Lub Pov Thawj Hwj Mekhixedes thiab cov Yawm Sij
Nyob hauv lub Koom Txoos ib tug siv txoj cai pov thawj hwj raws li ib tug thawj coj uas tuav cov yawm sij ntawm lub pov thawj hwj ntawd coj nws ua.
Kuv yuav hais lus ntxiv txog Vajtswv lub pov thawj hwj, peb tug hais lus ua ntej kuv tau qhia peb txog qhov uas lub pov thawj hwj ua li cas foom koob hmoov rau cov poj niam, cov ntxhais hluas, thiab cov tub hluas.
Lub pov thawj hwj yog Vajtswv lub hwj chim thiab txoj cai uas Vajtswv tso siab pub rau peb kom ua tau Nws txoj hauj lwm foom koob hmoov rau tag nrho Nws cov me nyuam. Pov thawj hwj tsis yog cov uas raug tsa rau ib lub luag hauj lwm pov thawj hwj los sis cov uas siv txoj cai pov thawj hwj. Cov txiv neej uas tuav lub pov thawj hwj tsis yog lub pov thawj hwj. Peb yuav tsum tsis txhob hais tias cov txiv neej uas tau muab tsa yog lub pov thawj hwj, tiam sis tsim nyog uas peb hais tias lawv tuav lub pov thawj hwj.
Muaj lub hwj chim pov thawj hwj nyob hauv lub Koom Txoos thiab hauv ib tsev neeg. Tiam sis lub hwj chim pov thawj hwj thiab txoj cai pov thawj hwj hauv lub Koom Txoos thiab hauv ib tsev neeg los ua tej yam sib txawv. Tag nrho tej no yog raws li tej ntsiab cai tus tus Tswv tau tsa. Lub hom phiaj ntawm Vajtswv txoj hau kev yog kom coj Nws cov me nyuam mus rau txoj sia nyob mus ib txhis. Tsev neeg hauv lub ntiaj teb no yeej tseem ceeb rau txoj hau kev ntawd. Muaj lub Koom Txoos no kom muab lus qhuab qhia, txoj cai, thiab cov kab ke uas yuav tsum muaj kom thiaj li muaj tej tsev neeg kev txheeb ze mus ib txhis li. Yog li ntawd, ib tsev neeg thiab Yexus Khetos lub Koom Txoos ob pawg no ib pawg los pab txhawb nqa ib pawg. Cov koob hmoov los ntawm lub pov thawj hwj—xws li txoj moo zoo, thiab cov kab ke xws li kev cai raus dej, kev pom zoo, thiab kev txais lub txiaj ntsim Vaj Ntsuj Plig Dawb Huv, lub vaj txiaj ntsim, thiab kev sib yuav mus ib txhis—los pub tau rau txiv neej thiab poj niam ib yam.1
Lub pov thawj hwj uas peb yuav hais txog yog lub Pov Thawj Hwj Mekhixedes, uas tus Tswv tau muab los thaum pib muab txoj moo zoo txum tim rov qab los. Petus, Yakaunpaus, thiab Yauhas, uas “tshaj hais tias lawv tuav cov yawm sij ntawm lub nceeg vaj, thiab ntawm lub caij nyoog tso txoj cai uas muaj txhij txhua” tau tsa Joseph Smith thiab Oliver Cowdery (Lus Qhuab Qhia thiab Kev Khi Lus 128:20). Cov Tim Thawj puag thaum ub no twb tau txais txoj cai no los ntawm tus Cawm Seej. Tag nrho lwm cov thawj coj los sis tej luag hauj lwm hauv lub pov thawj hwj yog txuas rau lub Pov Thawj Hwj Mekhixedes (saib Lus Qhuab Qhia thiab Kev Khi Lus 107:5), vim lub pov thawj hwj no “tuav txoj cai ntawm pawg thawj tswj hwm, thiab muaj hwj chim thiab txoj cai kav tag nrho tej hauj lwm nyob hauv lub koom txoos nyob rau txhua tiam neeg ntawm lub ntiaj teb” (Lus Qhuab Qhia thiab Kev Khi Lus 107:8).
Nyob hauv lub Koom Txoos txoj cai ntawm lub pov thawj hwj hlob, lub Pov Thawj Hwj Mekhixedes thiab lub pov thawj hwj yau los sis lub Pov Thawj Hwj Aloos los neeg siv raws li ib tug thawj coj qhia, xws li ib tug npisov los sis tus thawj tswj hwm, uas tuav cov yawm sij ntawm lub pov thawj hwj ntawd. Yog peb yuav to taub kev siv txoj cai pov thawj hwj hauv lub Koom Txoos no, peb yuav tsum to taub lub ntsiab cai ntawm cov yawm sij pov thawj hwj.
