Phau Ntawv Maumoos txoj Kev Tawm Los
Tej zaj keeb kwm thiab cov tim khawv tshwj xeeb txog Phau Ntawv Maumoos yeej ua tim khawv tias qhov uas muaj Phau Ntawv Maumoos yog ib qho txuj ci tseem ceeb.
Thaum nws sib ntsib nrog lub Koom Txoos cov txwj laug, tus Yaj Saub Joseph Smith hais tias: “Muab Phau Ntawv Maumoos thiab tej kev tshwm sim tshem mus, ces peb txoj kev teev ntuj yog dab tsi? Ntshe peb yuav tsis muaj li.”1 Kuv cov kwv tij thiab cov muam, tom qab Thawj Zaug Ua Yog Toog, qhov uas Phau Ntawv Maumoos tawm los yog qhov tseem ceeb thib ob nyob hauv kev muab Yexus Khetos txoj moo zoo txum tim rov qab los hauv lub caij nyoog tso cai no. Phau Ntawv Maumoos ua tim khawv txog Vajtswv txoj kev hlub Nws cov me nyuam thiab txog tus Tswv Yexus Khetos txoj kev txi theej txhoj, thiab Nws txoj kev qhuab qhia rau cov Neeg Nifais tsis ntev tom qab Nws sawv rov los.2 Phau no kuj ua tim khawv tias cov tseem tshuav ntawm tsev neeg Ixayees yuav koom ua ke los ntawm Nws txoj hauj lwm hauv hnub nyoog kawg no thiab yuav tsis muab lawv ntiab tawm mus ib txhis.3
Thaum peb kawm txog qhov uas phau vaj lug kub dawb huv no tau tawm los hauv hnub nyoog kawg no, peb kawm tias txhua yam yog ib qho txuj ci tseem ceeb—tsis hais ib tug tim tswv tau muab cov phiaj kub rau tus Yaj Saub Joseph thiab tau txhais phau no los ntawm “Vajtswv lub txiaj ntsim thiab lub hwj chim,”4 tau muab tshwj cia, thiab tau muab luam tawm los ntawm tus Tswv txhais tes.
Phau Ntawv Maumoos twb pib tawm los ntev heev ua ntej Joseph Smith tau txais cov phiaj kub los ntawm tus tim tswv Maulaunais. Cov yaj saub puag thaum ub twb hais txog qhov uas phau ntawv dawb ceev no yuav los hauv peb hnub nyoog.5 Yaxayas tau hais txog ib phau ntawv uas tau muab khi cia hais tias thaum phau ntawv no tawm los cov neeg yuav sib ceg txog Vajtswv txoj lus. Nov yog lub sij hawm thaum Vajtswv yuav ua Nws “txoj hauj lwm zoo kawg nkaus thiab ib qho txuj ci xav tsis thoob,” ua rau “cov neeg … tej kev txawj ntse yuav piam sij, thiab txoj kev to taub ntawm lawv cov neeg ntse yuav raug muab zais” es cov uas txo hwj chim yuav “xyiv fab rau tus Tswv, thiab cov pluag yuav zoo siab rau Ixayees tus Dawb Huv.”6 Exekhees tau hais txog Yudas tus pas (phau Npaivnpaum) thiab Efala-is tu pas (Phau Ntawv Maumoos) yuav los koom ua ke ua ib tug pas. Exekhees (nyob hauv Phau Qub) thiab Lihais (nyob hauv Phau Ntawv Maumoos) nkawd ob leeg tau hais tias ob tug pas no yuav “los koom ua ib ke” kom tawm tsam cov lus qhuab qhia cuav, tsim kev thaj yeeb, thiab ua rau peb paub txog tej kev khi lus.7
Thaum hmo ntuj ntawm lub Cuaj Hlis Ntuj 21, 1823, peb thiab ib nrab xyoos tom qab Thawj Zaug Ua Yog Toog, tus tim tswv Maulaunais, uas yog cov Neeg Nifais tus yaj saub kawg hauv Amelikas puag thaum ub, nws tuaj xyuas Joseph peb zaug, vim Joseph tau thov Vajtswv tiag tiag. Thaum nkawd sib tham tas ib hmo, Maulaunais qhia Joseph tias Vajtswv muaj ib txoj hauj lwm zoo kawg nkaus rau nws ua—kev muab cov lus ntawm cov yaj saub puag thaum ub hauv thaj av Amelikas txhais thiab muab luam tawm rau lub ntiaj teb.8 Hnub tom qab ntawd, Joseph tau mus rau qhov chaw ntawd, nyob ze nws lub tsev, es nyob ntawd Maulaunais tau muab cov phiaj faus thaum txog lub sij hawm nws yuav tas sim neej no, ntau pua xyoo ua ntej. Nyob ntawd, Joseph tau pom Maulaunais dua, tus uas qhia nws kom npaj nws tus kheej kom txais cov phiaj kub thaum yav tom ntej.
