Los thiab Koom Ua Ke
Peb caw tag nrho Vajtswv cov me nyuam nyob thoob plaws lub ntiaj teb kom koom nrog peb ua txoj hauj lwm zoo kawg no.
Kuv cov kwv tij thiab cov muam, kuv cov phooj ywg zoo, txhua lub lim tiam, cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg nyob thoob plaws lub ntiaj teb teev tiam peb Leej Txiv Saum Ntuj Ceeb Tsheej, tus Vajtswv thiab Vaj Ntxwv ntawm lub ntuj tag nrho, thiab Nws Leej Tub, Yexus Khetos. Peb xav txog Yexus Khetos lub neej thiab tej lus qhia—yog tib tug uas tsis tau ua txhaum, Vajtswv tus Me Nyuam Yaj uas tsis muaj qhov ceb. Ntau li peb ua tau, peb txais lub cim nco txog kom nco txog Nws txoj kev txi thiab paub tias Nws nyob hauv plawv ntawm peb lub neej.
Peb hlub Nws thiab peb qhuas Nws. Vim Nws hlub peb kawg nkaus mus ib txhis li, Yexus Khetos twb raug txom nyem thiab tuag kom theej peb. Nws tau qhib lub qhov rooj tuag tawm los, rhuav tej qhov khuam uas cais cov phooj ywg thiab cov uas peb hlub,1 thiab coj kev cia siab rau cov uas tsis muaj, kho neeg mob, thiab tso cov neeg raug txim dim.2
Peb muab siab npuab Nws, muab peb lub neej thiab peb txoj kev teev tiam txhua hnub. Yog vim li no, “peb hais txog Khetos, peb xyiv fab rau Khetos, [thiab] peb qhia txog Khetos … xwv kom peb cov me nyuam yuav paub cia siab rau lub hauv paus twg kom txais kev zam txim rau lawv tej kev txhaum.”3
Kev Xyaum Ua Ib tug Thwj Tim
Txawm li cas los, kev ua Yexus Khetos ib tug thwj tim tsis yog kev hais thiab qhia txog Khetos xwb. Tus Cawm Seej twb tau muab Nws lub Koom Txoos txum tim rov qab los kom pab peb hloov los ua neeg zoo li Nws. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej muab cib fim rau peb xyaum ua li cov thwj tim. Thaum peb koom tes ua hauj lwm hauv lub Koom Txoos, peb kawm paub thiab ua raws li tus Vaj Ntsuj Plig Dawb Huv tej kev tshoov siab. Peb yeej kawm kom hlub lwm tus thiab ua siab dawb siab zoo rau lwm tus.
Yuav tsum siv zog ua li no tas yus lub neej, thiab yus yuav tsum xyaum ua li ntawd.
Cov kws txawj ntaus pob ncaws pob yeej siv sij hawm ntev kawg xyaum ntaus pob thiab ncaws pob. Cov kws tu mob, cov kws tswj hluav taws xob nuclear, thiab kuv thaum kuv kawm ua mov nyob hauv Harriet chav ua mov yeej yuav muaj txuj ci tsuas yog peb rau siab xyaum ua tej ntawd xwb.
Thaum kuv yog ib tug thawj kws tsav nyab hoom, kuv tau siv ib lub tshuab raws kev tsav nyab hoom kom cob qhia neeg—yog ib lub tshuab uas yus siv kom zoo ib yam li yus twb tsav nyab hoom lawm. Lub tshuab no pab cov kwv tsav nyab hoom paub tsav zoo; tiam sis lub tshuab no kuj pab lawv paub ua li cas thaum muaj xwm txheej ceev uas lawv yuav raug thaum lawv tsav nyab hoom tiag tiag.
Qhov no muaj tseeb ib yam thaum hais txog Yexus Khetos cov thwj tim.
