Sib Koom Tes ua Vajtswv txoj Hauj Lwm
Txoj kev zoo tshaj plaws kom ua txoj hauj lwm no yog kom sib koom siab, vim muaj lub hwj chim thiab txoj cai los ntawm lub pov thawj hwj sib koom ua peb tej hauj lwm.
Cov viv ncaus thiab cov nus, kuv zoo siab nrog nej koom ua ke. Txawm nej nyob qhov twg los xij, kuv xav khawm nej uas yog kuv cov viv ncaus thiab tuav tes ntawm kuv cov nus. Peb koom siab ua tus Tswv txoj hauj lwm no.
Thaum peb xav txog Adas thiab Evas, feem ntau peb xub xav txog nkawd lub neej zoo tag nrho hauv lub Vaj Edees. Kuv xav tias nyaj huab cua zoo kawg txhua txhua hnub—tsis kub tsis txias li—thiab muaj tej txiv hmab txiv ntoo thiab zaub qab heev uas loj hlob tuaj ze nkawd ces nkawd thiaj tau noj thaum twg los tau. Xws li nov yog ib lub ntiaj teb tshiab rau nkawd, muaj ntau yam tshiab khiv uas nkawd tsis tau pom dua, ces txhua hnub lawv saib tsiaj txhu thiab tshawb nrhiav tej yam zoo nkauj ib ncig lawv. Nkawd tseem muaj cov lus txib uas nkawd yuav tsum ua thiab nyias coj tej kev cai no nyias yam, uas ua rau nkawd muaj kev txhawb xeeb thiab kev xeeb txob.1 Tiam sis thaum nkawd txiav txim siab uas pauv nkawd lub neej tas li, nkawd tau kawm sib koom siab thiab ua raws li tej tswv yim uas Vajtswv tau teem tseg rau nkawd—thiab rau tag nrho Nws cov me nyuam.
Ces tam sim no xav txog khub niam txiv no hauv lub neej txawj ploj txawj tuag. Nkawd tau khwv noj khwv haus, ib co tsiaj txhu xav tias nkawd yog zaub mov noj lawm, thiab muaj tej kev nyuaj uas nkawd yuav tau kov yeej thaum nkawd sib ntuas thiab thov Vajtswv ua ke. Kuv xav tias muaj ob peb zaug uas nkawd tsis sib haum txog tej teeb meem no. Tiam sis, vim muaj Kev Poob, nkawd kawm tias nkawd yuav tsum sib koom siab thiab sib hlub ua txhua yam. Nkawd kawm saum ntuj los, nkawd kawm txoj kev cawm seej thiab tej ntsiab cai hauv Yexus Khetos txoj moo zoo uas pab khiav txoj hauj lwm no. Vim nkawd to taub tias nkawd lub hom phiaj hauv ntiaj teb no thiab rau lub neej nyob mus ib txhis yeej zoo ib yam, nkawd txaus siab thiab ua zoo vim muaj kev hlub thiab ua ncaj ncees ua ke.
Nkawd muaj me tub me nyuam, Adas thiab Evas qhia nkawd tsev neeg tias nkawd kawm dab tsi los ntawm cov tub txib saum ntuj ceeb tsheej. Nkawd xav pab nkawd cov me nyuam to taub thiab ua raws li tej ntsiab cai uas yuav ua rau lawv zoo siab hauv lub neej no, thiab npaj nkawd rov qab mus nrog niam txiv saum ntuj ceeb tsheej no ua ke tom qab lawv kawm ub no thiab qhia tseeb tias lawv yuav mloog Vajtswv lus. Thaum ua li no, Adas thiab Evas kawm hais tias nkawd nyias txawj ua nyias thiab ib leeg txhawb pab ib leeg ua tej hauj lwm tseem ceeb no.2
Ntau pua xyoo dhau los mus, qhov uas txiv neej thiab poj niam txawj ua thiab ib leeg vam ib leeg pib ploj mus thiab tib neeg tsis to taub zoo. Thaum lub caij pib hauv lub Vaj Edees los mus txog niaj hnub nim no, tus yeeb ncuab ua zoo kawg nkaus kom cov txiv neej thiab poj niam nyob sib nrug deb heev thaum nws sim kov yeej peb tej ntsuj plig. Luxifaws paub yog hais tias nws ua rau cov txiv neej thiab poj niam tsis sib haum, yog tias nws txawj ua rau peb tsis paub hais tias peb los qhov twg los thiab tsis ua raws li kev sib khi lus, ces nws thiaj yuav ua rau tej yim neeg puas tsuaj, vim tsev neeg yog lub hauv paus rau lub neej nyob mus ib txhis.
