តើព្រះវិញ្ញាណបរិសុទ្ធជួយបងប្អូនតាមរបៀបណា ?
ព្រះវិញ្ញាណបរិសុទ្ធព្រមាន ព្រះវិញ្ញាណបរិសុទ្ធលួងលោមចិត្ត ហើយព្រះវិញ្ញាណបរិសុទ្ធថ្លែងទីបន្ទាល់ ។
នាល្ងាចថ្ងៃចន្ទថ្មីៗនេះ ភរិយាខ្ញុំ ឡេសា និងខ្ញុំបានទៅលេងគ្រួសារវ័យក្មេងមួយដែលជាអ្នកជិតខាងយើង ។ កាលយើងនៅទីនោះ គ្រួសារនោះបានអញ្ជើញយើងឲ្យចូលរួមរាត្រីជួបជុំក្រុមគ្រួសារ ដោយប្រាប់យើងថា កូនប្រុសពួកគេអាយុប្រាំបួនឆ្នាំបានរៀបចំមេរៀន ។ ប្រាកដណាស់ យើងបានចូលរួម !
បន្ទាប់ពីចម្រៀងបើក ការអធិស្ឋាន និងកិច្ចការគ្រួសារ នោះក្មេងប្រុសអាយុប្រាំបួនឆ្នាំនោះបានចាប់ផ្ដើមដោយអានសំណួរដ៏ស៊ីជម្រៅមួយមានក្នុងមេរៀនដែលគាត់បានសរសេរដោយដៃថា « តើព្រះវិញ្ញាណបរិសុទ្ធជួយបងប្អូនតាមរបៀបណា ? » សំណួរនេះបានចាប់ផ្ដើមការពិភាក្សាជាគ្រួសារដ៏មានន័យមួយ ព្រោះមនុស្សគ្រប់គ្នាបានចែកចាយគំនិត និងទស្សនៈនានា ។ ខ្ញុំបានស្ងើចសរសើរចំពោះការរៀបចំមេរៀនរបស់គ្រូបង្រៀនយើង និងសំណួរដ៏ល្អបំផុតរបស់គាត់ ដែលធ្វើឲ្យខ្ញុំរំជួលចិត្តម្ដងហើយម្ដងទៀត ។
ចាប់ពីពេលនោះមក ខ្ញុំបានបន្តសួរខ្លួនឯងថា « តើព្រះវិញ្ញាណបរិសុទ្ធជួយបងប្អូនតាមរបៀបណា ? »—ពិសេសជាសំណួរមួយដែលទាក់ទងនឹងកុមារដែលឈានចូលអាយុប្រាំបីឆ្នាំ ហើយកំពុងរៀបចំខ្លួនសម្រាប់បុណ្យជ្រមុជទឹក និងសម្រាប់កុមារដែលទើបជ្រមុជទឹក ហើយទទួលអំណោយទាននៃព្រះវិញ្ញាណបរិសុទ្ធថ្មីៗ ។ វាជារឿងទាក់ទងគ្នានឹងអ្នកផ្លាស់ប្រែចិត្តជឿថ្មីៗរាប់ពាន់នាក់ផងដែរ ។
ខ្ញុំសូមអញ្ជើញយើងម្នាក់ៗ ជាពិសេសកុមារឲ្យពិចារណាថា « តើព្រះវិញ្ញាណបរិសុទ្ធជួយបងប្អូនតាមរបៀបណា ? » ពេលខ្ញុំបានពិចារណាសំណួរនេះ ខ្ញុំបាននឹកឃើញភ្លាមពីបទពិសោធន៍មួយកាលពីខ្ញុំនៅក្មេង ។ នេះគឺជាដំណើររឿងមួយដែលខ្ញុំបានលើកឡើងពីអែលឌើរ រ៉ូបឺត ឌី ហែល នៅមិនយូរប៉ុន្មានក្រោយពី ខ្ញុំត្រូវបានហៅមកក្នុងកូរ៉ុមនៃពួកសាវកដប់ពីរនាក់ ហើយដែលលោកបានសរសេរអត្ថបទមួយអំពីជីវប្រវត្តិខ្ញុំ ហើយវាត្រូវបានបោះពុម្ពក្នុងទស្សនាវដ្ដីសាសនាចក្រ ។១ បងប្អូនមួយចំនួនប្រហែលជាធ្លាប់ឮរឿងនេះហើយ ប៉ុន្តែភាគច្រើនពុំឮនៅឡើយទេ ។
