1 Ere chiney, pi walageg nib tʼuf rog, kug biʼeg e pinnʼey ni gomanga yog ni ngam nanged morngaʼagen fapi mʼag rokʼ Somoel ni ire falʼeg ba mʼag riy nga thilraed gubin e gidiiʼ ku Israel—

2 Niʼir e ke weliy ngakʼ fapi Jew, u lʼugun e pi profet rokʼ nib thothup, ni aram ko tabolngin iyib nga butʼ, u rebo mfen ngo rebo mfen, nge yaeni madaʼ ko ngiyalʼ ni kan sulwegraed ko bin riyulʼ e galasia nge ulung rokʼ Got; nge napʼan ni yaedra mukun nga tabinaew ko pi nam ni taferaed, min kunuy raed nga langgin gubin e pi nam roraed nni michmicheg.

3 Musap gaed, pi walageg nib tʼuf rog, gube weliy ngomed e pinnʼey ni gomanga mu falfalaenʼ gaed, mi gimed pug oewchmed ngalang ni gubinfen, ni bachan e pi tawaʼath ni bayi piiʼ Somoel ni Got nga dakean pifakmed.

4 Ya gumnang ni kam gow gaed ni gubin e ngiyalʼ, ni boʼor i gimed e baʼadag, ni nge nang e pinʼen ni bay yib; ere gumnang ni gimed manang ni dowef rodaed e thingari moʼowaer me yimʼ; machane, lan e pi dowef rodaed e gadaed ra guy Got riy.

5 Arragon, gumnang ni gimed manang nu lan e dowef e ra mʼug riy ngakʼ e piʼin ni bay u Jerusalem, ko gin dabaed riy; ya rib tʼuf ni thingari yib nga fithikʼraed; ya rib gaʼfan ngakʼ fachaʼ nib Tasunmiy ni nge pag ir nga paʼ e gidiiʼ u lan e dowef, me yimʼ ni fan ngakʼ gubin e gidiiʼ, ni gomanga yog ni gubin e gidiiʼ me mʼing ngakʼ.

6 Ya bachan e yamʼ ni ke yib nga dakean gubin e gidiiʼ, ni nge muguʼuliy fare tanam ko wurengaenʼ rokʼ fachaʼ ni Tasunmiy ni thʼabi gaaʼ, ere thingari tʼuf ni nge yib ba gelingin e foskoyamʼ, ma foskoyamʼ e thingari tʼuf ni nge yib ko gidiiʼ ni bachan fare mul; ma fare mul e yib ni bachan e denen; ere bachan e mul ni tay e gidiiʼ min chuwegraed rokʼ Somoel.

7 Ere, thingari tʼuf ni nge yib ba bayul ni dariy nʼumngin i napʼan—ma faʼanra dariy e re bayul ney ni dariy nʼumngin i napʼan mare dowef ney e dabi thil nge paer nib dowef ni dabki yimʼ. Ere, bin mʼon e pufthin ni yib nga dakean e gidiiʼ e thingari paer ni dariy nʼumngin i napʼan. Ma faʼanra aray rogon, ma re dowef ney e thingari paer u butʼ nge kireb nge bangbang nge sul ko fayleng ni chitiningiy, ma dabki fos bayay.

8 O rib felʼ fare gonop rokʼ Got, ni fare wurengaenʼ nge murnguy rokʼ! Ya musap gaed, faʼanra dowef e dabki fos bayay ma yaʼel rodaed e thingari paer ni ke mʼing ngakʼ fare angel ni mul nge chuw rokʼ Got ni manechubog, ni ke mang fare moʼoniyanʼ, ni dabki sul bayay ko gin ni immoy riy.

9 Ma yaʼel rodaed e thingari paer ni ke boed ir, ma gaed mang boech e moʼoniyanʼ, nge angel ko moʼoniyanʼ, ni ngad pired ni kad chuw gaed rokʼ Got, ma gaed paer rokʼ fachaʼ ni chitamangin e baen, u fithikʼ e amith, ni boed ir; arragon, ni ngad manged ngakʼ fachaʼ ni baen nag fagal nib mʼon e gallabthir rodaed, niʼir e piliyeg ir nge boed yaʼan ba angel ko tamilang, me gagyeg nag e gidiiʼ ngar sunmiyed bogi ulung nib miith ni ulung ko mathang pogofan, nge gubin mite muruwel nu milmor nib miith.

