Ua Li Cas lub Pov Thawj Hwj Foom Koob Hmoov rau cov Hluas
Peb muaj cib fim txhawb pab lwm tus li cov tim tswv, qhia txoj moo zoo nyob hauv txhua thaj av ntawm lub ntiaj teb, thiab pab tib neeg los cuag Khetos.
Cov kwv tij thiab cov muam, kuv zoo siab hais lus rau nej hmo no txog lub txiaj ntsim dawb ceev uas yog lub pov thawj hwj thiab lub hwj chim kom foom koob hmoov rau cov hluas hauv lub caij nyoog no. Kuv thov kom tus Ntsuj Plig pab kuv qhia qhov tseeb, txawm yog kuv yog ib tug tsis zoo tag nrho.
Thawj Pawg Thawj Tswj Hwm tau hais kom cov uas tuav lub Pov Thawj Hwj Aloos tias “Nej ua neej nyob hauv ib lub caij nyoog uas muaj tej cib fim thiab kev cov nyom loj heev—ib lub caij nyoog uas lub pov thawj hwj tau raug txum tim rov qab los. Nej muaj txoj cai saib xyuas tej kab ke ntawm lub Pov Thawj Hwj Aloos. Thaum nej ua tib zoo thov Vajtswv thiab ua neej tsim nyog los siv txoj cai ntawd, ces nej yuav foom tau koob hmoov loj heev rau cov neeg uas nyob ntawm nej ib ncig.”1 Peb cov tub hluas hauv lub Koom Txoos los Vajtswv hais kom peb nco qab tias peb yog “Vajtswv cov [tub] uas nws hlub, thiab Nws muaj ib txoj hauj lwm rau [peb] ua”2 thiab peb pab ua Nws txoj hauj lwm kom “tib neeg tsis txawj tuag thiab tau txoj sia nyob mus ib txhis” (Mauxes 1:39).
Lub pov thawj hwj yog txoj cai kom ua kab ke thiab muab kev khi lus ntawm tus Cawm Seej txoj moo zoo rau cov uas tsim nyog txais. Los ntawm cov kab ke pov thawj hwj thiab tej kev khi lus dawb ceev peb txais tau cov koob hmoov ntawm tus Cawm Seej txoj Kev Theej Txhoj uas pab peb txais tau peb txoj hmoov saum ntuj ceeb tsheej.
Joseph Smith yog ib tug tub hluas uas Vajtswv hu kom muab Yexus Khetos txoj moo zoo txum tim rov qab los, es nws thiaj li tau txais lub pov thawj hwj, rau lub hom phiaj ntawd, nws tau siv kom foom koob hmoov rau noob neej. Phau Lus Qhuab Qhia thiab Kev Khi Lus 135, hais txog cov koob hmoov uas Joseph tau muab rau cov hluas hauv lub caij nyoog tso txoj cai no. Peb nyeem hais tias: “Joseph Smith … twb ua ntau tshaj lwm tus, rau tib neeg txoj kev cawm seej nyob hauv ntiaj teb no, tsuas yog Yexus tib leeg nkaus xwb thiaj tau ua tshaj nws. … Nws tau coj Phau Ntawv Maumoos los … ; tau xa qhov txhij txhua ntawm txoj moo zoo uas kav ib txhis … mus rau plaub ceg kaum ntuj; tau coj tej kev tshwm sim thiab tej lus txib uas muab los ua ke los ua phau ntawv Lus Qhuab Qhia thiab Kev Khi Lus no … ; tau muab txhiab txhiab tug ntawm Tsoom Haiv Neeg Ntseeg hauv Hnub Nyoog Kawg sau los ua ke,… thiab tau tseg cia kev muaj koob muaj npe uas yuav tsis txawj tuag” (Lus Qhuab Qhia thiab Kev Khi Lus 135:3).
Yog peb xav ua hauj lwm li Joseph tau ua, peb yuav tsum tsim nyog siv tus Tswv lub hwj chim pov thawj hwj. Thaum nkawd muab Phau Ntawv Maumoos txhais lus, Joseph thiab Oliver Cowdery xav ua kev cai raus dej, tiam sis nkawd tsis muaj txoj cai ua li ntawd. Thaum lub Tsib Hlis Ntuj 15, 1829, nkawd thov Vajtswv thiab Yauhas tus uas Muab Neeg Ua Kev Cai Raus Dej tuaj xyuas, es nws muab cov yawm sij thiab txoj cai ntawm lub Pov Thawj Hwj Aloos rau nkawd, hais tias: “Rau neb kuv ob tug kwv luag tub qhe, los ntawm Mexiyas lub npe, kuv muab lub Pov Thawj Hwj Aloos rau neb, uas tuav cov yawm sij ntawm cov tim tswv tej kev los txhawb pab, thiab ntawm txoj moo zoo ntawm kev hloov siab lees txim, thiab ntawm kev cai raus dej uas ua rau neeg txais kev zam txim rau tej kev txhaum.” (Lus Qhuab Qhia thiab Kev Khi Lus 13).
Peb muaj cib fim txhawb pab lwm tus li cov tim tswv, qhia txoj moo zoo nyob hauv txhua thaj av ntawm lub ntiaj teb, thiab pab tib neeg los cuag Khetos. Kev ua hauj lwm li no yog kev koom nrog Yauhas tus uas Muab Neeg Ua Kev Cai Raus Dej, Maulaunais, Joseph Smith, Thawj Tswj Hwm Russell M. Nelson, thiab tus Tswv lwm tus tub qhe uas rau siab heev ua hauj lwm.