កាលខ្ញុំអាយុប្រហែល១១ ឆ្នាំ លោកឪពុកខ្ញុំ និងខ្ញុំបានទៅឡើងភ្នំនៅជិតផ្ទះរបស់យើង នៅថ្ងៃមួយដ៏ក្ដៅហែង ។ កាលលោកឪពុកខ្ញុំឡើងលើផ្លូវចោត ខ្ញុំបានលោតពីថ្មធំមួយទៅថ្មធំមួយទៀតដែលមាននៅតាមដងផ្លូវនោះ ។ ដោយចង់តោងឡើងថ្មដ៏ធំមួយ ខ្ញុំបានចាប់ផ្ដើមប្រវេសប្រវាសតោងផ្នែកខាងលើនេះថ្មនោះ ។ កាលខ្ញុំបានធ្វើដូច្នេះ ខ្ញុំបានភ្ញាក់ផ្អើលកាលលោកឪពុកខ្ញុំបានចាប់ខ្សែក្រវ៉ាត់ខ្ញុំ ហើយទាញខ្ញុំចុះក្រោមភ្លាម ដោយពោលថា « កុំឡើងទៅលើថ្មនោះអី ។ ចូរយើងបន្តដើរតាមផ្លូវនេះវិញ » ។
ប៉ុន្មាននាទីក្រោយមកទៀត កាលយើងបានមើលតាមផ្លូវនោះពីលើចុះមកក្រោម យើងមានការភ្ញាក់ផ្អើលកាលយើងបានឃើញពស់កន្ទុយកណ្ដឹងធំមួយកំពុងហាលថ្ងៃនៅលើថ្មដែលខ្ញុំបានចង់តោងឡើងនោះ ។
ក្រោយមកកាលយើងបានបើកឡានត្រឡប់ទៅផ្ទះវិញ ខ្ញុំបានដឹងថាលោកឪពុកខ្ញុំកំពុងរង់ចាំឲ្យខ្ញុំសួរថា « តើលោកពុកបានដឹងថា ពស់នៅទីនោះបានយ៉ាងដូចម្ដេច ? » ដូច្នេះខ្ញុំបានសួរ ហើយសំណួរខ្ញុំបាននាំទៅរកការពិភាក្សាមួយអំពីព្រះវិញ្ញាណបរិសុទ្ធ និងរបៀបដែលព្រះវិញ្ញាណបរិសុទ្ធអាចជួយយើង ។ ខ្ញុំពុំភ្លេចពីអ្វីដែលខ្ញុំបានរៀនថ្ងៃនោះឡើយ ។
តើបងប្អូនអាចមើលឃើញពីរបៀបដែលព្រះវិញ្ញាណបរិសុទ្ធបានជួយខ្ញុំដែរទេ ? ខ្ញុំមានអំណរគុណជារៀងរហូតថា លោកឪពុកខ្ញុំបានស្ដាប់សំឡេងដ៏តូចរហៀងនៃព្រះវិញ្ញាណបរិសុទ្ធ ដែលបានជួយសង្គ្រោះជីវិតខ្ញុំ ។
អ្វីដែលយើងដឹង អំពីព្រះវិញ្ញាណបរិសុទ្ធ
ពីមុនយើងពិចារណាបន្ថែមទៀតលើសំណួរថា « តើព្រះវិញ្ញាណបរិសុទ្ធជួយបងប្អូនតាមរបៀបណា ? » ចូរយើងរំឭកអ្វីដែលព្រះអម្ចាស់បានបើកសម្ដែងអំពីព្រះវិញ្ញាណបរិសុទ្ធ ។ មានសេចក្ដីពិតអស់កល្បជាច្រើនដែលយើងគួរមើល ប៉ុន្តែនៅថ្ងៃនេះខ្ញុំនឹងគូសបញ្ជាក់តែបីប៉ុណ្ណោះ ។
ទីមួយ ព្រះវិញ្ញាណបរិសុទ្ធគឺជាសមាជិកទីបីក្នុងក្រុមព្រះ ។ យើងរៀនសេចក្ដីពិតនេះនៅក្នុងមាត្រាទីមួយនៃសេចក្ដីជំនឿថា « យើងខ្ញុំជឿដល់ព្រះ គឺព្រះវរបិតាដ៏គង់នៅអស់កល្បជានិច្ច និងដល់ព្រះរាជបុត្រាទ្រង់ គឺព្រះយេស៊ូវគ្រីស្ទ ហើយដល់ព្រះវិញ្ញាណបរិសុទ្ធ » ។២
