Txoj Hau Kev Zoo Kawg Nkaus
Peb cov uas paub txog Vajtswv txoj hau kev thiab cov uas tau khi lus kom ua Vajtswv txoj hauj lwm los peb muaj kev lav ris qhia tej lus tseeb no.
Txawm peb raug tej kev sim siab thiab tej teeb meem li no los, Vajtswv yeej foom koob hmoov rau peb ntau nplua mias! Peb tau txais tej nuj nqis thiab kev xyiv fab los ntawm kev muab Yexus Khetos txoj moo zoo Txum Tim Rov Qab Los nyob hauv lub tuam rooj sab laj no. Peb zoo siab kawg vim Joseph ua yog toog pom Leej Txiv thiab Leej Tub uas tau qhib lub Caij Nyoog Txum Tim Rov Qab Los no. Muaj neeg ua rau peb nco txog qhov txuj ci tseem ceeb uas yog Phau Ntawv Maumoos, phau no lub hom phiaj yog kom ua tim khawv txog Yexus Khetos thiab Nws cov lus qhuab qhia. Peb txais kev txhawb nqa vim peb tau txais kev tshwm sim, uas los rau cov yaj saub thiab los rau peb tus kheej. Peb twb hnov tej zaj lus tim khawv txog Yexus Khetos txoj Kev Theej Txhoj uas nyob mus ib txhis thiab Nws txoj kev sawv rov los. Thiab peb tau kawm txog lwm yam tseeb ntawm txoj moo zoo uas tus Tswv tau muab tshwm sim rau Joseph Smith tom qab Vajtswv Leej Txiv tau hais rau tus yaj saub tshiab no: “Tus no yog kuv Leej Tub uas kuv hlub. Cia li mloog Nws hais!” (Joseph Smith—Keeb Kwm 1:17).
Qhov uas peb paub tias tus Tswv tau muab lub pov thawj hwj thiab cov yawm sij txum tim rov qab los tau txhawb nqa peb. Peb rau siab xav hu tus Tswv lub Koom Txoos raws li lub npe yog lawm, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Thiab tus yaj saub tau caw peb yoo mov thiab thov Vajtswv kom thiaj tsis raug xwm txheej los ntawm tus kab mob uas kis thoob plaws tam sim no thiab thaum yav tom ntej. Tag kis no peb tau txais kev tshoov siab vim tus Tswv tus yaj saub tau hais ib zaj lus tshaj tawm txog lub Caij Nyoog Txum Tim Rov Qab Los. Peb tshaj tawm tias cov lus no muaj tseeb hais tias “cov uas thov Vajtswv thaum lawv kawm txog zaj lus ntawm lub Caij Nyoog Txum Tim Rov Qab Los thiab muab siab rau ntseeg yuav tau koob hmoov kom txais tau kev ua tim khawv tias zaj no yog los saum ntuj los thiab muaj lub hom phiaj uas yog npaj lub ntiaj teb rau peb tus Tswv thiab tus Cawm Seej, Yexus Khetos, txoj Kev Los Zaum Ob.”1
Txoj Hau Kev
Tag nrho tej no yog ib feem ntawm Vajtswv txoj hau kev; Nws lub hom phiaj yog kom pab Vajtswv cov me nyuam txais kev tsa nto thiab hloov los ua neeg zoo li Nws. Nyob hauv vaj lug kub txoj hau kev no yog “txoj hau kev zoo siab uas tseem ceeb,” “txoj hau kev txhiv dim,” thiab “txoj hau kev cawm seej” (Amas 42:8, 11, 5), es txoj hau kev ntawd—uas tau muab tshwm sim hauv lub Caij Nyoog Txum Tim Rov Qab Los—twb pib thaum muaj kev sib saj laj saum ntuj. Thaum peb yog cov ntsuj plig xwb, peb xav muaj txoj sia nyob mus ib txhis zoo li peb leej niam leej txiv saum ntuj muaj. Thaum ntawd peb twb loj hlob tuaj npaum li peb ua tau vim peb tsis tau muaj ib lub cev nqaij daim tawv. Xwv kom muaj li ntawd, Vajtswv Leej Txiv tau npaj tsim lub ntiaj teb no. Nyob hauv lub neej hauv ntiaj teb no, peb yuav ua txhaum thaum peb raug kev tawm tsam kom peb sab ntsuj plig loj hlob tuaj. Peb kuj yuav raug kev tuag ntawm sab cev nqaij daim tawv. Xwv kom pab peb dim kev tuag thiab kev txhaum, peb Leej Txiv Saum Ntuj Ceeb Tsheej txoj hau kev muab ib tug Cawm Seej rau peb. Nws txoj Kev Sawv Rov Los yuav txhiv txhua tus dim kev tuag, thiab Nws txoj kev txi theej txhoj yuav them tus nqi uas yuav tsum them kom ntxuav txhua tus huv ntawm kev txhaum kom pab peb loj hlob tuaj. Yexus Khetos txoj Kev Theej Txhoj yeej yog qhov tseem ceeb tshaj plaws hauv Vajtswv txoj hau kev.
