Xav txog Vajtswv txoj Kev Zoo thiab txoj Kev Tshav Ntuj
Kuv caw nej txhua hnub kom nej nco ntsoov Leej Txiv Saum Ntuj Ceeb Tsheej thiab Yexus Khetos txoj kev zoo thiab tej yam uas Nkawd tau ua rau nej.
Nyob hauv txhua lub caij nyoog, qhov tseem ceeb hauv tej lub sij hawm nyuaj heev, cov yaj saub tau hais kom peb nco txog Vajtswv txoj kev zoo thiab xav txog tej yam uas Nws tau ua rau peb txhua tus, peb tsev neeg, thiab peb cov neeg.1 Cov lus qhia no los muaj nyob thoob plaws cov vaj lug kub tiam sis haj yam muaj nyob hauv Phau Ntawv Maumoos. Phab ntawv qhia npe piav hais tias Phau Ntawv Maumoos lub hom phiaj yog “los qhia rau cov uas seem tshuav ntawm tsev neeg Ixayees kom paub hais tias tus Tswv tau ua tej yam tseem ceeb li cas rau lawv cov yawg koob lawm.”2 Phau Ntawv Maumoos xaus lus thaum Maulaunais thov hais tias: “Saib seb, kuv yuav ntuas nej tias thaum nej nyeem tej no … kom nej yuav nco qab tias tus Tswv tau hlub tshua noob neej npaum li cas, … thiab xav txog qhov no nyob hauv nej lub siab.”3
Qhov uas txhua tus yaj saub thov kom peb xav txog Vajtswv txoj kev zoo yeej yog ib qho tseem ceeb.4 Peb Leej Txiv Saum Ntuj Ceeb Tsheej xav kom peb nco txog Nws thiab Nws Leej Tub uas Nws hlub txoj kev zoo, tsis yog kom Nkawd zoo siab, tiam sis kom peb yuav hloov siab vim peb nco txog Nkawd. Thaum peb xav txog Nkawd txoj kev siab hlub, peb txoj kev xav thiab txoj kev to taub loj tuaj ntxiv. Thaum peb xav txog Nkawd txoj kev khuv leej, peb yuav txo hwj chim, thov Vajtswv, thiab nyob ruaj nrees.
Ib zaj txog ib tug neeg mob dhau los yuav qhia tias kev ris Vajtswv txiaj vim Nws ua siab dawb siab zoo hlub peb yuav hloov peb lub siab. Xyoo 1987, kuv los paub Thomas Nielson, ib tug txiv neej zoo uas yuav tsum muaj ib lub plawv tshiab. Nws tau muaj 63 xyoo thiab nyob hauv Logan, Utah, hauv lub Teb Chaws Amelikas. Tom qab nws ua tub rog hauv Kev Tsov Rog Thoob Ntiaj Teb thib Ob, nws tau yuav Donna Wilkes ua nws tus poj niam nyob hauv lub Tuam Tsev Logan Utah. Nws tau los ua ib tug kws txawj ua thwv cib ua vaj ua tsev. Thaum nws laus me ntsis nws nyiam ua hauj lwm nrog nws tus tub xeeb ntxwv hlob, Jonathan, thaum nws phav kawm ntawv. Ob tug ntawd sib raug zoo heev, vim hais tias Tom pom nws tus kheej nyob hauv Jonathan.
Nyuaj rau Tom nyob tos kom tau ib lub plawv tshiab. Nws tsis yog ib tug uas ua siab ntev heev. Nws yeej ib txwm txawj cuab hom phiaj thiab khwv ua hauj lwm thiab rau siab heev thiaj ua tau. Vim nyuaj rau nws lub plawv dhia, thiab xyov nws lub neej yuav zoo li cas, tej lub sij hawm Tom nug kuv seb kuv ua dab tsi kom thiaj tau ib lub plawv tshiab sai sai. Nws tso dag tso luag hais kom kuv ua tej yam uas yuav pab lwm tus pub tau ib lub plawv rau nws sai sai.