Petus, Yakaunpaus, thiab Yauhas tau muab cov yawm sij Pov Thawj Hwj Mekhixedes ntawm lub nceeg vaj rau lub Koom Txoos, tiam sis tsis yog tag nrho cov yawm sij pov thawj hwj. Muaj cov yawm sij pov thawj hwj uas tau los tom qab ntawd. Tom qab tau muab lub tuam tsev fij tseg hauv lub caij nyoog tso txoj cai no hauv Kirtland, Ohio, muaj peb tug yaj saub—Mauxes, Eli-as, thiab Eliyas—uas muab “cov yawm sij ntawm lub caij nyoog tso txoj cai no” txum tim rov qab los, tsis hais cov yawm sij ntawm kev muab Ixayees sau los ua ke thiab kev ua hauj lwm hauv tus Tswv lub Tuam Tsev. (saib Lus Qhuab Qhia thiab Kev Khi Lus 110), ib yam li Thawj Tswj Hwm Eyring tau nyuam qhuav hais txog.
Qhov uas txhua tus paub txog kev siv cov yawm sij yog kev ua cov kab ke pov thawj hwj. Ib txoj kab ke yog ib qho dawb huv uas yog ib lub cim txog kev ua khi lus thiab kev cog lus yuav tau koob hmoov. Nyob hauv lub Koom Txoos peb ua txhua txoj kab ke raws li tus thawj coj pov thawj hwj uas tuav cov yawm sij rau txoj kab ke ntawd tso cai ua xwb.
Feem ntau ib tug uas tau txais ib lub luag hauj lwm hauv lub pov thawj hwj yuav ua ib txoj kab ke raws li tus uas tuav cov yawm sij pov thawj hwj qhia. Piv txwv hais tias, cov uas tuav tej luag hauj lwm hauv lub Pov Thawj Hwj Aloos tswj hwm txoj kab ke muab lub cim nco txog raws li tus npisov txoj kev qhia thiab cov yawm sij, vim nws tuav cov yawm sij ntawm lub Pov Thawj Hwj Aloos. Muaj raws li lub ntsiab cai no thaum hais txog cov kab ke pov thawj hwj uas cov poj niam tswj hwm hauv lub tuam tsev. Txawm yog cov poj niam tsis tuav ib lub luag hauj lwm hauv lub pov thawj hwj, lawv ua cov kab ke hauv lub tuam tsev raws li lub tuam tsev tus thawj tswj hwm tso cai, vim nws tuav cov yawm sij ua kab ke hauv lub tuam tsev.
Ib qho piv txwv ntxiv txog kev siv txoj cai pov thawj hwj raws li tus uas tuav cov yawm sij qhia yog qhov uas cov poj niam thiab txiv neej mus qhia txoj moo zoo, nyob hauv lawv pawg ntseeg los sis qhov chaw tshaj tawm txoj moo zoo. Tsis tas li ntawd muaj cov uas yog thawj coj hauv lawv pawg ntseeg thiab lawv siv txoj cai pov thawj hwj vim tus thawj coj pov thawj hwj uas tuav cov yawm sij hauv lawv pawg ntseeg los sis ceg txheem ntseeg tau hu thiab tsa lawv. Peb siv txoj cai thiab lub hwj chim pov thawj hwj li no nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.2
Tej tsev neeg uas yog Tsoom Haiv Neeg Ntseeg hauv Hnub Nyoog Kawg kuj siv txoj cai pov thawj hwj thiab tau koob hmoov los ntawm lub pov thawj hwj ntawd. Thaum kuv hais tsev neeg kuv hais tias yog ib tug txiv neej uas tuav lub pov thawj hwj thiab ib tug poj niam uas nkawd tau sib yuav thiab nkawd cov me nyuam. Kuv kuj hais txog tsev neeg uas tau hloov vim muaj ib tug tas sim neej lawm los sis tau sib nrauj.
