Vakatabuya na Valetabu na Arizona Snowflake o Peresitedi Hinckley

A vakatabuya o Peresitedi Gordon B. Hinckley na valetabu na Snowflake—na kena ikarua e Arizona ka kena i ka 108 ena loma ni Lotu—ena va na kena iwasewase ena i ka 3 ni Maji.

“Eda sa vakavinavinaka vei ira era a taura na yavu ni itikotiko oqo kei na so tale na itikotiko voleka eke,” e kaya o Peresitedi Hinckley ena nona masu ni vakatatabu, ka vakaibalebaletaki ira tiko na Yalododonu Edaidai ka ra a tawavanua taumada ena yasayasa vaka- Snowflake ena 1878 me vaka na kerekere nei Peresitedi Brigham Young. ”Era a veiqalisominiwai vakabalavu sara kei na vuqa na veimataqali meca. Era sa mai marautaka tu oqo o ira na nodra kawa na vua ni nodra sasaga, ka sa kena ulumatua na valetabu vakasakiti ka totoka oqo.”

Erau a tomani Peresitedi Hinckley voli o Elder Neal A. Maxwell mai na Kuoramu ni Apositolo Le Tinikarua kei Elder Dale E. Miller mai na Vitusagavulu, iKarua ni Daunivakasala ena Mataveiliutaki ni Wasewase na North America Southwest.

Na valetabu oqo ena qaravi ira na lewe ni Lotu ena vua-i-cake kei Arizona kei na dua na iwase lailai ni ceva kei New Mexico. Era okati talega ena vanua e qaravi ena valetabu oqo o ira era tiko ena itikotiko na Apache, Hopi, Navajo, kei Zuni na nodra veitikotiko na itaukei kei Amerika. E vuqa na nodra icakacaka ni loma ni vale kei na kena vakaiyayataki na itaukei kei Amerika e okati ena loma ni valetabu, na veiyaya eso me vaka na ibe vavaku a tali e liga, na basikete, kei na iyaya buli ena qele.

Erau a tawani ena 1878 o Snowflake kei na koro volekata o Taylor me tiki ni tawavanua ka a tekivuna o Peresitedi Brigham Young. Ena 1880, a vakayaloqaqataki ira kina na Yalododonu ka ra sotava tu oqo na dredre me ra cakacaka vakaukauwa, o Elder Wilford Woodruff, ka lewena tu na Kuoramu ni Apositolo Le Tinikarua ena gauna oya, ena nona tukuna ni na rawa ni tara e dua na valetabu ena kedra maliwa. E muri a tau na kena parofisai mai vei rau na Peresitedi ni Lotu o John Taylor (1808–87) kei Joseph F. Smith (1838–1918). Era a tugana tu e yalodra o ira na Yalododonu yalodina na yalayala oqo, ka ra veisolitaka sobu mai na dua na itabatamata ki na dua tale.

”E dau rogoci na italanoa kilai levu oqo vata kei na itukutuku makawa kei na itukuni me baleti Snowflake,“ e kaya o Leon T. Ballard, e dua na itaukei kei Snowflake ka peresitedi ni valetabu. ”Au a tubu cake mai ena veika oqori. Oqori na vuna au dau nanuma tu ga kina ni valetabu ni parofisai oqo.“

”Na valetabu oqo e isau ni veiparofisai ka a tukuni,” e kaya o Dean Porter, e dua na lewe ni komiti ni Valetabu e Arizona. “E dua na ivakananumi e sega ni baleti keimami, ia e baleti ira na neimami ivuvu, ka ra a kerei me ra biuta na nodra veivale mai Utah ka mai vaqara na nodra bula eke.”

E sivia ni 11,000 na lewenilotu era a tiko rawa ena vakatabui ni valetabu. E dina ni 9,000 ga era vakaitikotiko ena yasayasa vaka- Snowflake, e sivia ni 94,000 era a lako ena kena dolavi raraba mai na i ka 2–16 Feperueri. E kaya o Peresitedi Ballard ni vica na udolu na vulagi era lako mai me baleta ni so na tukadra era a tu eke. “Ena nodra nanamaki, era kauta mai kina eso na nodra itokani,” e kaya kina. Na yalo vakanuinui me baleta na valetabu oqo e sega ni se bau malumalumu me tekivu mai na gauna e vakatabui kina. “E dau 24 na iwasewase ni veiqaravi ena dua na macawa, ka voleka ni ra dau sinai kece tu ga,” e kaya o Peresitedi Ballard.