1 Kag karon ako, si Moroni, magapadayon sa akon kasulatan. Gani, tan-awa, natabo ini nga tungod sang sekreto nga mga padihot ni Akis kag sang iya mga kaabyanan, tan-awa, naagaw nila ang ginharian ni Omer.

2 Apang, ang Ginuo nangin maluluy-on kay Omer, kag amo man sa iya mga anak nga lalaki kag sa iya mga anak nga babayi nga wala naghangad sang iya kalaglagan.

3 Kag ginpaandaman sang Ginuo si Omer sa isa ka damgo nga maghalin sia sa kadutaan; gani naghalin si Omer sa kadutaan upod ang iya panimalay, kag nagpanglakaton sa madamo nga adlaw, kag nakaabot kag naglabay sa bungyod sang Sim, kag nakaabot malapit sa lugar nga sa diin ang mga Nefinhon nalaglag, kag halin didto pa-este, kag nakaabot sa isa ka lugar nga ginatawag nga Ablom, sa higad sang baybayon, kag didto nagpatindog sia sang iya tolda, kag amo man ang iya mga anak nga lalaki kag iya mga anak nga babayi, kag tanan niya nga panimalay, luwas lang kay Jared kag iya panimalay.

4 Kag natabo ini nga si Jared ginhaplas nga hari sang katawhan paagi sa kamot sang kalainan; kag ginhatag niya kay Akis ang iya anak nga babayi agud iya pangasaw-on.

5 Kag natabo ini nga gintinguhaan ni Akis ang kabuhi sang iya ugangan; kag nangayo sia sing bulig sa sadtong iya mga ginpasumpa paagi sa panumpa sang mga dumaan, kag nakuha nila ang ulo sang iya ugangan, samtang nagapungko sia sa iya trono, nga nagapakig-atubang sa iya katawhan.

6 Kay sa pagkagrabe ang paglapnag sining malain kag sekreto nga katilingban nga ginpalain sini ang mga tagipusuon sang tanan nga katawhan; gani si Jared ginpatay sa iya trono, kag si Akis ang naggahum bulos sa iya.

7 Kag natabo ini nga si Akis nagsugod nga naimon sa iya anak nga lalaki, gani ginhunong niya sia sa bilanggoan, kag ginbuhi niya sia sa diutay ukon sa wala sing pagkaon tubtob nga nag-antos sia sang kamatayon.

8 Kag karon ang utod sang nag-antos sang kamatayon, (kag ang iya ngalan amo si Nimra) naakig sa iya amay tungod sinang ginhimo sang iya amay sa iya utod.

9 Kag natabo ini nga si Nimra nagtipon sang diutay nga kadamuon sang mga tinawo, kag nagpalagyo sa kadutaan, kag nagkadto kag nagpuyo upod kay Omer.

10 Kag natabo ini nga si Akis nangin amay naman sang iban pa nga mga anak nga lalaki, kag nabihag nila ang mga tagipusuon sang katawhan, bisan pa nga nagsumpa sila sa iya nga maghimo sang tanan nga sari sang kalainan suno sa sinang iya luyag.

11 Karon ang katawhan ni Akis nagahangad sang bayad, bisan pareho nga si Akis nagahangad sang gahum; gani, ang mga anak ni Akis nagtanyag sa ila sang kwarta nga sa amo nga paagi napasunod nila ang kalabanan sang katawhan sa ila.

12 Kag nagsugod nga may giyera sa tunga sang mga anak ni Akis kag ni Akis nga naglawig sa sulod sang madamo nga tinuig, huo, tubtob sa kalaglagan sang halos tanan nga katawhan sang ginharian, huo, bisan tanan, luwas lang sa treinta ka tawo, kag sila nga nagpalagyo upod sa panimalay ni Omer.

13 Gani, si Omer napanumbalik liwat sa duta nga iya palanublion.

14 Kag natabo ini nga si Omer nagsugod sa pagtigulang; apang, sa iya katigulangon nangin amay sia ni Emer; kag ginhaplas niya si Emer nga mangin hari bulos sa iya.

15 Kag pagkatapos nga nahaplas niya si Emer nga mangin hari nakakita sia sang paghidaet sa kadutaan sa sulod sang duha ka tuig, kag napatay sia nga nakakita sing tuman kadamo nga adlaw nga napuno sang kasubo. Kag natabo ini nga si Emer naggahum bulos sa iya, kag ginsunod niya ang mga tikang sang iya amay.

16 Kag ang Ginuo nagsugod liwat sa pagkuha sang sumpa halin sa kadutaan, kag ang panimalay ni Emer nag-uswag sing tuman sa idalom sang pagginahum ni Emer; kag sa sulod sang sisenta’y dos ka tuig nangin tuman sila kabakod, sa bagay nga nangin tuman sila kamanggaranon—

17 Nga may yara sang tanan nga sari sang prutas, kag sang uyas, kag sang mga sida, kag sang lino nga manipis, kag sang bulawan, kag sang pilak, kag sang malahalon nga mga butang;

18 Kag tanan man nga sari sang kasapatan, sang toro, kag mga baka, kag sang mga carnero, kag sang mga baboy, kag sang mga kanding, kag madamo man nga iban pa nga mga sari sang mga kasapatan nga mapuslanon para sa pagkaon sang tawo.

19 Kag may mga kabayo man sila, kag mga asno, kag may mga elepante kag mga curelom kag mga cumom; ang tanan sang mga ini mapuslanon sa tawo, kag ilabi na gid ang mga elepante kag mga curelom kag mga cumom.