Kev rau siab koom tes uah auj lwm hauv Yexus Khetos lub Koom Txoos yuav pab peb npaj rau lub neej tej xwm txheej uas pheej hloov, txawm yog li cas los xij. Vim peb yog cov mej zeej ntawm lub Koom Txoos, peb yuav tsum kawm txog Vajtswv txoj lus los ntawm Nws cov yaj saub tej lus, uas lawv hais puag thaum ub thiab hauv lub caij nyoog no. Thaum peb rau siab thiab txo hwj chim thov peb Leej Txiv Saum Ntuj Ceeb Tsheej, peb kawm paub tus Vaj Ntsuj Plig Dawb Huv lub suab zoo li cas. Peb txais tej uas Vajtswv hu peb ua kom ua hauj lwm, qhia, npaj, txhawb pab, thiab ua. Tej lub cib fim no cia peb loj hlob tuaj ntawm peb tus ntsuj plig, lub siab, thiab tus cwj pwm.
Lawv pab peb npaj siab ua raws li tej kev khi lus dawb ceev uas yuav pab peb tau koob hmoov hauv lub neej no thiab lub neej tom ntej.
Los, Koom Nrog Peb!
Peb caw tag nrho Vajtswv cov me nyuam nyob thoob plaws lub ntiaj teb kom koom nrog peb ua txoj hauj lwm zoo kawg no. Los thiab saib! Tsis hais nyob hauv lub sij hawm uas muaj kab mob COVID-19, los koom nrog peb nyob online. Ntsib cov tub txib nyob online. Kawm tias lub Koom Txoos zoo li cas! Thaum lub sij hawm nyuaj twb dhau mus lawm, cia li ntsib peb nyob hauv peb tsev thiab nyob hauv peb tej tsev teev tiam!
Peb caw nej los thiab pab! Los thiab pab lwm tus nrog peb, txhawb pab Vajtswv cov me nyuam, raws li tus Cawm Seej tau ua, thiab ua kom lub ntiaj teb no zoo dua.
Los thiab koom ua ke! Nej yuav txhawb peb dag zog. Thiab nej kuj yuav los ua neeg zoo dua ntxiv, muaj siab dawb siab zoo ntxiv. Nej txoj kev ntseeg yuav loj tuaj thiab khov kho ntxiv—yuav muaj peev xwm tiv taus tej teeb meem thiab tej kev sim siab hauv lub neej no.
Thiab peb yuav pib li cas? Muaj ntau yam peb ua tau.
Peb caw nej nyeem Phau Ntawv Maumoos. Yog nej tsis muaj ib phau, nej nyeem tau hauv ChurchofJesusChrist.org4 los sis download qhov app rau Phau Ntawv Maumoos. Phau Ntawv Maumoos yog ib zaj lus tim khawv ntxiv txog Yexus Khetos thiab yog ib phau uas koom nrog Phau Qub thiab Phau Tshiab. Peb nyiam tag nrho cov vaj lug kub no thiab kawm los ntawm cov vaj lug kub no.
Peb caw nej los siv sij hawm nyob hauv ComeuntoChrist.org kom kawm tias lub Koom Txoos cov mej zeej qhia thiab ntseeg li cas.
Caw cov tub txib tuaj xyuas koj nyob online los sis nyob hauv nej tsev yog nej ua tau—lawv muaj ib zaj lus txog kev cia siab thiab kev kho mob. Cov tub txib ntxhais txib no yog peb cov tub thiab ntxhais uas peb hlub es lawv ua hauj lwm nyob thoob plaws lub ntiaj teb siv lawv lub sij hawm thiab cov nyiaj.
Nyob hauv Yexus Khetos lub Koom Txoos, nej yuav nrhiav tau ib tsev neeg uas tsis txawv nej pes tsawg. Nej yuav nrhiav tau ib co neeg uas xav tau nej txoj kev pab thiab xav pab nej thaum nej siv zog ua tus neeg zoo—tus neeg uas Vajtswv xav kom nej ua.