10 O rib felʼ falʼngin e Got rodaed, niʼir e falʼeg ba woʼen e miil rodaed u paʼ e re kan ney nib kireb; arragon, fare kan ko yamʼ nge infierno, niʼir e kugog ni fare yamʼ ko dowef, nge fare yamʼ ko yaʼel.

11 Ma bachan fare woʼen e ayuw rokʼ e Got rodaed, ni Fachaʼ nib Thothup ku Israel, ma arame re yamʼ ney, niʼir e kug weliy morngaʼagen, niʼir e ba ngoch napʼan, e ra pag e pi yamʼ rokʼ; ni yamʼ ni aram fare loew.

12 Ma bin baʼaray e yamʼ ni kug weliy morngaʼagen, niʼir fare yamʼ ko tin thothup banʼen, e ra pag e pi yamʼ rokʼ; ni fare yamʼ ko tin thothup banʼen e infierno; ere, yamʼ nge infierno e yow ra pag e pi yamʼ rorow, ma infierno e thingari pag e pi yaʼel ni kalbus, ma fare dowef nge yaʼel ko gidiiʼ e yow ra sul nga taʼabang; u dakean gelingin fare foskoyamʼ rokʼ Fachaʼ nib Thothup ku Israel.

13 O rib felʼ fare tanam rokʼ e Got rodaed! Ya nga barbaʼ i paʼay, e fare paraedis rokʼ Got e thingari pag fapi yaʼel ko piʼin nib matʼaw, ma fare loew e nge pag fare dowef ko piʼin nib matʼaw; ma fare yaʼel nge fare dowef e ngar sulow nga taʼabang bayay, ma gubin e gidiiʼ ni ke thil, ma dab kur mʼaed, mar pired ni yaed bogi gidiiʼ nib fos, nib tamilang laniyaenʼraed ni woed rogdaed e chiney u lan e biney e dowef, ma kemus ni nʼen nib thil riy e llowaenʼ rodaed e ra machalbog.

14 Ere, ra matabgol e nangaenʼ rodaed ko gubin e kireb rodaed, nge pi galong rodaed, nge pi denen rodaed ni dadur tamraʼ gaed ngay; ma piʼin nib matʼaw e ra matabgol e nangaenʼ roraed ko pi falfalaenʼ roraed, nge pinʼen nib matʼaw roraed, mar upnguyed yaed ko machalbog, arragon, nga madan e tin nib matʼaw.

15 Ma bay yibi buch u napʼan ni gubin e gidiiʼ ni kar thap gaed ko biney ni mʼon e yamʼ ko yafos, ni bachan e ke yog ba dowef ngoraed ni dabki yimʼ, ma thingar rabaed nga tagilʼ e pufthin rokʼ Fachaʼ nib Thothup ku Israel; ma aram me nge yib fare pufthin, ma thingar ni pufthin nagraed u rogon fare pufthin nib thothup rokʼ Got.

16 Ma rib dugil, ni woed nib fos Somoel, ya fare Somoel ni Got e ke yoeg, ma riʼir e thin rokʼ ni manechubog, ni dabiyog ni nge mʼay, ni piʼin nib matʼaw e bay kur pired ni yaed ba matʼaw, ma piʼin nib alit e bay ra pired ni ku yaed ba alit; ere, piʼin nib alit e yaed fare moʼoniyanʼ nge pi angel rokʼ ngab yang; ma yaedra chuw nga ranoed nga fithikʼ e nifiy ni dabimus biʼid, ni kan falʼeg ni fan ngoraed; ma gechig roraed e ba lupath ko nifiy nge dramrom, nibe yaen e dramrom riy ngalang ni gubinfen ma dabital.

17 O rib mangil falʼngin nge yalen e justice rokʼ fare Got rodaed! Ya be rinʼ gubin e thin rokʼ, ni ke yib u lʼugun, ere motochiyel rokʼ e thingari muguʼul.

18 Machane, musap gaed, gimed e piʼin nib matʼaw, nge pi gidiiʼen Fachaʼ nib Thothup ku Israel, nge piʼin nib michaenʼraed ngakʼ Fachaʼ nib Thothup ku Israel, nge piʼin ni kar athamgiliyed e pi kuruth nu fayleng, ma kar feked yathin e tamraʼ riy, e ireram e piʼin ni yaedra tafnaʼ fare gilʼilungun Got, niʼir e ni falʼeg ni fan ngoraed aram ko tabolngin e fayleng, ma falfalaenʼ roraed e rasug ni gubinfen.