ទីពីរ ព្រះវិញ្ញាណបរិសុទ្ធគឺជាតួអង្គនៃវិញ្ញាណ មួយអង្គ ដូចដែលបានពិពណ៌នាក្នុងបទគម្ពីរសម័យទំនើបថា « ព្រះវរបិតា ទ្រង់មានព្រះកាយជាសាច់ និង ឆ្អឹង ដែលជាក់ស្ដែងដូចជារូបកាយមនុស្ស ព្រះរាជបុត្រាដ៏ដូច្នោះដែរ ប៉ុន្តែព្រះវិញ្ញាណបរិសុទ្ធពុំមានព្រះកាយជាសាច់ និង ឆ្អឹងឡើយ តែមានរូបជាវិញ្ញាណវិញ ។ បើពុំនោះទេ ព្រះវិញ្ញាណបរិសុទ្ធពុំអាចសណ្ឋិតនៅក្នុងយើងបានឡើយ » ។៣ នេះមានន័យថា ព្រះវិញ្ញាណបរិសុទ្ធមានរូបកាយជាវិញ្ញាណ ពុំដូចជាព្រះវរបិតា និងព្រះយេស៊ូវគ្រីស្ទដែលមានព្រះកាយនោះទេ ។ សេចក្ដីពិតនេះបញ្ជាក់ពីឈ្មោះផ្សេងទៀតដែលបានផ្ដល់ឲ្យព្រះវិញ្ញាណបរិសុទ្ធ ហើយដែលយើងស្គាល់ រួមមាន ព្រះវិញ្ញាណបរិសុទ្ធ ព្រះវិញ្ញាណនៃព្រះ ព្រះវិញ្ញាណនៃព្រះអម្ចាស់ ព្រះវិញ្ញាណបរិសុទ្ធនៃសេចក្ដីសន្យា និងព្រះដ៏ជាជំនួយ ។៤
ទីបី អំណោយទាននៃព្រះវិញ្ញាណបរិសុទ្ធកើតមានដោយការដាក់ដៃលើ ។ ពិធីបរិសុទ្ធនេះដែលទទួលបានបន្ទាប់ពីបុណ្យជ្រមុជទឹក ធ្វើឲ្យយើងមានគុណសម្បត្តិធ្វើជាជាដៃគូដ៏ខ្ជាប់ខ្ជួននៃព្រះវិញ្ញាណបរិសុទ្ធ ។៥ ដើម្បីធ្វើពិធីបរិសុទ្ធនេះ ពួកអ្នកកាន់បព្វជិតភាពម៉ិលគីស្សាដែកដែលសក្ដិសមដាក់ដៃលើក្បាលរបស់បុគ្គលម្នាក់ ហៅឈ្មោះគាត់ ថ្លែងពីសិទ្ធិអំណាចបព្វជិតភាពរបស់ពួកគាត់ ៦ និងនៅក្នុងព្រះនាមនៃព្រះយេស៊ូវគ្រីស្ទ បញ្ជាក់គាត់ជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ហើយបន្លឺឃ្លាដ៏សំខាន់ថា « ចូរទទួលព្រះវិញ្ញាណបរិសុទ្ធចុះ » ។
តើព្រះវិញ្ញាណបរិសុទ្ធជួយបងប្អូនតាមរបៀបណា ?
ជាមួយនឹងការរំឭកដ៏សាមញ្ញនៃសេចក្ដីពិតសំខាន់ទាំងបីនោះអំពីព្រះវិញ្ញាណបរិសុទ្ធ សូមយើងត្រឡប់ទៅសំណួរទីមួយរបស់យើងវិញ ៖ « តើព្រះវិញ្ញាណបរិសុទ្ធជួយបងប្អូនតាមរបៀបណា ? » ។
ព្រះវិញ្ញាណបរិសុទ្ធព្រមាន
ដូចដែលខ្ញុំបានរៀបរាប់ពីបទពិសោធន៍ខ្ញុំកាលពីក្មេង ព្រះវិញ្ញាណបរិសុទ្ធអាចជួយបងប្អូនដោយការព្រមានបងប្អូនជាមុនពីគ្រោះថ្នាក់ខាងរូបកាយ និងខាងវិញ្ញាណ ។ ខ្ញុំបានរៀនជាថ្មីអំពីតួនាទីព្រមានដ៏សំខាន់របស់ព្រះវិញ្ញាណបរិសុទ្ធកាលខ្ញុំបម្រើក្នុងគណៈប្រធានតំបន់នៅប្រទេសជប៉ុន ។
អំឡុងពេលនេះ ខ្ញុំបានធ្វើការយ៉ាងជិតស្និទ្ធនឹងប្រធានរៀឌ តាតេអូកា ជាប្រធានបេសកកម្មសេនដៃ ប្រទេស ជប៉ុន ។ ជាផ្នែកមួយនៃទម្លាប់បេសកកម្មជាធម្មតារបស់គាត់ ប្រធាន តាតេអូកា បានគ្រោងការប្រជុំមួយសម្រាប់ថ្នាក់ដឹកនាំបេសកកម្មនៅភាគខាងត្បូងបេសកកម្មរបស់គាត់ ។ ពីរបីថ្ងៃពីមុនការប្រជុំនោះ ប្រធាន តាតេអូកា មានអារម្មណ៍មួយ ជាអារម្មណ៍ក្នុងចិត្តគាត់ ដើម្បីអញ្ជើញពួកអ្នកផ្សព្វផ្សាយសាសនាចក្រទាំងអស់នៃតំបន់ភាគខាងត្បូងនោះមកការប្រជុំថ្នាក់ដឹកនាំ ជំនួសឲ្យការមានថ្នាក់ដឹកនាំជាអែលឌើរ និងស៊ិស្ទើរតែមួយចំនួនតូចនោះ ។