Peb txoj hauj lwm uas siv Nws lub pov thawj hwj ua rau cov uas rau siab ntso coj raws nraim li tus Tswv tej lus qhia koom ua ke, yog ib qho kuv paub tias yog ib qho nyuaj heev vim peb cov hluas raug teeb meem. Tiam sis kev koom nrog tus Tswv cov tub qhe kom ua Nws txoj hauj lwm yuav pab peb muaj zog tiv taus tus yeeb ncuab tej kev dag ntxias. Nej yuav ua ib txoj kev kaj rau tag nrho cov uas tsis paub txog lawv tus kheej. Txoj kev kaj nyob hauv nej yuav ci ntsa iab kom txhua tus uas nej ntsib yuav tau koob hmoov vim lawv koom nrog nej xwb. Tej zaum yuav nyuaj rau peb paub tias thaum twg muaj tus ntsuj plig koom nrog peb, tiam sis kuv zoo siab paub tias kuv yog ib tug hauv ib pawg pov thawj hwj rau siab ntseeg ib pawg uas kuv nrog lawv mus cuag Khetos.
Nrog peb cov phooj ywg thiab tsev neeg, tus Vaj Ntsuj Plig Dawb Huv yog ib tug khub uas nrog nraim peb. Tiam sis yog xav kom Nws nrog nraim peb nyob tas li, peb yuav tsum nyob hauv tej qhov chaw thiab ua tej yam uas ua rau Nws xav nyob thiab. Peb pib ua li no nyob hauv peb tsev, thaum peb hloov peb lub tsev ua ib qho chaw dawb huv los ntawm tsev neeg kev kawm vaj lug kub txhua hnub thiab tsev neeg kev thov Vajtswv ua ke, thiab qhov tseem ceeb kev kawm vaj lug kub thiab kev thov Vajtswv ntawm yus ib leeg.
Xyoo no, kuv tau muaj cib fim pab kuv tus muam, Oceane, taug nws txoj kev ua kev khi lus thaum nws tau ua kev cai raus dej thiab tau ua ib yam uas yuav tsum ua kom nkag tau hauv lub nceeg vaj xilethi-aus. Nws tos ib lub hlis ua kev cai raus dej, mus txog thaum kuv raug tsa ua ib tug pov thawj, kuv thiaj muaj cib fim ua kab ke no thaum wb ob tug muam muaj cib fim nyob ua pov thawj txog kab ke no. Thaum wb sawv ob sab ntawm lub dab raus dej, thiab npaj nkag hauv cov dej, kuv pom tias nws zoo siab heev, ib yam li kuv. Thiab kuv koom siab nrog nws vim wb pom tias nws txiav txim siab raws li qhov yog. Kuv yuav tsum ua tib zoo ua raws li txoj moo zoo thiab tsis txhob lam tau lam ua kuv thiaj li muaj cib fim siv lub pov thawj hwj no. Xwv kom npaj, kuv twb mus rau lub tuam tsev txhua hnub lub lim tiam ntawd, es kuv niam, pog, thiab muam, tau nrog kuv mus ua kev cai raus dej rau cov tuag.
Lub sij hawm no tau qhia ntau yam rau kuv txog lub pov thawj hwj thiab kuv yuav tsum ua li cas kom tsim nyog siv. Kuv paub tias txhua tus uas tuav lub pov thawj hwj yuav hnov zoo ib yam li kuv hnov yog tias peb ua raws li Nifais tus yam ntxwv kom “mus thiab ua” (saib 1 Nifais 3:7). Peb yuav tsum tsis txhob zaum twj ywm thiab xav tias tus Tswv yuav siv peb ua Nws txoj hauj lwm tseem ceeb. Peb yuav tsum tsis txhob tos cov uas xav tau peb txoj kev pab nrhiav peb; peb tes num vim peb tuav lub pov thawj hwj yog kom coj yam ntxwv thiab ua tim khawv txog Vajtswv. Yog peb ua tej yam uas yuav ua rau peb tsis vam meej mus ib txhis, peb yuav tsum hloov siab tam sim no. Dab Ntxwg Nyoog yuav sim ua kom peb nyob raws li sab cev nqaij daim tawv kom peb nrhiav tej yam me me. Tiam sis kuv paub yog peb yuav rau siab, nrhiav cov uas yuav txhawb nqa peb, thiab hloov siab lees txim txhua hnub, ces peb yuav tau koob hmoov zoo kawg thiab peb lub neej yuav hloov thaum peb txiv mus lawm tom hauv ntej taug txoj kev ua raws li peb tej kev khi lus.
Kuv paub tias nov yog Yexus Khetos lub Koom Txoos tseeb, Nws yog peb tus Cawm Seej uas tau muab cov yawm sij ntawm lub pov thawj hwj rau Nws cov Tim Thawj uas coj peb, qhov tseem ceeb yog nyob hauv lub caij nyoog nyuaj heev, thiab npaj lub ntiaj teb rau Nws txoj kev rov los.
Kuv paub tias Joseph Smith yog tus yaj saub ntawm Kev Muab Txoj Moo Zoo Txum Tim Rov Qab Los thiab Thawj Tswj Hwm Nelson yog peb tus yaj saub niaj hnub no. Kuv caw peb txhua tus kawm txog ob tug uas tuav lub pov thawj hwj lub neej thiab nrhiav kev kom ua neeg zoo dua txhua hnub peb thiaj yuav npaj siab ntsib tus uas tau Tsim peb. Los ntawm Yexus Khetos lub npe, amees.