1 Ao ngkai, e taku te uea ae Beniamina bwa e riai bwa i mwin tiana n taetae nakoia aomata, ao e na ^akoroi araia aomata ake a tia ni karaoa te berita ae tabu ma te Atua bwa a na kaawakin ana tua.

2 Ao e koro bukina bwa akea temanna mai buakoia, ma tii ataei aika a uarereke, ake a tuai ni karaoa te berita ae tabu ao ni katoka aran Kristo iaoia.

3 Ao e a manga koro naba bukina bwa ngke e a tia te uea ae Beniamina ni karaoi bwaai aikai ni kabane, ao ni katabua natina te mwaane ae ^aMotiaea bwa te tia tautaeka ao te uea iaoia ana botanaomata, ao n anganna taekan ueana ni kabane, ao ngke e a tia naba ni ^bweteia taian ibonga bwa a na ^creireinia aomata, bwa aonga ni kona n ongo ma n atai ana tua te Atua, ao ni kauringia taekan aia ^dtuea ake a tia ni karaoi, ao e a kainaomata te botanaomata, ao a oki, ni kabane, n aron aia utu, nakon mwengaia.

4 Ao e a moana ana tautaeka ^aMotiaea n onea mwiin tamana. Ao e a moana ana tautaeka n ana katenibwi n ririki, ni bootan te tai aio ni kabane, ae e nakon abubua itibwi ma onoua te ririki man te ^btai are e kitana iai Ierutarem Riaai.

5 Ao e maiu te uea ae Beniamina teniua riki te ririki i mwin aio ao e a mate.

6 Ao e koro bukina bwa e maiu Motiaea ni kawain te Uea, ao e butimwaei ana motikitaeka, ma ana tua, ao e kaawakin ana tua ibukin bwaai ni kabane ma are e tuatua nakoina.

7 Ao e tuatua te uea ae Motiaea nakoia ana botanaomata bwa a na ribana te aonaba. Ao ngaia naba, n oin rabwatana, e waaki n ribana te aonaba, bwa e aonga n ^aaki riki bwa te bwai ni katabetabe nakoia ana botanaomata, bwa e aonga ni waaki n aron are e a tia ni waaki iai tamana ni karaoi, ni bwaai ni kabane. Ao akea te itabaraara are e riki i buakoia ana botanaomata i nanon te maan ae teniua te ririki.