កាលគាត់បានប្រកាសពីបំណងរបស់គាត់ មានគេរំឭកគាត់ថា ការប្រជុំជាក់លាក់នេះគឺពុំមែនរៀបចំឡើងសម្រាប់ពួកអ្នកផ្សព្វផ្សាយសាសនាទាំងអស់ទេ ប៉ុន្តែសម្រាប់តែពួកថ្នាក់ដឹកនាំបេសកកម្មប៉ុណ្ណោះ ។ ប៉ុន្តែ ដោយទុកការព្រមព្រៀងគ្នាមួយអន្លើរសិន ដើម្បីធ្វើតាមការបំផុសគំនិតដែលគាត់បានទទួល នោះគាត់បានអញ្ជើញពួកអ្នកផ្សព្វផ្សាយសាសនាទាំងអស់ដែលកំពុងបម្រើនៅទីក្រុងតាមឆ្នេរសមុទ្រមួយចំនួន រួមទាំងទីក្រុងហ្វុគុស៊ីម៉ាឲ្យមកការប្រជុំនោះដែរ ។ នៅថ្ងៃដែលបានកំណត់គឺថ្ងៃទី១១ ខែមីនា ឆ្នាំ២០១១ ពួកអ្នកផ្សព្វផ្សាយសាសនាបានប្រមូលផ្ដុំគ្នាសម្រាប់ការប្រជុំបេសកកម្មដ៏ធំនៅទីក្រុងដីគោកឈ្មោះកូរីយ៉ាម៉ា ។
អំឡុងការប្រជុំនេះ មានការរញ្ជួយដី និងព្យុះស៊ូណាម៉ិមួយកម្រិត ៩.០ រ៉ិចទ័រ បានបោកបក់លើភូមិភាគនៃទីតាំងរបស់បេសកកម្ម សេនដៃ ប្រទេស ជប៉ុន ។ ជាអកុសល ទីក្រុងនៅតាមឆ្នេរសមុទ្រជាច្រើន—រួមទាំងតំបន់ដែលមានពួកអ្នកផ្សព្វផ្សាយសាសនាផងដែរ—ត្រូវបានបំផ្លិចបំផ្លាញ ហើយរងការបាត់បង់ជីវិតយ៉ាងច្រើន ។ ហើយទីក្រុងហ្វុគុស៊ីម៉ាបានរងនូវការខូចខាតរោងចក្រថាមពលនុយក្លេអ៊ែរជាបន្តបន្ទាប់ ។
ទោះបី ជាសាលាប្រជុំដែលពួកអ្នកផ្សព្វផ្សាយសាសនាបានជួបជុំគ្នានៅថ្ងៃនោះ បានរងការខូចខាតដោយការរញ្ជួយដីនោះក្ដី ក៏ប្រធាន និងស៊ិស្ទើរ តាតេអូកា និងពួកអ្នកផ្សព្វផ្សាយសាសនាទាំងអស់បានប្រមូលផ្ដុំគ្នាដោយសុវត្ថិភាពដែរ តាមរយៈការធ្វើតាមការបំផុសគំនិតមកពី ព្រះវិញ្ញាណបរិសុទ្ធ ។ ពួកគេស្ថិតនៅតំបន់មានសុវត្ថិភាពតែ ប៉ុន្មានគីឡូម៉ែត្រពីការបំផ្លិចបំផ្លាញដោយព្យុះស៊ូណាម៉ិ និងការឆ្លងរោគពីថាមពលនុយក្លេអ៊ែរប៉ុណ្ណោះ ។
កាលបងប្អូនស្ដាប់ការបំផុសគំនិតពីព្រះវិញ្ញាណបរិសុទ្ធ—ជាញឹកញាប់ ជាអារម្មណ៍ស្ងប់ស្ងាត់ និងរហៀងៗ—បងប្អូនអាចត្រូវបានដកចេញពីគ្រោះថ្នាក់ខាងវិញ្ញាណ និងខាងសាច់ឈាមដោយពុំបានដឹងជាមុន ។
បងប្អូនប្រុសស្រី ព្រះវិញ្ញាណបរិសុទ្ធនឹងជួយបងប្អូនដោយព្រមានបងប្អូន ដូចទ្រង់បានព្រមានដល់លោកឪពុកខ្ញុំ និងប្រធានតាតេអូកាដែរ ។
