1 Epi kounyeya, reyèlman, se te konsa, tout moun nan peyi a te tande pawòl sa yo, e yo te temwen. Epi apre pawòl sa yo, te gen silans nan peyi a pandan anpil tan;

2 Paske tèlman pèp la te etone anpil, yo te sispann plenyen ak bougonnen poutèt fanmi yo ki te mouri; se poutèt sa, te gen silans nan tout peyi a pandan anpil tan.

3 Epi, se te konsa, te gen yon vwa ki te vin jwenn pèp la ankò; tout pèp la te tande l e yo te temwen; vwa a te di:

4 O, nou menm pèp ^agwo vil sa yo ki te tonbe a, ki se desandan Jakòb la, wi, ki se kay Izrayèl la, konbyen fwa m te rasanble nou menm jan yon manman poul rasanble ti poul li yo anba zèl li, e m ^bte nouri nou.

5 Epi ankò, ^akonbyen fwa pou m ta rasanble nou menm jan yon manman poul rasanble ti poul li yo anba zèl li; wi, O, nou menm pèp kay Izrayèl la ki te tonbe a; wi, O nou menm pèp kay Izrayèl la, nou menm ki rete nan Jerizalèm tankou moun sa yo ki te tonbe a; wi, konbyen fwa m te rasanble w menm jan yon manman poul rasanble ti poul li yo, epi nou pa t vle.

6 O, kay Izrayèl la, nou menm mwen te ^aepaye a, konbyen fwa m ap rasanble nou, menm jan yon manman poul rasanble ti poul li yo anba zèl li, si nou repanti, e si nou ^bretounen vin jwenn mwen avèk tout ^ckè nou.

7 Men, si se pa sa, O, kay Izrayèl la, kote nou rete a ap vin vid jistan ^aalyans zansèt nou yo akonpli.

8 Epi kounyeya, se te konsa, lè pèp la te fin tande pawòl sa yo, yo te kòmanse kriye ak bougonnen ankò poutèt fanmi yo ak zanmi yo ki te pèdi.

9 Epi, se konsa twa jou yo te pase. Epi se te nan maten, e ^atenèb la te disparèt tikras pa tikras sòti sou sifas tè a, tè a te sispann tranble, wòch yo te sispann fann, move loray yo te sispann gwonde, epi tout gwo bri yo te pase.

10 Epi, tè a te ranmase kò l ankò, li te rete fèm; plenyen, ak kriye, ak griyen dan pèp la ki te pwoteje a te sispann; plenyen yo te vin tounen lajwa, e lamantasyon yo te vin tounen louwanj ak remèsiman pou Senyè a, Jezikri, Redanmtè yo a.

11 Epi konsa, ekriti pwofèt yo te pale yo te ^aakonpli.

12 Epi, se te pati ki te ^api jis nan pèp la ki te sove, se te moun ki te resevwa pwofèt yo e ki pa t lapide yo avèk kout wòch yo; e se te moun ki pa t fè san sen yo koule yo ki te epaye—

13 Epi, yo te epaye; yo pa t desann antere anba tè a; yo pa t nwaye anba fon lanmè; dife pa t boule yo, ni tou, anyen pa t tonbe kraze yo pou yo te mouri; toubiyon pa t pote yo ale, ni tou, vapè lafimen ak fènwa pa t kouvri yo.

14 Epi kounyeya, nenpòt moun ki li, se pou l konprann; moun ki gen ekriti yo, se pou l ^afouye yo pou l wè, pou l kontanple si tout lanmò ak destriksyon sa yo anba dife, lafimen, tanpèt, toubiyon, ak tè a ki ^blouvri pou resevwa yo, ak tout bagay sa yo pa t fèt pou akonpli pwofesi anpil nan pwofèt ki te sen yo.

15 Gade, m ap di nou, wi anpil moun te temwaye konsènan bagay sa yo lè Kris la ap vini; yo te ^amouri poutèt yo te temwaye konsènan bagay sa yo.

16 Wi, pwofèt ^aZenòs te temwaye konsènan bagay sa yo, epi tou, Zenòk te pale konsènan bagay sa yo; paske, yo te temwaye espesyalman konsènan nou menm ki se yon rès nan desandan yo.

17 Gade, papa nou, Jakòb te temwaye tou konsènan yon ^arès desandan Jozèf. Epi èske nou pa yon rès desandan Jozèf? Epi, bagay sa yo ki te temwaye konsènan nou menm nan, èske yo pa t ekri sou plakderen papa nou an, Leyi te pote soti nan Jerizalèm nan?

18 Epi, se te konsa, nan finisman trant-katriyèm ane a, m ap montre nou pèp Nefi a ki te epaye ak moun ki te rele Lamanit yo tou, ki te epaye, m ap montre nou kòman yo te gen gwo favè ak gwo benediksyon sou tèt yo, konsa sa, apre Kris la te fin ^amonte nan syèl la, li te fè yo wè l reyèlman—

19 Li te ^amontre yo kò l, li te preche yo; m ap rakonte istwa travay li apre sa. Men, kounyeya, m sispann pale.