Dab Ntxwg Nyoog ntxias kom peb sib piv thiaj li muaj tus uas xav tias nws zoo tshaj los sis yog tus qis, kom zais tej qhov tseeb hais tias cov txiv neej thiab poj niam tej kev sib txawv yog ib yam uas Vajtswv tsim thiab pom zoo rau. Nws twb sim ua kom saib tsis tau poj niam rau nqi rau tsev neeg thiab lub xam khoo, yog li ntawd lawv thiaj tsis txawj txhawb nqa tib neeg. Nws lub hom phiaj twb yog kom lawv yuav sib cav sib ceg tsis nco qab hais tias tej yam sib txawv ntawm txiv neej thiab poj niam yog tej yam uas sib phim thiab ntxiv zog rau txoj kev sib koom siab.
Yog li ntawd, txij thaum chiv keeb los thiab thoob plaws ntiaj teb no, txoj kev to taub txog tej yam uas los saum ntuj thiab tej kev sib txawv thiab kev lav ris ntawm cov poj niam thiab txiv neej tau ploj mus. Txawm muaj ntau haiv neeg uas yuam kom cov poj niam ua qhev rau txiv neej tsis yog nyob ua ke nyob sib txig, tsuas pub lawv ua tej yam me me xwb. Thaum muaj kev tsaus ntuj li no txoj kev loj hlob ntawm sab ntsuj plig thiaj tsawg zuj zus; muaj tseeb tiag, qhov kaj nkag tsis tau hauv lawv lub siab lub ntsws vim txiv neej tsis saib lawv rau nqi pes tsawg.
Ces txawm muaj qhov kaj los ntawm txoj kev muab txoj moo zoo txum tim rov qab los “ci tshaj lub hnub ci”3 thaum Vajtswv Leej Txiv thiab Nws Leej Tub, Yexus Khetos, tshwm los rau tus tub hluas Joseph Smith pom hauv lub caij nplooj ntoo hlav xyoo 1820 hauv ib koog ntoo hauv New York. Qhov ntawd yog qhov uas pib kev tshwm sim los saum ntuj ceeb tsheej los. Thawj qhov hauv Yexus lub Koom Txoos uas muab txum tim rov qab los yog txoj cai ntawm Vajtswv lub pov thawj hwj. Thaum tseem muaj Kev Txum Tim Rov Qab Los, cov txiv neej thiab poj niam pib to taub hais tias lawv yuav tsum sib koom tes ua ib khub, Yexus muab txoj cai thiab coj qhia lawv seb yuav tsum ua txoj hauj lwm no li cas.