Nyob hauv Pawg Sab Laj Saum Ntuj, tag nrho Vajtswv cov me nyuam ntsuj plig tau kawm txog Leej Txiv txoj hau kev, tsis hais tej xwm txheej thiab kev sim siab hauv ntiaj teb, tej yam uas pab los saum ntuj los, thiab yuav muaj li cas thaum kawg. Peb tau pom txhua yam qhov chiv keeb mus txog qhov kawg. Tag nrho cov neeg uas yug los hauv lub ntiaj teb no twb xaiv ua raws li Vajtswv txoj hau kev thiab tau tuaj Leej Txiv tog thaum muaj kev tsov rog saum ntuj. Feem coob twb ua kev khi lus nrog Leej Txiv txog tej yam uas peb yuav ua hauv lub neej no. Peb tsis paub ua li cas, tiam sis tej yam peb ua hauv lub ntuj ntsuj plig twb tau hloov tej xwm txheej uas peb raug hauv lub neej no.
Lub Neej No thiab lub Ntuj Ntsuj Plig
Tam sim no kuv yuav hais ntsiab lus txog tej yam tseem ceeb hauv Vajtswv txoj hau kev vim tej no yuav hloov peb lub neej hauv lub ntiaj teb no thiab hauv lub ntsuj ntsuj plig tom qab ntawd.
Lub hom phiaj ntawm lub neej no thiab kev loj hlob tuaj hauv lub neej tom qab yog kom Vajtswv cov me nyuam hloov los ua neeg zoo li Nws. Nov yog qhov uas Leej Txiv Saum Ntuj Ceeb Tsheej xav kom Nws txhua tus me nyuam ua. Xwv kom muaj kev xyiv fab no, tej kev cai uas nyob mus ib txhis qhia tias peb yuav tsum hloov los ua neeg huv los ntawm Yexus Khetos txoj Kev Theej Txhoj peb thiaj yuav nyob tau hauv Leej Txiv thiab Leej Tub lub xub ntiag thiab txais tau cov koob hmoov ntawm kev tsa nto. Ib yam li Phau Ntawv Maumoos qhia, Nws caw “txhua tus kom los cuag nws thiab los txais yuav nws txoj kev tshav ntuj; thiab nws tsis txwv leej twg ntawm cov uas los cuag nws, tsis hais cov neeg dub los sis cov neeg dawb, cov neeg ua qhev los sis cov neeg ywj pheej, tsis hais poj niam los sis txiv neej; thiab nws nco ntsoov txog cov neeg tsis hwm Vajtswv; thiab txhua tus yeej zoo tib yam rau Vajtswv” (2 Nifais 26:33; kuj saib Amas 5:49).
