Guruy Ni 16
Isaiah e guy fare Somoel—Pi denen rokʼ Isaiah e ni nʼaegfan—Min pining ni nge prophesy—I prophesy nag morngaʼagen fare fekyath ni tay fapi Jews ko pi machib rokʼ Kristus—Tin ni magaey ko gidiiʼ ku Judah e yaedra sul—Mu taʼareb nag ko Isaiah 6. Napʼan 559–545 M.K.
1 Lan fare duw ni yimʼ fare pilung i Uzziah, e gguy Somoel nibe paer nga chiyaʼ ko lung, nib tolang ni kan nʼuf ngalang, ma matharngen e mad rokʼ e ke suguy lan e temple.
2 Mab sakʼiy fapi seraphim u puluwon ngalang; nra bagyaed ma nelʼ poen; ni lʼagruw riy e ba upnguy oewchen, ma lʼagruw e ba upnguy rifrifanʼay, ma lʼagruw riy e ma changeg ngay.
3 Me non reb ngakʼ reb, ni gaʼar: Thothup, nib thothup, nib thothup, fare Somoel ko Yoʼor; fayleng ni poloʼ e ke sug ko rir rokʼ.
4 Ma liken e mab e mithmith ni bachan laman e chaʼ ni non, ma fare naʼun e sug ko ath.
5 Ma aram mug gaʼar: Gafgow gag! Ya kar gu mogothgoth; ni bachan e gag beeʼ nib kireb e thin rog; ma gube paer u fithikʼ e gidiiʼ nib kireb e thin roraed ya ke guy oewcheg fare pilung, ni fare Somoel ko Yoʼor.
6 Me changeg reb fapi seraphim nge yib ngog, ni bay ba achaffin u lani paʼ, ni ke fek ko achthal u dakean e altar;
7 Me tay nga lʼugnag, mug gaʼar: muguyed, biney e ke math nga dappʼelʼugnam; ma pi kireb rom e kan chuweg, nge denen rom e kam beʼech riy.
8 Ma kug rungʼag laman Somoel, nibe gaʼar: Miniiʼ e nggu piiʼ nge yaen, ma miniiʼ e nge yaen ni paʼadaed? Ma aram mug gaʼar: Gu baʼaray; mu piiʼeg nggu waen.
9 Me gaʼar: Man nga moeg ko pi gidiiʼ ney—Ma riyulʼ ni bay rrungʼaged e nʼen ni kamoeg, machane dabra nanged fan; ma riyulʼ ni bay ruguyed gur, machane dabra nanged gur.
10 Muguy rogon e gumʼirchaʼ rokʼ e pi gidiiʼ ney nge sugsug, mag tomal nag telraed, mag mileg oewchraed—ya richey mar guyed nga oewchraed, mar rungʼaged nga telraed, mar nangedfan ko gumʼirchaʼ roraed, me michaenʼraed ngar golgaed.
11 Ma aram mug gaʼar: Somoel, uw nʼumngin i napʼan ni nggu rinʼ e biney? Me gaʼar: Nge yaeni madaʼ ko ngiyalʼ ni fapi binaw e kan gatheay ma dakuriy e gidiiʼ riy, nge pi naʼun ni ke paer ni dakuriy beeʼ riy, nge ngiyalʼ ni kar ni pag fare nam;
12 Nge ngiyalʼ ni ke chuweg fare Somoel e gidiiʼ riy nga palog, ya bay yaeni aw nib noemow ni kan chuw u lukungun fare nam.
13 Machane bay taʼab guruy u ragag guruy roraed ni yira koelraed, ma yaedra sul, min longuyraed, ni boed e gakʼiy ni teil, ma boed e gakʼiy ni oak ni ku bay e yafos riy u napʼan ni be mungun yuwan nga butʼ; ere fare awoch nib thothup e ramang fare yafos riy bayay.