Hauv xyoo 1842, thaum cov poj niam hauv lub Koom Txoos me me no xav tsim ib pawg neeg los pab ua txoj hauj lwm no, Thawj Tswj Hwm Joseph Smith tau kev tshoov siab kom txhim tsa lawv “nyob hauv lub pov thawj hwj muaj tus txheej txheem hauv lub pov thawj hwj.”4 Nws hais tias, “Tam sim no kuv muab Vajtswv tus yawm sij rau nej …—nov yog qhov pib rau lub caij nyoog zoo dua.”5 Txij li muab tus yawm sij ntawd, kev kawm ntawv, kev kas moos, thiab kev khwv noj khwv haus rau poj niam thiaj li ntau zuj zus thoob ntiaj teb no.6
Lub koom haum tshiab hauv lub Koom Txoos no, tau lub npe hu ua Koom Haum Niam Tsev, tsis zoo li lwm lub koom haum thaum lub caij ntawd vim yog tus yaj saub muaj cai tsim tau siv lub pov thawj hwj lub hwj chim muab txoj cai rau cov poj niam, muab tej hauj lwm dawb ceev rau lawv, thiab tsa lawv los ua thawj coj hauv lub Koom Txoos no, tsis yog muab tej yam uas nyob sab nraud.7
Txij li tus Yaj Saub Joseph Smith lub caij rau niaj hnub nim no, txoj kev muab txhua yam tsav txum tim rov qab los tau coj qhov kaj los vim muaj txoj cai thiab lub hwj chim hauv lub pov thawj hwj uas pab tau txiv neej thiab poj niam ua lawv tej ntiag tug hauj lwm. Tsis ntev tas los peb kawm hais tias cov poj niam uas raug tsa los ntawm ib tug uas tuav lub pov thawj hwj cov yuam sij muaj cai khiav tej hauj lwm yeej muaj lub pov thawj hwj txoj cai ua lawv tes dej tes num.8
Thaum lub Kaum Hli Ntuj xyoo 2019, Thawj Tswj Hwm Russell M. Nelson qhia tias cov poj niam uas tau vaj txiaj ntsim hauv lub tuam tsev muaj lub pov thawj hwj lub hwj chim hauv lawv lub neej thiab hauv lawv tsev thaum uas lawv ua raws li tej kev khi lus dawb ceev uas lawv khi tseg nrog Vajtswv.9 Nws piav hais tias “lub ntuj ceeb tsheej twb qhib rau cov poj niam uas tau muab hwj chim pov thawj hwj rau ib yam li lub ntuj twb qhib rau cov txiv neej uas tuav lub pov thawj hwj.” Thiab nws hais kom txhua tus viv ncaus yuav “muaj cai siv tus Cawm Seej lub hwj chim kom pab nej tsev neeg thiab lwm cov neeg uas nej hlub.”10
Ces qhov ntawd txhais tau li cas rau koj thiab kuv? Txoj kev to taub lub pov thawj hwj txoj cai thiab lub hwj chim pauv tau peb lub neej li cas? Ib yam tseem ceeb yog kom peb to taub tias thaum cov poj niam thiab txiv neej sib koom tes peb ua tau ntau tshaj qhov uas peb ua yog peb nyias ua nyias yam.11 Peb tej hauj lwm thiaj yuav sib phim tsis yog sib tawm tsam. Txawm hais tias cov poj niam tsis raug tsa los rau tej luag hauj lwm pov thawj hwj, raws li twb qhia lawm, cov poj niam tau lub pov thawj hwj lub hwj chim thaum lawv ua raws li lawv tej kev khi lus, lawv muaj txoj cai ntawm lub pov thawj hwj thaum lawv raug tsa los ua ib txoj hauj lwm twg hauv lub koom txoos.
Muaj ib hnub zoo hauv lub Yim Hli Ntuj, kuv tau nrog Thawj Tswj Hwm Russell M. Nelson zaum sib tham hauv Joseph thiab Emma Smith lub tsev hauv lub zos Harmony, Pennsylvania, nyob ze ze qhov chaw uas muab lub Pov Thawj Hwj Aloos txum tim rov qab los thaum lub caij nyoog kawg no. Nyob hauv peb txoj kev sib tham no, Thawj Tswj Hwm Nelson qhia tias cov poj niam muaj hauj lwm tseem ceeb ua hauv txoj Kev Txum Tim Rov Qab Los.
Thawj Tswj Hwm Nelson: “Ib yam tseem ceeb uas kuv nco txog thaum kuv xav txog kev muab lub Pov Thawj Hwj Txum Tim Rov Qab Los yog qhov uas cov poj niam muaj hauj lwm tseem ceeb hauv txoj Kev Txum Tim Rov Qab Los.
“Thaum Joseph pib txhais Phau Ntawv Maumoos, leej twg ua tus kws sau ntawv? Nws ua me ntsis, tiam sis tsis sau ntau. Emma los pab.
“Thiab thaum kuv xav txog Joseph uas mus hauv koog ntoo ze nkawd tsev thov Vajtswv hauv Palmyra, New York. Nws mus qhov twg? Nws mus hauv Koog Ntoo Dawb Ceev. Vim li cas nws mus hauv? Vim hais tias nws niam mus rau tib qhov chaw ntawd thaum nws xav thov Vajtswv.