Vajtswv txoj hau kev kom peb hloov los ua neeg zoo li Nws qhia tias peb yuav tsum xaiv kom xyeej kev phem uas ntxias tib neeg tsis ua raws li Vajtswv cov lus txib thiab Nws txoj hau kev. Txoj hau kev no kuj qhia tias peb yuav raug kev tawm tsam hauv lub ntiaj teb no, xws li los ntawm lwm tus tej kev txhaum los sis los ntawm tej yam uas muaj thaum peb yug los. Tej lub sij hawm thaum peb raug txom nyem thiab tej teeb meem peb kawm tau zoo dua li thaum peb nyob txaus siab thiab muaj kev zoo siab. Thiab tej kev sim siab hauv lub ntiaj teb no yuav tsis pab kom muaj raws li Vajtswv tej lub hom phiaj yog tias Nws pab peb dim tag nrho tej yam uas peb raug hauv lub neej no.
Txoj hau kev no qhia tias peb yuav txais txoj sia nyob mus ib txhis, vim li cas peb nyob hauv lub neej no thiab lub neej no yuav zoo li cas, thiab tej yam uas Vajtswv yuav pub kom pab peb. Vajtswv tej lus txib ceeb toom peb kom txhob ua tej yam uas yuav ua rau peb raug xwm txheej ceev. Cov thawj coj tej lus qhia coj peb txoj hau kev thiab pab txhawb nqa peb txoj kev mus kom tau txoj sia nyob mus ib txhis.
Vajtswv txoj hau kev qhia plaub yam rau peb kom pab peb hauv lub neej no. Txhua yam no yog los ntawm Yexus Khetos txoj Kev Theej Txhoj, uas yog qhov tseem ceeb tshaj plaws hauv txoj hau kev no. Yam thib ib qhia peb tias los ntawm Nws txoj kev raug txom nyem rau tej kev txhaum uas peb hloov siab lees txim txog, tus Tswv ntxuav peb kom huv thiaj tsis muaj tej kev txhaum ntawd. Ces tus txiav txim uas muaj siab hlub tshua yuav “tsis nco qab txog tej ntawd ntxiv” (Lus Qhuab Qhia thiab Kev Khi Lus 58:42).
Yam thib ob ntawm peb tus Cawm Seej txoj Kev Theej Txhoj, Nws ris txhua yam kev mob kev nkeeg uas muaj hauv lub ntiaj teb no. Nws ua li no peb thiaj li thov tau Nws kom Nws muab dag zog rau peb ris tej lub nra ntawm lub neej no, uas peb ris peb tus kheej thiab tej xwm txheej xws li kev tsov rog thiab tej kab mob uas kis thoob plaws. Phau Ntawv Maumoos muab tej lus piav meej tshaj txog lub hwj chim ntawm txoj Kev Theej Txhoj no. Tus Cawm Seej ris Nws “cov neeg tej kev mob thiab tej kev nkeeg. … Nws yuav ris lawv tej kev qaug dag qaug zog, xwv kom nws lub siab thiaj li yuav muaj kev hlub tshua puv nkaus, ntawm sab cev nqaij daim tawv, xwv kom nws yuav paub pab nws cov neeg ntawm sab cev nqaij daim tawv raws li lawv tej kev qaug dag qaug zog” (Amas 7:11–12).
Yam thib peb, tus Cawm Seej, los ntawm Nws txoj Kev Theej Txhoj uas mus ib txhis, kov yeej kev tuag, thiab ua rau peb muaj kev zoo siab vim peb txhua tus yuav sawv rov los. Phau Ntawv Maumoos qhia tias, “Txoj kev txum tim rov qab los no yuav los rau txhua tus, tag nrho cov laus thiab cov hluas, tag nrho cov ua qhev thiab cov ywj pheej, tag nrho poj niam thiab txiv neej, tag nrho cov neeg phem thiab cov neeg ncaj ncees; thiab ib txoj plaub hau saum lawv lub taub hau los twb yuav tsis ploj; tiam sis Vajtswv yuav txum tim txhua yam rov qab los ua lub cev uas zoo tag nrho” (Amas 11:44).
