1 Ao e koro bukina bwa ngke e a tia te uea ae Rimwaai n taetae nakoia ana botanaomata, bwa e taekin bwaai aika a mwaiti nakoia ma tii tabeua aika I a tia ni koroi i nanon te boki aio, e taekin nakoia ana botanaomata bwaai ni kabane ake a kaineti ma tariia ake a maeka n aban Taraemera.

2 Ao e tuatua bwa e na teirake Amon imatan te botanaomata, ao e na taekin nakoia bwaai ni kabane ake a tia n riki nakoia tariia man te tai are e mwananga iai Tinebi n nako man te aba arei ni karokoa te tai are e mwananga iai ngaia man te aba arei.

3 Ao e taekin naba nakoia ana kabanea n taeka te uea are Beniamina ake e reiakin nakoia, ao e kabwarabwarai nanoia nakoia ana botanaomata te uea are Rimwaai, bwa a aonga ni maataata n nanon taeka ni kabane ake e taekin.

4 Ao e koro bukina bwa ngke e a tia ni karaoa aio, ao e a kainaomata te botanaomata te uea are Rimwaai, ao e tuatua bwa a na bane n okiri mwengaia.

5 Ao e koro bukina bwa e tuatua bwa a uotaki nakon Amon taian bwaatua aika kanoaia taian ^arongorongo ibukiia ana botanaomata man te tai are a kitana iai aban Taraemera, bwa e aonga ni wareki.

6 Ngkai, ngke e a tia ni wareki taian rongorongo Amon, ao e a titirakinna te uea bwa e kona n raitaeka ke aki, ao e tuangnga Amon bwa e aki konaa.

7 Ao e taku te uea nakoina: I nanon rawawatau ibukin korakaia au botanaomata, I tua bwa a na mwananga angaun ma teniman mai buakoia au botanaomata nakon te rereua, bwa aonga n roko i Taraemera, bwa ti aonga ni bubuti nakoia tarira bwa a na kamaiuira man te tautoronaki.

8 Ao a bua i nanon te rereua i nanon te maan ae boong aika a mwaiti, ma a botumwaaka, ao e aki reke irouia aban Taraemera ma a manga oki nakon te aba aio, i mwin mwaamwanangaia n te aba ae bati te nei iai, ao ni kunea naba te aba ae on n riia aomata, ma maan, ao iai naba mwiin taian kateitei n aekakiia nako, ao n reke naba irouia te aba ae e a tia ni kaainaki irouia aomata ae titebo mwaitia ma mwaitia tibun Iteraera.

9 Ao ni kakoauan bwaai ake a taekin ao a uoti bwaatua aika ^auabwi ma aua aika a bon on n te koroboki, ao a karaoaki man te koora.

10 Ao taraia, a uota naba ^aotangan te bwabwa, ae bubura, ao e karaoaki n te ^bburaati ao te kaobwa, ao e tamaroa.

11 Ao a uotii naba kabaang, a buakaka bwain tauaia, ao a rootaki n te raraa wiia; ao akea iaon te aba ae kona n rairananon te taetae ke te koroboki ake a mena iaon taian bwaatua. Mangaia ae I kangai nakoim: Ko kona n raitaeka?

12 Ao I kangai riki nakoim: Iai ae ko ataia ae kona n raitaeka? Bwa I tangiria bwa e na rairaki te rongorongo aio nakon ara taetae; bwa tao e na kona n anganiira te atatai teutana nakoira taekan mwiia te botanaomata are e a tia ni kamaunaki, bwa a roko mai iaa rongorongo aikai; ke e na kona n anganiira te atatai n aron taekaia te botanaomata aio are e a tia ni kamaunaki; ao I rangi ni kan ataa taekan kamaunakia.

13 Ao ngkai e kangai Amon nakoina: I kona n taekinna ma te aki nanokokoraki nakoim, O ngkoe ae te uea, bwa antai te aomata ae kona n ^arairi taian rekooti aikai; bwa iai bwaai aika e kona n taratara mai nanoia, ao n rairi taian rekooti ni kabane man taai ake ngkoa; ao bon te bwai n tituaraoi mai iroun te Atua. Ao a aranaki bwaai aikai bwa taian ^bbwai n raitaeka, ao akea te aomata ae kona n taratara inanoia ma tii ngkana e a tia n tuangaki, bwa ngkana e karaoia ma akea kariaiakana ao e na mate. Ao te aomata are tuangaki bwa e na taratara inanoia, e aranaki bwa te ^ctia mamata.

14 Ao taraia, aia uea te botanaomata are e mena i aban Taraemera bon te aomata are e a tia n tuangaki bwa e na karaoi bwaai aikai, are e mena irouna te bwai n tituaraoi ae korakora aio mai iroun te Atua.

15 Ao e taku te uea bwa e korakora riki te tia mamata nakon te burabeti.

16 Ao e taku Amon bwa te tia mamata bon te tia kaotioti ao te burabeti naba; ao te kabanea ni kakawaki ni bwai n tituaraoi are e kona n reke iroun te aomata bon karekean mwaakan te Atua irouna, are bon akea ae kona n reke irouna; ma e kona n anganaki te mwaaka ae korakora aio mai iroun te Atua.

17 Ma e kona te tia mamata n atai kanoan bwaai aika a tia n riki, ao bwaai naba aika a na riki, ao mai irouia are a na kaotiotaki iai bwaai, ke are a na kaotaki iai bwaai aika a raba, ao a na atai bwaai aika a karabaki, ao a na kaotaki bwaai ake a ataaki irouia, ao a na kaotaki bwaai riki tabeua irouia are a na bon aki ataaki ngke akea ngaia.

18 Mangaia ae e a tia te Atua ni katea te kawai are e na kona iai te aomata ni karaoi kakai aika a korakora i nanon te onimaki; mangaia are e na riki bwa te kabwaia ae korakora nakoia raona n aomata.

19 Ao ngkai, ngke e a tia Amon n taekin taian taeka aikai ao e a kimwareirei te uea, ao e anga ana kaitau nakon te Atua, ni kangai: I ataia ni koaua bwa e ^akorakora te bwai ae raba i nanon bwaatua aikai, ao I ataia ni koaua bwa bwaai n raitaeka aikai, a tauraoi ibukin kaotan nanon bwaai aika a raba aikai ni kabane, nakoia natia aomata.

20 O ai kamiimira ana mwakuri te Uea, ao ai korakorara taotaonakin nanona ibukiia ana botanaomata; eng, ao ai matakiira ma ni matoatoa reken te atatai irouia natiia aomata; bwa a aki kan ukoukora te wanawana, ke n tangiria bwa ^ae na tautaekaniia!

21 Eng, ai aroia taian tiibu aika a aki manana ake a birinako mai iroun te tia kaawakin tiibu, ao a maenako, ao a booaki nako, ao a kanaki irouia man ni kakang n te buakonikai.