Rawa ni Vakavulici
Mai na kena rawa ni da vakavulici, eda vakabulabulataka na kaukauwa taucoko kei na veivakalougatataki ni Veisorovaki e na noda bula.
O ira na tisaipeli dina ni iVakavuvuli e rawa ni ra vakavulici. E na vica walega na vosa, e solia vei keda o Eparama e vuqa sara na rai e loma me baleta nona sa rui vakalougatataki vakalevu. E a bulataka e dua na bula e na … “nona gadreva me ciqoma na veivakaro, ka muria na ivunau kecega ni Kalou.”1 “Na gadreva me ciqoma na veivakaro” e sa toso cake sara mai na lomasoli me da vakarorogo. Mai na noda gadreva me da ciqoma na ivakaro sa ikoya na veivakaukauwataki levu duadua mai na noda vakacegu e na kena sa rauti keda tu ga na itutu eda sa tu kina qo, e sa rawa me da vakavulici.
E a vakavulica o Peresitedi Brigham Young noda itavi me “liu ka taumada (sa ikoya) me da vakasaqara na Turaga me yacova ni da sa dolava na gaunisala ni veitaratara mai vua na Kalou ki na dui yaloda.”2 Ni se qai oti ga e dua na gauna lekaleka nona a mate o Josefa Simici, e a rairai vei Brigham Young e na dua na tadra ka vakaroti koya: “Tukuna vei ira na tamata me ra yalomalua ka yalodina, ka vakadeitaka na kena maroroi na yalo ni Turaga me na liutaki ira vakadodonu. Qarauna me ra kakua ni vakanadakuya na domo lailai; e na vakavulici ira e na veika me ra cakava kei na vanua me ra lakova; e na vuataka na vuanikau ni Matanitu.”3
Me da vakacaudreva vakacava na kaukauwa ni ivakaro vakalou oqo e na noda bula? Kena imatai, e gadrevi me da tekivu vata kei na lomasoli me da vakaroti. E so era via kania ka via gunuva na ivalavala dodonu, e so era na vakasaurarataki me ra yalomalumalumu.4 E so vei keda, me vaka na kena dodonu me da vakamuria na ivakaro se veisautaki keda e na vaka ga na veisautaki ni veilawa. O Nemani e a vinakata dina sara ga me kaulaivi na nona vukavuka, ia e a lako tani e na cudru e na nona tukuna vua na italai ni parofita me la’i sisili vakavitu e na Uciwai na Joritani. E sa vakatubu leqa sara ga, e ka lailai, ka vakila ni veiuciwai e na nona vanua era vinaka cake mai na uciwai na Joritani. Ia, e sa maca na nona vukavuka mai na nona vakarorogo vei ira na nona italai, veisautaka na nona vakasama ka cakava “me vaka na nona ivosavosa na tamata ni Kalou.”5 E a vakatakarakarataki na kena ivakaraitaki ni a dua na parofita kei na dua na Kalou ni Kalou ni Isireli. O keda talega e sa dodonu me da kidava ni Kalou e tu na nona lawa ni vakatulewa6 kei na Nona vuku e uasivi cake sara mai na noda vakaikeda. E vakadikeva talega o Mosese, e na nona raica oti na itikotiko cecere ni Kalou kei na nona cakacaka, “Ni sa ka wale na tamata, oqo na ka au a sega sara tu ga ni kila.”7
Kena ikarua, e gadrevi me da biuta mada vakavinaka e na kena itutu dina na noda vakasama kei na lomada. Oqo e lako mai e na vakanananu ni masumasu kei na yaluma ni Yalo.8 Na cakacaka oqo e cakacaka dina. E wili kina na yavavala ni ikalawa me vaqaqara, vakatudaliga kei na vulici ni ivolanikalou. Ni da yalomalua ka luva laivi na dokadoka e vakamalumalumutaka na lomada e na gauna qo e rawa me da vakanamata e na ivakasala vakalomalagi kei na ivakaro. O tamai Lamoni, na tui kaukauwa ni Leminaiti, e a cakava na veisau oqori me vakanamata, nona davo vakatobuicu e na vuravura, me vakaraitaka na nona itavi uasivi nona kila na Kalou. E a vakarota: “au na veivutunitaka na noqu ivalavala ca kecega me’u kilai kemuni, ia mo ni vakaturi au cake mai na mate ka me’u vakabulai e na siga mai muri.”9
