កុំក្រឡេកមើលជុំវិញខ្លួន ប៉ុន្តែត្រូវងើយមើលទៅលើវិញ !
ការអញ្ជើញមនុស្សដទៃឲ្យមករកព្រះគ្រីស្ទគឺជាគោលបំណងរបស់យើង ហើយយើងអាចបំពេញគោលបំណងនេះ បានដោយងើយមើលទៅព្រះយេស៊ូវគ្រីស្ទ ។
គោលបំណងរបស់ខ្ញុំគឺដើម្បី « អញ្ជើញអ្នកដទៃឲ្យមករកព្រះគ្រីស្ទ » ។១ នេះក៏ជាគោលបំណងរបស់បងប្អូនផងដែរ ។ យើងអាចបំពេញគោលបំណងនេះដោយងើយមើលទៅព្រះយេស៊ូវគ្រីស្ទ ។
ខ្ញុំបានជ្រមុជទឹកជាមួយនឹងឪពុកម្ដាយខ្ញុំ កាលខ្ញុំមានអាយុ ១៦ ឆ្នាំ ។ ប្អូនប្រុសខ្ញុំ ឃ្វុង វ៉ាន់ ដែលមានអាយុ ១៤ ឆ្នាំ បានចូលសាសនាចក្រតាមរយៈពូខ្ញុំឈ្មោះ យ៉ាំង ជីក លី ហើយបានអញ្ជើញយើងឲ្យទៅព្រះវិហារគាត់ ។ សមាជិកគ្រួសារយើងទាំង ១០នាក់ ម្នាក់ៗទៅព្រះវិហារខុសៗគ្នា ដូច្នេះយើងមានចិត្តរីករាយដើម្បីស្វែងរកសេចក្ដីពិត ហើយចង់ចែកចាយសុភមង្គលដែលយើងរកឃើញក្នុងដំណឹងល្អនៃព្រះយេស៊ូវគ្រីស្ទ បន្ទាប់ពីយើងបានជ្រមុជទឹក ។
លោកឪពុកខ្ញុំមានចិត្តរំភើបជាងគេដើម្បីរៀន ហើយចែកចាយសេចក្ដីពិតនោះ ។ គាត់ធ្លាប់ក្រោកតាំងពីព្រលឹមសិក្សាព្រះគម្ពីរជាងពីរម៉ោងរាល់ថ្ងៃ ។ ក្រោយចេញពីធ្វើការ គាត់បានទៅជាមួយនឹងពួកអ្នកផ្សព្វផ្សាយសាសនាទៅសួរសុខទុក្ខគ្រួសារ មិត្តភក្ដិ និងអ្នកជិតខាងយើងនៅក្បែរនោះស្ទើរជារៀងរាល់ថ្ងៃ ។ បន្ទាប់ពីយើងជ្រមុជទឹកបានប្រាំពីរខែមក គ្រួសារ និងសាច់ញាតិខ្ញុំចំនួន ២៣ នាក់បានក្លាយជាសមាជិកសាសនាចក្រ ។ បន្ទាប់មកទៀតគឺជាអព្ភូតហេតុនៃការឃើញមនុស្ស ១៣០ នាក់បានជ្រមុជទឹកនៅឆ្នាំបន្ទាប់នោះ តាមរយៈកិច្ចការផ្សព្វផ្សាយសាសនារបស់លោកឪពុកខ្ញុំ ។
ពង្សប្រវត្តិក៏ជាផ្នែកដ៏សំខាន់ចំពោះគាត់ដែរ ហើយបានបំពេញឈ្មោះបុព្វការីជនយើងចំនួនប្រាំបីជំនាន់ ។ តាំងពីពេលនោះមក ផលផ្លែនៃការប្រែចិត្តជឿរបស់គ្រួសារយើង ដែលចាប់ផ្ដើមដោយប្អូនប្រុសខ្ញុំអាយុ ១៤ ឆ្នាំ មានចំនួនកើនឡើងតាមរបៀបជាច្រើនពុំមែនសម្រាប់អ្នកដែលនៅរស់ប៉ុណ្ណោះទេ ប៉ុន្តែដល់អ្នកស្លាប់ផងដែរ ។ ដោយស្ថាបនាលើការងាររបស់លោកឪពុកខ្ញុំ និងមនុស្សផ្សេងទៀត ឥឡូវមែកធាងគ្រួសារយើងបានពង្រីកដល់ទៅ ៣២ ជំនាន់ ហើយឥឡូវយើងបានបញ្ចប់កិច្ចការក្នុងព្រះវិហាបរិសុទ្ធឲ្យពួកគេជាច្រើន ។ សព្វថ្ងៃនេះ ខ្ញុំមានការភ្ញាក់ផ្អើល ហើយមានអំណរជាខ្លាំងចំពោះតំណភ្ជាប់រវាងបុព្វការីជនយើង និងកូនចៅយើង ។