Lub ntsiab cai uas qhia tias yus siv tau txoj cai pov thawj hwj raws li tus uas tuav cov yawm sij ua tej hauj lwm ntawd coj xwb yeej yog ib qho tseem ceeb nyob hauv lub Koom Txoos tiam sis tsis yog li ntawd thaum hais txog yus tsev neeg. Piv txwv hais tias, ib leej txiv uas tuav lub pov thawj hwj tswj hwm nws tsev neeg los ntawm txoj cai ntawm nws lub pov thawj hwj. Nws tsis tas muaj leej twg uas tuav cov yawm sij pov thawj hwj coj kev los yog pom zoo kom nws ua tau tej yam hauv nws tsev neeg. Tej yam ntawd los muaj xws li kev ntuas nws tsev neeg, muaj tsev neeg kev sib ntsib, siv lub pov thawj hwj foom koob hmoov rau nws tus poj niam thiab me nyuam, los sis foom koob hmoov kho mob rau nws tsev neeg los sis lwm tus.3 Cov thawj coj hauv lub Koom Txoos qhia yus tsev neeg tiam sis tsis siv txoj cai pov thawj hwj hauv yus tsev neeg.
Muaj raws li lub ntsiab cai no thaum ib tug txiv tsev tsis nyob thiab tus niam tsev yog ib tsev neeg tus thawj coj. Nws tswj hwm hauv nws lub tsev thiab yog tus uas ua rau nws tsev neeg tau lub hwj chim thiab cov koob hmoov ntawm lub pov thawj hwj vim nws tau txais vaj txiaj ntsim thiab ua kev cai khi hauv lub tuam tsev. Txawm yog nws tsis tau kev tso cai foom koob hmoov pov thawj hwj uas tsuas pub ib tug uas tuav ib lub luag hauj lwm pov thawj hwj ua xwb, nws yeej ua tau txhua yam ntxiv ua ib tug thawj coj hauv nws tsev neeg. Thaum nws ua li ntawd, nws siv lub hwj chim pov thawj hwj kom pab cov me nyuam uas nws tswj hwm vim nws yog tus thawj coj hauv nws tsev neeg.4
Yog cov txiv tsev yuav rau siab siv lub pov thawj hwj nyob hauv lawv tsev neeg, ces yuav pab lub Koom Txoos ntiag tug hauj lwm tshaj lwm yam lawv ua tau. Cov txiv tsev uas tuav lub Pov Thawj Hwj Mekhixedes yuav tsum siv lawv txoj cai “los ntawm kev yaum, los ntawm kev ua siab ntev, los ntawm kev siab mos thiab siab muag, thiab los ntawm kev hlub tiag tiag xwb” (Lus Qhuab Qhia thiab Kev Khi Lus 121:41). Lub ntsiab cai uas hais txog kev siv txoj cai pov thawj hwj no yeej tseem ceeb tshaj plaws nyob hauv tsev neeg. Cov uas tuav lub pov thawj hwj yuav tsum ua raws li cov lus txib xwv kom lawv thiaj li muaj hwj chim ntawm lub pov thawj hwj kom foom koob hmoov rau lawv tsev neeg. Lawv yuav tsum pab kom lawv tsev neeg sib hlub, lawv tsev neeg thiaj yuav xav thov lawv foom koob hmoov pub rau lawv. Thiab cov niam tsev txiv tsev yuav tsum yaum kom lawv tsev neeg xav tau koob hmoov pov thawj hwj ntxiv.5
Nyob hauv lub rooj sab laj no, thaum peb nrhiav kev pov hwm kom txhob txhawj txog phaum mob txoj kev kis thoob plaws no, peb twb tau kawm txog tej ntsiab cai ntawm kev nyob mus ib txhis. Kuv yaum peb txhua tus “ntsia ntsoov” rau kev txais tej yam tseeb mus ib txhis no peb lub cev thiaj yuav “muaj txoj kev kaj puv npo” (3 Nifais 13:22).
Nyob hauv nws zaj lus qhia uas sau txog hauv phau Npaivnpaum thiab hauv Phau Ntawv Maumoos, tus Cawm Seej qhia tias tib neeg lub cev yuav muaj txoj kev kaj puv nkaus los sis muaj kev tsaus nti puv nkaus. Peb yeej xav muaj txoj kev kaj puv nkaus, thiab tus Cawm Seej tau qhia tias peb yuav ua li cas thiaj muaj li no. Peb yuav tsum mloog tej zaj lus uas qhia txog tej yam tseeb uas nyob mus ib txhis. Nws tau hais txog lub qhov muag, qhov uas peb siv kom txais txoj kev kaj rau hauv peb lub cev. Yog tias peb lub qhov muag “ntsia ntsoov”—los yog hais tias, yog peb tsom ntsoov rau txoj kev txais kev kaj mus ib txhis thiab xav to taub—Nws piav tias, “tag nrho nej lub cev yuav muaj txoj kaj puv npo” (Mathais 6:22; 3 Nifais 13:22). Tiam sis yog peb “qhov muag phem”—los yog hais tias peb nrhiav kev phem thiab txais tej ntawd hauv peb lub cev—Nws ceeb toom tias “nej lub cev yuav muaj kev tsaus ntuj puv npo” (nqe 23). Los yog hais tias, txoj kev kaj los sis txoj kev tsaus nti hauv peb lub cev nyob ntawm seb peb ntsia—los yog peb txais—tej yam tseeb uas nyob mus ib txhis li cas.
