1 Ao ngkai e koro bukina bwa ngke e a tia te uea ae Motiaea ni maiu n te rau i nanon te maan ae teniua te ririki, ao e a kan atai taekaia aomata ake a ^awaerake bwa a na maeka n abaia Riaai-Nibwaai, ke n te kaawa ae Riaai-Nibwaai; bwa a tuai n ongo te botanaomata mai irouia man te tai are a mwananga iai nakon aban ^bTaraemera; mangaia ae e a kua n aia titiraki aika a mwaiti aika akea tokiia.

2 Ao e koro bukina bwa te uea ae Motiaea e kariaia tengaun ma onoman mai buakoia ana rorobuaka aika a marurung bwa a na waerake nakon aban Riaai-Nibwaai bwa a na kakaea taekaia tariia.

3 Ao e koro bukina bwa n te bong are i mwina ao a mwananga ni waerake ao iai i buakoia temanna ae arana Amon, ae te aomata ae marurung ma ni korakora, ao bon kanoan Taraemera; ao bon ngaia naba aia tia kairi.

4 Ao ngkai, a bon aki ataa kawaia i nanon te rereua bwa aonga n roko n aban Riaai-Nibwaai; Mangaia ae a mwananga i nanon te rereua i nanon boong aika a mwaiti, ao e koro abwi te bong n aia tai ni mwaamwananga.

5 Ao ngke a tia ni mwananga i nanon abwi te bong ao a roko n te tabuki teuana, ae mena i meangin ^aTiirom, ao a katei iai umwaia.

6 Ao e kairia tarina aika teniman Amon, ao araia bon Amareki, Erem, ao Eim, ao a mwananga nako aban ^aNibwaai.

7 Ao taraia, a kaitibo ma aia uea te botanaomata ake a maeka i aon aban Nibwaai, ma aban Tiirom; ao a katobibiaki irouia ana tautia te uea, ao a tauaki, ao a kabaeaki, ao a karinaki i nanon te umwa ni kaikain.

8 Ao e koro bukina bwa ngke e a koro uoua te bong i nanon menaia i nanon te umwa ni kaikain ao a kairaki nako matan te uea, ao a kabwaraki kabaeaia; ao a tei imatan te uea, ao a kariaiakaki, ke n tuangaki bwa a riai ni kaekai titiraki ake e na titirakinia iai.

9 Ao e taku nakoia: Taraia, ngai bon ^aRimwaai, ae natin Noa, are natin Tinebi, ake a mwananga nako man aban Taraemera bwa a na abaaba n te aba aio, ae abaia aia bakatibu, ao are e karikaki bwa te uea ni bwanaia te botanaomata.

10 Ao ngkai, I kan ataia bwa teraa bukin aki maakumi ni kaniia oon au kaawa, ngkai I mena i tinanikun oona ma au tautia?

11 Ao ngkai, bon ibukin anne are I a tia iai n anga au taeka bwa kam na aki tiringaki bwa I kan titirakiningkami bukina, bwa ngke tiaki ao N na kaman tuangiia au tautia bwa a na tiringingkami. Kam kariaiakaki n taetae.

12 Ao ngkai, ngke e a ongo Amon bwa e a kariaiakaki n taetae, ao e a kerake ni bobaraaki imatan te uea; ao ngke e a teirake ao e kangai: O te uea, I rang ni karabwarabwa imatan te Atua n te bong aio ngkai e teimatoa maiu, ao ni kariaiakaki n taetae; ao N na waaki n taetae n te aro ae matoatoa;

13 Bwa I ataia raoi bwa ngke kam kinaai ao kam na bon aki kariaia bwa ti na kabaeaki ni kabaebae aikai. Bwa bon ngai Amon, ao ngai kanoan ^aTaraemera, ao I mwananga ni kitana aban Taraemera ni ukoukori taekaia tarira, ake e kairia nako Tinebi man te aba anne.

14 Ao ngkai e koro bukina bwa ngke e tia Rimwaai n ongo ana taeka Amon, ao e onrake n te kukurei, ao e taku: Ngkai, I ataia ma te aki nanokokoraki bwa tariu ake a maeka i Taraemera a teimatoa i nanon te maiu. Ao ngkai, N na kimwareirei; ao nakon te ingabong N na tua bwa a na kimwareirei naba au botanaomata.

15 Bwa taraia, ti mena i aan aia tautaeka Reimwanaite, ao te ^aangabwai are kateaki nakoira bon moan te rawawata. Ma ngkai, taraia, a na kamaiuira tarira man te tautaekanaki, ke mai nanon baia Reimwanaite, ao ti na riki bwa aia toro; bwa e tamaroa riki bwa ti na toro irouia Nibwaite nakon ae ti na angabwai nakon ueaia Reimwanaite.

16 Ao ngkai, e tuatua te uea ae Rimwaai nakoia ana tautia bwa a na aki manga kabaea Amon ke tarina, ao e tua bwa a na nako nakon te tabuki are mena i meangin Tiirom bwa a na kairiia tariia nako nanon te kaawa, bwa aonga n amwarake, ni mooi, ao ni motiki rawaia i mwin mwanangaia; bwa a tia n rinanon kaangaanga aika a mwaiti; a tia n rinanon te baki, te taka, ao te korakai.

17 Ao ngkai, e koro bukina bwa ngke e a ingabong ao e a kanakoa te katanoata te uea ae Rimwaai nakoia ana botanaomata, bwa a na bane ni mwananga nakon te ^atembora bwa a na ongo taeka aika e kan taekin nakoia.