Tau plaub xyoos, thaum lub Cuaj Hlis Ntuj hnub tim 22, Joseph tau txais tej lus qhia los ntawm Maulaunais ntxiv hais txog qhov uas yuav tsum tswj hwm tus Tswv lub nceeg vaj hauv hnub nyoog kawg no. Vajtswv cov tim tswv tuaj xyuas Joseph pab nws npaj, yog li ntawd thiaj tau muaj tej xwm txheej zoo kawg nkaus hauv lub caij nyoog tso txoj cai no.9
Nws txoj kev yuav Emma Hale ua poj niam thaum xyoo 1827 kuj tau npab nws npaj siab. Nws yog ib tug tseem ceeb uas pab tus Yaj Saub hauv nws lub neej thiab txoj kev qhuab qhia. Muaj tseeb tiag, thaum lub Cuaj Hlis Ntuj xyoo 1827, Emma nrog Joseph mus saum toj uas cov phiaj raug zais, thiab nws tos Joseph thaum tus tim tswv Maulaunais muab cov ceev xwm txheej rau Joseph. Joseph tau kev cog lus tias tus Tswv yuav muab cov phiaj tshwj cia yog nws rau siab ua txhua yam pov hwm cov phiaj mus txog thaum yuav rov muab rau Maulaunais.10
Kuv cov phooj ywg zoo uas ntseeg txoj moo zoo, ntau yam los ntawm yav thaum ub uas peb nrhiav tau yog nrhiav hauv av thaum khawb khoom hauv av tawm los los sis nrhiav tau thaum ua tsev. Tiam sis, yog ib tug tim tswv uas coj Joseph Smith rau cov phiaj. Qhov ntawd yeej yog ib qho txuj ci tseem ceeb.
Tus txheej txheem muab Phau Ntawv Maumoos txhais lus kuj yog ib qho txuj ci tseem ceeb. Phau ceev xwm txheej puag thaum ub no los tsis tau muab “txhais lus” ib yam li cov kws tshawb fawb mam li txhais cov ntawv hauv yav tas los thaum lawv kawm ib yam lus puag thaum ub. Tsim nyog uas peb xav txog tus txheej txheem no tias yog kev txais kev tshwm sim thaum siv tej cuab yeej uas tus Tswv muab los thiab tsis yog kev txhais lus los ntawm ib tug uas paub lwm yam lus. Joseph Smith hais tias los ntawm Vajtswv lub hwj chim los, “Kuv thiaj tau txhais Phau Ntawv Maumoos uas muab sau ua ib yam lus siv [cov tsiaj ntawv zoo li duab], uas tib neeg ntiaj teb tsis paub txog, es kuv tib leeg xwb thiaj paub, txawm tias kuv tseem hluas thiab tsis paub neeg ntiaj teb cov tswv yim hlo li, ces kuv txawm tau ib txoj kev tshwm sim tshiab.”11 Yus yeej paub tus Tswv tau pab muab cov phiaj kub txhais thaum yus xav txog lub sij hawm luv uas Joseph Smith tau siv kom txhais tau lus.12
Joseph cov teev ntawv tau ua tim khawv txog Vajtswv lub hwj chim uas tau tshwm sim thaum Joseph muab Phau Ntawv Maumoos txhais lus. Oliver Cowdery hais tias: “Tej hnub no yog tej uas yuav tsis hnov qab hlo li—qhov uas kuv los zaum mloog ib lub suab uas hais tej lus ntawm Vajtswv tej kev tshoov siab, ua rau tus no tsim dheev ris txiaj kawg nkaus! Tsis muaj kev cuam tshuam, hnub dhau hnub kuv tau sau tej uas nws lub qhov ncauj hais, thaum nws txhais … Phau Ntawv Maumoos.”13
