Los Cuag Khetos—Kev Ua Tsoom Haiv Neeg Ntseeg hauv Hnub Nyoog Kawg
Peb yuav muaj peev xwm ua tej yam nyuaj thiab pab lwm tus ua ib yam, vim peb paub peb tso siab rau leej twg.
Ua tsaug, Txwj Laug Soares, rau koj zaj lus tim khawv uas muaj hwj chim thiab tshoov peb lub siab txog Phau Ntawv Maumoos. Tsis ntev tas los, kuv muaj cib fim tuav ib phab ntawv ntawm cov ntawv uas siv kom sau Phau Ntawv Maumoos. Nyob hauv phab ntwav no, yog thawj zaug hauv lub caij nyoog no, uas tau sau Nifais cov lus no: “Kuv yuav mus thiab ua tej uas tus Tswv tau txib kom ua, vim kuv paub tias tus Tswv yeej tsis muab tej lus txib rau noob neej ua ib yam dab tsi li, tsuas yog nws twb npaj ib txoj kev rau lawv xwv kom lawv yuav ua tau yam uas nws txib lawv ua.”1
Thaum kuv tuav phab ntawv no, ua rau kuv ris Joseph Smith txiaj heev vim rau qhov thaum nws muaj 23 xyoos xwb, nws tau txhais Phau Ntawv Maumoos “los ntawm Vajtswv lub txiaj ntsim thiab lub hwj chim.”2 Kuv kuj ris Nifais txiaj rau nws tej lus uas nws hais thaum tus Tswv tau hais kom nws ua ib txoj hauj lwm nyuaj heev mus muab cov phiaj toog los ntawm Lanpas.
Nifais paub tias yog nws tsom ntsoov rau tus Tswv, nws yeej yuav muaj peev xwm ua raws li qhov uas tus Tswv txib nws ua. Nws twb tsom ntsoov rau tus Cawm Seej tas nws lub neej tsis hais thaum nws raug kev ntxias, raug kev sim siab ntawm sab cev nqaij daim tawv, thiab tsis hais nws tsev neeg ib txhia ntxeev siab rau nws.
Nifais paub tus uas nws yuav tso siab rau.3 Tsis ntev tom qab nws hais tias, “Auj kuv yog ib tug neeg uas nyuaj siab kawg! Muaj tseeb tiag, kuv tu siab vim yog kuv cev nqaij daim tawv,”4 Nifais hais tias, “Kuv tus Vajtswv tau txhawb kuv lub zog; nws tau coj kuv dhau kuv tej kev txom nyem nyob rau hauv roob moj sab qhua; thiab nws tau tsom kwm kuv thaum kuv nyob rau saum tej dej tob heev.”5
Vim peb yog cov uas coj raws li Khetos, tsis yog peb yuav dim tej teeb meem thiab tej kev sim siab hauv peb lub neej. Peb yeej yuav tsum ua tej yam nyuaj heev, yog peb ua peb tus kheej ces ntshe peb tsis muaj peev xwm ua hlo li. Thaum peb ua raws li tus Cawm Seej tej lus caw peb “los cuag kuv,”6 Nws yuav muab kev txhawb nqa, kev nplij siab, thiab kev kaj siab lug rau peb, ib yam li Nws tau ua rau Nifais thiab Yauxej. Txawm peb raug kev sim siab loj heev, peb tseem yuav muaj Nws txoj kev hlub thaum peb tso siab rau Nws thiab ua raws li Nws lub siab nyiam. Peb yuav muaj kev xyiv fab uas Nws tau pub rau Nws cov thwj tim rau siab ntseeg, vim Khetos yeej yog kev xyiv fab.7
Thaum xyoo 2014, thaum saib xyuas ib qhov chaw tshaj tawm txoj moo zoo, peb tsev neeg rau ib qho xwm txheej. Thaum nws caij ib daim txiag ntoo uas muaj log, wb tus tub ntxawg vau thiab raug nws lub hlwb mob heev ntshe nws yuav tuag. Thaum nws pib mob zuj zus tuaj, cov kwv kho mob coj nws mus phais mob xwm txheej ceev.
Peb tsev neeg tau txhos caug hauv ib chav kho mob, thiab peb tau thov Vajtswv kawg siab kawg ntsws. Thaum lub sij hawm nyuaj siab txhawj xeeb no, peb tau muaj Leej Txiv Saum Ntuj Ceeb Tsheej txoj kev hlub thiab kev kaj siab lug puv npo.