Tus Cawm Seej Khawm Txhua Leej Txhua Tus
Tej zaum nej xav tias, “Kuv twb ua yuam kev hauv kuv lub neej. Kuv tsis paub yog tias kuv yuav tsim nyog koom nrog Yexus Khetos lub Koom Txoos. Vajtswv tsis xav muaj ib tug zoo li kuv.”
Yexus tus Khetos, txawm Nws yog “vaj ntxwv tus vaj ntxwv,”5 tus Mexiyas, Vajtswv Leej Tub6 Nws yeej hlub Vajtswv cov me nyuam txhua leej txhua tus. Nws hlub lawv txawm ib tug neeg zoo li cas—nplua nuj los yog pluag npaum li cas, tsis txawj los yog txawj npaum li cas. Nyob hauv Nws lub neej hauv lub ntiaj teb no, tus Cawm Seej tau txhawb pab txhua tus: rau cov zoo siab thiab cov muaj peev xwm, rau cov uas mob siab thiab ploj lawm, thiab rau cov uas tsis muaj kev cia siab. Feem ntau, cov neeg uas Nws tau txhawb pab tsis yog cov uas muaj koob muaj npe, zoo nkauj, los yog nplua nuj. Feem ntau, cov neeg uas Nws txhawb nqa tsis muaj dab tsi tsuas yog lawv txoj kev ris txiaj, ib lub siab mos siab muag, thiab txoj kev xav muaj kev ntseeg.
Yog Yexus twb siv Nws lub neej hauv lub ntiaj teb txhawb pab cov uas tsis muaj hwj chim,7 es Nws yuav tsis hlub lawv hnub no los? Puas muaj chaw nyob hauv Nws lub Koom Txoos rau tag nrho Vajtswv cov me nyuam? Tsis hais cov uas xav tias lawv tsis tsim nhyog, tsis muaj leej twg nco qab lawv, los sis lawv nyias nyob nyias ib leeg?
Tsis yog nej yuav tsum ua neeg zoo tag nrho kom nej tsim nyog txais Vajtswv txoj kev tshav ntuj. Nej tej lus thov Vajtswv los tsis tas hais nrov los yog hais paj lug los yog hais zoo kom thiaj li txog ntuj ceeb tsheej.
Muaj tseeb tiag, Vajtswv tsis xaiv ntsej muag8—tej yam ntawm lub ntiaj teb no tsis muaj nqis rau Nws. Nws paub nej lub siab, thiab Nws hlub nej txawm nej muaj npe npaum li cas, muaj nyiaj npaum li cas, los sis muaj neeg raws nej npaum li cas hauv Instagram.
Thaum peb muab siab npuab peb Leej Txiv Saum Ntuj Ceeb Tsheej thiab los nyob ze Nws, peb yuav hnov Nws los nyob ze peb.9
Peb yog Nws cov me nyuam uas Nws hlub.
Tsis hais cov uas xyeej Nws.
Tsis hais cov uas ua zoo li ib tug me nyuam tawv ncauj, uas npau taws rau Vajtswv thiab Nws lub Koom Txoos, lawv tso khoom hauv hnab, thiab chim siab tawm mus hais tias lawv yuav khiav mus thiab yeej yuav tsis rov qab los.
Thaum twg ib tug me nyuam khiav hauv tsev mus, tej zaum nws tsis pom nws niam nws txiv saib ntawm qhov rais. Lawv lub siab mob heev, pom lawv tus tub los sis tus ntxhais mus—cia siab tias lawv tus me nyuam uas muaj nqis yuav kawm ib yam dab tsi los ntawm qhov xwm txheej no thiab tej zaum yuav muaj qhov muag tshiab saib lub neej no—thiab thaum kawg rov los tsev.
Peb Leej Txiv Saum Ntuj Ceeb Tsheej yeej zoo li no. Nws tos ntsoov peb rov qab los.