ព្រះវិញ្ញាណបរិសុទ្ធលួងលោមចិត្ត
ដើម្បីបន្តឆ្លើយនឹងសំណួរថា « តើព្រះវិញ្ញាណបរិសុទ្ធជួយបងប្អូនតាមរបៀបណា ? » ឥឡូវចូរយើងរៀនបន្ថែមទៀតពីតួនាទីរបស់ទ្រង់ដែល្ជាព្រះដ៏ជាជំនួយ ។ ព្រឹត្តិការណ៍ដែលពុំបានរំពឹងទុកនានានៅក្នុងជីវិតយើងបណ្ដាលឲ្យមានភាព សោកសៅ ការឈឺចាប់ និងការខកចិត្ត ។ ប៉ុន្តែក្នុងចំណោមនៃការសាកល្បងទាំងនេះ ព្រះវិញ្ញាណបរិសុទ្ធបម្រើយើងក្នុងតួនាទីដ៏សំខាន់មួយរបស់ទ្រង់—គឺជាព្រះដ៏ជាជំនួយ ដែលតាមពិត ជាព្រះនាមមួយរបស់ទ្រង់ ។ ពាក្យអះអាងដ៏សុខសាន្តទាំងនេះមកពីព្រះយេស៊ូវគ្រីស្ទពិពណ៌នាពីតួនាទីដ៏ពិសិដ្ឋនេះថា « ខ្ញុំនឹងទូលសូមដល់ព្រះវរបិតា ហើយទ្រង់នឹងប្រទានព្រះដ៏ជាជំនួយមួយអង្គទៀត មកអ្នករាល់គ្នា ឲ្យបានគង់នៅជាមួយ នៅអស់កល្បរៀងទៅ » ។៧
ដើម្បីបង្ហាញពីរឿងនេះ បន្ថែមទៀត ខ្ញុំសូមចែកចាយដំណើររឿងអំពីគ្រួសារមួយ មានកូនប្រុសប្រាំនាក់ដែលផ្លាស់មកពីរដ្ឋឡូស អាន់ជើលេស កាលីហ្វូញ៉ា ស.រ.អា. មកកាន់សហគមន៍ដ៏តូចមួយកាលពីប៉ុន្មានឆ្នាំមុន ។ កូនប្រុសច្បងពីរនាក់បានចាប់ផ្ដើមកីឡានៅវិទ្យាល័យ ហើយសេពគប់មិត្តភក្ដិ អ្នកដឹកនាំ និងគ្រូបង្វឹក—ដែលភាគច្រើនជាសមាជិកស្មោះត្រង់របស់សាសនាចក្រ ។ ទំនាក់ទំនងទាំងនេះបានជួយដឹកនាំទៅរកបុណ្យជ្រមុជទឹករបស់ហ្វឺណាន់ដូ ជាកូនច្បង និងប្អូនប្រុសបន្ទាប់គាត់ ។
ក្រោយមក ហ្វឺណាន់ដូ បានចេញឆ្ងាយពីគ្រួសារទៅបន្តការអប់រំរបស់គាត់ ហើយលេងបាល់ឱបសម្រាប់សាកលវិទ្យាល័យ ។ គាត់បានរៀបការក្នុងព្រះវិហារបរិសុទ្ធនឹងកំណាន់ចិត្តរៀននៅវិទ្យាល័យជាមួយគ្នាឈ្មោះ ប៊េលី ។ កាលហ្វឺណាន់ដូ និងប៊េលីបានបញ្ចប់ការសិក្សា ពួកគេរង់ចាំយ៉ាងអន្ទះសារដល់កំណើតកូនដំបូងរបស់ពួកគេ—ដែលជាកូនស្រី ។ ប៉ុន្តែក្នុងដំណើរនេះ គ្រួសារពួកគេបានជួយផ្លាស់ហ្វឺណាន់ដូ និងប៊េលីត្រឡប់មកផ្ទះវិញ ប៊េលី និងប្អូនស្រីនាងកំពុងបើករថយន្តនៅលើផ្លូវល្បឿនលឿនមួយ ហើយបានជួបនឹងគ្រោះថ្នាក់មួយដ៏រន្ធត់ដែលបណ្ដាលឲ្យរថយន្តជាច្រើនត្រូវខូចខាត ។ ប៊េលី និងកូនក្នុងផ្ទៃរបស់នាងបានបាត់បង់ជីវិត ។