Muaj ib hnub, muaj ib tug zoo tshaj plaws uas pub tau nws lub plawv rau Tom. Lub plawv loj txaus thiab hom ntshav zoo ib yam, thiab tus uas pub nws lub plawv yog ib tug tub hluas, uas muaj 16 xyoo xwb. Tus uas pub tau nws lub plawv yog Jonathan, Tom tus tub xeeb ntxwv. Hnub ntawd thaum sawv ntxov, Jonathan raug mob dhau thaum ib lub tsheb nqaj hlau tau tsoo lub tsheb uas nws caij haud.
Thaum kuv tuaj xyuas Tom thiab Donna nyob hauv lub tsev kho mob, nkawd ntxhov siab kawg. Yeej nyuaj rau peb paub tias nkawd xav li cas, vim nkawd paub tias Tom lub neej yuav ntev zog yog tias yuav siv nkawd tus tub xeeb ntxwv lub plawv. Thaum xub thawj, nkawd tsis kam yuav lub plawv uas Jonathan niam thiab txiv, uas yog nkawd tus ntxhais thiab tus vauv. Tiam sis Tom thiab Donna paub tias Jonathan lub hlwb twb tuag lawm, thiab nkawd to taub tias nkawd tej kev thov Vajtswv kom tau ib lub plawv rau Tom tsis tau ua rau Jonathan raug xwm txheej. Tsis yog li ntawd, Jonathan lub plawv yog ib lub txiaj ntsim uas yuav pab Tom thaum nws xav tau kev pab. Nkawd to taub tias tej zaum yuav muaj ib yam zoo los ntawm kev nyuaj siab heev no thiab txiav txim tias yuav ua.
Kev hloov lub plawv los twb mus zoo. Tom qab ntawd, Tom yog ib tug neeg txawv. Nws txoj kev hloov tsis yog vim nws tsis mob ntxiv los sis nws muaj kev ris txiaj ntxiv xwb. Nws qhia kuv tias nws tau xav txog Jonathan txhua hnub, xav txog nws tus ntxhais thiab tus vauv, xav txog lub txiaj ntsim uas nws tau txais, thiab vim li cas nws thiaj tau lub txiaj ntsim ntawd. Txawm yog nws tseem txaus luag thiab tseem khwv heev los, kuv pom tias Tom haj yam txawj xav thiab muaj lub siab dawb siab zoo.
Tom tau ua neej nyob 13 xyoo tom qab muab lub plawv tshiab rau nws, tej xyoo uas yuav tsis muaj yog tsis tau ua li ntawd. Cov ntawv uas hais txog nws txoj kev tuag hais tias tej xyoo no tau pab nws txhawb nqa nws tsev neeg lub neej thiab lwm tus vim nws ua siab dawb hlub lawv heev. Nws yog ib tug uas tau pab neeg coob thiab coj yam ntxwv xav zoo thiab rau siab.
Ib yam li Tom, peb txhua tus tau txais tej txiaj ntsim uas peb tsis muaj peev xwm ua rau peb tus kheej, tej txiaj ntsim los ntawm peb Leej Txiv Saum Ntuj Ceeb Tsheej thiab Nws Leej Tub, tsis hais kev txhiv dim los ntawm Yexus Khetos txoj kev theej txhoj los yog.5 Peb twb txais txoj sia nyob hauv lub ntiaj teb no; peb yuav txais txoj sia nyob hauv lub neej tom qab lub neej no thiab txais kev cawm seej thiab kev tsa nto mus ib txhis—yog peb xaiv—tag nrho yog vim muaj Leej Txiv Saum Ntuj Ceeb Tsheej thiab Yexus Khetos.
Txhua zaus peb siv, tau foom koob hmoov, los sis xav txog tej txiaj ntsim no, peb yuav tsum xav txog kev txi, lub siab dawb siab zoo, thiab kev khuv leej ntawm cov uas pub txiaj ntsim no. Kev tswm seeb rau cov uas pub txiaj ntsim no tsis ua rau peb ris txiaj xwb. Kev xav txog Nkawd tej txiaj ntsim yuav hloov peb lub siab.
