Guruy Ni 7
Ulul Jacob i biʼeg e thin rok Isaiah: Isaiah e non ni boed fare Messiah—Fare Messiah e ra yoeg e thin rokʼ e piʼin nib llowaenʼ—Ra piiʼ Keruʼ ni ngan toey ngakʼ e piʼin nib tadumow—Dabiyog ni ngan ning laniyaenʼ—Mu taʼareb nag ko Isaiah 50. Napʼan 559–545 M.K.
1 Arragon, ya baʼaray rogon ni yoeg Somoel: Gul kug furuy med nga orel, ara kug chuwegmed ni gubinfen? Ya baʼaray rogon ni yoeg Somoel: Buʼuw babyoren e machuw ni tay e chitiningmed? Miniiʼ e chaʼ ni kug piiʼmed ngakʼ, ara miniiʼ rokʼ e pi tapiiʼ malfith rog e kug piiʼmed ngakʼ ni chuwaeyʼ? Arragon, miniiʼ e kug piiʼmed ngakʼ ni chuwaeyʼ. Musap gaed, ya pi denen romed e ke piiʼmed ni chuwaeyʼ, nge pi kireb romed e ke chuweg e pi chitiningmed.
2 Ere, napʼan ni gub, ma demoy beeʼ; napʼan nug poeng, arragon, ma dariy beeʼ ni fulweg. O pi gidiiʼ ku Israel, gul ke ngochngoch paʼag ni dabiyog ni nge bayuliymed, ara dariy gelingig ni nggu ayuwegmed? Musap gaed, u dakean e thin ni gura yoeg me malikʼ e rigur, mug gagyeg nag e pi lulʼ roraed nge ngaelʼ ni wuruʼ e binaw nge pi nig roraed e bayi meal ni bachan e ke mʼay e day, ma kar mʼaed ni bachan e balel.
3 Gura upnguy e pi lanelang ko talimor, ma gura falʼeg e tutuw nge mang upong roraed.
4 Fare Somoel ni Got e ke piiʼ ngog e balwoth rokʼ e piʼin nib llowaenʼ, ni nge yog nug nang rogon ni nggu non ngomed bingyalʼ, O pi gidiiʼ ku Israel. Napʼan ni bayi mulaenʼmed ma bayi pugmed ni gubin e kadbul. Me mab telig ni nge rungʼag ni boed e piʼin nib llowaenʼ.
5 Fare Somoel ni Got e ke bing telig, ma dag togopluw, ara gu sap nga bayang.
6 Gu piiʼ keruʼug ngakʼ e chaʼ ni ma dumow, nge linglingig ngakʼ e piʼin ni yaed ma bupʼuy e piy. Da gumithaeg oewcheg ko tamraʼ nge mathuw ko gidiiʼ.
7 Ya fare Somoel ni Got e ra ayuwegeg, ere dabiyog ni ngan ning laninʼug. Ere kug ayliy oewcheg ni boed e pacheʼ, ma gumnang ni dab gu tamraʼ.
8 Ma fare Somoel e ba chugur ngog, ma be micheg ni dariy e kireb rog. Miniiʼ e rayog ni nge togopluw ngog? Mmaroed ngad sakʼiy gaed u taʼabang. Miniiʼ e toʼogor rog? Mu paged nge chugur ngog, nggu liiʼ nga gelingin e thin rog.
9 Ya fare Somoel ni Got e ra ayuwegeg. Ma gubin e piʼin ni ra kireb nigeg, e musap gaed, yaed gubin ni yaedra wod ni boed e mad, ma ra longuyraed e ngael.
10 Miniiʼ u fithikʼmed e bay madguwan Somoel rokʼ, ma be fol ko thin ko tapigpig rokʼ, nibe yaen u milmor ma dariy e magael rokʼ?
11 Musap gaed gimed gubin e piʼin nibe gaelʼ e nifiy, ni kam liyeged gimed ko achaffin, ma gimed be yaen u raʼen e nifiy nge achaffin ni kam gaelʼed. Baʼaray e nʼen ni ra yog ngomed u paʼag—gimed rathig nga butʼ nga fithikʼ e kirbaenʼ.