Kena ikatolu, e dodonu me da dau talairawarawa e na ivakaro eda ciqoma. E kaya o Alama, “Daurogoca na noqu vunau, de mani rawa mo dou vakabauta e vica na tikina.”10 E a kaya o Nifai: “Au na lako ka kitaka.”11 Sa totoka vakaoti na itovo ni vakanananu me baleta na vakarorogo kei na talairawarawa e na nona ciqoma na ivakasala nei tamana me kauta mai na peleti parasa, na kena tukuni vua na vanua me vaqaqara kina ka me taya e dua na waqa.12 E na veikisi yadua e vakayacora e na veivakabauti, toso yani ki liu, “sega ni kila na ka”13 e dodonu me cakava se na kena itinitini. Ia ni sa tu vei keda na galala ni digidigi, e so na gauna e rawa me dredre na ilakolako ni bula e na kena vakayagataki ni lomada kei na noda vakanananu e na dina baleta na Kalou. Veitalia, me vaka e kaya o Peresitedi Thomas S. Monson, “Na Turaga e namaka tiko noda vakanananu. E namaka tiko noda cakacakataka. E namaka tiko noda cakacaka vakaukauwa.”14
Yaco me rawa ni da vakavulici sa ikoya e dua na ivalavala ni vulici e dua na iyatu ki na dua tale. E na ivalavala oqo eda sa veisautaka na vakasama kei na vakanananu me cakacakataki. Ia sa wacava na isau ni itavi oqo e na noda vakabauta e na noda sa dolava na sala ni veitaratara vata kei na Turaga. E kaya na Turaga, “Era sa kalougata ko ira sa vakarorogo ki na noqu vunau, ka vakatudaliga ki na noqu ivakavuvuli, ni ra na vakavukui kina.”15 E tukuna talega o Koya: “Ia ko ira sa muria na nona ivakasala na Yalo ni Turaga, era sa kila na Kalou ko Tamada.”16
Au nanuma noqu a tarogi tamai na watiqu e na vica na yabaki sa oti, na bisopi ni itaba yabaki, me baleta e dua na tiki ni pepa e tolu na idi na kena raba ka lima na idi na kena balavu e dau tawa tu ga e na nona taga ni sote. E a sauma mai ka kaya ni so na gauna e vakila na vakanananu se veivakauqeti. E qai dau dreta mai tuba na tiki ni pepa o ya me qai vola kina na veivakanananu oqori, e na gauna ga era yaco mai kina. E qai dau tovolea me cakacakataki sara, e na gauna totolo duadua. E sa veivakayalomalumalumutaki dina ni da vakasamataka na domo lailai, ni na dau tikoga e kea e na veigauna taucoko me baleti keda, ka vakavulici keda tiko e na veika e dodonu me da vakayacora kei na vanua me da lakova. Na Turaga e tukuna vei keda na gauna me tarovi kina na veivakauqeti, vakawasoma na kena dausoli vakalevu. Kevaka eda sega ni vakamuria, na veivakauqeti e na yali yani.
Me kena itinitini mai na noda rawa ni vakavulici, eda rawata kina e dua na ivakadinadina uasivi ni nona kauwaitaki keda na Tamada Vakalomalagi. Eda rawata kina na veitaqomaki kei na kena kilai deivaki ni noda gaunisala ni bula e na vakatau tikoga e na Nona lewa.17 E tu vei keda na dodonu me da vinaka, na dodonu me da bula savasava kei na dodonu me da veisautaka na noda ivakarau. Mai na kena rawa ni vakavulici eda vakabulabulataka na kaukauwa taucoko kei na veivakalougatataki ni veisorovaki e na noda bula. E yaco me da dauririko e na vakasolokakana ni Yalo Tabu me rawa kina ni da biuta na Karisito vakatitobu e na noda bula18 na ivakavuvuli dodonu ka vakavulici mai vei ira na parofita kei na dina mai na vuravura. Eda sa yaco me da Nona tisaipeli dina.
Sa ikoya na noda lomana tiko na veidina oqo e na vu ni yaloda taucoko ni na tubu mai e dua na veimaliwai e na keda maliwa kei na iVurevure ni dina vakaikoya, “Raica na kila ka sa kabita ga na kila ka; na vuku sa taleitaka ga na vuku; na dina sa rekitaka ga na dina; [kei] na ivalavala savasava sa domona ga na ivalavala savasava.”19 O koya gona, eda na kunea ni veika taucoko sara eda vakamareqeta ka taleitaka vakalevu duadua sai ira eda vulica vakaikeda mai vua na Turaga.
Au vakadinadinataka noda ciqoma na ivakatakila ni dina e sega ni wiliki rawa, sa mai vua na Parofita o Josefa Simici, wasei ni ivakadinadina ni solibula ni veisorovaki iJisu Karisito. Mai na noda rawa ni da vakavulici eda na raica sara vakamatata, rogoca ka da kabi matua vei ira na veivakatakila oqori ka tomana tikoga, edaidai sara ga, mai vei ira na noda iapositolo, parofita, daurairai, kei na ivakatakila bula. E na yaca iJisu Karisito, emeni.