lako vei Karisito Me vakataki Susanna, de na mani yaco me da volitaka yani noda matailoilo me rawa ni da takosova na buca ni mosi, rarawa, kei na veivakayalomalumalumutaki. Ia ni da sa cakava oqori, eda na kunea na kaukauwa Vakalou ka a sega beka ni rawa me da kila.

E a vosa o Peresitedi Joseph F. Smith e na nona vakanananu uasivi ni kaukauwa e loma baleti ira na marama ivuvu. E a kaya, “E ka wale vei ira na mate. Na dredre e ka wale. Na liliwa se tau ni uca, se katakata, e ka wale vei ira. Na veika kece era vakasamataka ka kila ka gadreva sa ikoya duadua ga na qaqa uasivi ni matanitu ni Kalou kei na dina e a solia vei ira na Turaga.” Me qai kuria vata na lagilagi taucoko ni parofita ni Kalou, e a kerea kina, “Na yaloqu, era sa lako kivei na marama oqo?”⁶

Au tiko eke edaidai me’u vakadinadinataka vei kemuni ni ra tiko na mataqali marama vakaoqo e na iSoqosoqo ni Veivukei ni Lotu e wavolita na vuravura. Au sega ni vakamacalataka rawa na noqu vakamuduo e na gauna au mai donuya me’u raici ira kina na marama oqo e na noda gauna era sa “dregati vakaukauwa e na kila ka me baleta na dina.”⁷ E na vu-ni-yaloqu taucoko, au kila ni Turaga e rawa me “vakaukauwataka na veika era malumalumu tu.”⁸ Au kila ni oqo na Nona cakacaka kei Nona matanitu. Au kila ni o keda vakayadua e rawa ni da ilova na iVakabula mai na gauanisala eda digia ka bulataka kina noda bula E na yaca i Jisu Karisito, emeni.