20 Kag gani ginbubo sang Ginuo ang iya mga pagpakamaayo sa sini nga duta, nga labing pinili sa tanan nga iban pa nga mga kadutaan; kag nagsugo sia nga kon sin-o man ang magapanag-iya sang duta magapanag-iya sini para sa Ginuo, indi gani pagalaglagon sila kon naluto na sila sa kalainan; kay sini sa ila, siling sang Ginuo; ibubo ko ang kabug-osan sang akon kaakig.

21 Kag si Emer nagpatuman sang paghukom sa pagkamatarong sa tanan niya nga mga adlaw, kag nangin amay sia sang madamo nga mga anak nga lalaki kag mga anak nga babayi; kag nangin amay sia ni Coriantum, kag ginhaplas niya si Coriantum nga maggahum bulos sa iya.

22 Kag pagkatapos nga nahaplas na niya si Coriantum nga maggahum bulos sa iya nagkabuhi sia sing apat pa ka tuig, kag nakakita sia sang paghidaet sa kadutaan; huo, nakita pa gani niya ang Anak sang Pagkamatarong, kag nagkasadya kag naghimaya sa iya adlaw; kag napatay sia sa paghidaet.

23 Kag natabo ini nga si Coriantum naglakat sa mga tikang sang iya amay, kag nagtukod sang madamo nga dalagko nga mga siyudad, kag naghikot sinang maayo sa iya katawhan sa tanan niya nga mga adlaw. Kag natabo ini nga wala sia sing mga anak bisan tubtob nga tuman na sia katigulang.

24 Kag natabo ini nga ang iya asawa napatay nga isa ka gatos kag duha ka tuig ang pangidaron. Kag natabo ini nga si Coriantum nagpangasawa, sa iya katigulangon, sing isa ka lamharon nga dalaga, kag nangin amay sang mga anak nga lalaki kag mga anak nga babayi; gani nagkabuhi sia tubtob nga nagpangidaron sia sing isa ka gatos kag kwarenta’y dos ka tuig.

25 Kag natabo ini nga nangin amay sia ni Com, kag si Com naggahum bulos sa iya; kag naggahum sia sa kwarenta’y nuebe ka tuig, kag nangin amay sia ni Het; kag nangin amay man sia sang iban pa nga mga anak nga lalaki kag mga anak nga babayi.

26 Kag ang katawhan naglinapta liwat sa bug-os nga ibabaw sang kadutaan, kag nagsugod liwat nga may tuman kadako nga kalainan sa ibabaw sang kadutaan, kag si Het nagsugod liwat sa pagsapopo sang sekreto nga mga plano sang dumaan nga panahon agud laglagon ang iya amay.

27 Kag natabo ini nga ginpapanaog niya sa trono ang iya amay kay ginpatay niya sia sa iya kaugalingon nga espada; kag naggahum sia bulos sa iya.

28 Kag may nag-abot liwat nga mga propeta sa kadutaan, nga nagawali sang paghinulsol sa ila—nga kinahanglan gid nila nga ihanda ang dalanon sang Ginuo ukon may magaabot nga isa ka sumpa sa ibabaw sang kadutaan; huo, bisan mangin may dako nga tiggulutom, nga sa diin malaglag sila kon indi sila maghinulsol.

29 Apang ang katawhan wala nagpati sa mga pulong sang mga propeta, kundi nga ginpanabog nila sila; kag ang pila sa ila ginpanghulog nila sa mga buho kag ginbayaan agud mapatay. Kag natabo ini nga ginhimo nila ining tanan nga butang suno sa sugo sang hari nga si Het.

30 Kag natabo ini nga nagsugod nga may dako nga tiggulutom sa kadutaan, kag ang mga pumuluyo nagsugod nga magkalamatay sing tuman kadasig tungod sang tiggulutom kay wala sing ulan sa ibabaw sang duta.

31 Kag may naggulowa man nga dalitan nga mga man-og sa ibabaw sang kadutaan, kag ginbuntog ang madamo nga katawhan. Kag natabo ini nga ang ila mga panong nagsugod nga magpalagyo sa atubang sang dalitan nga mga man-og padulong sa duta pa-sur nga ginatawag sang mga Nefinhon nga Zarahemla.

32 Kag natabo ini nga may madamo sa ila nga nagkalamatay sa dalanon; apang, may pila nga nagpalagyo padulong sa duta pa-sur.

33 Kag natabo ini nga ginpahanabo sang Ginuo nga indi na sila paglagson pa sang mga man-og, kundi nga balabagan sang mga ini ang alagyan agud ang katawhan indi makaagi, agud kon sin-o man ang magtilaw nga mag-agi mapatay paagi sa dalitan nga mga man-og.

34 Kag natabo ini nga ginsunod sang katawhan ang inagyan sang mga kasapatan, kag ginpangaon ang mga bangkay sang mga ini nga nagkalamatay sa dalanon tubtob nga napangaon nila ini tanan. Karon sang nakita sang katawhan nga pat-od gid nga makalamatay sila nagsugod sila sa paghinulsol sang ila mga kalainan kag nagpakitluoy sa Ginuo.

35 Kag natabo ini nga sang napaubos nila sing nagakaigo ang ila mga kaugalingon sa atubang sang Ginuo nagpadala sia sang ulan sa ibabaw sang duta; kag ang katawhan naulian liwat, kag nagsugod nga may mga prutas sa mga pungsod sa norte, kag sa tanan nga pungsod sa palibot. Kag ginpakita sang Ginuo ang iya gahum sa ila sa pag-amlig sa ila halin sa tiggulutom.