Zaj keeb kwm qhia tias txij thaum Joseph txais tau cov phiaj thaum xyoo 1827, tib neeg twb sim nyiag cov phiaj. Joseph hais tias “lawv sib zog heev tuaj txeeb kom tau cov phiaj ntawm kuv mus” thiab “tej neeg siv txhua lub tom txwv uas lawv xav tawm kom ua raws li lub hom phiaj ntawd.”14 Tom qab ntawd Joseph thiab Emma raug yuam tsiv tsev los ntawm Manchester, New York mus rau Harmony, Pennsylvania, nrhiav ib qho chaw puaj phais kom rov qab txhais lus, ib qho chaw uas tsis muaj neeg phem uas xav nyiag cov phiaj.15 Raws li ib tug kws sau keeb kwm hais tias; “Yog li ntawd, thawj zaug nyuaj uas Joseph saib xyuas cov phiaj twb tiav lawm. … Tiam sis cov ceev xwm txheej twb tsis raug teeb meem, thiab vim nyuaj rau Joseph khaws cia, nws thiaj li tau kawm ntau yam txog Vajtswv tej kev thiab tib neeg tej kev uas yuav pab nws tau ntev.”16
Thaum nws txhais Phau Ntawv Maumoos, Joseph tau kawm tias tus Tswv yuav xaiv cov neeg tim khawv kom pom cov phiaj.17 Nov yog qhov uas tus Tswv tau txhim tsa thaum Nws hais tias, “los ntawm ob los yog peb tug tim khawv lub qhov ncauj thiaj yuav tsa tau txhua lo lus.”18 Oliver Cowdery, David Whitmer, thiab Martin Harris yog Joseph peb tug khub uas tau pab txhim tsa Vajtswv txoj hauj lwm zoo kawg nkaus hauv lub caij nyoog no thiab thawj peb tug tim khawv uas Vajtswv hu kom ua tim khawv tshwj xeeb txog Phau Ntawv Maumoos rau lub ntiaj teb. Lwav tau ua tim khawv tias ib tug tim tswv, uas los ntawm tus Tswv los, tau muab cov ceev xwm txheej puag thaum ub rau lawv pom thiab lawv pom cov tsiaj ntawv uas tau muab kos rau hauv cov phiaj. Lawv kuj tau hnov Vajtswv lub suab los saum ntuj los qhia tias kev txhais lus cov phiaj ntawd twb yog Vajtswv lub txiaj ntsim thiab lub hwj chim ua. Ces tus Tswv txib lawv ua tim khawv txog qhov no mus rau neeg ntiaj teb nyob thoob plaws.19
Tus Tswv kuj ua qhov txuj ci tseem ceeb hu yim tus tim khawv ntxiv pom cov phiaj kub thiab ua tim khawv tshwj xeeb rau neeg ntiaj teb txog tej xwm txheej uas muaj los thaum muab Phau Ntawv Maumoos tawm los. Lawv kuj tau ua tim khawv tias lawv pom thiab tshuaj ntsuam cov phiaj thiab cov tsiaj ntawv haud. Txawm lawv raug kev tsim txom, kev tawm tsam, txhua yam kev nyuaj, thiab ib txhia los twb tso lawv txoj kev ntseeg tseg, kaum ib tug uas Vajtswv tau xaiv kom ua tim khawv txog Phau Ntawv Maumoos yeej tsis tau thim lawv zaj lus tim khawv hais tias lawv tau pom cov phiaj. Joseph Smith yeej tsis nyob nws ib leeg paub tias Maulaunais tuaj xyuas thiab muaj cov phiaj kub tiag.
