Mus Tom Ntej nrog Kev Ntseeg
Kuv foom koob hmoov rau nej kom nej nyob kaj siab lug thiab muaj kev ntseeg tus Tswv.
Kuv cov kwv tij thiab cov muam, thaum peb yuav xaus lub rooj sab laj no, peb ua tus Tswv tsaug. Cov nkauj yeej zoo mloog thiab tej zaj no tau tshoov peb lub siab.
Nyob hauv lub rooj sab laj no, peb twb tau muaj ntau yam tseem ceeb. Nov yog peb txoj kev nco txog ob puas xyoo tas los zaj lus tshaj tawm rau lub ntiaj teb txog kev muab Yexus Khetos txoj moo zoo uas muaj txhij txhua txum tim rov qab los.
Peb tau nco txog lub Caij Nyoog Txum Tim Rov Qab Los thaum peb tau ua txoj Kev Qw Hauxanas.
Peb tau muab ib lub cim hom tshiab rau nej saib uas yog ib lub cim txog peb txoj kev ntseeg tus Tswv Yexus Khetos thiab txoj kev paub tias yog lub Koom Txoos tej xov xwm thiab cov ntaub ntawv tiag.
Peb twb tau hais kom txhua tus thoob plaws ntiaj teb yoo mov thiab thov Vajtswv, kom yuav tswj tau phaum mob uas kis txhua qhov chaw, pov hwm cov kws kho mob, txhawb nqa txoj kev khwv nyiaj txiag, thiab lub neej yuav rov zoo li qub. Peb yuav yoo mov thaum Hnub Friday Zoo, lub Plaub Hlis Ntuj hnub tim 10. Yuav yog ib hnub Friday zoo kawg!
Hnub Sunday tom ntej no yog Hnub Easter, thaum peb yuav nco txog peb tus Tswv Yexus Khetos txoj Kev Theej Txhoj thiab txoj Kev Sawv Rov Los. Vim Nws tau Theej peb lub Txhoj, ces txhua leej txhua tus yuav txais Nws lub txiaj ntsim uas yog kev sawv rov los. Thiab nws lub txiaj ntsim uas yog txoj sia nyob mus ib txhis yuav los rau txhua tus uas tsim nyog vim lawv ua kab ke thiab ua kev khi lus nyob hauv Nws cov tuam tsev dawb huv.
Tej yam uas tshoov peb lub siab nyob hauv lub Plaub Hlis Ntuj 2020 lub tuam rooj sab laj—thiab lub lim tiam dawb ceev uas peb pib tam sim no—los lub ntsiab yeej nyob hauv cov lus uas Vajtswv tau hais tias: “Mloog Nws Hais.”1 Peb thov kom nej yuav tsom ntsoov rau Leej Txiv Saum Ntuj Ceeb Tsheej, cov lus uas Nws tau hais, thiab rau Nws Leej Tub, Yexus Khetos, thaum nej nco txog txhua yam uas tau muaj los. Peb thov kom nej yuav rov qab pib mloog thiab ua raws li tus Cawm Seej tej lus tiag tiag.2 Kuv cog lus tias kev ntshai yuav ploj thiab kev ntseeg yuav loj tuaj tom qab nej ua li ntawd.
Ua nej tsaug vim nej xav kho nej lub tsev kom ua tej chaw dawb ceev uas muaj kev ntseeg, uas yog tej qhov chaw rau tus Tswv tus Ntsuj Plig nyob. Peb cov ntaub ntawv kawm txog txoj moo zoo, Los, Nrog Kuv Mus, yuav foom koob hmoov rau nej ntxiv. Qhov uas nej rau siab ua li no—tsis hais thaum tej lub sij hawm uas nej xav tias nej ua tsis zoo los—yuav hloov nej lub neej, thiab nej tsev neeg, thiab lub ntiaj teb. Peb yuav txais kev txhawb nqa thaum peb hloov los ua tus Tswv cov thwj tim uas rau siab, sawv los thiab hais lus rau Nws, txawm peb nyob qhov twg los xij.