ប៉ុន្តែទន្ទឹមនឹងការឈឺចាប់ដ៏ជ្រាលជ្រៅរបស់ហ្វឺណាន់ដូ ព្រមទាំងឪពុកម្ដាយ និងសាច់ញាត់របស់ប៊េលីដែរ ភាពសុខសាន្ត និងការលួងលោមចិត្តបានកើតឡើងចំពោះពួកគេភ្លាមៗ ។ ព្រះវិញ្ញាណបរិសុទ្ធនៅក្នុងតួនាទីរបស់ទ្រង់ជាព្រះដ៏ជាជំនួយពិតជាបានគាំទ្រហ្វឺណាន់ដូឲ្យឆ្លងកាត់ការរងទុក្ខដែលពុំអាចថ្លែងបាននេះ ។ ព្រះវិញ្ញាណបានភ្ជាប់ភាពសុខសាន្តអចិន្ត្រៃយ៍មួយដែលបានដឹកនាំហ្វឺណាន់ដូទៅរកឥរិយាបថនៃការអភ័យទោស និងក្ដីស្រឡាញ់ចំពោះអ្នកដែលពាក់ព័ន្ធនៅក្នុងគ្រោះថ្នាក់រថយន្តដ៏រន្ធត់នេះ ។
ឪពុកម្ដាយប៊េលីបានទូរសព្ទប្រាប់ប្អូនប្រុសនាងដែលកំពុងបម្រើបេសកកម្មជាអ្នកផ្សព្វផ្សាយសាសនានៅពេលកើតមានគ្រោះថ្នាក់នោះ ។ គាត់បានពិពណ៌នានៅក្នុងសំបុត្រមួយពីអារម្មណ៍គាត់ ពេលស្ដាប់ឮដំណឹងដ៏អណោចអធមអំពីបងស្រីជាទីស្រឡាញ់របស់គាត់ថា « ការបានស្ដាប់ឮសំឡេងដ៏ស្ងប់របស់ប៉ាម៉ាក់នៅគ្រាដ៏សោកសៅនេះ វាជារឿងអស្ចារ្យណាស់ ។ កូនរកពាក្យអ្វីនឹងថ្លែងពុំបានឡើយ ។ … អ្វីដែលកូនអាចគិតឃើញគឺថា បងស្រីកូនលែងនៅទៀតហើយពេលកូនត្រឡប់ទៅផ្ទះវិញឡើយ ។ … ខ្ញុំបានទទួលការលួងលោមចិត្តពីទីបន្ទាល់ដ៏រឹងមាំរបស់ប៉ាម៉ាក់អំពីព្រះអង្គសង្គ្រោះ និងផែនការទ្រង់ ។ វិញ្ញាណដ៏ផ្អែមល្ហែមដូចគ្នាដែលធ្វើឲ្យខ្ញុំស្រក់ទឹកភ្នែកកាលខ្ញុំសិក្សា ហើយបង្រៀនដំណឹងល្អបានបំពេញដួងចិត្តខ្ញុំ ។ បន្ទាប់មកខ្ញុំបានលួងលោមចិត្ត ហើយបានរំឭកពីរឿងដែលខ្ញុំដឹង » ។៨
ព្រះវិញ្ញាណបរិសុទ្ធនឹងជួយបងប្អូនដោយលួងលោមចិត្តបងប្អូន ដូចទ្រង់បានលួងលោមហ្វឺណាន់ដូ និងគ្រួសាររបស់ប៊េលីដែរ ។
ព្រះវិញ្ញាណបរិសុទ្ធថ្លែងទីបន្ទាល់
ព្រះវិញ្ញាណបរិសុទ្ធក៏ថ្លែងទីបន្ទាល់ និងសាក្សីអំពីព្រះវរបិតា និងព្រះរាជបុត្រា ព្រមទាំងអំពីសេចក្ដីពិតទាំងអស់ផងដែរ ។៩ ព្រះអម្ចាស់បានមានបន្ទូលទៅពួកសិស្សរបស់ទ្រង់ថា « ប៉ុន្តែកាលណាព្រះដ៏ជាជំនួយទ្រង់យាងមក ដែលខ្ញុំនឹងចាត់មកពីព្រះវរបិតា … នោះទ្រង់នឹងធ្វើបន្ទាល់ពីខ្ញុំ » ។១០
ដើម្បីពិពណ៌នាអំពីតួនាទីដ៏មានតម្លៃរបស់ព្រះវិញ្ញាណបរិសុទ្ធជាសាក្សី ខ្ញុំនឹងបន្តដំណើររឿងរបស់ហ្វឺណាន់ដូ និងប៊េលី ។ ប្រសិនបើបងប្អូននៅចាំ ខ្ញុំបានចែកចាយថា ហ្វឺណាន់ដូ និងប្អូនប្រុសគាត់បានជ្រមុជទឹក ប៉ុន្តែឪពុកម្ដាយគាត់ និងប្អូនប្រុសបីនាក់ទៀតពុំជ្រមុជទឹកទេ ។ ហើយទោះជាទទួលបានការអញ្ជើញជាច្រើនដងឲ្យជួបនឹងពួកអ្នកផ្សព្វផ្សាយសាសនាអស់ជាច្រើនឆ្នាំក្ដី ក៏គ្រួសារនេះបានបដិសេធគ្រប់ពេល ។