Nej tus Cawm Seej, tos nej rov qab los, Nws qhov muag los kua muag thiab muaj kev khuv leej. Txawm nej xav tias nej nyob deb ntawm Vajtswv, Nws yuav pom nej; Nws yuav hlub nej thiab khiav los khawm nej.10
Los thiab koom ua ke.
Vajtswv Cia Peb Kawm Thaum Peb Ua Yuam Kev
Peb yeej yog cov neeg taug kev ntawm lub neej no peb nrhiav lub ntsiab thiab qhov tseeb. Feem ntau, peb tsuas pom txoj kev uas nyob hauv peb ntej—peb tsis pom yuav mus qhov twg thaum txoj kev lem. Peb Leej Txiv Saum Ntuj Ceeb Tsheej uas hlub peb tsis tau qhia txhua yam rau peb. Nws xav kom peb ua tib zoo xav kom thiaj kawm tau ntawm peb tus kheej. Nws xav kom peb ntseeg—tsis hais thaum nyuaj rau peb ua li ntawd.
Nws xav kom peb sia siv thiab mob siab me ntsis—rau siab me ntsis ntxiv—thiab mus ib ruam tom ntej.
Peb kawm thiab loj hlob tuaj li no.
Nej puas xav kom Vajtswv qhia txhua yam rau nej? Nej puas xav kom Nws teb txhua yam lus nug? Thiab qhia txog txhua qhov chaw nej yuav mus?
Kuv ntseeg tias peb feem coob yuav nkees yog Vajtswv tswj peb ua txhua yam txib peb rau ub rau no. Peb kawm tej yam tseem ceeb los ntawm peb lub neej. Peb kawm thaum peb ua yuam kev. Thaum peb hloov siab lees txim thiab paub ntawm peb tus kheej tias kev phem yeej tsis yog kev zoo siab.11
Yexus Khetos, Vajtswv Leej Tub, tau tuag kom tej yam peb ua yuam kev yuav tsis ua rau peb raug txim thiab tsis vam meej mus ib txhis. Vim muaj nws, peb hloov siab lees txim los tau, thiab tej yam peb ua yuam kev yuav pab peb txais tau lub yeeb koob.
Nej tsis tas taug txoj kev no nej ib leeg xwb. Peb Leej Txiv Saum Ntuj Ceeb Tsheej tsis tau cia peb ua loj leeb hauv kev tsaus ntuj.
Yog vim li no, thaum xyoo 1820 lub caij nplooj ntoo hlav, Nws tau tshwm sim nrog Nws tus Tub, Yexus Khetos, rau ib tus tub hluas, Joseph Smith, pom.
Cia li xav txog qhov no! Tus Vajtswv ntawm lub ntuj ceeb tsheej twb tshwm sim rau tib neeg!
Nov yog thawj zaug xwb uas Joseph tau pom Vajtswv thiab lwm tus neeg nyob saum ntuj ceeb tsheej. Tej lus uas cov neeg saum ntuj tau hais rau nws los feem ntau twb sau rau hauv cov vaj lug kub ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Yeej yooj yim nyeem tej lus no. Txhua tus nyeem tau thiab kawm txog tej yam uas Vajtswv xav hais rau peb hauv peb hnub nyoog.
Peb caw nej kawm tej zej no nej tus kheej.
Joseph Smith hluas heev thaum nws tau txais kev tshwm sim no. Feem ntau los nws tau txais ua ntej nws muaj 30 xyoos.12 Nws tsis tau ua neej ntev, thiab ib txhia neeg xav tias nws tsis tsim nyog ua tus Tswv tus yaj saub.
Tiam sis, tus Tswv tau hu nws ua li ntawd—yog raws li tus txheej txheem uas peb kawm txog nyob hauv cov vaj lug kub.
Vajtswv tsis tau xav tos nrhiav tau ib tug neeg zoo tag nrho muab txoj moo zoo txum tim rov qab los.