Nim no, cia peb hais txog lub tuam tsev. Peb muaj 168 lub tuam tsev uas tau muab fij tseg lawm nyob thoob plaws lub ntiaj teb. Muaj lwm lub uas peb tab tom npaj ua thiab ua tam sim no. Thaum peb tshaj tawm txog kev tsa ib lub tuam tsev tshiab, ces yog ib feem ntawm peb zaj keeb kwm dawb ceev.
Tej zaum yog ib qho txawv uas peb tshaj tawm txog tej lub tuam tsev tshiab thaum tag nrho peb cov tuam tsev raug kaw tam sim no.
Ib puas tawm xyoo tas los, Thawj Tswj Hwm Wilford Woodruff pom tias yuav muaj tej xwm txheej zoo li peb muaj tam sim no, raws li tau hais hauv zaj lus thov Vajtswv muab lub Tuam Tsev Salt Lake fij tseg, uas nws hais thaum xyoo 1893. Tej zaum nej ib txhia tau pom ib feem ntawm zaj lus thov Vajtswv no nyob hauv social media.
Cia li mloog tej lus thov los ntawm Vajtswv ib tug yaj saub: “Thaum Koj cov neeg yuav tsis muaj cib fim nkag hauv lub tsev dawb huv no … thiab lawv raug tsim txom thiab muaj kev kub ntxhov, muaj teeb meem nyob puag ncig … yog lawv tig lawv lub ntsej muag saib Koj lub tsev dawb huv thiab thov Koj pab lawv dim, kom pab lawv, kom Koj lub hwj chim yuav los txhawb nqa lawv, peb thov Koj, saib lawv los ntawm Koj qhov chaw nyob uas dawb huv … thiab mloog lawv tej lus thov. Los sis thaum Koj cov neeg cov me nyuam, thaum yav tom ntej, yuav nyob nrug qhov chaw no … thiab lawv yuav thov Koj kom dim lawv txoj kev txom nyem thiab txoj kev nyuaj siab kom thiaj li muaj kev nplij siab, peb txo hwj chim thov Koj kom mloog lawv tej lus thov, thiab muab cov koob hmoov uas lawv thov Koj rau lawv.”3
Cov kwv tij thiab cov muam, thaum lub sij hawm uas peb nyuaj siab heev thaum cov tuam tsev raug kaw, nej tseem muaj peev xwm siv lub hwj chim ntawm nej tej kev khi lus thiab vaj txiaj ntsim hauv lub tuam tsev thaum nej ua raws li nej tej kev khi lus. Thov siv lub sij hawm no thaum cov tuam tsev raug kaw kom ua neej tsim nyog nkag hauv lub tuam tsev.
Hais txog lub tuam tsev nrog nej tsev neeg thiab cov phooj ywg. Vim Yexus Khetos yog tus nyob hauv plawv ntawm txhua yam peb ua hauv lub tuam tsev, thaum nej xav ntxiv txog lub tuam tsev nej yeej yuav xav ntxiv txog Nws. Kawm ntawv thiab thov Vajtswv kom kawm ntxiv txog lub hwj chim thiab kev txawj ntse uas tau txais—los sis nej yuav tau txais—thaum nej txais vaj txiaj ntsim.
Peb zoo siab tshaj tawm tias yuav ua yim lub tuam tsev tshiab nyob hauv tej qhov chaw no: Bahía Blanca, Argentina; Tallahassee, Florida; Lubumbashi, Democratic Republic of the Congo; Pittsburgh, Pennsylvania; Benin City, Nigeria; Syracuse, Utah; Dubai, United Arab Emirates; thiab Shanghai, Teb Chaws Suav.
Nyob hauv yim qhov chaw no, cov kws kos daim qauv yuav ua hauj lwm nrog cov thawj coj hauv zej zog kom txhua lub tuam tsev nyias yuav zoo nkauj phim nyias zej zog.
Kev ua ib lub tuam tsev nyob hauv Dubai yog los ntawm lawv txoj kev ua siab dawb caw peb ua, es peb ris lawv txiaj vim lawv ua li no.
