ការទាញយកព្រះចេស្ដានៃព្រះយេស៊ូវគ្រីស្ទមកក្នុងជីវិតរបស់យើង
ដំណឹងល្អនៃព្រះយេស៊ូវគ្រីស្ទបានពោរពេញដោយព្រះចេស្ដារបស់ទ្រង់ ដែលមានដល់គ្រប់បុត្រី ឬបុត្រារបស់ព្រះដែលស្វែងរកទ្រង់ដោយអស់ពីដួងចិត្ត ។
បងប្អូនប្រុសស្រីជាទីស្រឡាញ់របស់ខ្ញុំ យើងរស់នៅក្នុងគ្រាកាន់កាប់ត្រួតត្រាដ៏លំបាកបំផុតមួយ ។ ឧបសគ្គ ភាពចម្រូងចម្រាស់ និងភាពស្មុគស្មាញមាននៅជុំវិញពួកយើង ។ គ្រាដ៏ចលាចលទាំងនេះត្រូវបានព្រះអង្គសង្គ្រោះទតឃើញជាមុនរួចហើយ ។ ទ្រង់បានព្រមានថា នៅក្នុងជំនាន់របស់យើង មារសត្រូវនឹងចាក់រុកឲ្យមានកំហឹងនៅក្នុងដួងចិត្តរបស់មនុស្ស ហើយដឹកនាំពួកគេឲ្យវង្វេង ។១ ប៉ុន្តែព្រះវរបិតាសួគ៌របស់យើងពុំមានព្រះទ័យថាឲ្យយើងប្រឈមមុខនឹងបញ្ហាផ្ទាល់ខ្លួន និងបញ្ហាសង្គមដ៏ច្របូកច្របល់ដោយខ្លួនយើងនោះទេ ។
ព្រះទ្រង់ស្រឡាញ់លោកិយដល់ម្ល៉េះ បានជាទ្រង់បានប្រទានព្រះរាជបុត្រាទ្រង់តែ១មក២ ជួយយើង ។៣ ហើយព្រះរាជបុត្រារបស់ទ្រង់ ព្រះយេស៊ូវគ្រីស្ទ បានប្រទានព្រះជន្មរបស់ទ្រង់ដើម្បីយើង ។ ទាំងអស់គឺដើម្បីឲ្យយើងអាចមានព្រះចេស្ដានៃព្រះ—ជាព្រះចេស្ដាល្មមគ្រប់គ្រាន់ដើម្បីប្រឈមនឹងបន្ទុក ឧបសគ្គ និងការល្បួងនានានៃជំនាន់របស់យើង ។៤ ថ្ងៃនេះ ខ្ញុំចង់និយាយអំពីរបៀបដែលយើងអាចទាញយកព្រះចេស្ដានៃព្រះអម្ចាស់ និងលោកចៅហ្វាយនៃយើង ព្រះយេស៊ូវគ្រីស្ទ មកក្នុងជីវិតរបស់យើង ។
យើងចាប់ផ្ដើមដោយការរៀនអំពីទ្រង់ ។៥ វា « គ្មានផ្លូវទេសម្រាប់ [ យើង ] បានសង្គ្រោះក្នុងការល្ងង់ខ្លៅ » ។៦ កាលណាយើងកាន់តែដឹងអំពីការបម្រើ និងបេសកកម្មរបស់ព្រះអង្គសង្គ្រោះ៧នោះយើងកាន់តែយល់ពីគោលលទ្ធិរបស់ទ្រង់៨ និងអ្វីដែលទ្រង់បានធ្វើសម្រាប់យើង—យើងកាន់តែដឹងថា ទ្រង់អាចប្រទានព្រះចេស្ដាដែលយើងត្រូវការសម្រាប់ជីវិតយើង ។