Hauv lub caij Easter no peb ua koob tsheej txog Kev Sawv Rov Los. Qhov no ua rau peb thiab cov uas peb hlub pom meej thiab muaj dag zog txaus nyiaj mus kom dhau tej teeb meem hauv lub ntiaj teb no, xws li tej teeb meem ntawm sab cev nqaij daim tawv, los sis hauv lub siab ntsws uas peb raug thaum peb yug los los sis muaj hauv lub neej hauv ntiaj teb no. Vim tus Tswv tau Sawv Rov Los, peb paub tias tej teeb meem ntawm lub neej no yuav tsis kav mus ib txhis!
Txoj moo zoo qhia peb tias thaum peb sawv rov los ces yuav muaj cib fim nrog peb tsev neeg—tus txiv tsev, tus niam tsev, thiab cov me nyuam. Nov yog ib qho uas txhawb nqa peb txoj kev xav ua raws li tej yam peb yuav tsum ua kom pab peb tsev neeg hauv lub neej no. Qhov no pab peb muaj kev sib hlub hauv lub neej no thaum peb tos kev xyiv fab thaum peb rov qab koom ua ke hauv lub neej tom ntej.
Yam thib plaub, kev tshwm sim hauv lub caij nyoog no qhia peb tias peb txoj kev vam meej yuav tsis tag thaum peb tas sim neej no. Tsis tau muab ntau yam tshwm sim txog qhov seem ceeb no. Peb kawm tias lub neej no yog lub sij hawm npaj mus ntsib Vajtswv thiab peb yuav tsum tsis txhob laug peb lub sij hawm hloov siab lees txim (saib Amas 34:32–33). Tiam sis peb kawm tias nyob hauv lub ntuj ntsuj plig peb yuav qhia txoj moo zoo “cov neeg phem thiab cov tsis mloog lus uas tau xyeej txoj kev tseeb” (Lus Qhuab Qhia thiab Kev Khi Lus 138:29) thiab cov uas peb qhia nyob ntawd txawj hloov siab lees txim ua ntej Kev Txiav Txim Zaum Kawg (saib nqe 31–34, 57–59).
Kuv yuav hais txog lwm yam tseem ceeb hauv peb Leej Txiv Saum Ntuj Ceeb Tsheej txoj hau kev:
Yexus Khetos txoj moo zoo ua rau peb xav tias kev coj dawb huv, kev sib yuav, thiab kev muaj tub muaj ki yog tej yam tseem ceeb. Nws txoj moo zoo qhia tias kev sib yuav yog ib yam uas peb ua kom muaj raws li Vajtswv txoj hau kev, kom npaj chaw rau me nyuam yug los rau hauv lub ntiaj teb, thiab npaj tsev neeg txais tau txoj sia nyob mus ib txhis. Tus Tswv hais tias, “Kev sib yuav yog Vajtswv tsa los rau neeg, … xwv kom yuav muaj raws li lub hom phiaj ntawm txoj kev tsim lub ntiaj teb” (Lus Qhuab Qhia thiab Kev Khi Lus 49:15). Muaj tseeb tiag, nyob hauv Nws txoj hau kev, qhov no yeej tsis yog raws li neeg ntiaj teb tej kev xav txog kab lig kev cai.
Lub hwj chim tsim txoj sia yog lub hwj chim tseem ceeb tshaj plaws uas Vajtswv tau muab rau nws cov me nyuam. Vajtswv thawj txoj lus txib rau Adas thiab Evas yog hais txog peb txoj kev siv lub hwj chim no, tiam sis nws kuj tsa ib txoj kev cai kom txhob siv tsis yog. Yog tsis tau sib yuav, txhua yam kev siv lub hwj chim muaj tub muaj ki yog kev txhaum thiab kev muab ib yam uas los saum ntuj los hloov ua ib yam tsis zoo. Txoj moo zoo qhia tias txoj kev cai coj dawb huv tseem ceeb heev vim lub hom phiaj ntawm peb lub hwj chim muaj tub muaj ki yog kom peb ua raws li Vajtswv txoj hau kev.
Yuav Muaj Li Cas Yav Tom Ntej?
