1 Ngkai ngke e a tia Motiaea ni karaoa aio ao e a kanakoa te rongorongo ni kabuta te aba, nakoia aomata ni kabane, ni kan atai nanoia bwa antai ae e na riki bwa aia uea.

2 Ao e koro bukina bwa e roko bwanaia te botanaomata ni kangai: Ti tangiria bwa e na riki natim are Aaron bwa ara uea ao ara tia tautaeka.

3 Ma e a tia Aaron n nako aban Nibwaai, mangaia ae e aki kona te uea n anganna ueana; ao e aki naba kan ana ueana Aaron; ke ni iai mai buakoia ^anatin Motiaea mwaane ake a tauraoi ni katokaa iaoia te aba n uea.

4 Mangaia ae e a manga kanakoa riki te rongorongo te uea ae Motiaea nakoia aomata; eng, e kanakoa te rongorongo ae koreaki nakoia aomata. Ao aikai taian taeka ake a koreaki, e kangai:

5 Taraia, O ngkami au botanaomata, ke tariu, bwa irou tariu ngkami, I tangiria bwa kam na iangoa te bwai are kam a tia ni butiaki bwa kam na baireia—bwa kam tangiria bwa e na reke ami ^auea.

6 Ngkai I taekinna nakoimi bwa e a tia te aomata are e riai n reke irouna te abanuea n aki butimwaia, ao e aki kan katokaa iaona te abanuea.

7 Ao ngkai ngkana iai are e a manga rineaki n onea mwiina, taraia I raraoma bwa e na bae n riki te itabaraara imarenami. Ao antai ae e na ataia ao e kona natiu, are riai n reke te abanuea irouna, n un ao e na kairia nako mwakoron te botanaomata aio mangaia, are e na kariki buaka ma itabaraara imarenami, are e na reke mai iai tiritiri ao bitakin ana mwakuri te Uea nakon te buakaka, eng, ao a na kamaunaki iai tamneia aomata aika a mwaiti.

8 Ngkai I kangai nakoimi, ti na kawanawanaira ao ti na iangoi bwaai aikai, bwa akea kariaiakara ni kamaraia natiu, ke ni iai kariaiakara bwa ti na kamaraia temanna ngkana arona bwa e rineaki n onea mwiina.

9 Ao ngkana e okiri arona ni kamoamoa ma aika a buakaka natiu ao e na kona n anai taeka ake e a tia n atong, ma n anaa nnena n te aba n uea, are e na kona iai n ikotaki ma te botanaomata aio ni karaoa te bure.

10 Ao ngkai e riai bwa ti na wanawana n taratarai bwaai aikai, ao ni karaoa are e na reke iai te rau irouia te botanaomata aio.

11 Mangaia ae N na riki bwa ami uea n nikiran au bong ni maiu; e ngae n anne, e riai bwa ti na ^arineia ^btaan moti, bwa a na motiki taekaia te botanaomata aio n aron ara tua; ao ti na kaboou aron aia waaki te botanaomata aio, bwa ti na rineia aomata aika a wanawana bwa taan moti, ake a na motika taekaia te botanaomata aio n aron ana tua te Atua.

12 Ngkai e tamaroa riki bwa e na motikaki taekan te aomata iroun te Atua nakon ae iroun te aomata, bwa a tau ana motikitaeka te Atua n taainako, ma ana motikitaeka te aomata a aki tau n taainako.

13 Mangaia ae ngkana e kona ao a na riki aomata aika a ^atau bwa ami uea, ake a na kamatoai ana tua te Atua, ma ni motika taekaia te botanaomata aio n aron ana tua, eng, ngkana a kona n riki aomata bwa ami uea ake a kona ni karaoa aron are e karaoia tamau are ^bBeniamina nakoia te botanaomata aio—I kangai nakoimi, ngkana e kona n riki aio n taainako ao ngkanne e riai bwa e na teimatoa ni iai ami uea are e na tautaeka i aomi.

14 Ao ngai naba I a tia ni beku ma korakorau ma au konabwai ni kabane ake irou, n reireingkami ana tua te Atua, ao ni kamatoa te rau ni kabuta te aba, bwa a na akea taian buaka ma itabarara, ke te iraa, ke te anaibwai, ke te tiriaomata, ke bwaai riki tabeua aika a buakaka;

15 Ao te aomata are e a tia ni karaoa te buakaka, I a tia ni ^akatuaea n aron te bure are e a tia ni karaoia, n aron taian tua ake ti a tia n anganaki mai irouia ara bakatibu.