កាលពីដើមឆ្នាំនេះ ខ្ញុំបានសុំយុវមជ្ឈិមវ័យនៃសាសនាចក្រឲ្យថ្វាយមួយផ្នែកនៃពេលវេលារបស់ពួកគេរាល់សប្ដាហ៍ដើម្បីសិក្សាអ្វីៗដែលព្រះយេស៊ូវបានមានបន្ទូល និងបានធ្វើ ដូចបានកត់ត្រានៅក្នុងព្រះគម្ពីរ ។៩ ខ្ញុំបានអញ្ជើញពួកគេឲ្យដាក់សេចក្ដីយោងបទគម្ពីរអំពីព្រះយេស៊ូវគ្រីស្ទនៅក្នុងការណែនាំតាមប្រធានបទ ឲ្យទៅជាកម្មវិធីសិក្សាសំខាន់ផ្ទាល់ខ្លួនរបស់ពួកគេ ។១០
ខ្ញុំបានផ្ដល់សំណូមពរនោះ ដោយសារខ្ញុំបានទទួលយកវាខ្លួនឯងរួចហើយ ។ ខ្ញុំបានអាន ហើយគូសបន្ទាត់ពីក្រោមគ្រប់ខគម្ពីរដែលប្រាប់អំពីព្រះយេស៊ូវគ្រីស្ទ ដូចបានរៀបរាប់ក្រោមចំណងជើងរងចំនួន ៥៧ នៅក្នុងការណែនាំតាមប្រធានបទ ។១១ នៅពេលខ្ញុំបានបញ្ចប់លំហាត់ដ៏រំភើបនោះហើយ ភរិយារបស់ខ្ញុំបានសួរខ្ញុំថាតើវាមានឥទ្ធិពលមកលើខ្ញុំយ៉ាងណាខ្លះ ។ ខ្ញុំបានប្រាប់គាត់ថា « ខ្ញុំជាមនុស្សផ្សេងម្នាក់ ! »
ខ្ញុំបានមានអារម្មណ៍ពីភក្ដីភាពចំពោះទ្រង់ជាថ្មី ពេលខ្ញុំអានព្រះគម្ពីរមរមនម្ដងទៀត ជាសេចក្ដីថ្លែងការណ៍ផ្ទាល់របស់ព្រះអង្គសង្គ្រោះអំពីបេសកកម្មរបស់ទ្រង់នៅក្នុងជីវិតរមែងស្លាប់ ។ ទ្រង់ប្រកាសថា ៖
« យើងបានមកឯលោកិយនេះ ដើម្បីធ្វើតាមព្រះហឫទ័យនៃព្រះវរបិតារបស់យើង ពីព្រោះព្រះវរបិតារបស់យើង ទ្រង់បានចាត់ឲ្យយើងមក។
« ហើយព្រះវរបិតាយើង ទ្រង់បានចាត់ឲ្យយើងមក ដើម្បីឲ្យយើងអាចត្រូវបានលើកឡើងលើឈើឆ្កាង » ។១២
ក្នុងនាមជាពួកបរិសុទ្ធថ្ងៃចុងក្រោយ យើងសំដៅបេសកកម្មរបស់ទ្រង់ថាជាដង្វាយធួនរបស់ព្រះយេស៊ូវគ្រីស្ទ ដែលបានធ្វើឲ្យការរស់ឡើងវិញក្លាយជាការពិតចំពោះមនុស្សទាំងអស់ ហើយបានធ្វើឲ្យមានជីវិតអស់កល្បជានិច្ចចំពោះអស់អ្នកដែលប្រែចិត្តពីអំពើបាបរបស់ពួកគេ ហើយទទួលយក និងរក្សាពិធីបរិសុទ្ធ និងសេចក្ដីសញ្ញាសំខាន់ៗទាំងឡាយ ។