Lucy Mack Smith sau ntawv hais tias thaum nws tus tub txog tsev nws twb xyiv fab kawg vim lwm tus tim khawv tau pom cov phiaj. Joseph piav rau nws niam nws txiv, “Kuv xav tias twb tshem ib lub nra uas hnyav dhau rau kuv ris, thiab ua rau kuv zoo siab kawg, vim kuv tsis nyob kuv ib leeg hauv lub ntiaj teb no ntxiv lawm.”20
Joseph Smith tau raug tsim txom thaum nws yuav muab Phau Ntawv Maumoos txhais lus tiav thiab muab luam tawm. Nws hais rau ib tug kws luam ntawv hu ua Egbert B. Grandin hauv Palmyra, New York uas kam muab luam tsuas yog tom qab Martin Harris tau ua kev txi thiab muaj kev ntseeg loj heev muab nws liaj teb yuam nqi thiaj them tau tus nqi luam ntawv. Yog vim tib neeg tawm tsam kev luam Phau Ntawv Maumoos, Martin Harris thiaj li muab 151 acre (0.6km2) ntawm nws liaj teb muag kom them tus nqi luam ntawv. Los ntawm kev tshwm sim uas tus Tswv muab rau Joseph Smith, tus Tswv qhia Martin Harris kom nws tsis txhob khuv xim nws tej teej tug thiab cia li them tus nqi luam phau ntawv uas “muaj txoj kev tseeb thiab Vajtswv txoj lus.”21 Nyob hauv lub Peb Hlis Ntuj 1830 twb luam thawj 5,000 Phau Ntawv Maumoos tawm, thiab hnub no, muaj 180 plhom phau uas tau muab luam tawm thiab tau txhais ua ib puas tawm lus.
Tej zaj keeb kwm thiab cov tim khawv tshwj xeeb txog Phau Ntawv Maumoos yeej ua tim khawv tias qhov uas muaj Phau Ntawv Maumoos yog ib qho txuj ci tseem ceeb. Txawm li ntawd los, phau ntawv no lub hwj chim tsis yog los ntawm nws zaj keeb kwm los sis nws zaj lus uas muaj hwj chim loj kawg nkaus uas tau hloov neeg coob kawg lub siab—tsis hais kuv li log yos!
Thawj zaug kuv nyeem Phau Ntawv Maumoos tag nrho yog thaum kuv yog ib tug tub hluas uas kawm seminary. Raws li kuv cov xib hwb hais, kuv pib nyeem zaj lus piav txog Phau Ntawv Maumoos. Txoj kev cog lus hauv thawj phab ntawv ntawm Phau Ntawv Maumoos los kuv tseem nco ntsoov: “Muab zaj xov xwm nyob hauv phau ntawv no ua tib zoo xav hauv [nej] lub siab, … tom qab ntawd nug Vajtswv [nrog kev ntseeg] … los ntawm Yexus Khetos lub npe saib phau ntawv no puas tseeb tiag. Cov uas ua li no … yuav tau ib zaj lus tim khawv los ntawm tus Vaj Ntsuj Plig Dawb Huv lub hwj chim hais tias phau no muaj tseeb thiab yog los ntawm Vajtswv los.”22
Kuv tau xav txog cov lus cog tseg ntawd thiab kuv tau thov Vajtswv vim kuv xav paub puas muaj tseeb, kuv thiaj li thov Vajtswv thiab kawm Phau Ntawv Maumoos ib me ntsis ntxiv rau ib me ntsis, thaum kuv kawm txhua lub lim tiam hauv seminary. Kuv nco qab ntsoov zoo li yog nag hmo xwb txog kev sov so uas puv kuv lub siab, pab kuv to taub, thiab ua rau kuv xav tias yog ib qho zoo siab kawg, ib yam li Amas piav txog thaum nws qhia txog Vajtswv txoj lus rau nws cov neeg.23 Txoj kev xav li no twb hloov los ua kev paub tseeb uas tuaj cag hauv kuv lub siab thiab los ua lub hauv paus ntawm kuv zaj lus tim khawv txog tej zaj lus thiab tej lus qhia uas muaj hauv phau dawb ceev no.
