1 Kag nag-abot man sa mga adlaw ni Com ang madamo nga propeta, kag nagpropesiya sang kalaglagan sinang gamhanan nga katawhan luwas lang kon maghinulsol sila, kag magliso sa Ginuo, kag isikway ang ila mga pagpamatay kag kalainan.

2 Kag natabo ini nga ang mga propeta ginsikway sang katawhan, kag nagpalagyo sila padulong kay Com para sa pangamlig kay ang katawhan nagtinguha sa pagpatay sa ila.

3 Kag nagpropesiya sila kay Com sang madamo nga butang; kag ginpakamaayo sia sa tanan nga nabilin niya nga mga adlaw.

4 Kag nangin malawig ang iya kabuhi, kag nangin amay sia ni Siblom; kag si Siblom naggahum bulos sa iya. Kag ang utod ni Siblom nagrebelde batok sa iya, kag nagsugod nga may tuman kadako nga giyera sa bug-os nga kadutaan.

5 Kag natabo ini nga ang utod ni Siblom nagsugo nga ang tanan nga propeta nga nagpropesiya sang kalaglagan sang katawhan pamatyon;

6 Kag may dako nga kalamidad sa bug-os nga kadutaan, kay nagpamatuod sila nga isa ka dako nga sumpa ang magaabot sa kadutaan, kag amo man sa katawhan, kag mangin may dako nga kalaglagan sa ila, nga ang amo sina wala pa gid natabo sa ibabaw sang duta, kag ang ila mga tul-an mangin pareho sang mga tinumpokan sang duta sa ibabaw sang kadutaan luwas lang kon maghinulsol sila sang ila kalainan.

7 Kag wala sila namati sa tingug sang Ginuo, tungod sang ila malain nga mga padihot; gani, nagsugod nga may mga giyera kag mga pagbinaisay sa bug-os nga kadutaan, kag amo man madamo nga tiggulutom kag mga peste, sa bagay nga may dako nga kalaglagan, nga ang amo sina wala pa gid nasayran sa ibabaw sang duta; kag ini tanan natabo sa mga adlaw ni Siblom.

8 Kag ang katawhan nagsugod sa paghinulsol sang ila kalainan; kag tungod ginhimo nila ini ang Ginuo naluoy sa ila.

9 Kag natabo ini nga si Siblom ginpatay, kag si Set gindala sa pagkabihag, kag nagpuyo sa pagkabihag sa tanan niya nga mga adlaw.

10 Kag natabo ini nga naangkon ni Acias, nga iya anak, ang ginharian; kag naggahum sia sa katawhan sa tanan niya nga mga adlaw. Kag naghimo sia sang tanan nga sari sang kalainan sa iya mga adlaw, nga paagi sa sini ginpahanabo niya ang tuman nga pagpaagay sang dugo; kag diutay lang ang iya mga adlaw.

11 Kag naangkon ni Etem, nga isa ka kaliwat ni Acias, ang ginharian; kag ginhimo man niya inang malain sa iya mga adlaw.

12 Kag natabo ini nga sa mga adlaw ni Etem may nag-abot nga madamo nga propeta, kag nagpropesiya liwat sa katawhan; huo, nagpropesiya sila nga lubos sila nga pagalaglagon sang Ginuo halin sa ibabaw sang duta luwas lang kon maghinulsol sila sang ila mga kalainan.

13 Kag natabo ini nga ginpatig-a sang katawhan ang ila mga tagipusuon, kag indi mamati sa ila mga pulong; kag ang mga propeta nagpangalisud kag nagpalayo sa katawhan.

14 Kag natabo ini nga ginpatuman ni Etem ang paghukom sa kalainan sa tanan niya nga mga adlaw; kag nangin amay sia ni Moron. Kag natabo ini nga si Moron naggahum bulos sa iya; kag ginhimo ni Moron inang malain sa atubang sang Ginuo.

15 Kag natabo ini nga may nagtuhaw nga pagrebelde sang katawhan, tungod sinang sekreto nga alyansa nga gintukod agud mag-angkon sing gahum kag manggad; kag may nagtuhaw nga isa ka gamhanan nga lalaki sa ila sa kalainan, kag nakig-away kay Moron, nga sa diin ginlaglag niya ang katunga sang ginharian; kag gindumalahan niya ang katunga sang ginharian sa sulod sang madamo nga tinuig.

16 Kag natabo ini nga ginlaglag sia ni Moron, kag gin-angkon liwat ang ginharian.

17 Kag natabo ini nga may nagtuhaw nga isa pa ka gamhanan nga lalaki; kag isa sia ka kaliwat sang utod ni Jared.

18 Kag natabo ini nga ginlaglag niya si Moron kag gin-angkon ang ginharian; gani, si Moron nagpuyo sa pagkabihag sa tanan nga nabilin niya nga mga adlaw; kag nangin amay sia ni Coriantor.

19 Kag natabo ini nga si Coriantor nagpuyo sa pagkabihag sa tanan niya nga mga adlaw.

20 Kag sa mga adlaw ni Coriantor may nag-abot man nga madamo nga propeta, kag nagpropesiya sang dalagko kag dalayawon nga mga butang, kag nagwali sang paghinulsol sa katawhan, kag luwas lang kon maghinulsol sila ang Ginuong Dios magapatuman sang paghukom batok sa ila sa ila lubos nga kalaglagan;

21 Kag ang Ginuong Dios magapadala sang iban nga katawhan nga magpanag-iya sang kadutaan, paagi sa iya gahum, suno sa paagi nga gindala niya ang ila mga amay.

22 Kag ginsikway nila ang tanan nga pulong sang mga propeta tungod sang ila sekreto nga katilingban kag malain nga mga kangil-aran.

23 Kag natabo ini nga si Coriantor nangin amay ni Eter, kag napatay sia nga nagpuyo sa pagkabihag sa tanan niya nga mga adlaw.