វាពុំពេញលេញខាងគោលលទ្ធិទេ ដែលនិយាយអំពីពលិកម្មដ៏ធួនរបស់ព្រះអម្ចាស់តែឃ្លាកាត់ ដូចជា « ដង្វាយធួន » ឬ « អំណាចនៃដង្វាយធួនដែលអាចធ្វើទៅបាន » ឬ « ការអនុវត្តដង្វាយធួន » ឬ « ការត្រូវបានពង្រឹងដោយដង្វាយធួន » នោះ ។ ការប្រើឃ្លាទាំងនេះបង្ហាញពីហានិភ័យដ៏ពិតមួយ ដែលអាចប្រើជំនឿខុសដោយចាត់ទុកព្រឹត្តិការណ៍នេះដូចជាវាមានជីវិត និងសមត្ថភាពឯករាជ្យពីព្រះវរបិតាសួគ៌របស់យើង និងព្រះរាជបុត្រាទ្រង់ ព្រះយេស៊ូវគ្រីស្ទ ។
នៅក្រោមផែនការដ៏អស់កល្បជានិច្ចដ៏មហិមារបស់ព្រះបិតាគឺព្រះអង្គសង្គ្រោះដែលបានរងទុក្ខ ។ គឺព្រះអង្គសង្គ្រោះដែលបានផ្ដាច់ចំណងនៃសេចក្ដីស្លាប់ ។ គឺព្រះអង្គសង្គ្រោះដែលបានបង់ថ្លៃសម្រាប់អំពើបាប និងការរំលងទាំងឡាយរបស់យើង ហើយបានលុបចោលក្រោមលក្ខខណ្ឌនៃការប្រែចិត្តរបស់យើង ។ គឺព្រះអង្គសង្គ្រោះដែលបានរំដោះយើងពីការស្លាប់ខាងរូបកាយ និងខាងវិញ្ញាណ ។
គ្មានតួអង្គឥតរូបណាដែលហៅថា« ដង្វាយធួន » ដែលយើងអាចហៅរកការជួយ ការព្យាបាល ការអភ័យទោស ឬអំណាចបាននោះទេ ។ ព្រះយេស៊ូវគ្រីស្ទគឺជាប្រភព ! ពាក្យពិសិដ្ឋដូចជា ដង្វាយធួននិងការរស់ឡើងវិញ ពិពណ៌នាអំពីអ្វីដែលព្រះអង្គសង្គ្រោះបានធ្វើ ស្របតាមផែនការរបស់ព្រះបិតា ដើម្បីយើងអាចរស់នៅដោយក្ដីសង្ឃឹមនៅក្នុងជីវិតនេះ ហើយទទួលបានជីវិតអស់កល្បជានិច្ចនៅបរលោកនាយ ។ ពលិកម្មដ៏ធួនរបស់ព្រះអង្គសង្គ្រោះ—ជាទង្វើដ៏សំខាន់នៃប្រវត្តិសាស្ត្រមនុស្សលោក—ត្រូវបានយល់ និងកោតសរសើរខ្លាំងបំផុត នៅពេលយើងភ្ជាប់វាទៅនឹងទ្រង់យ៉ាងច្បាស់លាស់ ។
ចំណុចសំខាន់នៃបេសកកម្មរបស់ព្រះអង្គសង្គ្រោះ ត្រូវបានគូសបញ្ជាក់ដោយព្យាការី យ៉ូសែប ស៊្មីធ ដែលបានប្រកាសច្បាស់ៗថា « គោលការណ៍គ្រឹះនៃសាសនារបស់យើង គឺជាទីបន្ទាល់របស់ពួកសាវកនិងពួកព្យាការីអំពីព្រះយេស៊ូវគ្រីស្ទ ថាទ្រង់បានសុគត ត្រូវបានគេបញ្ចុះ ហើយបានរស់ឡើងវិញនៅថ្ងៃទីបី ហើយបានយាងឡើងទៅស្ថានសួគ៌ ហើយរឿងផ្សេងទៀតដែលទាក់ទងនឹងសាសនារបស់យើងគឺជារឿងបន្ទាប់បន្សំប៉ុណ្ណោះ » ។១៣