ប្រធាន ហ្គរដុនប៊ី ហ៊ិងគ្លី បានកត់ត្រាបទពិសោធន៍មួយស្រដៀងគ្នានេះនៅក្នុងព្រះវិហារបរិសុទ្ធកូឡុំប៊ើស អូហៃអូ ៖
« ការនឹកគិតពីជីវិតរបស់ [ ជីទួត ជីតា និងលោកឪពុកខ្ញុំ ] កាលខ្ញុំអង្គុយក្នុងព្រះវិហារបរិសុទ្ធ ខ្ញុំបានមើលទៅកូនស្រីខ្ញុំ កូនស្រីគាត់ … និងកូនស្រីនាង ដែលជាចៅទួតរបស់ខ្ញុំ ។ រំពេចនោះខ្ញុំបានដឹងថា ខ្ញុំឈរនៅចំកណ្ដាលនៃជំនាន់ទាំងប្រាំពីរនេះ—បីជំនាន់ពីមុនខ្ញុំ និងបីជំនាន់ក្រោយខ្ញុំ ។
« នៅក្នុងដំណាក់ដ៏ពិសិដ្ឋ ហើយបរិសុទ្ធនោះ អារម្មណ៍នៃកាតព្វកិច្ចដ៏ធំមួយបានផុសក្នុងគំនិតខ្ញុំ ដែលវាជាកាតព្វកិច្ចរបស់ខ្ញុំដើម្បីផ្ទេរនូវអ្វីទាំងអស់ដែលខ្ញុំបានទទួលជាកេរមរតកមួយមកពីដូនតាខ្ញុំទៅឲ្យជំនាន់ក្រោយៗទៀត » ។២
យើងទាំងអស់គ្នាស្ថិតនៅចំកណ្ដាលនៃគ្រួសារដ៏អស់កល្បមួយ ។ តួនាទីរបស់យើងអាចជាចំណុចរបត់មួយដែលការផ្លាស់ប្ដូរដ៏សំខាន់អាចកើតឡើងតាមរបៀបវិជ្ជមាន ឬអវិជ្ជមាន ។ ប្រធាន ហ៊ិងគ្លី បានបន្តថា « សូមកុំបណ្ដោយខ្លួនឲ្យក្លាយជាតំណដ៏ទន់ខ្សោយមួយនៅក្នុងជំនាន់របស់បងប្អូនឡើយ » ។៣ ភាពស្មោះត្រង់របស់បងប្អូននៅក្នុងដំណឹងល្អនឹងពង្រឹងគ្រួសារបងប្អូន ។ តើយើងអាចប្រាកដថា យើងនឹងក្លាយជាតំណមួយដ៏រឹងមាំក្នុងគ្រួសារដ៏អស់កល្បរបស់យើងតាមរបៀបណា ?
មានថ្ងៃមួយ ក្រោយពីខ្ញុំជ្រមុជទឹកបានពីរបីខែ ខ្ញុំបានស្ដាប់ឮសមាជិកមួយចំនួនរិះគន់គ្នានៅក្នុងព្រះវិហារ ។ ខ្ញុំមានការខកចិត្តជាខ្លាំង ។ ខ្ញុំបានត្រឡប់ទៅផ្ទះប្រាប់លោកឪពុកខ្ញុំថា ប្រហែលជាខ្ញុំមិនគួរទៅព្រះវិហារទៀតទេ ។ ការមើលឃើញសមាជិករិះគន់គ្នាបែបនោះ វាជារឿងពិបាកទទួលយកណាស់ ។ បន្ទាប់ពីបានស្ដាប់ខ្ញុំរួច លោកឪពុកខ្ញុំបានបង្រៀនខ្ញុំថា ដំណឹងល្អបានស្ដារឡើងវិញ ហើយវាល្អឥតខ្ចោះ ប៉ុន្តែសមាជិកមិនដូច្នោះទេ សូម្បីតែរូបគាត់ ឬខ្ញុំក្ដី ។ គាត់ពោលយ៉ាងម៉ឺងម៉ាត់ថា « កុំបាត់បង់សេចក្ដីជំនឿដោយសារតែមនុស្សជុំវិញកូន ប៉ុន្តែត្រូវស្ថាបនាទំនាក់ទំនងដ៏រឹងមាំ មួយជាមួយនឹងព្រះយេស៊ូវគ្រីស្ទ ។ កុំក្រឡេកមើលជុំវិញខ្លួន ប៉ុន្តែងើយមើលទៅលើវិញ ! »