16 Ngkai I kangai nakoimi, ibukina ngkai a aki tau aomata ni kabane, e aki riai bwa e na iai te uea ke Ueea ake a na tautaeka i aomi.

17 Bwa taraia, ^amwaitira te ^bbuakaka are e a tia ni karaoia temanna te uea, eng, ao mwaitira ana urubwai!

18 Eng, uringa te uea are Noa, ana ^abuakaka ma ana mwakuri aika a ribaki, ao aia buakaka naba ma aia mwakuri ana botanaomata aika a ribaki. Taraia moan te korakora te rekenikai are e reke nakoia; ao ibukin naba aia buakaka ao a kairaki nakon te ^btautoronaki.

19 Ao ngke e aki karinna, aia Tia Karikibwai ae wanawana, ibukin aia rairannano ae kororaoi, are a na bon mena naba ngkai i nanon te tautoronaki.

20 Ma taraia, e kamaiuia kioina ngkai a ^akarinanoia imatana; ao kioina ngkai a kakorakorai aia ^btataro nakoina ao e a kamaiuia man te tautoronaki; mangaia ae e mwammwakuri te Uea ma mwaakana ni bwaai nako i buakoia natia aomata, n arora baina ae ^cnanoanga nakoia ake a ^donimakinna.

21 Ao taraia, ngkai I kangai nakoimi, kam aki kona ni kabwaka te uea ae buakaka ma ti rinanon te itabaraara, ma te tiriaomata.

22 Bwa taraia, e na kairia ^araona nakon te buakaka, ao e na kairia ana tautia i rarikina; ao e na urui aia tua ake a tia n tautaeka i nanon te raoiroi i mwaaina; ao e na toubekai ana tua te Atua.

23 Ao e na katei tua, ao e na kanakoi nakoia ana botanaomata, eng, aika taian tua aika a boraoi ma arona ni ^abure; ao ane e aki iri nanon ana tua e na tua bwa e na tiringaki; ao ake a teirake ni kaitaraa ao e na kanakoia ana tautia bwa a na buakaniia, ao ngkana e konaia ao e na tiringia; ao te uea ae aki raoiroi e na onea kawain te raoiroi nakon te buakaka.

24 Ao ngkai taraia bwa I kangai nakoimi, e aki riai bwa a na reke iroumi mwakuri aika a ribaki n aron aikai.

25 Mangaia ae kam na rineia man bwanaia te botanaomata, taan moti, bwa aonga ni motikaki taekami ni kaineti ma tua ake kam a tia n anganaki irouia ami bakatibu, aika a eti raoi, aika a anganaki ni bain te Uea.

26 Ngkai e burenibwai bwa e na kaokoro are e tangiraki ni bwanaan te botanaomata ma ae te eti; ma e nonoraki riki ae ti tabeman aika a tangira ae e aki bure; mangaia ae kam na karaoa aio bwa ami tua—ni karaoi ami waaki ni bwanaan te botanaomata.

27 Ao ^angkana e roko te tai are e rineaki iai te buakaka ni bwanaan te botanaomata, ao bon te tai naba are e na roko iai ana motikitaeka te Atua i aomi; eng, bon te tai naba anne are e na kawaringkami ma te urubwai ae korakora n aron are e a tia ni karaoia ni karokoa te tai aio ni kawaran te aba aei.

28 Ao ngkai ngkana iai ami tia moti, ao a aki motiki taekami n aron te tua are e a tia ni kateaki, ao kam kona n tua bwa a na motikaki taekaia iroun te tia moti ae e rietata riki.

29 Ngkana a aki motiki taeka n ae raoiroi ami tia moti aika rietata, kam kona n tua bwa ana botaki ami tia moti ake mai nano, ao a na motika taekan ami tia moti are rietata, n aron bwanaia te botanaomata.

30 Ao I tua nakoimi ni maakan te Uea bwa kam na karaoi bwaai aikai; ao I tua nakoimi bwa kam na karaoi bwaai aikai, ao bwa a na akea ami uea; bwa ngkana a karaoa te bure ma bwaai aika a buakaka te botanaomata aio ao a na bon bane ni bukinaki iai i bon irouia.

31 Bwa taraia I kangai nakoimi, a tia n rinanon te bure aomata aika a mwaiti ibukin buakakaia aia uea; mangaia ae a na katokaaki aia buakaka ni kabane iaon atuuia aia uea.