គឺសេចក្ដីថ្លែងការណ៍របស់ព្យាការីនេះហើយ ដែលបានធ្វើឲ្យពួកព្យាការី អ្នកមើលឆុត អ្នកទទួលវិវរណៈ ១៥ រូបផ្ដួចផ្ដើមគំនិតឮចេញ និងចុះហត្ថលេខាលើទីបន្ទាល់របស់ពួកគាត់ដើម្បីរំឮកខួប ២០០០ ឆ្នាំនៃកំណើតរបស់ព្រះអម្ចាស់ ។ ទីបន្ទាល់ជាប្រវត្តិសាស្ត្រនោះមានចំណងជើងថា « ព្រះគ្រីស្ទដ៏មានព្រះជន្មរស់ » ។១៤ សមាជិកជាច្រើនបានទន្ទេញចាំសេចក្ដីពិតនោះ ។ អ្នកខ្លះទៀតស្ទើរតែមិនដែលឮពីវា ។ នៅពេលអ្នកព្យាយាមរៀនបន្ថែមទៀតអំពីព្រះយេស៊ូវគ្រីស្ទ ខ្ញុំជំរុញឲ្យបងប្អូនសិក្សា « ព្រះគ្រីស្ទដ៏មានព្រះជន្មរស់ » ។
នៅពេលយើងវិនិយោគពេលវេលាក្នុងការរៀនសូត្រអំពីព្រះអង្គសង្គ្រោះ និងពលិកម្មដ៏ធួនរបស់ទ្រង់ នោះយើងខិតចូលទៅធាតុគន្លឹះមួយទៀតដើម្បីទទួលបានព្រះចេស្ដារបស់ទ្រង់ ៖ គឺយើងជ្រើសរើសដើម្បីមានជំនឿទៅលើទ្រង់ ហើយធ្វើតាមទ្រង់ ។
សិស្សពិតរបស់ព្រះយេស៊ូវគ្រីស្ទស្ម័គ្រចិត្តឈរឡើង បញ្ចេញមតិ ហើយខុសពីមនុស្សនៃលោកិយ ។ ពួកគេពុំខ្លាច មានការលះបង់ និង ភាពក្លាហាន ។ ខ្ញុំបានរៀនពីពួកសិស្សទាំងនោះ អំឡុងពេលការចាត់តាំងនាពេលថ្មីៗនេះឲ្យទៅប្រទេសម៊ិកស៊ិក ជាកន្លែងដែលខ្ញុំជួបជាមួយមន្ត្រីរដ្ឋាភិបាល និងអ្នកដឹកនាំមកពីនិកាយសាសនាផ្សេងៗទៀត ។ ម្នាក់ៗបានអរគុណខ្ញុំចំពោះកិច្ចការដ៏ក្លាហាន និងដ៏ជោគជ័យរបស់សមាជិកយើងក្នុងការការពារ ហើយរក្សាអាពាហ៍ពិពាហ៍ និងក្រុមគ្រួសារឲ្យបានរឹងមាំនៅក្នុងប្រទេសពួកគេ ។
គ្មានអ្វីដែលងាយស្រួល ឬស្វ័យប្រវត្តិអំពីការក្លាយជាពួកសិស្សដ៏មានអានុភាពដូច្នេះបានទេ ។ ការផ្ដោតរបស់យើងត្រូវតែផ្អែកយ៉ាងរឹងមាំទៅលើព្រះអង្គសង្គ្រោះ និងដំណឹងល្អរបស់ទ្រង់ ។ វាតម្រូវឲ្យមានការខិតខំខាងសតិអារម្មណ៍យ៉ាងខ្លាំងដើម្បីមើលទៅទ្រង់គ្រប់គំនិត ។១៥ ប៉ុន្តែនៅពេលដែលយើងធ្វើវាបាន នោះភាពសង្ស័យ និងការភ័យខ្លាចរបស់យើងនឹងរលត់បាត់អស់ ។១៦