Ib tug uas tau hloov siab ntau heev yog Amas tus Hluas. Thaum Amas tab tom “ntxeev siab tawm tsam Vajtswv,”6 ib tug tim tswv tshwm sim rau nws. Tus tim tswv “hais lus zoo li ib lub suab xob quaj,”7 thiab cem Amas vim nws tsim txom lub Koom Txoos thiab “nyiag cov neeg lub siab coj mus.”8 Tus tim tswv tau hais cov lus qhuab ntuas no: “Cia li mus, thiab nco ntsoov koj cov yawg koob txoj kev poob cev qhev …; thiab nco ntsoov tej yam tseem ceeb uas [Vajtswv] tau ua rau lawv.”9 Muaj ntau yam uas tus tim tswv hais taus, es nws hais li ntawd.
Amas tau nco txog tej ntawd thiab tau hloov siab lees txim. Tom qab ntawd nws tau qhia txog tus tim tswv tej lus rau nws tus tub Hilamas. Amas ntuas hais tias, “Kuv xav kom koj ua li kuv tau ua lawm, nco ntsoov txog peb cov yawg koob txoj kev ua qhev; vim lawv tau poob cev qhev, thiab tsis muaj leej twg muaj peev xwm tso lawv dim tsuas yog Anplaham tus Vajtswv, thiab Ixaj tus Vajtswv, thiab Yakhauj tus Vajtswv; thiab nws yeej tau tso lawv dim ntawm lawv tej kev txom nyem lawm tiag.”10 Amas hais tias, “Kuv yeej tso siab rau nws.”11 Amas to taub tias yog peb nco txog kev dim kev poob cev qhev thiab kev txhawb nqa thaum “muaj txhua yam kev sim siab thiab txhua yam teeb meem,” ces peb los paub Vajtswv thiab paub Nws tej lus cog tseg.12
Peb feem tsawg muaj ib zaj zoo li Amas, tiam sis peb txoj kev hloov siab yeej yuav tseem ceeb npaum li nws txoj kev hloov siab. Thaum ub tus Cawm Seej cog lus tias:
“Kuv yuav muab lub siab tshiab thiab txoj kev xav tshiab rau nej. Kuv yuav muab nej lub siab uas tawv li pob zeb pov tseg thiab muab lub siab uas mloog lus rau nej.
““Kuv yuav pub kuv tus ntsuj plig rau nej. …
“… Thiab nej yuav yog kuv haiv neeg thiab kuv yuav yog nej tus Vajtswv.”13
Tus Cawm Seej uas sawv rov los lawm tau qhia cov Neeg Nifais tias kev hloov siab li no pib li cas. Nws hais txog ib qho tseem ceeb hauv Leej Txiv Saum Ntuj Ceeb Tsheej txoj hau kev thaum Nws hais tias:
“Thiab kuv Txiv txib kuv los xwv kom kuv yuav raug coj mus ntsia saum tus ntoo khaub lig; thiab tom qab uas kuv raug ntsia saum tus ntoo khaub lig lawm, kuv thiaj coj tau txhua leej txhua tus los cuag kuv …
“Thiab twb yog rau lub hom phiaj no kuv thiaj raug coj mus ntsia saum tus ntoo khaub lig; yog li ntawd, raws li Leej Txiv lub hwj chim kuv yuav coj txhua leej txhua tus los cuag kuv.”14
Yuav tsum xav txog dab tsi koj thiaj yuav xav mus cuag tus Cawm Seej? Cia li xav txog Yexus Khetos txoj kev ywj rau Nws Leej Txiv lub siab nyiam, Nws txoj kev kov yeej kev tuag, Nws txoj kev ris nej tej kev txhaum thiab lub txim, Nws txoj kev txais Leej Txiv lub hwj chim kom theej nej lub txhoj, thiab Nws txoj kev txhiv nej dim.15 Tej no tsis txaus kom nej xav mus cuag Nws los? Tej no yeej txaus rau kuv. Yexus Khetos “qhib caj npab tos [peb], cia siab thiab txaus siab kom kho mob, zam txim, ua kom huv, txhawb zog, thiab muab [peb] hloov ua dawb huv.”16
Tsim nyog uas tej no ua rau peb muaj ib lub siab tshiab thiab tshoov peb lub siab kom peb xav coj raws li Leej Txiv Saum Ntuj Ceeb Tsheej thiab Yexus Khetos. Tiam sis cov uas muaj lub siab tshiab tej zaum yuav xav “mus ua loj leeb … pheej ncaim Vajtswv tus uas [peb] hlub.”17 Xwv kom tsis txhob xav li no, niaj hnub peb yuav tsum xav txog tej txiaj ntsim uas peb tau txais thiab tau pub tej txiaj ntsim ntawd li cas. Vaj Ntxwv Npeyamis ntuas hais tias, “Kuv xav kom nej nco ntsoov, thiab nco txog tas mus li, Vajtswv txoj kev tshav ntuj … thiab nws txoj kev zoo thiab kev ua siab ntev nyiaj rau nej.”18 Yog peb yuav ua li ntawd, peb thiaj li tsim nyog txais tau cov koob hmoov zoo kawg nkaus uas los saum ntuj los.