Peb tsis tau paub yav tom ntej yuav zoo li cas thiab tsis paub xyov kuv tus tub puas yuav muaj txoj sia tom qab no. Tiam sis peb twb paub tias nws lub neej nyob hauv Vajtswv txhais tes, thiab zoo li cas los, yog xav txog kev nyob mus ib txhis, ces thaum kawg yuav zoo rau nws thiab peb. Los ntawm lub txiaj ntsim tus Ntsuj Plig, peb twb npaj siab lees yuav dab tsi uas tshwm sim los.
Qhov no yeej tsis yooj yim! Kev nyob hauv lub tsev kho mob tau ob lub hlis thaum wb ua hauj lwm saib xyuas 400 tus tub txib. Wb tus tub tsis nco qab ntau yam. Nws txoj kev kho kom rov zoo los muaj ntau zaus uas lawv pab txhawb nqa nws sab cev nqaij daim tawv, txoj kev hais lus, thiab txoj kev ua tau hauj lwm. Tseem muaj teeb meem thiab, tiam sis sij hawm dhau mus ces peb pom ib qho txuj ci tseem ceeb.
Peb to taub tias tsis yog txhua txoj kev sim siab yuav tiav raws li peb nyiam. Tiam sis, thaum peb tsom ntsoov rau Khetos, peb yuav nyob kaj siab lug thiab pom Vajtswv tej txuj ci tseem ceeb, txawm yog li cas los, raws li Nws lub sij hawm thiab raws li Nws txoj kev.
Yuav muaj tej lub sij hawm thaum peb yuav tsis txawj pom txoj kev uas ib qho xwm txheej yuav tiav thiab tej zaum peb yuav hais zoo li Nifais hais tias, “Kuv tu siab vim yog kuv cev nqaij daim tawv.”8 Tej lub sij hawm peb tib txoj kev cia siab yeej yog Yexus Khetos ib leeg xwb. Yog ib txoj koob hmoov vim peb muaj kev cia siab thiab kev tso siab rau Nws. Khetos yog tib tug uas yeej yuav ua raws li Nws tej lus cog tseg. Txhua tus uas los cuag Nws yuav tau so.9
Peb cov thawj coj xav xav kom txhua tus muaj kev kaj siab lug thiab kev nplij siab uas los ntawm kev tso siab rau tus Cawm Seej Yexus Khetos.
Peb tus yaj saub, Thawj Tswj Hwm Russell M. Nelson, qhia peb txog tus Tswv lub zeem muag rau neeg ntiaj teb thiab cov mej zeej hauv Khetos lub Koom Txoos: “Peb zaj lus rau lub ntiaj teb [thiab kuv ntxiv tej lus no, ‘rau peb pab yaj uas mus txhawb pab’] yeej yooj yim thiab ncaj ncees: peb caw tag nrho Vajtswv cov me nyuam nyob ob sab ntawm daim ntaub thaiv kom los cuag lawv tus Cawm Seej, txais cov koob hmoov ntawm lub tuam tsev dawb huv, muaj kev xyiv fab, thiab ua neeg tsim nyog txais txoj sia nyob mus ib txhis.”10
Kev caw “los cuag Khetos” no yeej tseem ceeb rau Tsoom Haiv Neeg Ntseeg hauv Hnub Nyoog Kawg.11 Vim peb yog cov mej zeej hauv tus Cawm Seej lub Koom Txoos, peb twb tau khi lus rau Nws thiab tau los ua Nws cov tub thiab cov ntxhais ntawm sab ntsuj plig.12 Peb kuj tau muaj cib fim ua hauj lwm nrog tus Tswv thaum peb caw lwm tus los cuag Nws.
Thaum peb ua hauj lwm nrog Khetos, peb yuav tsum siv zog ntau tshaj plaws nyob hauv peb tsev. Yuav muaj tej lub sij hawm thaum peb tsev neeg thiab cov phooj ywg yuav raug teeb meem. Neeg ntiaj teb tej lub suab, thiab tej zaum lawv tej kev xav, yuav ua rau lawv tsis ntseeg qhov tseeb. Peb yuav tsum ua txhua yam peb ua tau kom lawv hnov tus Cawm Seej txoj kev hlub thiab peb txoj kev hlub. Ua rau kuv nco txog nqe vaj lug kub nyob hauv zaj nkauj qhuas Vajtswv hu ua “Ib Leeg Hlub Ib Leeg” uas qhia peb, “Li no sawv daws paub nej yog kuv cov thwj tim, yog hais tias nej ib leeg hlub ib leeg.”13
Thaum peb hlub cov uas tsis ntseeg qhov tseeb, tej zaum tus yeeb ncuab rau txhua yam kev xyiv fab yuav kom peb xav tias peb ntxeev siab rau cov uas peb hlub yog tias peb tseem ua raws li txoj moo zoo thiab qhia tej yam tseeb.