ចូរងើយមើលទៅព្រះយេស៊ូវគ្រីស្ទ—ជាដំបូន្មានដ៏ឆ្លាតវៃពីលោកឪពុកខ្ញុំ—បានពង្រឹងសេចក្ដីជំនឿខ្ញុំពេលណាខ្ញុំជួបឧបសគ្គក្នុងជីវិត ។ គាត់បានបង្រៀនខ្ញុំពីរបៀបអនុវត្តការបង្រៀនរបស់ព្រះគ្រីស្ទ ដូចបន្ទូលទាំងនេះថា « ចូរមើលមកឯយើងដោយនូវគ្រប់ទាំងគំនិត ចូរកុំសង្ស័យ កុំខ្លាចឡើយ » ។៤
កាលខ្ញុំគ្រប់គ្រងបេសកកម្មភាពស៊ីអាថល វ៉ាស៊ីនតោន វាភ្លៀងស្ទើររាល់ថ្ងៃពេញមួយឆ្នាំ ។ ប៉ុន្តែពួកអ្នកផ្សព្វផ្សាយសាសនាយើងនៅតែណែនាំឲ្យចេញទៅផ្សព្វផ្សាយទាំងមានភ្លៀងធ្លាក់ ។ ខ្ញុំធ្លាប់ប្រាប់ពួកគេថា « ចូរចេញទៅខាងក្រៅទាំងភ្លៀង ងើយមើលទៅលើមេឃ ហាមាត់របស់ប្អូន ហើយផឹកវាទៅ ! កាលប្អូនងើយមើលទៅលើ ប្អូនមានកម្លាំងដើម្បីបើកមាត់និយាយនឹងមនុស្សគ្រប់គ្នាដោយមិនភ័យខ្លាចឡើយ » ។ វាគឺជាមេរៀនមួយសម្រាប់ពួកគេឲ្យងើយមើលទៅលើ ពេលពួកគេជួបឧបសគ្គ សូម្បីតែក្រោយបេសកកម្មពួកគេក្ដី ។ សូមកុំសាកល្បងធ្វើបែបនេះនៅតំបន់កខ្វក់ ។
កាលកំពុងបម្រើក្នុងបេសកកម្មស៊ីអាថល ខ្ញុំបានទទួលទូរសព្ទមួយមកពីកូនប្រុសច្បងខ្ញុំ ឈ្មោះ សាន់ប៊ីម ជាអ្នកលេងព្យាណូ ។ គាត់ប្រាប់ថា គាត់នឹងមានឯកសិទ្ធិសម្ដែងនៅសាលខាន័រហ្គីក្នុងទីក្រុងញូវយ៉ក ដោយសារគាត់ឈ្នះការប្រកួតជាអន្តរជាតិមួយ ។ យើងមានចិត្តរំភើបរីករាយជាខ្លាំងសម្រាប់គាត់។ ប៉ុន្តែនៅល្ងាចនោះ កាលកំពុងអធិស្ឋានថ្លែងអំណរគុណ ភរិយាខ្ញុំបាននឹកឃើញថា យើងមិនអាចចូលរួមមើលគាត់សម្ដែងបានឡើយ ហើយទូលប្រាប់ព្រះវរបិតាសួគ៌ថា « ព្រះវរបិតាសួគ៌អើយ ខ្ញុំមានអំណរគុណចំពោះពរជ័យដែលទ្រង់បានប្រទានដល់សាន់ប៊ីម ។ ប៉ុន្តែ ខ្ញុំម្ចាស់សូមទោសដែលមិនអាចទៅចូលរួមបាន ។ ខ្ញុំម្ចាស់អាចទៅបាន បើទ្រង់ប្រទានពរជ័យនេះនៅមុន ឬក្រោយបេសកកម្មនេះ ។ ខ្ញុំម្ចាស់មិនត្អូញត្អែរទេ ប៉ុន្តែ ខ្ញុំម្ចាស់មានអារម្មណ៍សោកស្ដាយបន្តិចប៉ុណ្ណោះ » ។
ពេលគាត់បញ្ចប់ការអធិស្ឋាននេះភ្លាម គាត់បានឮសំឡេងដ៏ច្បាស់មួយ ៖ « ដោយសារអ្នកពុំអាចទៅបាន នោះកូនប្រុសរបស់អ្នកត្រូវបានផ្តល់នូវឯកសិទ្ធិនេះ ។ តើអ្នកចង់ដោះដូរទេ ? »