“Nov tsuas qhia txog ob tug poj niam uas muaj hauj lwm tseem ceeb hauv kev muab lub Pov Thawj Hwj Txum Tim Rov Qab Los thiab muab lub Koom Txoos Txum Tim Rov Qab Los. Tiag tiag mas, peb hais tau hais tias tas sim no peb tus poj niam yeej tseem ceeb ib yam li thaum ub. Lawv yeej tseem ceeb ib yam.”
Zoo li Emma thiab Lucy thiab Joseph, peb ua tau hauj lwm zoo dua thaum peb ib leeg kam kawm los ntawm ib leeg thiab sib koom siab rau ib lub hom phiaj kom rais los mus ua Yexus Khetos cov pab coj thiab pab lwm tus neeg taug tib txoj kev ntawd.
Peb kawm hais tias “lub pov thawj hwj foom koob hmoov ntau yam hauv Vajtswv cov me nyuam lub neej. … Hauv lub [Koom Txoos] tej hauj lwm, tej kab ke hauv tuam tsev, tsev neeg kev sib raug zoo, thiab txoj kev ntsiag to saib xyuas tib neeg, ib Tsoom Haiv Neeg Ntseeg hauv Hnub Nyoog Kawg cov poj niam thiab txiv neej tawm mus muaj lub pov thawj hwj lub hwj chim thiab txoj cai. Qhov uas cov poj niam thiab cov txiv neej sib pab los ua Vajtswv txoj hauj lwm los ntawm Nws lub hwj chim yog ib qho tseem ceeb heev ntawm Yexus Khetos txoj moo zoo uas muab txum tim rov qab los dhau los ntawm tus Yaj Saub Joseph Smith.”12
Kev sib koom siab yog ib yam tseem ceeb hauv txoj hauj lwm uas peb raug hu los ua, tiam sis tsis yog ib yam yus lam tau lam ua. Yuav tau siv zog thiab sij hawm los sib sab laj—ib leeg mloog ib leeg, to taub seb sawv daws xav li cas, thiab sib faib peb tej tswv yim—tiam sis thaum ua li no yuav tau kev tshwm sim rau tej kev txiav txim. Txawm yog hauv tsev los sis hauv tej kev lav ris hauv lub Koom Txoos, txoj kev zoo tshaj plaws kom ua txoj hauj lwm no yog kom sib koom siab, vim muaj lub hwj chim thiab txoj cai los ntawm lub pov thawj hwj sib koom ua peb tej hauj lwm uas nyias txawv nyias li.
Txoj kev sib koom siab yuav zoo li cas rau cov poj niam uas ua tej kev sib khi lus niaj hnub nim no? Cia kuv qhia nej ib qho piv txwv.
Alison thiab John muaj ib txoj kev ua khub uas sib txawv. Nkawd caij ib lub luv thij rau ob tug neeg caij sib tw khiav. Yog yuav ua zoo caij lub luv thij, ob tug neeg yuav tsum sib haum zoo kawg nkaus. Nkawd yuav tau tig rau tib sab thaum lub sij hawm yog. Ib tug tswj tsis tau lwm tus, tiam sis yuav tsum sib tham zoo thiab ob leeg ua ob leeg tej hauj lwm. Tus thawj coj, tus nyob pem ntej, yuav tswj kav seb yuav nres thiab sawv thaum twg. Tus uas tuam, tus uas nyob nram qab, yuav tsum ua tib zoo saib thiab ntxiv zog yog tias lawv poob qab me ntsis los sis maj mam ua yog tias lawv nyob ze lwm cov neeg caij lub luv thij. Nkawd ib leeg yuav tsum txhawb nqa ib leeg kom mus tau tom ntej thiab ncav cuag nkawd lub hom phiaj.