18 Ao e koro bukina bwa ngke a tia ni botaki ao e a taetae nakoia n te aro ni wanawana, ni kangai: O ngkami, au botanaomata, tabeki atuumi ao kam na kabebeteaki; bwa taraia, n te tai aio, ae e aki rangi n raroa, are ti nang aki manga tautaekanaki iai irouia ara kairiribai, e ngae ngke a mwaiti ara tai ni buaka mai mwaaina, aika bon akea nanoia; ma I kakoaua bwa ti kona n tokanikai ngkana ti buaka teuana riki te tai.

19 Mangaia ae tabeki atuumi, ao kimwareirei, ao kawenea ami onimaki iroun te ^aAtua, ae te Atua are Atuan Aberaam, ao Itaaka, ao Iakobwa; are te Atua are ^bkairia tibun Iteraera n otinako mai aban Aikubita, ao e anganiia te kona n nakonako i nanon Taari are e Uraura i aon te tano ae mwau, ao e kamwarakeia n te ^cmaana bwa aonga n aki mate n te rereua; ao a mwaiti riki bwaai ake e karaoi ibukiia.

20 Ao te Atua naba anne, e a tia ni kairiia ara bakatibu ^amai aban Ierutarem, ao e a tia ni kawakiniia ma ni kateimatoaia ana botanaomata ni karokoa te tai aio; ao taraia, bon ibukin ara bure ma ara mwakuri aika bati n ribaki are e a tia iai ni kairira nakon te kona n tautoronaki.

21 Ao taan kakoaua ni kabane ngkami n te bong aio, bwa Tinebi, are e a tia ni karikaki bwa te uea iaoia te botanaomata aio, are rangi n ^aienikuri ni karekea te aba mai irouia ana bakatibu, mangaia are e mwaamwanaki n aron ana mwantiaka ma ni babakanikawai te uea are Reimwan, are karaoa te boraraoi ma te uea are Tinebi, ao e karekea i nanon baina mwakoron te aba are e reke naba iai te kaawa are mena iai Riaai-Nibwaai, ma te kaawa naba are mena iai Tiirom; ma aaba nako ake a katobibiaki iai—

22 Ao e karaoi bwaai aikai ni kabane, ti ibukin ^akairaia te botanaomata aio nakon te tautaekanaki ma te tautoronaki. Ao taraia, ngaira n te tai aio ao ti kaakabwaka te angabwai nakon aia uea Reimwanaite, n te mwaiti ae iteran ara koon, ma ara bwaare, ma ara kai n amwarake nako, ao iteran naba buniia ara man ma ara tiibu; ao iteran naba ara bwai ni kabane ake e tangiri aia uea Reimwanaite bwa ngkana ti aki ao e na anai maiura.

23 Ao ngkai, e koaua bwa e aki rangi ni kaangaanga uotakin aio? Ao tiaki naba moan te korakora karawawatakira aio? Ngkai, taraia, e na rangi ni korakora bukin tangira.

24 Eng, I kangai nakoimi, e na korakora bukin tangira; bwa taraia, iraman mwaitia tarira aika a tia n tiringaki, ao akea bukin katinakoan raraaia, ao a riki aikai ni kabane ibukin te buakaka.

25 Bwa ngke a aki bwaka te botanaomata aio n riaoan te tua ao te Uea e na bon aki karika te bwai ae moan te buakaka aio nakoia. Ma taraia, a bon aki kan ongo nakon ana taeka; ao e rikirake te itabaraara imarenaia, ao a bon kawawaea te raraa ae bati imarenaia.

26 Ao a tia naba n tiringa ana ^aburabeti te Uea; eng, ae te aomata ae e a tia n rineaki iroun te Atua are e tuangiia taekan aia buakaka, ma aia mwakuri aika bati n ribaki ao e taetae ni burabeti ibukin bwaai aika bati ake a na riki, eng, ma taekan naba rokon te Kristo.

27 Ao ngke e tuangiia bwa Kristo bon te ^aAtua, ae Tamaia bwaai ni kabane, ao n taku bwa e na riki n aiaron te aomata, are aiaron te ^bbanna are e a tia ni karikaki n aron te aomata ni moan karikan bwaai; ke n taekinna bwa e karikaki te aomata n aiaron te ^cAtua, ao e na ruo te Atua nako buakoia natia aomata, ao n riki n iriko ao n raraa, ao e na maiu iaon te aonaba—

28 Ao ngkai, a tiringnga ibukin ae e taekina aio; ao a mwaiti riki bwaai aika a karaoi are e karika iai ruon unin nanon te Atua iaoia. Mangaia ae antai ae miimi bwa bukin teraa ngkai a tautoronaki, ao a karawawataki ni bwaai aika a mwaiti?

29 Bwa taraia, e taku ana taeka te Uea: N na bon aki ^abuokiia au botanaomata n aia bong n riaon te tua; ma n N na kaobuakai kawaia bwa a na aki kakabwaiaki; ao aia mwakuri a na riki bwa bwaai ni kabwakabwaka imwaaia.

30 Ao e kangai riki: Ngkana a unika te ^akammaira au botanaomata ao ae na ^breke irouia kunin te wiita mai nanon te ukeukenanti; ao a na nganga iai.

31 Ao e kangai riki: Ngkana a unika te kammaira au botanaomata ao ae na reke irouia te ^aang mainiku, are mwiina te waekoa ni kamaunaki.

32 Ao ngkai, taraia, e a tia ni koro bukin ana berita te Uea, ao e a tia n reke kaimi ao kam a karawawataki.

33 Ma kam na ^arairaki nakon te Uea ma te nano ae koaua ma ni bwanin, ao kam na onimakinna, ao n toro irouna ma nanomi ni kabane, ao ngkana kam karaoa aio, ao e na kamaiungkami man te tautoronaki n aron ae boraoi ma ana babaire ma nanona.