Xyoo no thaum peb nco txog 200 xyoo tas los thaum Thawj Zaug Ua Yog Toog tau qhib lub Caij Nyoog Txum Tim Rov Qab Los, peb paub tus Tswv txoj hau kev thiab peb txais kev txhawb nqa vim peb tau koob hmoov los ntawm Nws lub Koom txoos tau ob puas xyoo lawm. Nyob hauv xyoo 2020 no, zoo li txhua tus hais peb txawj saib yav tas los li peb pom kev 20/20.
Tiam sis thaum peb saib rau yav tom ntej, peb pom kev tsis meej. Peb paub tias ob puas xyoo tom qab pib muab txoj moo zoo Txum Tim Rov Qab Los, lub ntuj ntsuj plig muaj cov neeg ua hauj lwm ntau kom qhia cov neeg nyob ntawd. Peb kuj paub tias peb muaj ntau lub tuam tsev ntxiv kom ua cov kab ke mus ib txhis rau cov uas hloov siab lees txim thiab lees yuav tus Tswv txoj moo zoo nyob ob sab ntawm daim ntaub thaiv. Txhua yam no yeej pab txhawb nqa Leej Txiv Saum Ntuj Ceeb Tsheej txoj hau kev. Vajtswv txoj kev hlub loj kawg nkaus, yog li ntawd tshuav cov neeg tsawg tsawg uas hloov los ua cov tub poob yeeb koob xwb, Nws tau npaj ib theem yeeb koob rau Nws cov me nyuam tag nrho (saib Lus Qhuab Qhia thiab Kev Khi Lus 76:43).
Peb paub tias tus Cawm Seej yuav rov qab los thiab yuav muaj kev thaj yeeb tau ib txhiab xyoo kom muaj raws li Vajtswv txoj hau kev rau lub ntiaj teb tiav lawm. Peb kuj paub tias yuav muaj tej lub caij sawv rov los uas sib txawv, rau cov ncaj thiab cov tsis ncaj, thiab txhua tus uas sawv rov los yuav raug txiav txim zaum kawg tom qab ntawd.
Peb paub tias Vajtswv yuav txiv txim rau peb raws li tej yam peb ua, tej yam uas peb xav hauv peb lub siab, thiab peb yog neeg zoo li cas. Kev txiav txim no yuav ua rau Vajtswv cov me nyuam tag nrho mus rau hauv ib lub nceeg vaj uas muaj yeeb koob raws li lawv tsim nyog mus rau haud thiab ua rau lawv txaus siab. Tus uas yuav txiv txim txhua tus yog peb tus Cawm Seej, Yexus Khetos (saib Yauhas 5:22; 2 Nifais 9:41). Vim Nws paub txhua yam Nws paub zoo txog tag nrho tej yam peb tau ua thiab tej yam peb xav, tsis hais tej uas peb tsis tau hloov thiab tej uas peb twb hloov siab lees txim thiab ua ncaj ncees. Yog li ntawd, tom qab Nws txiav txim peb txhua tus yuav lees hais tias “nws tej kev txiav txim yeej ncaj ncees” (Mauxiyas 16:1).
Thaum kuv xaus lus, kuv xav qhia nej txog qhov uas kuv tau kawm los ntawm cov neeg coob uas xa tsab ntawv tuaj thiab thov rov los rau lub Koom Txoos tom qab rho npe los sis tso txoj kev ntseeg tseg. Peb cov mej zeej coob tsis to taub txoj hau kev cawm seej no, uas teb ntau yam txog cov lus qhuab qhia thiab tej kev cai ntawm lub Koom Txoos no. Peb cov uas paub txog Vajtswv txoj hau kev thiab tau khi lus tias peb yuav pab ua nws txoj hauj lwm no muaj kev lav ris qhia tej yam tseeb no thiab ua txhua yam peb ua tau kom pab lwm tus thiab peb tus kheej ua li no hauv lub neej no. Kuv ua tim khawv txog Yexus Khetos, peb tus Cawm Seej thiab tus Txhiv Dim, uas ua rau peb ua tau li no, los ntawm Yexus Khetos lub npe, amees.