19 O rib mangil fare wurengaenʼ ko Got rodaed, ni Fachaʼ nib Thothup ku Israel! Ya ke thapeg gidiiʼen rokʼ fare kan niʼir fare moʼoniyanʼ, nge yamʼ, nge infierno, nge lupath ko nifiy nge dramrom, nib gafgow ni dabimus biʼid.

20 O rib mangil fare thothup rokʼ Got rodaed! Ya manang gubin banʼen, ma dariy banʼen ni denang.

21 Ma ra yib nga fayleng ni nge thapeg gubin e gidiiʼ ni faʼan yaedra motoyil ko thin rokʼ; ya musap gaed, ra gafgow ni amith ni fan ngakʼ gubin e gidiiʼ, arragon, ra amith ni fan ngakʼ gubin e gidiiʼ, ni pumoʼon, nge ppin, nge bitir, ni gidiiʼen e tabinaew rokʼ Adam.

22 Ma ra gafgow ko biney, ni nge yog e foskoyamʼ ngakʼ gubin e gidiiʼ, ni nge gubin e gidiiʼ me yog ni ngar sakʼiy gaed nga pʼoewchen ko fare rran ko pufthin nib gaaʼ.

23 Ma ke chiyliy ngakʼ gubin e gidiiʼ ni thingar ra kalgaed ngaenʼraed, min tawfe nagraed u fithingan, me machalbog e mich roraed ngakʼ Fachaʼ nib Thothup ku Israel, ara dabiyog ni ngar thap gaed nga langgin gilʼilungun Got.

24 Ma faʼanra dabra kalgaed ngaenʼraed me michaenʼraed nga fithingan, min tawfe nagraed u fithingan, mar athamgil gaed nge madaʼ ko tomur, ma yira gechig nagraed ni dabisiy; ya fare Somoel ni Got, ni Fachaʼ nib Thothup ku Israel, e ke yoeg.

25 Ere, ke piiʼ ba motochiyel; ni gin dariy e motochiyel riy e dariy e gechig riy; ma gin dariy e gechig riy e dariy e pufthin riy; ma gin dariy e pufthin riy, e fapi wurengaenʼ rokʼ Fachaʼ nib Thothup ku Israel e ke yib matʼawraed ngay, ni bachan fare bayul; ya kar thap gaed u dakean gelingin.

26 Ya fare bayul e ke muguʼuliy e tin ni be yoeg e justice nga dakean gubin e piʼin ni dariy e motochiyel ni kan piiʼ ngoraed, ma kan chuwegraed u paʼ fare kan, nge yamʼ, nge infierno, nge fare moʼoniyanʼ, nge fare lupath ko nifiy nge dramrom, ni gafgow ni dabimus biʼid; ma kan sulwegraed ko fare Got niʼir e piiʼ e pogofan ngoraed, niʼir Fachaʼ nib Thothup ku Israel.

27 Machane ra gafgow ngakʼ e chaʼ ni bay rokʼ e motochiyel ni kan piiʼ, arragon, ni chaʼ ni bay rokʼ gubin e motochiyel rokʼ Got, ni boed gadaed, ma dar fol riy, me adbey e pi rran rokʼ, ya rib gel e gafgow ko rangi dodow ni ke aw ngay!

28 O rib liyeb e tanam rokʼ fachaʼ nib kireb! O fare sasaliyeb, nge fare mul nga paʼ e lumel, nge fare meechiyang ko gidiiʼ! Napʼan ni yaedra fil banʼen ngar nanged mar lemniged ni kar gonop gaed, ma dab kur motoyil gaed ko fonow rokʼ Got, ya kar yarfiyed nga barbaʼ, ya yaed be lemnag ni yigoʼ yaed manang, ere, gonop roraed e ba meechiyang ma dariy angin ngoraed. Ere yaedra yimʼ.

29 Machane ra ngan fil banʼen mab mangil ni faʼan yaedra motoyil ko pi fonow rokʼ Got.

30 Machane ri gafgow ngakʼ e piʼin nib falaʼab, ni yaed ba falaʼab ko tinu fayleng banʼen. Ya bachan e yaed ba falaʼab ere yaed be fek yathin e piʼin nib gafgow, ma yaed be gafgow nag e piʼin nib sobutʼaenʼ, ma kar tayed e pi gumʼirchaʼraed nga dakean e pi falaʼab roraed; ere, falaʼab roraed e got roraed. Ere musap gaed, falaʼab roraed e kura un ngoraed ko yamʼ.