Peb txoj kev txawj pab lwm tus los cuag Khetos los sis rov los cuag Khetos yuav nyob ntawm seb peb puas coj yam ntxwv zoo thaum peb taug raws nraim li txoj kev ua raws li peb tej kev khi lus.
Yog tias peb xav cawm cov uas peb hlub, peb yuav tsum nrog nraim Khetos nyob, thaum peb muab siab npuab Nws lub Koom Txoos thiab Nws txoj moo zoo uas muaj txhij txhua.
Kuv rov qab hais txog Nifais zaj, es peb paub tias Nifais txoj kev xav tso siab rau tus Tswv yog los ntawm nws niam nws txiv txoj kev tso siab rau tus Tswv thiab nkawd txoj kev ua raws kev khi lus. Tus yam ntxwv txog qhov no los muaj hauv Lihais txoj kev ua yog toog pom tus ntoo uas cawm txoj sia. Tom qab nws noj cov txiv ntoo uas qab zib thiab zoo siab, Lihais “tsa qhov muag ntsia ib puag ncig, saib puas pom [nws] tsev neeg.”14 Nws pom Xaliyas, Xam, thiab Nifais “sawv ntsug zoo li lawv tsis paub xyov lawv yuav mus qhov twg.”15 Ces Lihais hais tias, “Kuv co tes rau lawv; thiab kuv kuj tau tsa suab hais nrov nrov rau lawv kom lawv yuav los cuag kuv, thiab los noj cov txiv.”16 Cia li nco qab tias Lihais tsis tau ncaim tus ntoo uas cawm txoj sia. Nws nyob nrog nraim tus Tswv thiab caw nws tsev neeg los txog qhov chaw uas nws nyob kom noj cov txiv.
Tus yeeb ncuab yuav ntxias ib txhia kom lawv khiav ntawm txoj moo zoo txoj kev xyiv fab thaum lawv muab Khetos tej lus qhia thiab Nws lub Koom Txoos sib faib. Nws xav kom peb ntseeg tias peb tseem yuav taug txoj kev ua raws li peb tej kev khi lus nyob peb tus kheej, tsis tas nyob hauv Nws lub Koom Txoos.
Nyob hauv hnub nyoog kawg no, tau muab Khetos lub Koom Txoos txum tim rov qab los kom pab Khetos cov me nyuam ntawm kev khi lus taug raws nraim Nws txoj kev khi lus.
Nyob hauv phau Lus Qhuab Qhia thiab Kev Khi Lus peb nyeem, “Saib seb, nov yog kuv txoj lus qhuab qhia—tus uas hloov siab lees txim thiab los cuag kuv, ces tus ntawd yog kuv lub koom txoos.”17
Nyob hauv Khetos lub Koom Txoos, peb txais dag zog los ntawm tej yam uas peb ua ib ke nrog Haiv Neeg Ntseeg. Peb mloog Nws lub suab los ntawm Nws cov yaj saub, cov pom tau, thiab cov txais kev tshwm sim. Qhov tseeb tshaj plaws, los ntawm Nws lub Koom Txoos peb thiaj txais tau cov koob hmoov tseem ceeb ntawm Khetos txoj Kev Theej Txhoj uas yuav muaj tsuas yog peb ua cov kab ke dawb ceev.
Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Khetos lub Koom Txoos hauv lub ntiaj teb, uas tau muab txum tim rov qab los kom pub txiaj ntsim rau Vajtswv cov me nyuam txhua leej txhua tus.
Kuv ua tim khawv tias thaum peb los cuag Khetos thiab ua neej raws li Tsoom Haiv Neeg Ntseeg hauv Hnub Nyoog Kawg, peb yuav tau koob hmoov muaj Nws txoj kev hlub, Nws txoj kev xyiv fab, thiab Nws txoj kev kaj siab lug ntxiv. Ib yam li Nifais, peb yuav muaj peev xwm ua tej yam nyuaj thiab pab lwm tus ua ib yam, vim peb paub peb tso siab rau leej twg.18 Khetos yog peb txoj kev kaj, peb txoj sia, thiab peb txoj kev cawm seej.19 Los ntawm Yexus Khetos lub npe, amees.