Los ntawm tej yam uas muaj nqis heev rau kuv, Phau Ntawv Maumoos yog lub plawv zeb uas txhawb kuv txoj kev ntseeg Yexus Khetos thiab zaj lus tim khawv txog cov lus qhuab qhia hauv Nws txoj moo zoo. Phau ntawv no yog ib tug ncej txheem uas ua tim khawv rau kuv txog Khetos txoj kev txi theej txhoj. Phau ntawv no yog qhov uas pov hwm kuv thaum tus yeeb ncuab sim ua rau kuv tsis ntseeg thiab pab kuv ua siab loj hais kuv zaj lus tim khawv txog tus Cawm Seej rau lub ntiaj teb.
Kuv cov phooj ywg, qhov uas kuv paub Phau Ntawv Maumoos muaj tseeb twb los ib nqe lus ntxiv rau ib nqe lus24 zoo li yog ib qho txuj ci tseem ceeb rau kuv lub siab. Txij thaum ntawd los txog hnub no, zaj lus tim khawv ntawd twb loj tuaj thaum kuv ua ib siab nrhiav kev tsis tu tsis tseg kom to taub ntxiv txog Vajtswv txoj lus raws li muaj hauv phau vaj lug kub zoo kawg no.
Tag nrho nej cov uas hnov kuv lub suab hnub no, kuv caw nej los koom nrog qhov txuj ci tseem ceeb uas yog Phau Ntawv Maumoos txoj kev los rau hauv nej lub neej. Kuv cog lus rau nej tias thaum nej thov Vajtswv thiab kawm phau no tej lus tsis tu tsis tseg, nej yuav rov txais tau cov lus cog tseg thiab cov koob hmoov tas mus li. Kuv rov qab cog lus tib cov lus uas nyob hauv phau ntawv no tias yog “nej yuav thov Vajtswv, Leej Txiv tus uas nyob mus ib txhis, los ntawm Khetos lub npe, saib tej yam no puas muaj tseeb; thiab yog nej yuav thov nrog lub siab dawb paug, nrog txoj kev thov tiag tiag, muaj txoj kev ntseeg Khetos, nws yuav ua kom nej paub qhov tseeb ntawm tej ntawd, los ntawm lub hwj chim ntawm tus Vaj Ntsuj Plig Dawb Huv.”25 Kuv cog lus rau nej tias Nws yuav teb nej tej lus thov, ib yam li Nws tau teb kuv thiab lwm tus nyob thoob plaws lub ntiaj teb. Tej yam uas muaj los rau nej yuav dawb ceev ib yam li tej yam uas muaj los rau Joseph Smith, tsis hais cov neeg tim khawv thiab tag nrho cov uas xav tau kev ua pov thawj txog qhov uas phau dawb ceev no muaj tseeb tiag.
Kuv ua tim khawv tias Phau Ntawv Maumoos yog Vajtswv txoj lus tiag. Kuv ua tim khawv tias phau ntawv dawb ceev no “piav txog txoj moo zoo tej lus qhuab qhia, qhia txog txoj kev cawm seej, thiab qhia rau tib neeg kom paub tias lawv yuav tsum ua li cas thiaj yuav tau txais txoj kev kaj siab lug hauv lub neej no thiab tau txoj kev cawm seej nyob mus ib txhis nyob hauv lub neej yuav los yav tom ntej.”26 Kuv ua tim khawv tias Phau Ntawv Maumoos yog Vajtswv lub cuab yeej kom muab Ixayees sau los ua ke hauv peb hnub nyoog thiab pab tib neeg los paub Nws Leej Tub, Yexus Khetos. Kuv ua tim khawv tias Vajtswv muaj txoj sia nyob thiab hlub peb thiab Nws Leej Tub, Yexus Khetos, yog tus Cawm Seej ntawm lub ntiaj teb, tus thawj ncej zeb tag ntawm peb txoj kev teev ntuj. Kuv hais tej yam no los ntawm peb tus Txhiv Dim, peb tus Xib Hwb, thiab peb tus Tswv, Yexus Khetos lub npe dawb ceev, amees.