1 Ngkai e koro bukina bwa ngke a tia ^anatin Motiaea mwaane ni karaoi bwaai aikai, ao a kairia tabeman mai irouia ao a okira tamaia, are te uea, ao a butiia bwa e na kariaia bwa a na konaa, n ikotaki ma aia aomata ake a tia n rineia, n nakon aban ^bNibwaai bwa aonga ni kona n tataekin bwaai ake a tia n ongo, ao bwa aonga naba n anga ana taeka te Atua nakoia tariia, aika Reimwanaite—

2 Ao bwa aonga ni karekea nakoia ataakin te Uea ae Atuaia, ao ni kamatoa nakoia aia bure aia bakatibu; ao bwa aonga ni katoka mai irouia aia ^akairiribai nakoia Nibwaite, ao bwa e aonga naba ni karekeaki nakoia te kimwareirei iroun te Uea ae Atuaia, bwa aonga n iraorao imarenaia, ao bwa e na toki te itabaraara imarenaia ni kabuta te aba are e a tia n anganiia te Uea ae Atuaia.

3 Ngkai nanoia e tangiria bwa e na karokoaki taekan te kamaiuiaki nakoia ana kariki bwai aika a maiu ni kabane, bwa a aki kona ^amoan ae e na iai ^btamnein te aomata temanna ae e na kamaunaki; eng, e bon riki naba iangoan ae e na iai te tamnei ae e na reke irouna te kammarakaki ae ^caki totoki bwa karikan ae ana ruru ma ni kurere.

4 Ao aio aron ana mwakuri Tamnein te Uea ni mwakuri iaoia, bwa bon ngaia kabanean ngkoa ^abuakakaia taan bure. Ao e nooria te Uea ma ana ^bnanoanga ae aki totoki bwa e na kamaiuia; ma e ngae n anne ao a rinanon te aki rau n tamnei ibukin aia buakaka, ni maaku bwa a rawa ni kaeaki nako n aki toki.

5 Ao e koro bukina bwa a bubuti nakon tamaia i nanon boong aika a mwaiti bwa a na kanakoaki nakon aban Nibwaai.

6 Ao te uea ae Motiaea e tataro nakon te Uea bwa e riai bwa e na kariaia natina bwa a na nakoia Reimwanaite n tataekina ana taeka.

7 Ao e taku te Uea nakon Motiaea: Kanakoia, bwa a mwaiti aika a na kakoauai aia taeka, ao e na reke irouia te maiu ae akea tokina; ao N na ^akamaiuia natim mai nanon baia Reimwanaite.

8 Ao e koro bukina bwa e kariaia Motiaea bwa a na mwananga ni karaoa are a tia ni bubuti bwa a na karaoia.

9 Ao a ^akaraoa mwanangaia nakon te rereua bwa a na tataekina te taeka nakoia Reimwanaite; ao N na manga anga ^brongorongon aia waaki i mwina.

10 Ngkai a akea ae e kona te uea ae Motiaea n anganna ueana, bwa akea natina ae kan butimwaea ueana.

11 Mangaia ae e uoti taian rekooti ake a koreaki iaon ^abwaatua aika buraati, ma ana bwaatua Nibwaai, ao bwaai ni kabane ake e a tia ni kaawakin n aron ana tua te Atua, ngke e a tia n rairi ao n tua bwa a na koreaki rekooti ake a mena iaon ^bbwaatua aika koora ake a kuneaki irouia ana botanaomata Rimwaai, ake e anganaki mai iroun Rimwaai;

12 Ao e karaoa aio ibukin te aki rau n nano are e reke irouia ana botanaomata; bwa a kabanei nanoia ibukin kan ataakin taekaia botanaomata ake a tia n tiringaki.

13 Ao ngkai e rairi man aia ibuobuoki ^aatibu ake uoua ake a kabaeaki nakon kain te kai ni katebe ake uoua.

14 Ngkai a tia ni katauraoaki bwaai aikai man moan rikin bwaai, ao ni buti man te rooro teuana nakon teuana, ibukin rairan taian taetae;

15 Ao a tia ni kaawakinaki man taurabwaki i nanon bain te Uea, bwa e aonga ni kaotia nakoia bwaai aika a maiu ni kabane ake a na bwaina te aba, aia buakaka ma aia mwakuri aika a ribaki ana botanaomata;

16 Ao te aomata are iai irouna bwaai aikai e na aranaki bwa te ^atia mamata, n aron te waaki n taai ake ngkoa.

17 Ao ngke e a tia Motiaea n rairi rekooti aikai, taraia, a taekinaki iai rongorongoia te botanaomata ake a ^atiringaki, man te tai are a tiringaki iai ni katean te ^btaua are korakora, n te tai are ^ckamwaiti iai te Uea neweia aomata ao a maenako iaon te aonaba ni kabuta, eng, ao man te tai naba anne rikaaki ni karokoa karikan Atam.

18 Ngkai rongorongo aikai ake a karika te tang ae korakora irouia ana botanaomata Motiaea, eng, a bon onrake n te nanokawaki ae korakora; e ngae n anne, e anganiia te atatai ae korakora, are a kimwareirei iai.

19 Ao e na koreaki te rongorongo aio i mwin aio; bwa taraia, a riai aomata ni kabane n atai taekan bwaai ake a koreaki i nanon te rongorongo aio.

20 Ao ngkai, n aron are I taekinna nakoimi, bwa ngke e a tia te uea ae Motiaea ni karaoi bwaai aikai, e anai bwaatua aika ^aburaati, ao bwaai ni kabane ake e a tia ni kaawakin, ao e angan Aramwa, are natin Aramwa; eng, taian rekooti ni kabane, ao bwaai n ^braitaeka naba, ao e katikui i nanon baina, ao e tua nakoina bwa e riai ni ^ckaawakin man taurabwai, ao ni koroi naba aia rekooti te botanaomata, ni buti man te roro teuana nakon teuana, n aiaron are a tia ni buti man te roro teuana nakon teuana man te tai are a kitana iai Ierutarem Riaai.