31 Ma ri gafgow ngakʼ e piʼin nib baling ni dabra motoyil gaed; ya yaedra yimʼ.

32 Gafgow ngakʼ e piʼin nib maʼew ni dab ruguyed banʼen; ya ku yaedra yimʼ.

33 Gafgow ngakʼ e piʼin ni dawor ra og niged gumʼirchaʼraed ngakʼ Got, ya nangaenʼ roraed ko pi denen roraed e ra gafgow nagraed ko bin tomur e rran.

34 Gafgow ngakʼ e piʼin nib tabaen, ya yira tharbograed nga infierno.

35 Gafgow ngakʼ e chaʼ ni ma mathang pogofan ni ma nomeg ni nge thang e fan, ya ra yimʼ.

36 Gafgow ngakʼ e piʼin ni ke paer nga paʼ e gathar, ya yira tharbograed nga infierno.

37 Arragon, gafgow ngakʼ e piʼin ni ma liyoer ko liyos, ya fare moʼoniyanʼ ko gubin e pi moʼoniyanʼ e rib falaenʼ ngoraed.

38 Ere, ngan ngochngoch nag i yoeg, ma gafgow ngakʼ gubin e piʼin ni yaedra yimʼ nga fithikʼ e pi denen roraed; ya yaedra sul ngakʼ Got, mar guyed oewchen, mar pired u fithikʼ e pi denen roraed.

39 O, pi walageg nib tʼuf rog, mu tayed u wunʼmed nib gel e gafgow riy ni ngan denen nib togopluw ngakʼ fare Got nib Thothup, ma kub gel e gafgow riy ni ngan pagey nga paʼ e lumel rokʼ fachaʼ nib liyeb. Mu tayed u wunʼmed, ni faʼanra ngan yinʼuy e tin u fayleng, ma ireram e yamʼ, ma ra ngan yinʼuy e tin u tharmiy, ma yafos ni manechubog.

40 O, pi walageg nib tʼuf rog, mmotoyil gaed ko thin rokʼ. Mu tayed u wunʼmed falʼngin Fachaʼ nib Thothup ku Israel. Dab moeged ni kug weliy bogi banʼen nib gel nib togopluw ngomed; ya faʼan gimed rarinʼ, ma gimed ra togopluw ko tin riyulʼ; ya kug weliy e thin rokʼ e Tasunmiy romed. Gumanang ni thin ko tin riyulʼ e ba togopluw ko tin nib galong banʼen; machane piʼin nib matʼaw e darur rus gaed ngay, ya yaed baʼadag e tin riyulʼ ma dar magawon nagraed.

41 O ere, pi walageg nib tʼuf rog, mired ngakʼ Somoel, ni Fachaʼ nib Thothup. Mu tayed u wunʼmed ni pi kanawo rokʼ e ba matʼaw. Musap gaed, kanawo rokʼ beeʼ e ba achig radan, machane rib kikʼiy u pʼoewchen, ma fare tamatanag ko fare garog e Fachaʼ nib Thothup ku Israel; ma dabi pag e tapigpig nge muruwel ko ginem; ma dakuriy rebo kanawo ngab yang ni yira yaen riy ma kemus ni fare garog; ma dabiyog ni ngan baen nag, ya fare Somoel ni Got e fithingan.

42 Ma chaʼ nra tugtuguy e mab, e yira bing ngakʼ; ma piʼin nib gonop, nge piʼin nib llowaenʼ, nge piʼin nib falaʼab, ni kar ʼuf gaed ni bachan e llowaenʼ roraed, nge gonop roraed, nge pi falaʼab roraed—arragon, ireram e piʼin nra dariy fan nagraed; ma faʼanra dabra chuweged e pinnʼey, ngar lemniged ni yaed bogi meechiyang u mit Got, mar tayed yaed nga butʼ nga fithikʼ e sobutʼaenʼ, ma dabi bing e mab ngoraed.

43 Ya pinʼen ni thawon e gonop nge tamilngaenʼ e yira mithaeg roraed ni gubinfen—arragon, fare falfalaenʼ ni kan falʼeg rogon ni fan ngakʼ e pi gidiiʼen Got.