Tej kev ua ib lub tuam tsev hauv Shanghai los yuav tsum piav meej. Tau nees nkaum xyoo, cov uas tsim nyog nkag hauv ib lub tuam tsev nyob lub Teb Chaws Suav twb tau mus rau lub Tuam Tsev Hong Kong China. Tiam sis thaum lub Xya Hli Ntuj xyoo 2019, peb tau kaw lub tuam tsev ntawd kom muab kho kom rov zoo li qub.
Nyob hauv Shanghai, ib lub tsev rau ntau lub hom phiaj yuav qhib ib txoj kev rau cov mej zeej Suav ua cov kab ke hauv lub tuam tsev—nyob hauv lub Teb Chaws Suav—rau lawv thiab lawv cov poj koob yawm txwv.4
Nyob hauv txhua lub teb chaws, lub Koom Txoos no hais kom cov mej zeej hwm thiab ua raws li txoj kev cai.5 Peb qhia tias yus tsev neeg tseem ceeb heev, thiab yuav tsum ua niam txiv zoo thiab ua cov pej xeem zoo. Vim peb ua raws li tej kev cai ntawm lub Teb Chaws Suav, lub Koom Txoos tsis tau xa cov tub txib qhia txoj moo zoo mus ua hauj lwm nyob ntawd; thiab peb yuav tsis ua li ntawd tam sim no.
Tej pawg ntseeg Suav thiab pawg ntseeg nyob txawv teb chaws los nyias yuav nyob nyias thaum sib ntsib. Lub Koom Txoos txoj kev muaj cai nyob ntawd los tsis tau hloov hlo li. Thaum xub thawj yuav siv lub tuam tsev ntawd thaum teem sij hawm ua ntej xwb. Tus Tswv lub tsev nyob hauv Shanghai yeej yuav tsis pub cov nyob hauv lwm lub teb chaws nkag mus haud.
Yim lub tuam tsev tshiab yuav foom koob hmoov rau cov neeg coob nyob ob sab ntawm daim ntaub thaiv. Cov tuam tsev yog ib feem tseem ceeb txog lub caij nyoog muab Yexus Khetos txoj moo zoo Txum Tim Rov Qab Los. Vim Vajtswv zoo thiab muaj lub siab dawb siab zoo, Nws yeej coj cov koob hmoov ntawm lub tuam tsev los nyob ze Nws cov me nyuam nyob txhua qhov chaw.
Thaum Vajtswv tseem muab txoj moo zoo txum tim rov qab los, kuv paub tias Vajtswv tseem yuav muab tej yam zoo kawg nkaus thiab tseem ceeb ntxiv txog Nws lub nceeg vaj hauv lub ntiaj teb no.6 Lub nceeg vaj ntawd yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.
Cov kwv tij thiab cov muam, kuv hlub nej. Thaum lub sij hawm uas muaj kev ntshai thiab kev kub ntxhov, thiab los ntawm txoj cai uas Vajtswv tau pub rau kuv, kuv xav foom ib tug tim thawj txoj koob hmoov rau nej.
Kuv foom koob hmoov rau nej kom nej nyob kaj siab lug thiab muaj kev ntseeg tus Tswv.7
Kuv foom koob hmoov rau nej kom nej xav hloov siab lees txim thiab hloov los ua neeg zoo li Nws txhua hnub.8
Kuv foom koob hmoov rau nej kom nej paub tias tus Yaj Saub Joseph Smith yog tus yaj saub ntawm lub caij nyoog muab Yexus Khetos txoj moo zoo txum tim rov qab los.
Yog tias nej los sis cov uas nej hlub muaj mob, kuv foom koob hmoov rau nej kom nej txais kev kho mob raws li tus Tswv lub siab nyiam pom zoo.
Kuv foom koob hmoov li no, hais ib zaug ntxiv rau nej txog kuv txoj kev hlub nej, los ntawm Yexus Khetos lub npe dawb ceev, amees.