ថ្មីៗនេះ ខ្ញុំបានស្គាល់យុវនារីឡូរ៉លដ៏អង់អាចម្នាក់ ។ នាងត្រូវបានគេអញ្ជើញឲ្យចូលរួមនៅក្នុងការប្រកួតប្រជែងក្នុងវិទ្យាល័យទូទាំងរដ្ឋមួយ នៅពេលល្ងាចដែលនឹងការប្រជុំសមាគមសង្គ្រោះស្ដេកមួយ ដែលនាងតាំងចិត្តថាទៅចូលរួមផងដែរ ។ នៅពេលនាងបានដឹងពីការជាន់កាលវិភាគគ្នានេះ នាងបានពន្យល់ទៅអ្នកដែលកាន់ការប្រកួតថា នាងនឹងត្រូវចេញពីការប្រកួតមុនម៉ោងដើម្បីទៅចូលរួមការប្រជុំសំខាន់មួយ តែគេប្រាប់នាងថាបើនាងធ្វើដូច្នោះ នាងនឹងមិនបានជាប់ទេ ។
តើយុវនារីឡូរ៉លថ្ងៃចុងក្រោយរូបនេះបានធ្វើយ៉ាងដូចម្ដេច ? នាងបានរក្សាការតាំងចិត្តរបស់នាងដើម្បីចូលរួមនៅក្នុងការប្រជុំសមាគមសង្គ្រោះ ។ ដូចបានសន្យា នាងបានធ្លាក់ពីការប្រកួតប្រចាំរដ្ឋនោះ ។ នៅពេលគេសួរនាងអំពីការសម្រេចចិត្តរបស់នាង នាងបានតបយ៉ាងសាមញ្ញថា « មែនហើយ សាសនាចក្រគឺសំខាន់ជាង មែនទេ ? »
សេចក្ដីជំនឿទៅលើព្រះយេស៊ូវគ្រីស្ទ លើកទឹកចិត្តយើងឲ្យធ្វើរឿងដែលយើងនឹងមិនហ៊ានធ្វើ ។ សេចក្ដីជំនឿដែលលើកទឹកចិត្តយើងឲ្យធ្វើសកម្មភាព ធ្វើឲ្យយើងទទួលបានព្រះចេស្ដារបស់ទ្រង់កាន់តែច្រើន ។
យើងក៏បង្កើនព្រះចេស្ដារបស់ព្រះអង្គសង្គ្រោះនៅក្នុងជីវិតរបស់យើងផងដែរ នៅពេលយើងធ្វើសេចក្ដីសញ្ញា ហើយរក្សាសេចក្ដីសញ្ញាទាំងនោះឲ្យបានជាក់លាក់ ។ សេចក្តីសញ្ញារបស់យើងចងភ្ជាប់យើងទៅនឹងទ្រង់ ហើយប្រទានដល់យើងនូវព្រះចេស្ដារបស់ព្រះ ។ ក្នុងនាមជាសិស្សស្មោះត្រង់ យើងប្រែចិត្ត ហើយដើរតាមទ្រង់ចូលទៅក្នុងទឹកនៃពិធីបុណ្យជ្រមុជទឹក ។ យើងដើរតាមផ្លូវនៃសេចក្ដីសញ្ញាដើម្បីទទួលបានពិធីបរិសុទ្ធសំខាន់ៗដទៃទៀត ។១៧ ហើយយើងមានអំណរគុណ ដែលផែនការរបស់ព្រះផ្ដល់ពរជ័យដល់ជីដូនជីតាដែលបានស្លាប់ទៅ ដោយគ្មានឱកាសដើម្បីទទួលបានពរជ័យនោះក្នុងពេលជីវិតរមែងស្លាប់របស់ពួកគាត់ ។១៨