44 O, pi walageg nib tʼuf rog, mu tayed u wunʼmed e thin rog. Musap gaed, nggu chuweg e mad u dakeanag, nggu rurug u pʼoewchmed; ma gube meybil ni manga yog ni fare Got rog ko woʼen e thap e guyeg u tane gachin nga oewchen; ere, gimed ranang ko bin tomur e rran, u napʼan ni ngan pufthin nag gubin e gidiiʼ ko pi muruwel roraed, ni fare Got ku Israel e guy nug rurug e pi denen romed nge chuw rog, mug sakʼiy nibe gael ramaʼeg u pʼoewchen, ma ke chuw rachaʼmed rog.

45 O, pi walageg nib tʼuf rog, mu chefeged gimed nga orel ko pi denen romed; mu ruruged nge mul fare chen rokʼ faʼanem ni ra mʼagmed ni rib macheʼcheʼ; mired ngakʼ fare Got ni fare war ko woʼen e thap romed.

46 Mu falʼeged rogmed ko fare rran nib maʼangʼang u napʼan ni yira gagyeg nag e justice nga dakean e piʼin nib matʼaw, ni fare rran ko pufthin, ni nge siy mu lulʼ gaed nga butʼ ko tamdag; me siy iyib uran ngomed me matabgol u wunʼmed thibngimed, me dugil ni ngam gaʼar gaed: Ba thothup, ba thothup, e pi pufthin rom, O Somoel ni Got ni Gubin ma rayog rokʼ—ya gumnang thibngig; kug thʼaeb e motochiyel rom, ma pi denen rog e kireb rog; ma fare moʼoniyanʼ e ke fekeg, ni kug mang wengan e gafgow rokʼ ni ubchiyaʼ.

47 Machane musap gaed, pi walageg, gul rib tʼuf ni nggu pug uran ngomed ni riyulʼ nib gel e gafgow ko pinnʼey? Gulley, ra magaf anʼug ko yaʼel romed ni faʼan manga ba machalbog laniyaenʼmed? Gulley, gura non nib sorfan ngomed u rogon fini tamilang e tin nib riyulʼ ni faʼan manga kam pithiged gimed ko denen?

48 Musap gaed, faʼan manga gimed ba thothup ma gura weliy ngomed e tin nib thothup banʼen; ere arragon ni dam thothup gaed, ma gimed be sap ngog ni gub sensey, ere rib tʼuf ni thingar gufil ngomed ngam nanged wengan e denen.

49 Musap gaed, yaʼel rog e dabun e denen, ma gumʼirchaʼ rog e ba mʼagaenʼ ko tin nib matʼaw banʼen; ma gura liyoer nag fithingan fare Got rog nib thothup.

50 Mired, pi walageg, ni gubin e piʼin ni ke balel, mired ko raen; nge piʼin ni dariy e salpiy romed, mired ngam chuwaeyʼ gaed mi gimed abich; arragon, mired ngam chuwiʼiyed e waeyin nge milik ni dariy e salpiy riy ma dariy puluwon.

51 Ere, dab mu piiʼed e salpiy ko pinʼen ni dariy fan, ara muruwel romed ko pinʼen ni dab mu sow gaed riy. Mmotoyil gaed ngog u fithikʼ e lʼagaenʼ, mi gimed tay u wunʼmed fapi thin ni kug weliy; mi gimed yib ngakʼ Fachaʼ nib Thothup ku Israel, ngam mur niged e pinʼen ni dabi mʼay, ara kireb, ma nge mʼagaenʼmed ko tawaʼath nu tharmiy.

52 Musap gaed, pi walageg nib tʼuf rog, mu tayed u wunʼmed e thin rokʼ e Got romed; mu meybil gaed ngakʼ ni gubin e ngiyalʼ ni rran, mi gimed oge magaer nga fithingan nib thothup ni ke nepʼ. Mu paged e gumʼirchaʼ romed nge falfalaenʼ.

53 Ere musap gaed, rib mangil e pi mʼag rokʼ Somoel, ma rib gel e adag rokʼ ngakʼ e gidiiʼ; ma bachan falʼngin, nge murnguy rokʼ, nge wurengaenʼ rokʼ, me michmicheg ngodaed ni pifakdaed e dab ni gatheayraed ni poloʼ, u rogon e dowef, ya ra ayuwegraed; ma lan e pi mfen ni bay nga mʼon e yaedra mang ba paʼangin nib matʼaw ngakʼ fapi gidiiʼ ku Israel.

54 Ere chiney, pi walageg, gubaʼadag ni nggu weliy boech; machane bay fini gabul mugog ngomed e tin ni kubay ko thin rog. Amen.