នៅគ្រានៃមរណភាពរបស់ប៊េលី និងចៅស្រី គ្រួសាររបស់ហ្វឺណាន់ដូមានការខូចចិត្តយ៉ាងខ្លាំង ។ មិនដូចជាហ្វឺណាន់ដូ និងគ្រួសាររបស់ប៊េលីទេ ពួកគាត់រកពុំឃើញការលួងលោមចិត្ត និងភាពសុខសាន្តឡើយ ។ ពួកគាត់មិនយល់ថាតើកូនប្រុសរបស់ពួកគាត់ ព្រមទាំងគ្រួសាររបស់ប៊េលីអាចទ្រាំទ្រនឹងបន្ទុកដ៏ធ្ងន់របស់ពួកគេតាមរបៀបណាឡើយ ។
នៅទីបំផុតពួកគាត់បានយល់ពី អ្វីដែលកូនប្រុសពួកគាត់មាន និងអ្វីដែលពួកគាត់គ្មាន គឺជាដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ហើយនេះត្រូវតែជាប្រភពនៃភាពសុខសាន្ត និងការលួងលោមចិត្តរបស់គាត់ ។ បន្ទាប់ពីការយល់ដឹងនេះ ពួកគាត់បានអញ្ជើញពួកអ្នកផ្សព្វផ្សាយសាសនាឲ្យបង្រៀនដំណឹងល្អដល់គ្រួសារពួកគាត់ ។ ជាលទ្ធផល ពួកគាត់បានទទួលសាក្សី និងទីបន្ទាល់ផ្ទាល់ខ្លួនអំពីផែនការនៃសុភមង្គលដ៏មហិមា ដែលបាននាំយកភាពសុខសាន្តដ៏ផ្អែមល្ហែម និងការលួងលោមដ៏ស្ងប់ចិត្តដែលពួកគាត់ស្វែងរកជាយូរមកឲ្យពួកគាត់ ។
ក្រោយពីប៊េលី និងចៅស្រីពួកគាត់ស្លាប់បានពីរខែ ឪពុកម្ដាយរបស់ហ្វឺណាន់ដូ និងប្អូនប្រុសគាត់ពីរនាក់ទៀតបានជ្រមុជទឹក ហើយបានបញ្ជាក់ ព្រមទាំងបានទទួលអំណោយទាននៃព្រះវិញ្ញាណបរិសុទ្ធ ។ ប្អូនប្រុសពៅរបស់ហ្វឺណាន់ដូ កំពុងរង់ចាំបុណ្យជ្រមុជទឹករបស់គាត់ ពេលគាត់មានអាយុប្រាំបីឆ្នាំ ។ ពួកគេម្នាក់ៗបានថ្លែងទីបន្ទាល់ថា ព្រះវិញ្ញាណជាព្រះវិញ្ញាណបរិសុទ្ធ បានថ្លែងសាក្សីអំពីសេចក្ដីពិតដ៏ពេញលេញនៃដំណឹងល្អ ដោយដឹកនាំពួកគេឲ្យមានបំណងប្រាថ្នាចង់ជ្រមុជទឹក ហើយទទួលអំណោយទាននៃព្រះវិញ្ញាណបរិសុទ្ធ ។
បងប្អូនប្រុសស្រី ព្រះវិញ្ញាណបរិសុទ្ធនឹងជួយបងប្អូនដោយថ្លែងទីបន្ទាល់ទៅកាន់បងប្អូន ដូចទ្រង់បានធ្វើដល់គ្រួសាររបស់ហ្វឺណាន់ដូដែរ ។
សេចក្ដីសង្ខេប
ឥឡូវនេះ ចូរយើងសង្ខេបមកវិញ ។ យើងបានស្គាល់សេចក្ដីពិតដែលបានបើកសម្ដែងចំនួនបីដែលនាំយើងទៅរកចំណេះដឹងមួយអំពីព្រះវិញ្ញាណបរិសុទ្ធ ។ សេចក្ដីពិតទាំងនេះគឺថា ព្រះវិញ្ញាណបរិសុទ្ធគឺជាសមាជិកទីបីនៃ ក្រុមព្រះ ព្រះវិញ្ញាណបរិសុទ្ធគឺជាតួអង្គនៃវិញ្ញាណ និងអំណោយទាននៃព្រះវិញ្ញាណបរិសុទ្ធកើតមានតាមរយៈការដាក់ដៃលើ ។ យើងក៏ស្គាល់ពីចម្លើយបីផងដែរចំពោះសំណួរថា « តើព្រះវិញ្ញាណបរិសុទ្ធជួយបងប្អូនតាមរបៀបណា ? » ព្រះវិញ្ញាណបរិសុទ្ធព្រមាន ព្រះវិញ្ញាណបរិសុទ្ធលួងលោមចិត្ត ហើយព្រះវិញ្ញាណបរិសុទ្ធថ្លែងទីបន្ទាល់ ។