បុរសស្ត្រីដែលរក្សាសេចក្ដីសញ្ញា ព្យាយាមរកវិធីដើម្បីរក្សាខ្លួនពួកគេពុំឲ្យប្រឡាក់ស្នាមពីលោកិយ ដើម្បីកុំឲ្យមានអ្វីមករារាំងពួកគេពីការទទួលបានព្រះចេស្ដារបស់ព្រះអង្គសង្គ្រោះ ។ ថ្មីៗនេះ ភរិយា និងជាម្ដាយស្មោះត្រង់ម្នាក់បានសរសេររឿងនេះថា ៖ « ពេលនេះគឺជាគ្រាដ៏ចលាចល និងលំបាក ។ ឱ វាជាពរជ័យណាស់ ដែលយើងមានចំណេះដឹងបន្ថែមអំពីផែនការនៃសេចក្ដីសង្គ្រោះ និងការដឹកនាំដ៏បំផុសគំនិតមកពីពួកព្យាការី ពួកសាវក និងថ្នាក់ដឹកនាំជាទីស្រឡាញ់ ដើម្បីជួយយើងឲ្យឆ្លងសមុទ្រព្យុះទាំងនេះដោយសុវត្ថិភាព ។ យើងបានបញ្ឈប់ទម្លាប់បើកវិទ្យុនៅពេលព្រឹក ។ ជំនួសឲ្យវិទ្យុ ឥឡូវយើងស្ដាប់ប្រសាសន៍សន្និសីទទូទៅនៅលើទូរសព្ទដៃរបស់យើងជារៀងរាល់ព្រឹកនៅពេលយើងរៀបចំខ្លួនសម្រាប់ថ្ងៃថ្មីវិញ » ។
ធាតុមួយទៀតដើម្បីទាញយកព្រះចេស្ដារបស់ព្រះអង្គសង្គ្រោះមកដាក់ក្នុងជីវិតរបស់យើង គឺឈោងទៅរកទ្រង់ដោយសេចក្ដីជំនឿ ។ ការឈោងទៅរកដូច្នេះតម្រូវឲ្យមានការខិតខំយ៉ាងឧស្សាហ៍ និងផ្ដោតចិត្ត ។
តើបងប្អូននៅចាំរឿងក្នុងគម្ពីរប៊ីបអំពីស្ត្រីម្នាក់ដែលបានរកទុក្ខរយៈពេល ១២ ឆ្នាំ ដោយជំងឺធ្ងន់ និងគួរខ្មាសអៀនឬទេ ?១៩ នាងបានអនុវត្តសេចក្ដីជំនឿដ៏អស្ចារ្យទៅលើព្រះអង្គសង្គ្រោះ ដោយប្រកាសថា « បើគ្រាន់តែពាល់ព្រះពស្ត្រទ្រង់ប៉ុណ្ណោះ នោះនឹងបានជាហើយ » ។២០
ស្ត្រីស្មោះត្រង់ និងផ្ដោតយកចិត្តទុកដាក់រូបនេះ ចាំបាច់ត្រូវឈោងទៅឲ្យបានឆ្ងាយដើម្បីនាងអាចទទួលបានព្រះចេស្ដារបស់ទ្រង់ ។ ការឈោងទៅខាងរូបកាយរបស់នាង គឺជានិមិត្តរូបនៃការឈោងទៅខាងវិញ្ញាណរបស់នាងផងដែរ ។
ពួកយើងជាច្រើនបានស្រែកយំចេញពីក្រអៅដួងចិត្តរបស់យើង នូវសម្ដីស្រដៀងនឹងស្ត្រីរូបនេះដែរ ៖ « ប្រសិនបើខ្ញុំអាចឈោងខាងវិញ្ញាណឲ្យល្មមដើម្បីទាញយកព្រះចេស្ដារបស់ព្រះអង្គសង្គ្រោះដាក់ក្នុងជីវិតរបស់ខ្ញុំ នោះខ្ញុំនឹងដឹងពីរបៀបដើម្បីដោះស្រាយស្ថានភាពឈឺចាប់ក្នុងចិត្តរបស់ខ្ញុំបាន ។ ខ្ញុំនឹងដឹងថាត្រូវធ្វើអ្វីហើយ ។ ហើយខ្ញុំនឹងមានព្រះចេស្ដាដើម្បីធ្វើវាបាន » ។