Peb yuav tsum ua raws li tus Cawm Seej qhia peb kom nrhiav thiab nug Vajtswv kom to taub tej yam tseeb uas nyob mus ib txhis. Nws cog lus tias peb Leej Txiv Saum Ntuj Ceeb Tsheej txaus siab qhia txhua tus txog tej yam tseeb uas lawv nrhiav (saib 3 Nifais 14:8). Yog peb xav tau qhov no thiab peb ntsia ntsoov rau qhov no, tus Cawm Seej cog lus tias Nws “yuav qhib” tej yam tseeb uas nyob mub ib txhis rau peb (saib 3 Nifais 14:7–8).
Tiam sis, Dab Ntxwg Nyoog xav ua rau peb tsis paub xav los yog coj peb mus ua yuam kev txog tej xwm tseem ceeb xws li kev siv Vajtswv lub pov thawj hwj. Tus Cawm Seej ceeb toom txog “cov yaj saub cuav, uas los rau ntawm nej uas ntsia rau sab nraud zoo li yog yaj, tiam sis nyob rau sab hauv lawv yog cov hma tshaib plab” (3 Nifais 14:15). Nws tau muab qhov no rau peb kom pab peb xaiv qhov tseeb los ntawm tej lus qhia ntau uas yuav ua rau peb tsis paub meej: “Nej yuav paub lawv los ntawm lawv cov txiv ntoo” (3 Nifais 14:16). “Tsob ntoo zoo yeej txi tsis tau cov txiv phem, thiab tsob ntoo liam yeej txi tsis tau cov txiv zoo” (nqe 18). Yog li ntawd, peb yuav tsum seb muaj li cas tom qab muaj—“cov txiv ntoo”—los yog tom qab neeg ua raws li tej ntsiab cai thiab tej lus uas cov neeg qhia. Nov yog txoj kev teb zoo rau tej lus tawm tsam uas peb hnov txog lub Koom Txoos thiab cov lus qhuab qhia thiab tej kev cai thiab cov thawj coj. Cia li ua raws li tus Cawm Seej qhia sim seb. Saib cov txiv ntoo—tej uas muaj los tom qab.
Thaum peb xav txog cov txiv ntoo ntawm txoj moo zoo thiab Yexus Khetos lub Koom Txoos uas tau muab txum tim rov qab los, peb zoo siab uas lub Koom Txoos, twb tau loj tuaj los ntawm tej pawg ntseeg hauv Sab Hnub Poob no zuj zus mus kom muaj 16 phlom tus mej zeej feem ntau nyob hauv tej teb chaws uas tsis yog lub Teb Chaws Amelikas. Vim lub Koom Txoos no tau loj tuaj li no, peb haj yam muaj peev xwm pab lub Koom Txoos cov mej zeej. Peb pab lawv ua raws li cov lus txib, pab qhia txoj moo zoo, muab Ixayees sau los ua ke, thiab ua tej tuam tsev nyob thoob plaws lub ntiaj teb.
Ib tug yaj saub, Thawj Tswj Hwm Russell M. Nelson, coj peb txoj hau kev, tus Tswv tau coj nws no kom ua txhua yam peb tau ua hauv ob xyoos uas nws yog peb tus thawj coj. Nim no peb yuav tau koob hmoov mloog Thawj Tswj Hwm Nelson, uas yuav qhia peb paub vam meej ntxiv nyob hauv Yexus Khetos lub Koom Txoos hauv lub caij nyoog nyuaj no.
Kuv ua tim khawv txog qhov uas tej no muaj tseeb thiab koom nrog nej thov Vajtswv pab peb tus yaj saub, tus uas peb yuav mloog tam sim no, los ntawm Yexus Khetos lub npe, amees.