Alison piav hais tias: “Thaum xub pib, tus thawj coj yuav hais tias ‘Sawv’ thaum wb yuav tau sawv thiab ‘Nres’ thaum wb yuav tau txhob tuam ntxiv. Nyob nyob ces, tus neeg tuam lub luv thij yuav kawm seb tus thawj coj yuav sawv los sis nres thaum twg, thiab tsis tas yuav hais ib lo lus li. Wb kawm ua tib zoo mloog seb lwm tus ua li cas thiab paub thaum twg nws sab thiab [ces] lwm tus mam li sib zog txhawb pab tus uas sab. Yeej yog kev sib tso siab thiab sib koom tes ua hauj lwm.”13
Tsis yog John thiab Alison sib koom siab thaum nkawd tuam lub luv thij xwb, nkawd sib koom siab hauv nkawd txoj kev ua txij nkawm. Nkawd ob leeg xav kom lwm tus yuav zoo siab dua nws tus kheej; nkawd ob leeg nrhiav tej yam zoo ntawm lwm tus thiab siv zog kho tej yam tsis zoo hauv nws tus kheej. Nkawd sib pauv ua tus coj thiab ntxiv zog thaum lwm tus ntawd sab me ntsis. Nkawd ob leeg saib ib leeg rau nqi thiab tau lub teb zoo dua thaum nkawd sib ntaus tswv yim thiab sib koom tes ua hauj lwm. Nkawd raug muab sib khi ua ke hauv Yexus Khetos txoj kev hlub.
Txoj kev ua tib zoo mloog lub ntuj tej lus qhia kom sib koom siab yog ib yam tseem ceeb heev hauv lub caij nyoog no uas sawv daws pheej hais tias “kuv ua ntej” uas nyob ntawm peb ib ncig. Cov poj niam yeej muaj lawv ib co txiaj ntsim14 thiab muaj lawv tej kev lav ris, tiam sis tej ntawd tsis tseem ceeb dua—los sis tsis tseem ceeb npaum—cov txiv neej tej txiaj ntsim thiab kev lav ris. Txhua yam raug tsim thiab xav tau kom thiaj ua tau raws li Leej Txiv Saum Ntuj Ceeb Tsheej txoj hau kev rau Nws txhua tus me nyuam kom ua tau raws li tej hauj lwm uas lub ntuj ceeb tsheej teem tseg.
Niaj hnub nim no, “peb xav tau cov poj niam uas ua siab loj thiab muaj lub zeem muag li peb Niam Evas”15 kom sib koom siab coj tib neeg los cuag Khetos.16 Cov txiv neej yuav tsum ua khub rau lawv tus poj niam txhob xav hais tias lawv muaj kev lav ris xwb los sis “ua txuj” hais tias yog khub thaum cov poj niam yog cov uas khiav tej hauj lwm ntau. Cov poj niam yuav tsum kam “sawv los [thiab] pib ua [lawv] ntiag tug thiab tej hauj lwm uas tsim nyog ua”17 ua khub txhob xav tias lawv yuav tsum ua txhua yam lawv tus kheej los sis tos leej twg txib lawv ua.18
Kev pom poj niam ua ib khub tseem ceeb tsis yog ua kom nyob sib txig xwb tiam sis yog to taub txoj lus tseeb. Tsis xav tsim ib qho los pab ua li no, tiam sis cia peb pib saib poj niam rau nqi ib yam li Vajtswv saib: ua cov khub tseem ceeb hauv txoj hauj lwm cawm tib neeg thiab txais kev tsa nto.
Peb puas tau npaj? Peb tseem yuav tsum kov yeej tej qub kev cai thiab pib ua li lub ntuj coj qhia thiab xyaum ua raws li tej lus qhuab qhia? Thawj Tswj Hwm Russell M. Nelson caw peb los “sib tuav tes hauv txoj hauj lwm dawb ceev no … [kom] pab npaj neeg ntiaj teb rau tus Tswv txoj Kev Los Zaum Ob.”19 Thaum peb ua li no, peb lb leeg thiaj yuav saib ib leeg rau nqi thiab haj yam txawj ua tej hauj lwm uas lub ntuj txib peb los ua. Peb yuav muaj kev zoo siab tshaj yav tas los lawm.
Txhua tus tau xaiv los koom tus Tswv txoj kev los pab khiav Nws tej hauj lwm rau yav tom ntej. Los ntawm peb tus Cawm Seej, Yexus Khetos, lub npe amees.