ភាពសក្ដិសមដើម្បីរក្សាអំណោយទាននេះ
ចំពោះបងប្អូនទាំងឡាយណាដែលកំពុងរៀបចំខ្លួនទទួលបុណ្យជ្រមុជទឹក និងពិធីបញ្ជាក់ អស់អ្នកដែលទើបទទួលថ្មីៗ ឬទាំងអស់អ្នកដែលបានទទួលយូរហើយ វាគឺជាការសំខាន់សម្រាប់សុវត្ថិភាពខាងរូបកាយ និងខាងវិញ្ញាណយើង ដើម្បីយើងរក្សាអំណោយទាននៃព្រះវិញ្ញាណបរិសុទ្ធ ។ យើងចាប់ផ្ដើមធ្វើដូច្នេះតាមរយៈការខិតខំគោរពបទបញ្ញត្តិ ការមានអធិស្ឋានផ្ទាល់ខ្លួន និងជាគ្រួសារ ការអានព្រះគម្ពីរ និងការស្វែងរកទំនាក់ទំនងការស្រឡាញ់ និងការអភ័យទោសជាមួយគ្រួសារ និងមនុស្សជាទីស្រឡាញ់ ។ យើងគួររក្សាគំនិត ទង្វើ និងពាក្យសម្ដីយើងឲ្យមានគុណធម៌ ។ យើងគួរថ្វាយបង្គំព្រះវរបិតាសួគ៌យើងក្នុងផ្ទះយើង នៅព្រះវិហារ និងទីណាដែលអាចធ្វើបាន ក្នុងព្រះវិហារបរិសុទ្ធ ។ សូមនៅជិតនឹងព្រះវិញ្ញាណ ហើយព្រះវិញ្ញាណនឹងគង់នៅជិតបងប្អូន ។
ទីបន្ទាល់
ឥឡូវ ខ្ញុំសូមបញ្ចប់ជាមួយនឹងការអញ្ជើញមួយ និងទីបន្ទាល់ដ៏ពិតរបស់ខ្ញុំ ។ ខ្ញុំសូមអញ្ជើញបងប្អូនឲ្យរស់នៅដោយពេញលេញតាមពាក្យពេចន៍ដែលបានច្រៀងជារឿយៗដោយកុមារ ជាពាក្យដែលខ្ញុំប្រាកដថាពួកគេស្គាល់ ៖ « សូមស្ដាប់ សូមស្ដាប់ ។ ព្រះវិញ្ញាណបរិសុទ្ធនឹងខ្សឹបប្រាប់ ។ សូមស្តាប់ សូមស្តាប់សំឡេងតូចរហៀង » ។១១
បងប្អូនប្រុសស្រីជាទីស្រឡាញ់ ទាំងចាស់ទាំងក្មេង ខ្ញុំសូមផ្ដល់ជាសាក្សីអំពីវត្តមានដ៏រុងរឿងរបស់តួអង្គនៃព្រះដែលមានក្នុងក្រុមព្រះ ៖ ព្រះជាព្រះវរបិតា ព្រះយេស៊ូវគ្រីស្ទ និងព្រះវិញ្ញាណបរិសុទ្ធ ។ ខ្ញុំសូមថ្លែងទីបន្ទាល់ថា ឯកសិទ្ធិមួយដែលយើងរីករាយក្នុងនាមជាពួកបរិសុទ្ធថ្ងៃចុងក្រោយដែលរស់នៅក្នុងគ្រានៃពេលពេញកំណត់នេះគឺជាអំណោយទាននៃព្រះវិញ្ញាណបរិសុទ្ធ ។ ខ្ញុំដឹងថា ព្រះវិញ្ញាណបរិសុទ្ធជួយ ហើយនឹងជួយបងប្អូន ។ ខ្ញុំក៏សូមបន្ថែមនូវសាក្សីពិសេសរបស់ខ្ញុំអំពីព្រះយេស៊ូវគ្រីស្ទ និងតួនាទីរបស់ទ្រង់ថាជាព្រះអង្គសង្គ្រោះ និងព្រះប្រោសលោះយើង និងពីព្រះជាព្រះវរបិតាសួគ៌យើងផងដែរ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។