Yog Nws tau ua li ntawd, ntshe Nws tseem yuav tos ntsoov.
Joseph zoo li peb ntau heev. Txawm Joseph twb ua yuam kev, Vajtswv tau siv nws ua Nws tej hom phiaj tseem ceeb.
Thawj Tswj Hwm Thomas S. Monson pheej tau hais cov lus no: “Tus uas tus Tswv hu, tus Tswv pab ua kom tau.”13
Tus Tim Thawj Povlauj tau hais rau Haiv Neeg Ntseeg nyob hauv Kauleesthaus: “Cov kwv tij [thiab cov muam], nej ua tib zoo xav thaum Vajtswv hu nej los ntseeg, nej yog neeg zoo li cas: raws li neeg xav, nej cov tsis muaj pes tsawg leej txawj ntse, tsis muaj pes tsawg leej muaj hwj chim thiab tsis muaj pes tsawg leej ua nom ua tswv.”14
Vajtswv yeej siv cov qaug zog thiab cov tsis tseem ceeb kom muaj raws li Nws tej lub hom phiaj. Qhov tseeb no ua tim khawv txog qhov uas Vajtswv lub hwj chim, tsis yog tib neeg lub hwj chim uas ua Nws txoj hauj lwm hauv lub ntiaj teb no.15
Mloog Nws Hais, Coj Raws Li Nws
Thaum Vajtswv tau tshwm sim rau Joseph Smith, Nws tau hais txog Nws Lej Tub, Yexus Khetos hais tias, “Mloog Nws hais!”16
Joseph twb siv tas Joseph lub neej kom mloog Nws hais thiab coj raws li Nws.
Ib yam li Joseph, peb txoj kev ua thwj tim pib thaum peb txiav txim siab mloog thiab coj raws li tus Cawm Seej, Yexus Khetos.
Yog nej xav coj raws li Nws, cia li muab siab rau ntseeg thiab ris Nws tus ntoo khaub lig.
Nej yuav kawm tias nej yeej muaj chaw hauv Nws lub Koom txoos—yog ib qho chaw sov so rau koj koom utes ua ib tug thwj tim thiab muaj kev zoo siab.
Ob puas xyoo tom qab Thawj Zaug Ua Yog Toog, thaum peb xav txog thiab kawm txog kev muab Yexus Khetos lub Koom Txoos Txum Tim Rov Qab Los, kuv cia siab tias peb yuav paub tias tsis yog ib yam hauv zaj keeb kwm xwb. Peb yeej muaj ib txoj hauj lwm tseem ceeb hauv zaj dab neeg zoo kawg nkaus no.
Yog li ntawd, peb txoj hauj lwm yog dab tsi?
Peb yuav tsum kawm txog Yexus Khetos. Kawm Nws tej lus. Mloog Nws hais thiab coj raws li Nws thaum peb rau siab ua txoj hauj lwm tseem ceeb no. Kuv caw nej los koom ua ke!
Nej tsis tas ua neeg zoo tag nrho. Nej tsuas yuav tsum xav pab kom nej kev ntseeg loj zuj zus thiab los nyob ze Nws ntxiv txhua hnub.
Peb txoj hauj lwm yog kom hlub thiab ua hauj lwm rau Vajtswv thiab hlub thiab pab Vajtswv cov me nyuam.
Thaum nej ua li ntawd, Vajtswv yuav ua kom Nws txoj kev hlub thiab kev xyiv fab nyob ib puag ncig thiab coj nej hauv lub neej, txawm nej raug xwm txheej ceev npaum li cas los yog, thiab ntxiv.
Kuv ua tim khawv txog qhov no thiab kuv foom koob hmoov rau nej txhua leej txhua tus vim kuv ua nej tsaug thiab hlub nej, los ntawm peb tus Cawm Seej, peb tus Xib Hwb lub npe—los ntawm Yexus Khetos lub npe, amees.