នៅពេលបងប្អូនឈោងទៅដើម្បីមានព្រះចេស្ដារបស់ព្រះអម្ចាស់នៅក្នុងជីវិតរបស់បងប្អូនដោយកម្លាំងដូចគ្នានឹងកម្លាំងរបស់មនុស្សលង់ទឹកម្នាក់ខំតោងចាប់ ហើយដង្ហក់រកខ្យល់ នោះព្រះចេស្ដាមកពីព្រះយេស៊ូវគ្រីស្ទនឹងជារបស់បងប្អូន ។ នៅពេលព្រះអង្គសង្គ្រោះដឹងថាបងប្អូនពិតជាចង់ឈោងទៅរកទ្រង់—ពេលទ្រង់អាចញាណដឹងពីបំណងប្រាថ្នាដ៏ខ្លាំងបំផុតនៃដួងចិត្តរបស់បងប្អូនថា បងប្អូនចង់ទាញយកព្រះចេស្ដារបស់ទ្រង់ដាក់ក្នុងជីវិត—នោះបងប្អូននឹងត្រូវបានដឹកនាំដោយព្រះវិញ្ញាណបរិសុទ្ធដើម្បីដឹងច្បាស់ពីអ្វីដែលបងប្អូនចាំបាច់ត្រូវធ្វើ ។២១
នៅពេលបងប្អូនឈោងខាងវិញ្ញាណហួសពីអ្វីៗដែលបងប្អូនធ្លាប់ធ្វើពីមុនមក នោះព្រះចេស្ដារបស់ទ្រង់នឹងចាក់ស្រោចមកលើបងប្អូន ។២២ បន្ទាប់មក បងប្អូននឹងយល់ពីអត្ថន័យជ្រាលជ្រៅនៃទំនុកដែលយើងច្រៀងនៅក្នុងទំនុកតម្កើង « ព្រះវិញ្ញាណនៃព្រះ » ៖
ព្រះអង្គទ្រង់ពង្រីកយោបល់ដល់ពួកបរិសុទ្ធ ។ …
តម្រិះនិងព្រះចេស្ដានៃព្រះរីកសាយវិសុទ្ធ
ស្បៃគ្របដណ្ដប់ផែនដីចាប់ផ្ដើមរសាត់ទៅ ។២៣
ដំណឹងល្អនៃព្រះយេស៊ូវគ្រីស្ទបានពោរពេញដោយព្រះចេស្ដារបស់ទ្រង់ ដែលមានដល់គ្រប់បុត្រី ឬបុត្រារបស់ព្រះដែលស្វែងរកទ្រង់ដោយអស់ពីដួងចិត្ត ។ វាគឺជាទីបន្ទាល់របស់ខ្ញុំថា នៅពេលយើងទាញយកព្រះចេស្ដារបស់ទ្រង់ដាក់ក្នុងជីវិតរបស់យើង នោះទាំងទ្រង់ និងយើងនឹងអរសប្បាយ ។២៤
ក្នុងនាមជាសាក្សីពិសេសម្នាក់របស់ទ្រង់ ខ្ញុំសូមប្រកាសថា ព្រះមានព្រះជន្មរស់ ! ព្រះយេស៊ូវគឺជាព្រះគ្រីស្ទ ! សាសនាចក្ររបស់ទ្រង់បានស្ដារឡើងវិញមកលើផែនដី ! ព្យាការីរបស់ព្រះនៅលើផែនដីសព្វថ្ងៃនេះ គឺប្រធានថូម៉ាស អេស ម៉នសុន ដែលខ្ញុំគាំទ្រដោយអស់ពីដួងចិត្ត ។ ដោយសេចក្ដីស្រឡាញ់ និងពរជ័យរបស់ខ្ញុំសម្រាប់បងប្អូនគ្រប់គ្នា ខ្ញុំសូមថ្លែងទីបន្ទាល់នេះនៅក្នុងព្រះនាមនៃព្រះយេស៊ូវ គ្រីស្ទ អាម៉ែន។