ភរិយាខ្ញុំមានការភ្ញាក់ផ្អើល ។ គាត់បានដឹងថា កូនៗយើងនឹងមានពរតាមរយៈកិច្ចការដ៏ស្មោះត្រង់របស់ឪពុកម្ដាយពួកគេ នៅក្នុងនគរព្រះអម្ចាស់ ប៉ុន្តែវាជាលើកដំបូងដែលគាត់យល់ពីតួនាទីគាត់កាន់តែច្បាស់ ។ គាត់បានតបទៅទ្រង់ភ្លាមថា ៖ « ទេ ទេ ខ្ញុំម្ចាស់មិនទៅក៏បាន ។ ចូរឲ្យគាត់ទទួលបានកិត្តិយសនោះចុះ » ។
បងប្អូនប្រុសស្រីជាទីស្រឡាញ់ វាមិនងាយឲ្យយើងស្គាល់ពីសេចក្ដីស្រឡាញ់របស់ព្រះវរបិតាសួគ៌ឡើយ ពេលយើងមើលជុំវិញដោយភ្នែកខាងសាច់ឈាមយើង ដោយសារដំបូងឡើយយើងមើលឃើញតែការលំបាក ការបាត់បង់ បន្ទុក ឬភាពឯកោប៉ុណ្ណោះ ។ ផ្ទុយទៅវិញ យើងអាចមើលឃើញពរជ័យនៅខាងមុខ ពេលយើងងើយមើលទៅលើ ។ ព្រះអម្ចាស់បានបើកសម្ដែងថា « កាលណាយើងបានព្រះពរណាមួយពីព្រះនោះគឺដោយសារការគោរពដល់ក្រឹត្យវិន័យនោះ ដែលព្រះពរនោះផ្អែកទៅលើ » ។៥ ចំពោះជនដែលចាប់ផ្ដើមធ្វើការបម្រើណាមួយដល់ព្រះ សូមដឹងថា បងប្អូនគឺជាតំណភ្ជាប់ដ៏រឹងមាំមួយសម្រាប់អំណាចដ៏អស្ចារ្យទៅនឹងជនដែលរស់នៅពីមុនបងប្អូន និងជំនាន់ក្រោយៗទៀត ។
ថ្ងៃនេះ ខ្ញុំមានអំណរដោយឃើញថា សមាជិកគ្រួសារយើងជាច្រើនមានភាពស្មោះត្រង់នៅលើផ្លូវនៃសេចក្ដីសញ្ញា ប៉ុន្តែខ្ញុំសោកស្ដាយដោយឃើញមានកៅអីទំនេរនៅក្បែរយើង ។ អែលឌើរ អិមរ័សុល បាឡឺដ បានថ្លែងថា « បើបងប្អូនជ្រើសក្លាយជាអសកម្ម ឬចាកចេញពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដែលបានស្ដារឡើងវិញ តើបងប្អូននឹងទៅកន្លែងណា ? តើបងប្អូននឹងធ្វើអ្វី ? ការសម្រេចចិត្តឈប់ ‹ ដើរជាមួយនឹងសមាជិកសាសនាចក្រ និងថ្នាក់ដឹកនាំដែលព្រះអម្ចាស់បានជ្រើសរើសនឹងមានផលប៉ះពាល់នៅពេលខាងមុខដែលវាមិនទាន់មើលឃើញនៅពេលនេះ » ។៦ ប្រធាន ថូម៉ាសអេស ម៉នសុន បានលើកទឹកចិត្តយើងថា « សូមឲ្យយើងជ្រើសរើសផ្លូវត្រូវជានិច្ចទោះជាវាលំបាកក្ដី កុំជ្រើសរើសផ្លូវខុសដែលងាយស្រួលឡើយ » ។៧
វាពុំទាន់ហួសពេលឡើយដើម្បីងើយមើលទៅព្រះយេស៊ូវគ្រីស្ទ ។ ព្រះហស្ដទ្រង់លាតសន្ធឹងចាំបងប្អូនជានិច្ច ។ មានជំនាន់ពីមុនយើង និង ជំនាន់ក្រោយយើងដែលពឹងផ្អែកលើយើងឲ្យដើរតាមព្រះយេស៊ូវគ្រីស្ទ ដើម្បីយើងអាចមានគ្រួសារដ៏អស់កល្បមួយរបស់ព្រះ ។