32 Ao ngkai I tangiria bwa e na ^abua te buakaka aio man te aba aio, ai moaraara riki buakoia au botanaomata; ma I tangiria bwa te aba aio te aba n ^binaomata, ao ^caomata ni kabane a na kimwareirei n inaomataia ma aia konabwai, ni maanin are motikia te Uea bwa ti na maeka iai iaon te aba aio, eng, ni karokoa tokin maiuia ara kariki iaon te aba aio.

33 Ao a mwaiti riki bwaai ake e koroi te uea ae Motiaea nakoia, ni kaoti nakoia ana korakai ma ana kaangaanga te uea ae raoiroi, eng, aki raun tamneina ibukiia ana botanaomata, ao ibukin ngurengureia te botanaomata nakon aia uea; ao e kabwarabwarai ni kabane nakoia.

34 Ao e tuangiia bwa a aki riai bwaai aikai; ma e riai bwa e na tibwauaaki te rawawata iaoia te botanaomata ni kabane, bwa e na uota tibwana temanna i bon irouna.

35 Ao e kaotii naba nakoia aki nakoraoin aia mwakuri, ngkana e tautaeka te uea ae e aki raoiroi iaoia;

36 Eng, ana bure ma ana mwakuri aika bati n ribaki ni kabane, ao buaka ni kabane, ma itabaraara, ma te tiritiri, ma te iraa, ma te anaibwai, ma karaoan mwakuri ni kabekaau, ao aekan mwakuri nako aika a buakaka aika a aki kona ni warekaki—n tuangiia bwa a aki riai bwaai aikai, bwa a bon rang ni kaaitarai ana tua te Atua.

37 Ao ngkai e koro bukina bwa te uea ae Motiaea e a tia ni kanakoi rongorongo aikai nakoia ana botanaomata ao a kakoauai ana taeka.

38 Mangaia ae a katoka tangiran karekean te uea, ao e rikirake irouia kantaningan reken boraoia aomata iaon te aba ni kabuta; eng, ao aomata ni kabane a kaota tauraoia ni bukinaki ibukin oin aia bure.

39 Mangaia ae koro bukina bwa ae a bobotiia n taian rabwata ni kabuta te aba, ni kaoti bwanaia bwa antai aika a na riki bwa aia tia moti, aika a na motiki taekaia man ^atua ake a tia n anganaki; ao moan te kimwareirei ngaia ibukin te ^binaomata are a tia n anganaki.

40 Ao e rikirake ni korakora tangiran Motiaea irouia; eng, a karinea riki nakoia aomata nako; bwa a aki nooria n aiaron te aomata ae iowawa are ukoukora ana raka, eng, bwa te kaubwai e na kabuakaka te tamnei; bwa e aki anaa te kaubwai mai irouia, ao e aki naba kukurei n te tiritiri; ma e kamatoa te ^arau iaon te aba, ao e a tia n tua nakoia ana botanaomata bwa a na kamaiuaki man aekan tautoronaki nako; mangaia ae a karinea, eng, n ae moan te korakora, riaon ae kona n taekinaki.

41 Ao e koro bukina bwa a rineia taan moti bwa a na ^atautaeka iaoia, ke ni motiki taekaia n aron te tua; ao a karaoa aio ni kabuta aon te aba.

42 Ao e koro bukina bwa e rineaki Aramwa bwa te moan tia moti ae rietata, ao ngaia naba te ibonga ae rietata, te nakoa are anganaki mai iroun tamana, are anganaki iai te mwioko ibukin ana waaki te ekaretia ni kabane.

43 Ao ngkai e koro bukina bwa e ^anakonako Aramwa n aron kawain te Uea, ao e kaawakin ana tua, ao e anga ana moti aika a raraoi; ao e teimatoa te rau iaon te aba.

44 Ao aio moan aia tautaeka taan moti ni kabuta aon aban Taraemera, irouia te botanaomata aika Nibwaite; ao Aramwa ngaia te moan ao te tia moti ae rietata.

45 Ao e koro bukina bwa e a mate tamana, ae ai wanibwi ma uoua ana ririki, n tia ni maiu ni kakoroi bukin ana tua te Atua.

46 Ao e koro bukina bwa e mate naba Motiaea, n ana katenibwi ma teniua n ririki n tautaeka, ngke ^aonobwi ma teniua ana ririki; are e a reke iai bootana ae nimabubua ao ruaiwa te ririki man te tai are e kitana iai Ierutarem Riaai.

47 Ao are e a toki iai aia tautaeka uea i aoia te botanaomata ae Nibwaite; ao are e a toki naba iai ana bong ni maiu Aramwa, are ngaia ae katea aia ekaretia.