Kev xav txog Vajtswv txoj kev zoo thiab txoj kev muaj siab hlub tshua yuav pab peb hnov tus ntsuj plig. Ces, qhov uas peb txawj hnov tus ntsuj plig ua rau peb txawj paub txhua yam tseeb los ntawm tus Vaj Ntsuj Plig Dawb Huv lub hwj chim.19 Tej yam tseeb no los muaj xws li ib zaj lus tim khawv tias Phau Ntawv Maumoos muaj tseeb, kev paub tias Yexus yog tus Khetos, peb tus Cawm Seej thiab tus Txhiv Dim, thiab kev lees yuav qhov uas tau muab Nws txoj moo zoo txum tim rov qab los hauv hnub nyoog kawg no.20
Thaum peb nco txog peb Leej Txiv Saum Ntuj Ceeb Tsheej thiab Yexus Khetos txoj kev zoo thiab tej yam uas Nkawd ua tau ua rau peb, peb yeej yuav saib taus Nkawd, ib yam li Tom yeej saib taus Jonathan lub siab. Tom muaj kev xyiv fab thiab kev tswm seeb nco txhua hnub txog xwm txheej uas ua rau nws muaj txoj sia ntev zog. Txawm peb zoo siab heev vim peb paub tias peb yuav txais tau kev cawm seej thiab kev tsa nto, peb yuav tsum nco ntsoov tias tau them nqi loj heev kom peb thiaj txais tau kev cawm seej thiab kev tsa nto.21 Peb yuav nyob tswm seeb thaum peb paub tias yog tsis muaj Yexus Khetos ces peb yuav raug puas tsuas tiam sis los ntawm Nws peb thiaj txais tau lub txiaj ntsim zoo tshaj plaws uas Leej Txiv Saum Ntuj Ceeb Tsheej pub tau.22 Muaj tseeb tiag, kev tswm seeb zoo li no yuav cia peb txais tau “txoj sia nyob mus ib txhis nyob hauv sim neej no” thiab thaum kawg txais “txoj sia nyob mus ib txhis nyob … uas yog lub yeeb koob tsis txawj tuag” nyob hauv sim neej yuav los.23
Thaum peb xav txog peb Leej Txiv Saum Ntuj Ceeb Tsheej thiab Yexus Khetos txoj kev zoo, peb tso siab rau Nkawd ntxiv. Peb tej kev thov Vajtswv hloov vim peb paub tias Vajtswv yog peb Leej Txiv thiab peb yog Nws cov me nyuam. Peb tsis xav hloov Nws lub siab nyiam tiam sis peb hloov peb lub siab nyiam kom muaj raws li Nws li thiab ua rau peb txais tau cov koob hmoov uas Nws xav pub rau peb, tiam sis peb yuav tsum thov kom tau.24 Peb xav muaj lub siab mos siab muag ntxiv, ua dawb huv ntxiv, ruaj nrees ntxiv, thiab ua neeg zoo li Khetos ntxiv.25 Tej kev hloov siab no ua rau peb tsim nyog txais cov koob hmoov saum ntuj ntxiv.