កាលខ្ញុំត្រូវបានដោះលែងពីការហៅជាប្រធានស្តេក ពួកកូនប្រុសខ្ញុំមានចិត្តរំភើបអំពីការមានពេលវេលាច្រើននៅជាមួយខ្ញុំ ។ បីសប្ដាហ៍ក្រោយមក ខ្ញុំត្រូវបានហៅជាពួកចិតសិបនាក់ ។ ដំបូងខ្ញុំបានគិតថា ពួកគេអាចមានការខកចិត្ត ប៉ុន្តែចម្លើយរាបសារបស់កូនប្រុសពៅខ្ញុំគឺថា « ប៉ា កុំបារម្ភអី ។ យើងជាគ្រួសារដ៏អស់កល្ប » ។ វាជាសេចក្ដីពិតដ៏សាមញ្ញ ហើយច្បាស់ខ្លាំងណាស់ ! ខ្ញុំរៀងបារម្ភបន្តិច ដោយសារខ្ញុំបានមើលជុំវិញជីវិតរមែងស្លាប់នេះជាមុនសិន ប៉ុន្តែកូនប្រុសខ្ញុំមានចិត្តរីករាយ ដោយសារគាត់មិនបានមើលជុំវិញទេ ប៉ុន្តែគាត់បានបើកភ្នែកមើលឆ្ពោះទៅភាពអស់កល្ប និងព្រះរាជបំណងរបស់ព្រះអម្ចាស់ ។
ជានិច្ចកាល វាមិនងាយឡើយក្នុងការងើយមើលទៅលើ កាលឪពុកម្ដាយបងប្អូនបដិសេធដំណឹងល្អ កាលបងប្អូនជាសមាជិកម្នាក់ក្នុងអង្គភាពតូចមួយរបស់សាសនាចក្រ កាលភរិយា ឬស្វាមីបងប្អូនមិនមែនជាសមាជិក កាលបងប្អូននៅតែនៅលីវ ទោះជាខំអស់លទ្ធភាពដើម្បីបានរៀបការក្ដី កាលកូនម្នាក់បានវង្វេង កាលបងប្អូនជាម្ដាយ ឬឪពុកទោល កាលបងប្អូនមានឧបសគ្គខាងផ្លូវកាយ ឬផ្លូវចិត្ត កាលបងប្អូនជាជនរងគ្រោះក្នុងគ្រោះមហន្តរាយមួយ ។ល។ សូមតោងសេចក្ដីជំនឿបងប្អូនឲ្យជាប់នៅគ្រាដ៏លំបាកទាំងនោះ ។ សូមងើយមើលទៅព្រះគ្រីស្ទ ទូលសូមកម្លាំង លំនឹង និងការព្យាបាល ។ តាមរយៈអំណាចនៃដង្វាយធួនរបស់ព្រះយេស៊ូវគ្រីស្ទ « គ្រប់ការណ៍ទាំងអស់ផ្សំគ្នា សម្រាប់សេចក្ដីល្អដល់[ បងប្អូន ] » ។៨
ខ្ញុំសូមថ្លែងជាសាក្សីអំពីព្រះយេស៊ូវគ្រីស្ទ ថាទ្រង់គឺជាព្រះអង្គសង្គ្រោះ និងព្រះប្រោសលោះយើង ។ កាលយើងធ្វើតាមព្យាការីបច្ចុប្បន្នរបស់យើងគឺ ប្រធានថូម៉ាស អេស ម៉នសុន នោះយើងងើយមើលទៅព្រះយេស៊ូវគ្រីស្ទហើយ ។ កាលយើងអធិស្ឋាន ហើយសិក្សាព្រះគម្ពីររាល់ថ្ងៃ ហើយទទួលទានសាក្រាម៉ង់រាល់សប្ដាហ៍ដោយចិត្តស្មោះ យើងទទួលបានកម្លាំងដើម្បីងើយមើលទៅទ្រង់ជានិច្ច ។ ខ្ញុំរីករាយដោយបានក្លាយជាសមាជិកសាសនាចក្រនេះ ហើយជាផ្នែកមួយនៃគ្រួសារដ៏អស់កល្ប ។ ខ្ញុំចូលចិត្តចែកចាយដំណឹងល្អដ៏អស្ចារ្យនេះ ដល់មនុស្សដទៃ ។ ការអញ្ជើញមនុស្សដទៃឲ្យមករកព្រះគ្រីស្ទគឺជាគោលបំណងរបស់យើង ហើយយើងអាចបំពេញគោលបំណងនេះ បានដោយងើយមើលទៅព្រះយេស៊ូវគ្រីស្ទ ។ ខ្ញុំសូមថ្លែងទីបន្ទាល់ដោយរាបសានូវរឿងទាំងនេះ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។