Thaum peb lees tias txhua yam zoo yog los ntawm Yexus Khetos, peb yuav txawj qhia lwm tus txog peb txoj kev ntseeg zoo ntxiv.26 Peb yuav ua siab loj thaum twg muaj tej hauj lwm thiab tej xwm txheej uas peb xav tias peb ua tsis taus.27 Peb yuav rau siab ntsoov ua raws li peb tej kev khi lus uas peb khi kom coj raws li tus Cawm Seej.28 Peb yuav muaj Vajtswv txoj kev hlub, xav pab cov uas xav tau tiam sis tsis txiav txim rau lawv, hlub peb cov me nyuam thiab tu lawv raws li kev ncaj ncees, txais kev zam txim rau peb tej kev txhaum tas mus li, thiab muaj kev xyiv fab tas mus li.29 Tej no yog tej yam zoo kawg uas los ntawm kev nco txog Vajtswv txoj kev zoo thiab txo kev hlub tshua.
Tiam sis tus Cawm Seej ceeb toom hais tias, “Neeg yeej tsis ua txhaum Vajtswv ib yam dab tsi li, los yog nws txoj kev npau taws tsis tau chim rau ib tug twg, tsuas yog rau cov neeg uas tsis lees txhua yam uas nws txhais tes tau ua.”30 Kuv tsis xav tias Vajtswv xav tias peb saib tsis taus Nws thaum peb tsis nco txog Nws. Tiam sis, kuv xav tias Nws poob siab heev. Nws paub tias peb tsis tau cia peb tus kheej muaj lub cib fim mus cuag Nws thaum peb nco txog Nws thiab Nws txoj kev zoo. Ces peb thiaj li yuav tsis muaj Nws los cuag peb thiab tsis txais tau cov koob hmoov uas Nws cog lus kom peb txais tau.31
Kuv caw nej txhua hnub kom nej nco ntsoov Leej Txiv Saum Ntuj Ceeb Tsheej thiab Yexus Khetos txoj kev zoo thiab tej yam uas Nkawd tau ua rau nej. Cia nej txoj kev xav txog Nkawd txoj kev zoo pab khi nej lub siab uas nyiam ua loj leeb rau Nkawd.32 Cia li xav txog Nkawd txoj kev khuv leej, thiab nej yuav tau koob hmoov kom txawj hnov tau tus ntsuj plig thiab ua neeg zoo li Khetos. Qhov uas nej xav txog Nkawd txoj kev paub nej lub siab yuav pab nej “rau siab ntseeg mus kom txog thaum kawg,” mus txog thaum “Vajtswv yuav txais [nej] mus rau hauv ceeb tsheej” xwv kom nej thiaj “yuav nrog Vajtswv nyob hauv qhov chaw uas muaj kev zoo siab tsis txawj kawg.”33
Peb Leej Txiv Saum Ntuj Ceeb Tsheej, hais txog Nws Leej Tub uas Nws Hlub hais tias, “Mloog Nws hais!”34 Thaum nej ua raws li tej lus no thiab mloog Nws hais, cia li nco ntsoov, nrog kev xyiv fab thiab kev tswm seeb, hais tias tus Cawm Seej nyiam kho tej yam uas nej kho tsis taus; Nws nyiam kho tej yam uas tau raug puas tas lawm;35 Nws pab them nqi rau tej yam tsis ncaj ncees uas nej raug;36 thiab Nws hlub nej kom kho tau nej lub siab uas puas tas.37
Thaum kuv tau xav txog tej lub txiaj ntsim los ntawm peb Leej Txiv Saum Ntuj Ceeb Tsheej thiab Yexus Khetos, kuv tau kawm txog Nkawd txoj kev hlub mus ib txhis thiab Nkawd txoj kev khuv leej rau tag nrho Leej Txiv Saum Ntuj Ceeb Tsheej cov me nyuam.38 Qhov uas kuv paub no tau hloov kuv lub siab, thiab yuav hloov nej ib yam li ntawd. Los ntawm Yexus Khetos lub npe, amees.